Genesis 27

Tinalingo na yan Jacob ye Isaac

1Hiyay Isaac ket matoayna boy makolapo yaynay pamilew na. Ha maghay mangaamot, impadakit na yay makaagat a anak na a hiyay Esau.

Hinabi na, “Anak ko.”

Nakibat yay Esau, “Anti ko ihti, tatang.”

2Hinabi na kana, “Anak ko, matoa koynan tubat boy madanon akoynan matey. 3Kaya-bay kowen moy yawo mo, ket iakalan moko. 4Ket pamakawoto moko nin kalalabay kon kena boy ilakew mo kangko. Pangayadi kon mangan, inged kata bayo kon matey.”

5Ampanlenge ya met manayti ye Rebeka legan angkatongtongen na yan Isaac ye Esau a anak na. Kaya-bay ha nakew yaynan mangakal ye Esau, 6hinabi nan Rebeka kanan Jacob a anak na, “Nange ko a hinabi nan bapa mo kanan katongno mo a Esau, 7‘Makew kan mangakal ket pamakawoto mo kon kalalabay kon kena ta-omen katayna mainged ha adapan nan Apo Dioh, bayo ko matey.’ 8Anak ko, leng-en moko boy diyagen mo yatin habiyen ko kamo. 9Makew ka ha kawan ket mangwa kan luway pinakamanged a oybon a kambing, ta pamakawoto ko yan malahap a omen ha kalalabay nan bapa mo. 10Pangayadi, ilakew moy kena kanan bapa mo ta-omen naka inged bayo ya matey!”

11Hinabi nan Jacob kanan indo na, “Noba malabok yay Esau, ket hiko ahe. 12Way-omen no kimpaan nako? Ket matandaan nan tatang a antalingowen koya, kainghon inged nako, ket ihumpa na koyna ingat.”

13Hinabi nan Rebeka kanan Jacob, “Paolayan mon hikoy maihumpa no ihumpa naka! Anak ko, diyagen moyna ingat ye hinabi ko kamo. Makew kaynan mangwa nin oybon kakambing boy ilakew mo hila kangko.”

14Kaya-bay nakew yan nangwa nin luwan oybon kambing ye Jacob, ket inlakew na kanan indo na. Impakawoto nan Rebeka a omen ha kalalabay nan Isaac. 15Pangayadi, kingwa nan Rebeka ye pinakamatampa a bado nan makaagat a anak na a anti ha baey la. Ket impabado na kanan makaydeng a anak na. 16Pinonggoh nan Rebeka nin katat nin kakambing ye takyay dayon leey nan Jacob. 17Ket in-ibyay na kanan Jacob ye malahap a pamangan boy tinapay a impakawoto na.

18Hinumaley yay Jacob kanan Isaac haka na hinabi, “Tatang.”

“Awo. Aya ka anak ko?” wanan Isaac.

19Hinabi nan Jacob kanan bapa na, “Hiko yay Esau a makaagat mon anak. Nadyag koynay hinabi mo kangko. Ti yaynay kalalabay mon kena. Mikno kayna, ta tawayan moynay naakalan ko ta-omen mo koynan mainged.”

20“Kadudumali mo man nakakwa, anak ko?” wanan Isaac.

“Hinaglapan na kon Apo Dioh mon Namalyadi,” wanan Jacob.

21Hinabi nan Isaac kanan Jacob, “Anak ko, humaley ka awod kangko, ta kimpaan kata ta-omen ko matandaan no hikan peteg ye anak ko a Esau.”

22Hinumaley ya met ye Jacob, ket kinimpaan na yan bapa na. Ket hinabi na, “Hiyay bihnga ket bihnga nan Jacob. Noba hiyay takyay ket takyay nan Esau.” 23Ahe naya nabalayan Isaac ye Jacob, ulita hiyay takyay na ket malabok ya a omen kanan Esau. Ket ha inged na yayna dayi nin Isaac ye Jacob, 24tinepet na yayna man, “Peteg lagin hikayna ye Esau a anak ko?”

“Hikobayna, tatang,” wanan Jacob.

25Hinabi nan Isaac, “Anak ko, ihaley moyna kangkoy pinakawoto mo ta-omen pangayadi kon mangna, inged katayna.” Kaya-bay inggawang nan Jacob ye kena, ket pangayadi nan nangna, binyan naya po nin alak, ket ininom na. 26Hinabi nan Isaac kanan Jacob, “Anak ko, kuka di, ta umaan moko.”

27Hinumaley yay Jacob, ket inumaan na yay bapa na. Ha nadaep nan Isaac ye bawo nin bado nan Esau, in-inged na yaynay Jacob, a wana,

“Hiyay bawo nan anak ko,

ket omen ya ha bawo bangkag a in-inged nan Apo Dioh.

28Biyan naka dayin Apo Dioh nin ambon

ket mag-ilyadin mabona ye bangkag mo

boy luhboy pupol boy bayon alak.

29Hilay nanahyon ket maghilbi boy pahakop hila dayi kamo.

Mamoon ka kanlan kakatongno mo boy manalimokod hila bilang pagpahakop la kamo.

Hilay mangihumpa kamo ket maihumpa hila met dayi.

Ket hilay manginged kamo, minged hila met dayi.”

30Ha nayadi na yan in-inged Isaac ye Jacob boy ha inumalih yaynay Jacob, nilumateng yayna met ye Esau a ibat nangakal. 31Ket namakawoto ya met nin malahap boy inlakew na kanan bapa na. Hinabi na, “Tatang, mikno kayna, ta kena moynay naakalan ko ta-omen mo koynan inged.”

32“Aya ka?” wanan Isaac.

“Hiko yay Esau a makaagat mon anak,” wanan Esau. 33Pamakange nan Isaac, namigpig yan tubat, a wana, “Aya awod ye naunan nangakal a namyay kangkon kena? Kapipiyadi kon bengat nangna nin wanabay ha nilumateng ka. In-inged ko yayna, ket homain hapo a minged yayna.”

34Pamakange nan Esau ha hinabi nan bapa na, nangandang yan makhaw boy malaem boy impakiiingalo na, a wana, “Tatang, inged moko met dayi!”

35Noba hinabi nan Isaac kanan Esau, “Tinalingo na kon katongno mo. Kaya-bay nakwa na yay panginged a nakataladan dayi kamo.”

36Hinabi nan Esau, “Nikalwa na koynan tinalingo. Kaya-bay manaytin Jacob#27:36 Jacob Hiyay labay habiyen ket mapanalingo. ye ngalan na. Kingwa nayna ye katulidan ko bilang makaagat, ket haanin kingwa na po ye panginged a nakataladan kangko! Homain kayna nayi kanayon a panginged kangko?”

37Hinabi nan Isaac kanan Esau, “Hinabi koyna kana a hiyaynay mamoon kamo haanin. Boy dinyag ko hilayna met a ipoh na ye kaganaan papaltido na. Boy hinabi koyna met a inged na yan Apo Dioh makauli ha malabong a pupol boy bayon alak. Kaya-bay anak ko, hinya po nayi ye malyadi kon diyagen kamo?”

38Noba hinabi nan Esau kanan bapa na, “Tatang, mamagha laweh ye panginged mo? Inged moko met, Tatang.” Ket lalo na po impakakhaw ye panumangih na.

39Hinabi nan Isaac kana,

“Kumonin ka ha lugal a mataang ha mabona a luta boy homain ambon.

40Lanang kan makilaban kanlan kanayon a tatao, boy maghilbi ka kanan katongno mo.

Noba no lumaban ka kanla, ket mapalihway ka ha kapalyadiyan la.”

41Ket kinahulog na yan Esau ye Jacob, ulita hiyabay ye in-inged nan bapa na. Ket inihip na, “Madanon yaynan matey ye bapa ko. Lano ha matey yayna, pateyen ko yay Jacob a katongno ko!”

42Ha natandaan nan Rebeka ye maloke a ihip nan Esau kanan katongno na, impadakit na yan tampol ye Jacob boy hinabi na kana, “Hiyay katongno mon Esau, ket ampantaan na kan pateyen bilang pamae na kamo. 43Haanin anak ko, diyagen moy habiyen ko. Umalih kaynan tampol! Makew ka ha Haran, ket ihtew ka kumonin kanan katongno kon Laban. 44Ihtewbay ka po kumonin angga ha maalih ye poot nan katongno mo kamo. 45Lano maalih yaynay poot na boy naliwaan nayna ye dinyag mo kana, ket mangitubol akon mangipatanda kamo a malyadi kaynan mag-udong ihti. Agko labay a maahe kawon luwa kangko ha mamaghay mangaamot.”

46Hinabi nan Rebeka kanan Isaac, “Angkahulog ako kanlan Heteo a aahawa nan Esau. Ket no Heteo met ye mapag-ahawa nan Jacob, mamanged po a matey akoyna.”

Currently Selected:

Genesis 27: AABPV+

Highlight

Copy