1 ကရံၣ်သူး 10
10
တၢ်ဟ့ၣ်ပလီၢ်ပဒီထီဒါတၢ်ဂီၤတၢ်ဖီၣ်တဖၣ်
1ယဒီပုၢ်ဝဲၢ်သ့ၣ်ဧၢ, ယအဲၣ်ဒိးလၢသုကသ့ၣ်နီၣ်ထီၣ်က့ၤတၢ်ဘၣ်ဃးဒီး တၢ်မၤအသးဒီးပမိၢ်ပၢ်ဖံဖုလၢပျၢၤတဖၣ်အပိာ်စီၤမိၤၡ့အခံဒ်လဲၣ်အဂ့ၢ် န့ၣ်လီၤ. အဝဲသ့ၣ်ကိးဂၤဒဲးအိၣ်လၢတၢ်အၢၣ်အတၢ်ကဟုကယာ် အဖီလာ်ဒီးအဝဲသ့ၣ်ကိးဂၤဒဲးလဲၤခီဂာ်ဝဲဒၣ်ပီၣ်လဲၣ်ဂီၤပူၤပူၤ ဖျဲးဖျဲးဂ့ၤဂ့ၤဘၣ်ဘၣ်န့ၣ်လီၤ. 2လၢတၢ်အၢၣ်အပူၤ, ဒီးလၢပီၣ်လဲၣ်အပူၤန့ၣ် အဝဲသ့ၣ်ကိးဂၤဒဲးဘၣ်တၢ်ဒိးဘျၢအီၤ ဒ်ပှၤပိာ်စီၤမိၤၡ့အခံတဖၣ်အသိးလီၤ. 3အဝဲသ့ၣ်ကိးဂၤဒဲးအီၣ်ကိၣ်တဖျၢၣ်ဃီလၢအဘၣ်ဃးဒီးသး 4ဒီးအီတၢ်ထံတခါဃီလၢအဘၣ်ဃးဒီးသးန့ၣ်လီၤ. အဝဲသ့ၣ်အီတၢ်လၢသးအလၢၢ်လၢအလဲၤဒီးအီၤတဖျၢၣ်န့ၣ် အပူၤ, ဒီးလၢၢ်န့ၣ် မ့ၢ်ခရံာ်အနီၢ်ကစၢ်ဒၣ်ဝဲလီၤ. 5ဘၣ်ဆၣ်ဒီးအန့ၣ်ဒၣ်လဲာ်, ကစၢ်ယွၤတဘၣ်သူၣ်ဘၣ်သးအဝဲသ့ၣ်အါဒၣ်တၢ်တက့ၢ်, ဒီးလၢတၢ်န့ၣ်အဃိ, အဝဲသ့ၣ်အစိၣ်တဖၣ်အိၣ်ပြံပြါလၢပှၢ်မုၢ် ကနၢအပူၤလီၤ.
6ခဲကနံၣ်အံၤတၢ်သ့ၣ်တဖၣ်အံၤခဲလၢာ်မ့ၢ်ဝဲတၢ်အဒိအတဲာ် လၢပဂီၢ်, ဒ်သိးအကဟ့ၣ်ပလီၢ်ပှၤလၢပသုတသးကွံတၢ် အၢတၢ်သီတဖၣ်ဒ်အဝဲသ့ၣ်သးကွံတ့ၢ်ဝဲတဂ့ၤ. 7ဒီးလၢပသုတဘါထီၣ်စ့ၢ်ကီးတၢ်ဂီၤတၢ်ဖီၣ်, ဒ်အဝဲသ့ၣ်တနီၤမၤဝဲအသိးတဂ့ၤအဂီၢ်န့ၣ်လီၤ. ဒ်တၢ်ကွဲးအသးစံးဝဲအသိးန့ၣ်, “ပှၤဂီၢ်မုၢ်တဖၣ်ဆ့ၣ်နီၤအီၣ် သကိးအီသကိးတၢ်, ဒီးမူးအံၤကဲထီၣ်မူးဧိၤပွဲဧိၤလၢအအိၣ် ဃုာ်တၢ်အီမူၤအီဘှီးသးလၢသံး, တၢ်ဂဲၤကလံၣ်ဒီးတၢ်မၤကမၣ်မုၣ်ကမၣ်ခွါန့ၣ်လီၤ.” 8ပတဘၣ်မၤတၢ်အၢတၢ်သီဘၣ်ဃးတၢ်မၤကမၣ်မုၣ်ကမၣ် ခွါဒ်အဝဲသ့ၣ်တနီၤမၤဝဲအသိးန့ၣ်ဘၣ်. ဒီးလၢတနံၤဃီအတီၢ် ပူၤန့ၣ်, အဝဲသ့ၣ်အဂၤခံကလးသၢကထိလီၤဃံၤသံဝဲဒၣ်လီၤ. 9ပတဘၣ်လ့ပစီကစၢ် ဒ်အဝဲသ့ၣ်တနီၤမၤဝဲအသိးန့ၣ် ဘၣ်. ဒီးအဝဲသ့ၣ်ဘၣ်တၢ်မၤသံအီၤလၢဂုၢ်သ့ၣ်လီၤ. 10ပတဘၣ်ကအုကစွါဒ်အဝဲသ့ၣ်တနီၤမၤဝဲအသိးဘၣ်. ဒီးအဝဲသ့ၣ်ဘၣ်တၢ်မၤဒၢၣ်ကွံာ်အီၤလၢတၢ်သံ အကလူးန့ၣ်လီၤ.
11တၢ်သ့ၣ်တဖၣ်အံၤခဲလၢာ်မၤအသးဒီးအဝဲသ့ၣ်ဒ်သိးအကကဲ ထီၣ်တၢ်အဒိအတဲာ်လၢပှၤဂၤတဖၣ်အဂီၢ်ဒီးဘၣ်တၢ်ကွဲးနီၣ် ကွဲးဃါအီၤဒ်သိးအကကဲထီၣ်တၢ်ဟ့ၣ်ပလီၢ်လၢပဂီၢ်လီၤ. အဂ့ၢ်ဒ်အံၤ, ပအိၣ်မူပဝဲဖဲဆၢကတီၢ်လၢတၢ်အကတၢၢ်ဘူး ကတုၤအိၣ်ပှၤလံန့ၣ်လီၤ.
12ပှၤတဂၤလၢ်လၢ်လၢအဆိကမိၣ်အဆၢထၢၣ်ဝဲကျၢၤကျၢၤန့ၣ်, ကြၢးပလီၢ်ပဒီအသးဒ်သိးအသုတလီၤဃံၤတဂ့ၤအဂီၢ်န့ၣ်လီၤ. 13ကယဲၢ်တၢ်မၤကွၢ်လၢသုလဲၤခီဖျိဘၣ်တ့ၢ်လံဝဲတဖၣ်န့ၣ် မ့ၢ်ဒၣ်တၢ်တကလုာ်ဃီလၢအတုၤအိၣ်ညီနုၢ်ပှၤဟီၣ်ခိၣ်ဖိ တဖၣ်န့ၣ်လီၤ. ဘၣ်ဆၣ်ဒီးကစၢ်ယွၤတီလၢအတၢ်အၢၣ်လီၤ, ဒီးအဝဲတပျဲသုဘၣ်တၢ်လ့ပစီသုအါန့ၢ်သုအိၣ်ဒီးတၢ်ဂံၢ် တၢ်ဘါလၢသုကဆၢထၢၣ်ကျၢၤကျၢၤအဂီၢ်ဘၣ်လီၤ. ဖဲအဆၢကတီၢ်လၢသုဘၣ်တၢ်လ့ပစီသုန့ၣ်အဝဲ ကဟ့ၣ်သုတၢ်ဂံၢ်တၢ်ဘါလၢသုကကွၢ်ဆၢၣ်မဲာ်အီၤဒီးဆၢထၢၣ် ကျၢၤကျၢၤအဂီၢ်ဒီးဒုးထူၣ်ဖျဲးထီၣ်ကွံာ်သုလၢကျဲဒ်န့ၣ်အပူၤလီၤ.
14လၢတၢ်န့ၣ်အဃိယတံၤသကိးသးဘိသ့ၣ်ဧၢ, ဟးဆှဲးတၢ်ဘါထီၣ်တၢ်ဂီၤတၢ်ဖီၣ်တဖၣ်န့ၣ်တက့ၢ်. 15ယကတိၤတၢ်ဒီးသုဒ်သုမ့ၢ်ပှၤလၢအသူၣ်ဆးသးဆးတဖၣ် လီၤ. တၢ်လၢယစံးယဲန့ၣ်ကွၢ်ဆိကမိၣ်လၢအဂ့ၢ်ဒီးစံၣ်ညီၣ် ကွၢ်သုဝဲတက့ၢ်. 16လီခီလၢပသူအီၤလၢတၢ်အီၣ်ကိၣ်အီစပံးထံအဂီၢ်ဒီးလၢ ပစံးဘျုးကစၢ်ယွၤလၢအဃိန့ၣ်, ဖဲပအီတၢ်လၢအပူၤ, မ့ၢ်ပနီၤဟံးန့ၢ်သကိးခရံာ်အသွံၣ်န့ၣ်လီၤ. ဒီးကိၣ်လၢပစိၢ်ဘျဲးအီၤတဖျၢၣ်ဖဲပဟံးန့ၢ်အီၣ်အီၤန့ၣ်, မ့ၢ်ပနီၤဟံးန့ၢ်သကိးခရံာ်အနီၢ်ခိန့ၣ်လီၤ. 17မ့ၢ်လၢကိၣ်အိၣ်ထဲတလိၣ်အဃိ, ပဝဲကိးဒံကိးဂၤဒဲး, ပမ့မ့ၢ်အါဂၤသနာ်က့, ပမ့ၢ်ဒၣ်နီၢ်ခိတဂၤဃီလီၤ. အဂ့ၢ်ဒ်အံၤ, ပနီၤဟံးန့ၢ်သကိးကိၣ်တလိၣ်ဃီလီၤ.
18ကွၢ်ဆိကမိၣ်ဘၣ်ဃးဒီးပှၤအံၣ်စရ့လးဖိတဖၣ်န့ၣ် တက့ၢ်. ပှၤတဖၣ်လၢအအီၣ်တၢ်လၢအဘၣ်တၢ်လုၢ်ထီၣ်အီၤလၢ တၢ်လုၢ်လီၢ်န့ၣ်, ဘၣ်ထွဲဒီးကစၢ်ယွၤအတၢ်လုၢ်လီၢ်အတၢ်မၤစ့ၢ်ကီးန့ၣ်လီၤ. 19လၢတၢ်အံၤအဃိမ့ၢ်ယစံးလၢတၢ်ဂီၤတၢ်ဖှီၣ်တဒုမ့တမ့ၢ်တၢ်အီၣ်လၢ အဘၣ်တၢ်လုၢ်ထီၣ်ဆူအီၤန့ၣ်, မ့ၢ်တၢ်တမံၤမံၤန့ၣ်ဧါ. 20တမ့ၢ်ဘၣ်. တၢ်လၢယအဲၣ်ဒိးစံးန့ၣ်, မ့ၢ်ဝဲ, တၢ်လၢအဘၣ်တၢ်လုၢ်ထီၣ်အီၤလၢပှၤသူခိၣ်ဖိအတၢ်လုၢ် လီၢ်န့ၣ်, ဘၣ်တၢ်လုၢ်ထီၣ်အီၤဆူတၢ်ဝံတၢ်နါတဖၣ်အအိၣ်ဒီး တမ့ၢ်ဆူကစၢ်ယွၤအအိၣ်ဘၣ်လီၤ. ဒီးယတအဲၣ်ဒိးလၢသုကကဲပှၤဒီတံၤဒီသကိးဒီးတၢ်ဝံတၢ်နါ တဖၣ်ဘၣ်. 21သုကအီတၢ်လၢကစၢ်အလီခီပူၤဝံၤသုကအီတၢ်လၢတၢ်နါ အလီခီပူၤတသ့ဘၣ်. သုကအီၣ်သကိးတၢ်ဒီးကစၢ်ဝံၤသုကအီၣ်သကိးတၢ်ဒီးတၢ်နါ တသ့ဘၣ်. 22မ့တမ့ၢ်ဘၣ်ဒီး, မ့ၢ်ပအဲၣ်ဒိးမၤသးက့ၣ်ကစၢ်ဧါ. မ့ၢ်ပဆိကမိၣ်လၢပဂံၢ်ပဘါဆူၣ်န့ၢ်ဒံးအီၤတက့ၢ်ဧါ.
23“တၢ်ဟ့ၣ်ပှၤအခွဲးလၢပကမၤတၢ်တမံၤလၢ်လၢ်လီၤ,” အဝဲသ့ၣ်စံးဝဲဒ်န့ၣ်, ဒီးမ့ၢ်ဝဲတီဝဲလီၤ. ဘၣ်ဆၣ်ဒီးတၢ်ခဲလၢာ်ခဲဆ့တမ့ၢ်တၢ်လၢအဂ့ၤဘၣ်. “တၢ်ဟ့ၣ်ပှၤအခွဲးလၢပကမၤတၢ်တမံၤလၢ်လၢ်လီၤ.” ဘၣ်ဆၣ်ဒီးတၢ်ကိးမံၤဒဲးတအိၣ်ဒီးအဘျုးအဖှိၣ်ဘၣ်. 24ပှၤတကြၢးကွၢ်တၢ်လၢအတၢ်ဘျုးတၢ်ဖှိၣ်ဒၣ်ဝဲအဂီၢ်နီ တဂၤဘၣ်. မ့မ့ၢ်ကဘၣ်ကွၢ်တၢ်လၢပှၤဂၤအတၢ်ဘျုးတၢ်ဖှိၣ် အဂီၢ်လီၤ.
25သုအိၣ်ဒီးတၢ်သဘျ့လၢသုကအီၣ်တၢ်တမံၤလၢ်လၢ်လၢ အဘၣ်တၢ်ဆါအီၤလၢတၢ်ဖံးတၢ်ညၣ်အဖၠါပူၤ, တအိၣ်ဒီးတၢ်သံကွၢ်သံဒိးလၢအအိၣ်ထီၣ်လၢသုသးလၢ အသ့ၣ်ညါဒၣ်တၢ်အဃိန့ၣ်ဘၣ်လီၤ. 26အဂ့ၢ်ဒ်အံၤ, ဒ်တၢ်ကွဲးအသးစံးဝဲအသိးန့ၣ်, “ဟီၣ်ခိၣ်ဒီးတၢ်ခဲလၢာ်ခဲဆ့လၢအအိၣ်လၢအပူၤန့ၣ်, ဘၣ်ထွဲလၢကစၢ်လီၤ.”
27ပှၤလၢအတစူၢ်က့ၤနာ်က့ၤတၢ်တဂၤမ့ၢ်ကွဲအီၣ်ကွဲအီသု ဒီးသုပာ်လီၤသုသးလၢသုကလဲၤန့ၣ်, အီၣ်တၢ်လၢပှၤပာ်လီၤလၢသုမဲာ်ညါတအိၣ်ဒီးတၢ်သံကွၢ်သံဒိး လၢအအိၣ်ထီၣ်လၢသုသးလၢအသ့ၣ်ညါဒၣ်တၢ်အဃိဘၣ်န့ၣ် တက့ၢ်. 28ဘၣ်ဆၣ်ဒီး, ပှၤတဂၤဂၤမ့ၢ်စံးဘၣ်နၤ, “တၢ်အီၣ်အဝဲအံၤဘၣ်တၢ်လုၢ်ထီၣ်တ့ၢ်အီၤဆူတၢ်ဂီၤ တၢ်ဖီၣ်အအိၣ်” န့ၣ်တဘၣ်အီၣ်တၢ်အီၣ်အဝဲန့ၣ်တဂ့ၤ. မ့ၢ်တၢ်ကွၢ်တၢ်လၢပှၤလၢအစံးဘၣ်တဲဘၣ်နၤတၢ်ဂ့ၢ်တဂၤန့ၣ် အဂီၢ်, ဒီးမ့ၢ်လၢသးလၢအသ့ၣ်ညါဒၣ်တၢ်အဃိ, 29ဒ်ပစံးတၢ်အသိး, တမ့ၢ်နသးလၢအသ့ၣ်ညါဒၣ်တၢ်ဒၣ်နဲအဃိ ဘၣ်, မ့မ့ၢ်ပှၤအဂၤတဂၤအသးလၢအသ့ၣ်ညါဒၣ်တၢ်အဃိလီၤ.
“မ့မ့ၢ်ဒ်န့ၣ်ဒီး” ပှၤတဂၤသံကွၢ်ဝဲ, “ဘၣ်မနုၤအဃိယတၢ်သဘျ့လၢယကမၤတၢ်တမံၤမံၤန့ၣ် ဘၣ်တၢ်မၤတံာ်တာ်အီၤလၢပှၤအဂၤတဂၤအသးလၢအသ့ၣ်ညါ ဒၣ်တၢ်န့ၣ်လဲၣ်. 30ယမ့ၢ်စံးဘျုးကစၢ်ယွၤလၢယတၢ်အီၣ်အဃိဒီး, ဘၣ်မနုၤအဃိပှၤတဂၤဂၤကဘၣ်ပာ်တၢ်ကမၣ်လၢယလိၤ ဘၣ်ဃးဒီးတၢ်အီၣ်လၢယဟ့ၣ်တၢ်စံးဘျုးစံးဖှိၣ်လၢ အဃိန့ၣ်လဲၣ်.”
31လၢတၢ်န့ၣ်အဃိ, တၢ်တမံၤလၢ်လၢ်လၢနမၤအီၤန့ၣ်, နအီၣ်တၢ်မ့ၢ်ဂ့ၤ, အီတၢ်မ့ၢ်ဂ့ၤ, မၤအီၤလၢယွၤအလၤကပီၤအဂီၢ်တက့ၢ်. 32အိၣ်မူဒ်သိး, သုသုတကဲထီၣ်တၢ်တံာ်တာ်လၢပှၤယူဒၤဖိအဂီၢ် မ့ၢ်ဂ့ၤ, ပှၤကလုာ်ဂၤအဂီၢ်မ့ၢ်ဂ့ၤ, မ့တမ့ၢ်, ယွၤအတၢ်အိၣ်ဖှိၣ်အဂီၢ်မ့ၢ်ဂ့ၤ, တဂ့ၤန့ၣ်တက့ၢ်. 33မ့မ့ၢ်, မၤဒၣ်သုဝဲဒ်ယမၤအသိးတက့ၢ်. လၢတၢ်ဖံးတၢ်မၤတမံၤလၢ်လၢ်လၢယမၤအီၤအပူၤန့ၣ်, ယဂုာ်ကျဲးစၢးမၤဘၣ်ပှၤကိးဂၤဒဲးအသးဒီးယတဃုဒၣ်ယဘျုးဒၣ် ယဲဘၣ်. မ့မ့ၢ်လၢပှၤခဲလၢာ်အဘျုးအဂီၢ်ဒ်သိးအဝဲသ့ၣ်ကတုၤ လၢတၢ်အုၣ်က့ၤခီၣ်က့ၤအဂီၢ်န့ၣ်လီၤ.
Currently Selected:
1 ကရံၣ်သူး 10: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
