ມັດທາຍ 23
23
ອ໋ອຍ ຕສຸ ໄຝ ຟິມ ອຈ໋າວ ເລີ໌ຍ ເຍີຍ ຟິນ-ແຊງ ເຖສົາ ຟາລິສີ ມ່ຽນ
(ເປີ໊ຍ ໝັ່ງ ມາໂຄ 12:38-39; ລູກາ 11:43,46; 20:45-46)
1ເຈ໋ຍ ຕ້າຍ, ເຢຊູ ບົ໋ວ ຕສວັ໋ງ ມ່ຽນ ເຖສົາ ນິ່ນ ເຍີຍ ໄຊ-ກໍ໋, 2“ອຈ໋າວ ເລີ໌ຍ ເຍີຍ ຟິນ-ແຊງ ເຖສົາ ຟາລິສີ ມ່ຽນ ມ່າຍ ເລີ໌ຍ ພໍ້ ເມ່ງ ໂມເຊ ເຍີຍ ເລີ໌ຍ. #23:2 ກີກ ຫວ່າ ກ໊ອງ “ເຕສວີ໌ຍ ຈ໊ຽນ ໂມເຊ ເຍີຍ ເຫວີ່ຍ.” ເອີ໋ຍ ເລີ໌ຍ ເຊ ມ່າຍ ເລີ໌ຍ ພໍ້ ເມ່ງ ໂມເຊ ເຍີຍ ເລີ໌ຍ. 3ເຫວີ່ຍ ນ້າຍ ເມີ່ຍ ບົວ ອ໋ອຍ ຕສຸ ໝວັງ ຢ່າ ເອີຍ ຈ໊ຽນ ນິ່ນ ບົວ ອຈ໋າວ ເຍີຍ ຫວ່າ ໂຕສ໋ວ. ມປ່າ ນິ່ນ ບົວ ໂຕສ໋ວ ເຍີຍ ສີ່ ເມີ່ຍ ບົວ ໄມ້ ຕູ໋ງ ຕສວດ, ເຫວີ່ຍ ຕສຸ ນິ່ນ ບົວ ອຈ໋າວ ມປ່າ ໄມ້ ເອີຍ ນິ່ນ ບົວ ອຈ໋າວ ເຍີຍ ຫວ່າ ໂຕສ໋ວ. 4ນິ່ນ ບົວ ເຕສ໊າະ ເຮນ້ຍ ເຍີຍ, ອະ ຕຸ໊ ເຫຍຍ ເຍີຍ ກະນ້າຍ ຜານ ປຸນ ມ່ຽນ ເຫຍຍ, ມປ່າ ນິ່ນ ບົວ ກັ້ນ ລ່ຽມ ໄມ້ ຄັ້ງ ຫລົ່ງ ຢຽດ ນອມ ປົ໌ວ-ໂດ໊ະ ເຖງ ມ່ຽນ ໂປ້ວ.
5“ນິ່ນ ບົວ ໂຕສ໋ວ ເຍີຍ ຢຽດ ຕສູ໊ງ ເຊ ເຫວີ່ຍ ປຸນ ມ່ຽນ ໝັ່ງ ຮນັ້ງ. ໝັ່ງ ກ໋າ, ນິ່ນ ບົວ ເຍີຍ ປຢ້ອງ ເຖສົາ ປົ໌ວ ຕັ້ງ ຈ໊ຽນ ຕັ໊ບ ກີງ-ໂຊວ ເຍີຍ ຫວ່າ ວົ້ວ ຫຍູ່ງ ຮລັບ ດົ່ງ ຫາຍ ໂຮລ! ຕີ໋ງ ລຸຍ-ຈົ໊ວະ ວົ້ວ ເຕີ໋ຍ ອກີ້ງ ໂອກວ ດົ່ງ ຫາຍ ດ໊າວ! #ຊ້າວ ມ່ຽນ 15:38; ດສ່ຳ ເລີ໌ຍ-ຫລັດ 6:8; ມັດທາຍ 6:1 6ມີ່ງ ຢິ້ນ ຫວຸ່ຍ, ນິ່ນ ບົວ ຂູງ ອ໋ອຍ ເຕສວີ໌ຍ ເຈ໋ຍ ແໝງ ປູງ ເຕ້ຍ ກອນ ຮນັ້ງ. ເປັຍ ຫວຸ່ຍ ຕ້ອງ ຢ່າ ອ໋ອຍ ເຕສວີ໌ຍ ຫລົງ ເຈ໋ຍ ເຍີຍ ຕ໋ອງ. 7ມີ່ງ ວົ້ວ ເຮີຍ-ຫ່ອງ ອ໋ອຍ ມ່ຽນ ເຕສ໊າະ ເຢັ໊ຍ ທ່າຍ ນິ່ນ ບົວ, ຢ່າ ເຫ່ວ ນິ່ນ ບົວ ໂຕສ໋ວ ‘ໄຊ-ເຕ໋ຍ.’
8“ໄມ້ ຕູ໋ງ ປຸນ ມ່ຽນ ເຫ່ວ ເມີ່ຍ ບົວ ໂຕສ໋ວ ‘ໄຊ-ເຕ໋ຍ’ ເຫວີ່ຍ ຕສຸ ເມີ່ຍ ບົວ ຢຽດ ຕສູ໊ງ ໂຕສ໋ວ ກໍ໋-ໂຢ໌ວ. ເມີ່ຍ ບົວ ຂູງ ມ່າຍ ດຸ ເຕົ້າ ໄຊ-ເຕ໋ຍ ຮນັ້ງ. 9ໄມ້ ຕູ໋ງ ເຫ່ວ ຢຽມ ນ້າຍ ປ້າມ ເກນ ເຍີຍ ຫາຍ ເຕົ້າ ໂຕສ໋ວ ‘ເຕຍ,’ ເຫວີ່ຍ ຕສຸ ເມີ່ຍ ບົວ ມ່າຍ ດຸ ເຕົ້າ ເຕຍ ຮນັ້ງ. ເຊ ຢຽມ ທິນ-ຕ້ອງ ວົ້ວ ເຕົ້າ ເຕຍ. 10ຢ່າ ໄມ້ ຕູ໋ງ ປຸນ ມ່ຽນ ເຫ່ວ ເມີ່ຍ ບົວ ໂຕສ໋ວ ‘ເປຢີ໊ຍ ເຕສີ໊ຍ,’ ເຫວີ່ຍ ຕສຸ ເມີ່ຍ ບົວ ມ່າຍ ດຸ ເຕົ້າ ເປຢີ໊ຍ ເຕສີ໊ຍ ຮນັ້ງ, ຕົ້ງ ເຢຍ, ກີຕູ່.
11“ເມີ່ຍ ບົວ ຫາຍ ເຕົ້າ ໂຕສ໋ວ ໂຮລ ເຈ໋ຍ, ວົ້ວ ເຕົ້າ ອ໋ອຍ ຕສຸ ໂຕສ໋ວ ເມີ່ຍ ບົວ ເຍີຍ ໂປວ. #ມັດທາຍ 20:26-27; ມາໂຄ 9:35; 10:43-44; ລູກາ 22:26 12ຫາຍ ເຕົ້າ ທ່າຍ ກັ້ນ ໂຕສ໋ວ ໂຮລ, ທິນ-ຮູ່ງ ອ໋ອຍ ປຸນ ວົ້ວ ເຕົ້າ ໂຕສ໋ວ ໄຝ. ຫາຍ ເຕົ້າ ຫຍ່ຽມ ກັ້ນ ໂຕສ໋ວ ໄຝ, ທິນ-ຮູ່ງ ອ໋ອຍ ປຸນ ວົ້ວ ເຕົ້າ ໂຕສ໋ວ ໂຮລ. #ລູກາ 14:11; 18:14
ເຢຊູ ຕີ່ງ ເປີ້ຍ ຕສະ ໂຮຍ້ວ ອຈ໊ວດ ເຍີຍ ມ່ຽນ ເຍີຍ ຕສຸ໌ຍ
(ເປີ໊ຍ ໝັ່ງ ມາໂຄ 12:40; ລູກາ 11:39-42,44,52; 20:47)
13“ເມີ່ຍ ບົວ ເປີ້ຍ ຕສະ ໂຮຍ້ວ ອຈ໊ວດ ອຈ໋າວ ເລີ໌ຍ ເຍີຍ ຟິນ-ແຊງ ເຖສົາ ຟາລິສີ ມ່ຽນ ອ້າ! ເມີ່ຍ ບົວ ອ໋ອຍ ປວັ້ງ ຕສຸ ໂຄ້ວ ອ໊ະ. ເມີ່ຍ ບົວ ຕອງ ຈ໊ຽນ ມ່ຽນ ເຍີຍ ຮມຽນ ກວນ ເປັຍ ທິນ-ຮູ່ງ ເຍີຍ ກົ໊ວະ ວົ້ວ ເຕົ້າ ແກ້ງ. ເມີ່ຍ ບົວ ກັ້ນ ໄມ້ ເປັຍ. ມ່ຽນ ອ໋ອຍ ເປັຍ ເມີ່ຍ ບົວ ຢ່າ ຕັ໊ງ ຈ໊ຽນ ໄມ້ ປຸນ ເປັຍ. #23:13 ມ່າຍ ເຕີ໋ຍ ໂລ໌-ຮນອຍ ໂຊວ ໄມ້ ມ່າຍ 23:14 ວົ້ວ ຢ່ຽມ. 14ເມີ່ຍ ບົວ ເປີ້ຍ ຕສະ ໂຮຍ້ວ ອຈ໊ວດ ອຈ໋າວ ເລີ໌ຍ ເຍີຍ ຟິນ-ແຊງ ເຖສົາ ຟາລິສີ ມ່ຽນ ອ້າ! ເມີ່ຍ ບົວ ອ໋ອຍ ປວັ້ງ ຕສຸ ໂຄ້ວ ອ໊ະ. ເມີ່ຍ ບົວ ດົ໊ວ ເອົ໊າ-ກວ໊າ ເຍີຍ ຈາ-ຕີ້ງ ຫຍັ່ນ, ຢ່າ ຕຸ໊-ເອີ໋ຍ ເຕົ໋າ ເກົ໋າ ດ໊າວ ເຍີຍ ດົ໊ວ ມ່ຽນ. ເຫວີ່ຍ ນ້າຍ ເມີ່ຍ ບົວ ຕສູ໊ງ ຕສຸ ຕີ່ງ ຕສຸ໌ຍ ເກົ້າ ເຮນ້ຍ ເຈ໋ຍ.
15“ເມີ່ຍ ບົວ ເປີ້ຍ ຕສະ ໂຮຍ້ວ ອຈ໊ວດ ອຈ໋າວ ເລີ໌ຍ ເຍີຍ ຟິນ-ແຊງ ເຖສົາ ຟາລິສີ ມ່ຽນ ອ້າ! ເມີ່ຍ ບົວ ອ໋ອຍ ປວັ້ງ ຕສຸ ໂຄ້ວ ອ໊ະ. ເມີ່ຍ ບົວ ເຈ໋ຍ ຄ້ອຍ ເຈ໋ຍ ກົ໊ວະ ເຫວີ່ຍ ລໍ໌ ຕຸ໊ ດຸ ລ່ານ ມ່ຽນ ຕ້າຍ ເປັຍ ເມີ່ຍ ບົວ. ເປັຍ ລິ໌ວ, ເມີ່ຍ ບົວ ໂຕສ໋ວ ປຸນ ນິ່ນ ອ໋ອຍ ຕສຸ ດ໊ອດ ເຕີ່ຍ ຫຍົວະ ເກົ້າ ທສ້ຳ ເມີ່ຍ ບົວ ອີ ໂກ໊ວ.
16“ເມີ່ຍ ບົວ ຕໍ້ ເຈົ໊າ ເຍີຍ ມຕສີງ ແມ່ງ ມ່ຽນ ອ້າ! ເມີ່ຍ ບົວ ອ໋ອຍ ປວັ້ງ ຕສຸ ໂຄ້ວ ອ໊ະ. ເມີ່ຍ ບົວ ກ໊ອງ, ‘ຫາຍ ເຕົ້າ ຕສຢັ໊ງ ຈ໊ຽນ ຕສັ່ງ ທິນ-ຮູ່ງ ເຍີຍ ເປຢົ໊າ ແລ໌ງ ຫວ່າ, ໄມ້ ເອີຍ ຈ໊ຽນ ນິ່ນ ແລ໌ງ ເຍີຍ ຫວ່າ ໂຕສ໋ວ, ໄມ້ ເປ໋ນ ຫາຍ ຫຍູ່ງ. ມປ່າ ຫາຍ ເຕົ້າ ຕສຢັ໊ງ ຈ໊ຽນ ຕສອງ ຕສັ່ງ ທິນ-ຮູ່ງ ເຍີຍ ເປຢົ໊າ ວົ້ວ ເຕີ໋ຍ ຈຽມ, ຕສູ໊ງ ອ໋ອຍ ຕສຸ ເອີຍ ຈ໊ຽນ ນິ່ນ ແລ໌ງ ເຍີຍ ຫວ່າ ໂຕສ໋ວ.’
17“ມຕສີງ ແມ່ງ ເຍີຍ ກະນ້າຍ-ຫຮງົງ ອ້າ! ຫາຍ ຫຍູ່ງ ເກົ້າ ຫລົ່ງ ຈ໊ຽນ ເຈ໋ຍ? ຈຽມ ໄຟ ປຸນ ຈຽມ ທສີງ-ເດສ່ງ ວົ້ວ ນອມ ຕສັ່ງ ທິນ-ຮູ່ງ ເຍີຍ ເປຢົ໊າ? 18ເມີ່ຍ ບົວ ຢ່າ ກ໊ອງ, ‘ຫາຍ ເຕົ້າ ຕສຢັ໊ງ ຈ໊ຽນ ເຕສ່ຍ-ຕ້ອງ ແລ໌ງ ຫວ່າ ຢ່າ ໄມ້ ເອີຍ ຈ໊ຽນ ນິ່ນ ແລ໌ງ ເຍີຍ ຫວ່າ ໂຕສ໋ວ, ໄມ້ ເປ໋ນ ຫາຍ ຫຍູ່ງ. ມປ່າ ຫາຍ ເຕົ້າ ຕສຢັ໊ງ ອັນ ເຕສ່ຍ-ຕ້ອງ ກູ້ ຫງວ່າຍ ວົ້ວ ເຕີ໋ຍ ເຕສ່ຍ ເຍີຍ ກະນ້າຍ ແລ໌ງ ນໍ, ຕສູ໊ງ ອ໋ອຍ ຕສຸ ເອີຍ ຈ໊ຽນ ນິ່ນ ແລ໌ງ ເຍີຍ ຫວ່າ ໂຕສ໋ວ.’ 19ມຕສີງ ແມ່ງ ເຍີຍ ມ່ຽນ ອ້າ! ຫາຍ ຫຍູ່ງ ເກົ້າ ຫລົ່ງ ຈ໊ຽນ ເຈ໋ຍ? ເຕສ່ຍ ເຍີຍ ກະນ້າຍ ໄຟ ເຕສ່ຍ-ຕ້ອງ? ເຊ ເຕສ່ຍ-ຕ້ອງ ປຸນ ເຕສ່ຍ ເຍີຍ ກະນ້າຍ ທສີງ-ເດສ່ງ. 20ຮນັ້ງ ໜ່າຍ, ຫາຍ ເຕົ້າ ຕສຢັ໊ງ ຈ໊ຽນ ເຕສ່ຍ-ຕ້ອງ ແລ໌ງ ຫວ່າ, ນິ່ນ ຕສູ໊ງ ຕສຢັ໊ງ ຈ໊ຽນ ເຕສ່ຍ-ຕ້ອງ ເຖສົາ ອັນ ເຕສ່ຍ-ຕ້ອງ ກູ້ ຫງວ່າຍ ວົ້ວ ເຕີ໋ຍ ເຕສ່ຍ ເຍີຍ ກະນ້າຍ ຢຽດ ຕສູ໊ງ. 21ຫາຍ ເຕົ້າ ຕສຢັ໊ງ ຈ໊ຽນ ຕສັ່ງ ທິນ-ຮູ່ງ ເຍີຍ ເປຢົ໊າ ແລ໌ງ ຫວ່າ, ນິ່ນ ຕສູ໊ງ ຕສຢັ໊ງ ຈ໊ຽນ ຕສັ່ງ ທິນ-ຮູ່ງ ເຍີຍ ເປຢົ໊າ ເຖສົາ ຢຽມ ເປຢົ໊າ ກະຍົ໌ວ ວົ້ວ ເຕົ້າ ທິນ-ຮູ່ງ ແລ໌ງ ຫວ່າ. 22ຫາຍ ເຕົ້າ ຕສຢັ໊ງ ຈ໊ຽນ ທິນ-ຕ້ອງ ແລ໌ງ ຫວ່າ, ນິ່ນ ຕສູ໊ງ ຕສຢັ໊ງ ຈ໊ຽນ ທິນ-ຮູ່ງ ເຍີຍ ເຫວີ່ຍ ຢ່າ ຕສຢັ໊ງ ຈ໊ຽນ ເຕສວີ໌ຍ ເຫວີ່ຍ ວົ້ວ ເຕົ້າ ທິນ-ຮູ່ງ ແລ໌ງ ຫວ່າ. #ອິສະຢາ 66:1; ມັດທາຍ 5:34
23“ເມີ່ຍ ບົວ ເປີ້ຍ ຕສະ ໂຮຍ້ວ ອຈ໊ວດ ອຈ໋າວ ເລີ໌ຍ ເຍີຍ ຟິນ-ແຊງ ເຖສົາ ຟາລິສີ ມ່ຽນ ອ້າ! ເມີ່ຍ ບົວ ອ໋ອຍ ປວັ້ງ ຕສຸ ໂຄ້ວ ອ໊ະ. ເມີ່ຍ ບົວ ຕໍ້ ແປະ ທສິດ, ທົ່ງ ເຮົາ ເຖສົາ ຢ້ຽນ ຊີ ຕສຽບ ໂກ໊ວ ເຍີຍ ຢຽດ ໂກ໊ວ ຝົ່ງ ຫໍ່ ທິນ-ຮູ່ງ. ເລີ໌ຍ-ຫລັດ ອຈ໋າວ ເກົ້າ ຫລົ່ງ ຈ໊ຽນ ເຈ໋ຍ ເຍີຍ ເລີ໌ຍ ເຊ ອ໋ອຍ ຕສຸ ໂຕສ໋ວ ແປ້ງ ຟິມ, ອ໋ອຍ ຕສຸ ຄໍ້-ລ່ຽນ ມ່ຽນ, ອ໋ອຍ ຕສຸ ໂຕສ໋ວ ໂຮຍ້ວ ຕສີ໋ງ, ມປ່າ ເມີ່ຍ ບົວ ໄມ້ ໂຕສ໋ວ. ເມີ່ຍ ບົວ ຫອບ ຕສຸ ຮນັ້ງ ນ້າຍ ໂຕສ໋ວ, ຢ່າ ອ໋ອຍ ຕສຸ ໄມ້ ຕູ໋ງ ຫລະຄຸ ຕສຽບ ໂກ໊ວ ເຍີຍ ຢຽດ ໂກ໊ວ ກະນ້າຍ ຝົ່ງ ຫໍ່ ທິນ-ຮູ່ງ. #ເລວີ 27:30 24ເມີ່ຍ ບົວ ຕໍ້ ເຈົ໊າ ເຍີຍ ມຕສີງ ແມ່ງ ມ່ຽນ ອ້າ! ຢຽມ ເມີ່ຍ ບົວ ຮົບ ເຍີຍ ກະນ້າຍ, ໄຝ ເຈ໋ຍ ເຍີຍ ແກງ ເມີ່ຍ ບົວ ໂຫລ່ວ ທສວດ ໝີ່ ອ໊ະ. ມປ່າ ລໍ່ ທໍ່ ເມີ່ຍ ບົວ ນະ ຕຸ໊ ເອຈ່ຍ ເຍີຍ.
25“ເມີ່ຍ ບົວ ເປີ້ຍ ຕສະ ໂຮຍ້ວ ອຈ໊ວດ ອຈ໋າວ ເລີ໌ຍ ເຍີຍ ຟິນ-ແຊງ ເຖສົາ ຟາລິສີ ມ່ຽນ ອ້າ! ເມີ່ຍ ບົວ ອ໋ອຍ ປວັ້ງ ຕສຸ ໂຄ້ວ ອ໊ະ. ເມີ່ຍ ບົວ ດສ໋າວ ເມີ່ຍ ບົວ ເຍີຍ ດສ່ອມ ຢ໊ຽນ, ຂູງ ດສ໋າວ ກະເຫຍ່ຍ ເດສ່ງ ຮນັ້ງ. ມປ່າ ກະຍົ໌ວ ຕສ້າງ ປວັ໊ງ ເດສ່ງ ເມີ່ຍ ບົວ ທສ້າງ ຕ້າຍ ເມົ້າ ຕ້າຍ ເຍີຍ ກະນ້າຍ.
26“ມຕສີງ ແມ່ງ ເຍີຍ ຟາລິສີ ມ່ຽນ ອ້າ! ດສ໋າວ ດສ່ອມ ຢ໊ຽນ ອ໋ອຍ ຕສຸ ດສ໋າວ ເດສ່ງ ກະຍົ໌ວ ດ່າງ. ລ່ຽມ ກະເຫຍ່ຍ ຕສ່ຽວ ເດສ່ງ ໝີ່ ອ໊ະ.
27“ເມີ່ຍ ບົວ ເປີ້ຍ ຕສະ ໂຮຍ້ວ ອຈ໊ວດ ອຈ໋າວ ເລີ໌ຍ ເຍີຍ ຟິນ-ແຊງ ເຖສົາ ຟາລິສີ ມ່ຽນ ອ້າ! ເມີ່ຍ ບົວ ອ໋ອຍ ປວັ້ງ ຕສຸ ໂຄ້ວ ອ໊ະ. ເມີ່ຍ ບົວ ເຊ ຮນັ້ງ ດສ໊າດ ຈ໊ຽນ ຮວີ-ແປະ ເຍີຍ ຈັ໋ນ-ໄຕ່ ໂຕສ໊ວ ນໍ. ປວັດ ກະເຫຍ່ຍ ເດສວີ່ຍ ເຍີຍ, ມປ່າ ກະຍົ໌ວ ມ່າຍ ຈັ໋ນ-ໄຕ່ ເຍີຍ ບູ໊ງ ເຖສົາ ຫຍູ່ງໆ ໄລ່ ຮລົບ ເຍີຍ ກະນ້າຍ ປວັ໊ງ ເດສ່ງ. #ກົງ-ໂຕສ້ 23:3 28ເມີ່ຍ ບົວ ຟີ່ ຮນັ້ງ ເຍີຍ. ມ່ຽນ ປວັດ ເມີ່ຍ ບົວ ເຊ ຮນັ້ງ ຄູ້ ມ່ຽນ ມປ່າ ເມີ່ຍ ບົວ ເປີ້ຍ ຕສະ ໂຮຍ້ວ ອຈ໊ວດ, ມ່າຍ ຕສຸ໌ຍ ປວັ໊ງ ເດສ່ງ.
ອຈ໋າວ ເລີ໌ຍ ເຍີຍ ຟິນ-ແຊງ ເຖສົາ ຟາລິສີ ມ່ຽນ ອ໋ອຍ ຕສຸ ຕີ່ງ ຕສຸ໌ຍ
(ເປີ໊ຍ ໝັ່ງ ລູກາ 11:47-51)
29“ເປີ້ຍ ຕສະ ໂຮຍ້ວ ອຈ໊ວດ ອຈ໋າວ ເລີ໌ຍ ເຍີຍ ຟິນ-ແຊງ ເຖສົາ ຟາລິສີ ມ່ຽນ ອ້າ! ເມີ່ຍ ບົວ ອ໋ອຍ ປວັ້ງ ຕສຸ ໂຄ້ວ ອ໊ະ. ໂຕ່ວ ຫວ່າ ມ່ຽນ ໄຕ່ ມີ່ງ, ເມີ່ຍ ບົວ ເຖສີຍ ຕຸ໊ ນິ່ນ ບົວ ເຍີຍ ໂຕສ໊ວ ຫລົງ ໄຫ່. ຄູ້ ມ່ຽນ ເຍີຍ ໂຕສ໊ວ ເມີ່ຍ ບົວ ຢ່າ ຕສອງ ຕຸ໊ ເດສວີ່ຍ. 30ເມີ່ຍ ບົວ ຢ່າ ກ໊ອງ, ‘ເຊ ກ໊ອງ ເຢຍ ບົວ ຢຽມ ເຢຍ ບົວ ເຍີຍ ອົງ-ຖາຍ-ແງະ ວົ້ວ ຈ໋າ ລູ່ງ ເດ໊ຍ, ເຢຍ ບົວ ຕສູ໊ງ ໄມ້ ເຖສົາ ເຢຍ ບົວ ເຍີຍ ອົງ-ຖາຍ-ແງະ ໄຕ໋ ໂຕ່ວ ຫວ່າ ມ່ຽນ.’ 31ຮນັ້ງ ໜ່າຍ, ເມີ່ຍ ບົວ ແລ໌ງ ເມີ່ຍ ບົວ ໂຕສ໋ວ ໄຕ໋ ໂຕ່ວ ຫວ່າ ມ່ຽນ ວົ້ວ ເຕີ໋ຍ ມ່ຽນ ເຍີຍ ເຕສີ໊ຍ-ຟຸນ. 32ວົ້ວ ຫຍູ່ງ, ກຸ໊ນ ໂຕສ໋ວ ຈ໊ຽນ ມີ່ງ ເຖົາ ໂຕສ໋ວ ຕສຢັ໋ງ ຮນັ້ງ ເມີ່ຍ ເຍີຍ ອົງ-ຖາຍ ໂຕສ໋ວ ນໍ.
33“ເມີ່ຍ ບົວ ໜ່າຍ ເຕີ໋ຍ ນາງ, ໜ່າຍ ດຸຍ ນາງ-ໂຕະ ເຍີຍ ປ໊ວນ ອ້າ! ເມີ່ຍ ບົວ ຮນັ້ງ ຫາຍ ນໍ ໄຮ່ ເປຢົ໋າ ຕຸ໊ ດຸ໊ດ, ໄມ້ ຕສຸ ຕີ່ງ ຕສຸ໌ຍ ດ໊ອດ ເຕີ່ຍ ຫຍົວະ? #ມັດທາຍ 3:7; 12:34; ລູກາ 3:7 34ເຫວີ່ຍ ນ້າຍ ເຢຍ ອ໋ອຍ ພ້າຍ ເຕີ໋ຍ ໂຕ່ວ ຫວ່າ ມ່ຽນ ເຖສົາ ທສົງ-ເມ່ງ ເຍີຍ ມ່ຽນ ເຖສົາ ຟິນ-ແຊງ ຕ້າຍ ລໍ໌ ເມີ່ຍ ບົວ. ມ່າຍ ເຕີ໋ຍ ເມີ່ຍ ບົວ ອ໋ອຍ ໄຕ໋ ໄຕ່. ມ່າຍ ເຕີ໋ຍ ເມີ່ຍ ບົວ ອ໋ອຍ ຕີງ ຕສຽບ ດສັ່ງ ຈ໋າ. ມ່າຍ ເຕີ໋ຍ ເມີ່ຍ ບົວ ອ໋ອຍ ຢຽມ ຫວຸ່ຍ ຕ້ອງ ກະຍົ໌ວ ຫລົ່ງ ປຢ໊າ-ປິນ ເບ໊າະ, ແອ໋ງ ໂຕສ໋ວ ໂຕະ ປຸນ ນິ່ນ ບົວ ຢຽດ ນອມ ມູ້ງ ຕສຸ່ນ ທສວດ ເຈ໋ຍ ຢຽດ ນອມ ມູ້ງ. 35ຮນັ້ງ ໜ່າຍ, ຢຽດ ຕສູ໊ງ ຄູ້ ມ່ຽນ ຕສຸ ໄຕ໋ ໄຕ່, ນ້າຍ ຫຍູ່ງ ຕສຸ໌ຍ ດ໊ອດ ຕສຸ ເມີ່ຍ ບົວ, ຢຽມ ອາແບນ ຕສຸ ໄຕ໋ ເຖົາ ເບເລຄິຢາ ເຍີຍ ຕອນ, ເສຄາລິຢາ, ຢຽມ ຕສັ່ງ ທິນ-ຮູ່ງ ເຍີຍ ເປຢົ໊າ ເຍີຍ ທສີງ-ເດສ່ງ ຕ໋ອງ ເຖສົາ ເຕສ່ຍ-ຕ້ອງ ບຸດົ໋ງ ຕສຸ ເມີ່ຍ ບົວ ໄຕ໋. #ທິນ ເຕີ່ຍ ໂຕ້ວ 4:8; 2 ຕສຸ້ນ ຕ່ອຍ ໂຕ້ວ 24:20-21 36ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ອີ້ ຈ໋າ ມ່ຽນ ອ໋ອຍ ຕສຸ ຫລາຍ ນ້າຍ ເຕີ໋ຍ ໄຕ໋ ມ່ຽນ ເຍີຍ ສີ່ ຕສຸ ຕີ່ງ ຕສຸ໌ຍ.
ເຢຊູ ເດສົ້າ ໄຫ່ ເຢລູຊາເລມ ຕສີ້ງ
(ເປີ໊ຍ ໝັ່ງ ລູກາ 13:34-35)
37“ເຢລູຊາເລມ ຕສີ້ງ ອ້າ! ເຢລູຊາເລມ ຕສີ້ງ! ເມີ່ຍ ໄຕ໋ ໂຕ່ວ ຫວ່າ ມ່ຽນ ຢ່າ ເຕສ໊າະ ຫລະເປຢີ໊ຍ ຕສົງ ໄຕ່ ທິນ-ຮູ່ງ ພ້າຍ ມີ່ງ ເມີ່ຍ ໜ່າຍ ເຍີຍ ມ່ຽນ. ບຸເຕສ໋ຍ ດສຸ່ນ ເຢຍ ອ໋ອຍ ຮລໍ້ ຕສຸ໊ນ ເມີ່ຍ ເຍີຍ ມ່ຽນ, ຮນັ້ງ ໄຈ-ເຍີ໌ຍ ປົ່ວ ຕອນ ຢຽມ ດ໊າດ-ເດ໊ຍ ນໍ. ມປ່າ ເມີ່ຍ ໄມ້ ຄັ້ງ ປຸນ ເຢຍ ໂຕສ໋ວ. 38ໝັ່ງ ມ່າະ! ເມີ່ຍ ເຍີຍ ເປຢົ໊າ ຕສູ໊ງ ຕສຸ ກວັ່ງ ເປ໋ນ ເປຢົ໊າ-ຮວາງ. #ເຢເລມີ 22:5 39ເຢຍ ບົ໋ວ ເມີ່ຍ ບົວ, ຢຽມ ນ້າຍ ມີ່ງ ເມີ່ຍ ບົວ ໄມ້ ຕຸ໊ ປວັດ ເຢຍ. ຕສົ໊ວ ເມີ່ຍ ບົວ ກ໊ອງ,
‘ໂທ້ ທິນ-ຮູ່ງ ເຖສີຍ ຟຸ ເຕ໊ງ ຕສ໊ຽວ ເຍີຍ ບົ໋ວ ຕ້າຍ ວົ້ວ ເຕົ້າ’ #ສີງ ດສູງ 118:26
ຖສີງ ຕຸ໊ ປວັດ ເຢຍ.”
Currently Selected:
ມັດທາຍ 23: IuMiLAO
Highlight
Share
Copy
Want to have your highlights saved across all your devices? Sign up or sign in
Mien Bible (Lao Script) © 2007 Thailand Bible Society, 2007.
