ມັດທາຍ 18
18
ຫາຍ ເຕົ້າ ໂຕສ໋ວ ເກົ້າ ໂຮລ ເຈ໋ຍ
(ເປີ໊ຍ ໝັ່ງ ມາໂຄ 9:33-37; ລູກາ 9:46-48)
1ວົ້ວ ຕສັ່ນ ໄຊ-ກໍ໋ ບົວ ຕ້າຍ ໜ່າຍ ເຢຊູ, “ຢຽມ ທິນ-ຮູ່ງ ເຍີຍ ກົ໊ວະ, ຫາຍ ເຕົ້າ ຕຸ໊ ໂຕສ໋ວ ເກົ້າ ໂຮລ ເຈ໋ຍ?” #ລູກາ 22:24
2ເຢຊູ ຕສ່ຽວ ເຫ່ວ ເຕົ້າ ຝຸຈ໊ວຍ ຕ້າຍ ປຸນ ນິ່ນ ໂຊ້ວ ຈ໊ຽນ ນິ່ນ ບົວ ເຍີຍ ບຸດົ໋ງ 3ຢ່າ ກ໊ອງ, “ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ທສວດ ລິ໌ວ ເມີ່ຍ ບົວ ກ໊ອຍ ໂຮຍ້ວ ຕສ່ຽວ ຮນັ້ງ ຝຸຈ໊ວຍ ນໍ, ເມີ່ຍ ບົວ ຢຽດ ລິ໌ວ ໄມ້ ຕຸ໊ ເປັຍ ທິນ-ຮູ່ງ ເຍີຍ ກົ໊ວະ. #ມາໂຄ 10:15; ລູກາ 18:17 4ຫາຍ ເຕົ້າ ຫຍ່ຽມ ກັ້ນ ໂຕສ໋ວ ໄຝ ຮນັ້ງ ນ້າຍ ເຕົ້າ ຝຸຈ໊ວຍ, ຢຽມ ທິນ-ຮູ່ງ ເຍີຍ ກົ໊ວະ ຕົ້ງ ນ້າຍ ເຕົ້າ ໂຕສ໋ວ ໂຮລ ເຈ໋ຍ. 5ຫາຍ ເຕົ້າ ເຕ໊ງ ເຢຍ ເຍີຍ ບົ໋ວ ຕສິ໊ບ ເຕົ້າ ຝຸຈ໊ວຍ ຮນັ້ງ ນ້າຍ ເຕົ້າ ຝຸຈ໊ວຍ ນໍ, ວົ້ວ ເຕົ້າ ຢ່າ ຕສິ໊ບ ເຢຍ.
ດົ໊ວ ມ່ຽນ ປ໌າມ ຕສຸ໌ຍ ເຍີຍ ສີ່
(ເປີ໊ຍ ໝັ່ງ ມາໂຄ 9:42-48; ລູກາ 17:1-2)
6“ມປ່າ ເຊ ກ໊ອງ ຫາຍ ເຕົ້າ ດົ໊ວ ຢຽດ ເຕົ້າ ນ້າຍ ເຕີ໋ຍ ສຽນ ເຢຍ ເຍີຍ ຝຸຈ໊ວຍ-ໄຝ ປ໌າມ ຕສຸ໌ຍ, #18:6 ປ໌າມ ຕສຸ໌ຍ ກີກ ຫວ່າ ກ໊ອງ ດິ໊ ຕສຸ ດອບ. ເອີ໋ຍ ເລີ໌ຍ ເຊ ເຮນ້ຍ ເຍີຍ. ໄມ້ ຕານ ດົ໊ວ ປ໌າມ ຕສຸ໌ຍ ຮນັ້ງ, ຕສູ໊ງ ດົ໊ວ ມ່ຽນ ທສວດ ເຢຊູ. ອ໋ອຍ ຕສຸ ເຕສ໊າະ ຕົ້ມ ໝໍ່ ດິ໋ວ ຈ໊ຽນ ວົ້ວ ເຕົ້າ ເຍີຍ ຈາງ ປູ໋ງ ເອຈ່ຍ ຄ້ອຍ, ໂດ ເຍີຍ ຕ໋ອງ, ຕສ໋ຽມ ໄຕ່ ເກົ້າ ຫລົງ. 7ຫລາຍ ດົ໊ວ ມ່ຽນ ປ໌າມ ຕສຸ໌ຍ ເຍີຍ ສີ່, ປ້າມ ເກນ ຕສ່ຽວ ຕສຸ ໂຄ້ວ ອ໊ະ. ດົ໊ວ ມ່ຽນ ເຍີຍ ສີ່ ຕສັ່ນໆ ອ໋ອຍ ທສວດ, ມປ່າ ໂຕສ໋ວ ກອນ ດົ໊ວ ມ່ຽນ ວົ້ວ ເຕົ້າ ຕສູ໊ງ ອ໋ອຍ ຕສຸ ໂຄ້ວ ອ໊ະ.
8“ເຊ ກ໊ອງ ເມີ່ຍ ເຍີຍ ປົ໌ວ ໄຟ ເຕສົ໋າ ດົ໊ວ ເມີ່ຍ ປ໌າມ ຕສຸ໌ຍ, ອ໋ອຍ ຕສຸ ຮງະ ກວັ່ງ. ຫວ່າຍ ເຕີ໋ຍ ຝັງ ໄຟ ໂຕສະ ເຈັ໊ຍ ປົ໌ວ-ເຕສົ໋າ ມປ່າ ຕຸ໊ ຢຽດ ລິ໌ວ ເຍີຍ ແໝ່ງ ຖສໍ່ ເກົ້າ ຫລົງ ມ່າຍ ອີ ເຈັ໊ຍ ປົ໌ວ ອີ ເຈັ໊ຍ ເຕສົ໋າ ມປ່າ ຕສຸ ຕສອຍ ເປັຍ ຢຽດ ລິ໌ວ ເຕສັຍ ຈ໊ຽນ ເຍີຍ ໂຕ໌ວ. #ມັດທາຍ 5:30 9ເຊ ກ໊ອງ ເມີ່ຍ ເຍີຍ ມຕສີງ ດົ໊ວ ເມີ່ຍ ປ໌າມ ຕສຸ໌ຍ, ອ໋ອຍ ຕສຸ ເກວີ໋ຍ ກວັ່ງ ມີ່ງ. ໂຕສະ ນອມ ມຕສີງ ມປ່າ ຕຸ໊ ຢຽດ ລິ໌ວ ເຍີຍ ແໝ່ງ ຖສໍ່ ເກົ້າ ຫລົງ ມ່າຍ ອີ ນອມ ມຕສີງ ຢ່າ ຕສຸ ຕສອຍ ເປັຍ ເຕີ່ຍ ຫຍົວະ ເຍີຍ ໂຕ໌ວ. #ມັດທາຍ 5:29
ປະກີ ຢູ້ງ ຕີ໋ງ ລ່າຍ ເຍີຍ ຫວ່າ-ເປີ໊ຍ
(ເປີ໊ຍ ໝັ່ງ ລູກາ 15:3-7)
10“ອ໋ອຍ ຕສຸ ໄຝ ຟິມ, ໄມ້ ຕູ໋ງ ໝັ່ງ ເຜຍ ຢຽດ ເຕົ້າ ນ້າຍ ເຕີ໋ຍ ໄຝ ເຍີຍ ຝຸຈ໊ວຍ. ເຢຍ ບົ໋ວ ເມີ່ຍ ບົວ, ນ້າຍ ເຕີ໋ຍ ຝຸຈ໊ວຍ ເຍີຍ ຟິນ-ມ່ຽນ ຢຽມ ທິນ-ຕ້ອງ, ຕສັ່ນໆ ຢຽມ ເຢຍ ເຍີຍ ທິນ-ຕ້ອງ ເຕ໋ຍ ເຍີຍ ດສະຮມຽນ. #18:10 ມ່າຍ ເຕີ໋ຍ ໂລ໌-ຮນອຍ ໂຊວ ແອ໋ງ ທິບ 18:11 ວົ້ວ ຢ່ຽມ, ມ່າຍ ເຕີ໋ຍ ໄມ້ ທິບ. 11ເຫວີ່ຍ ຕສຸ ເຢຍ, ປ້າມ ມ່ຽນ ເຍີຍ ຕອນ, ຕ້າຍ ໂອຈ໋ວ ຕີ໋ງ ລ່າຍ ເຍີຍ ມ່ຽນ. #ລູກາ 19:10
12“ເມີ່ຍ ບົວ ຮນັ້ງ ຫາຍ ນໍ ຮນ້ຳ? ເຊ ກ໊ອງ ມ່າຍ ລ່ານ ມ່ຽນ ມ່າຍ ຢຽດ ແປ໊ະ ເຕົ້າ ປະກີ ຢູ້ງ, ຕີ໋ງ ລ່າຍ ເຕົ້າ, ນິ່ນ ຮນັ້ງ ຫາຍ ນໍ ໂຕສ໋ວ? ນິ່ນ ໄມ້ ເຕສີ໌ຍ ກວັ່ງ ຈ໊ຽນ ວົ້ວ ເຕີ໋ຍ ຈົ໊ວ ຕສຽບ ຈົ໊ວ ເຕົ້າ ຢຽມ ວົ້ວ ບົງ ຫຍັ່ນ ເມ້ຍ, ແອ໋ງ ມີ່ງ ລໍ໌ ຕີ໋ງ ລ່າຍ ວົ້ວ ເຕົ້າ ໄຟ? 13ເຢຍ ບົ໋ວ ຕສຽນ ເມີ່ຍ ບົວ, ລໍ໌ ປວັດ ນ້າຍ ເຕົ້າ ປະກີ ຢູ້ງ, ນິ່ນ ອະເຮນີ້ຍ ໄຫ່. ເກົ້າ ອະເຮນີ້ຍ ເຈ໋ຍ ວົ້ວ ເຕີ໋ຍ ຈົ໊ວ ຕສຽບ ຈົ໊ວ ເຕົ້າ ໄມ້ ຕີ໋ງ ລ່າຍ ເຍີຍ ປະກີ ຢູ້ງ. 14ຟີ່ ຮນັ້ງ ເຍີຍ, ເມີ່ຍ ບົວ ເຍີຍ ທິນ-ຕ້ອງ ເຕ໋ຍ ໄມ້ ອ໋ອຍ ຢຽດ ເຕົ້າ ນ້າຍ ເຕີ໋ຍ ໄຝ ເຍີຍ ຝຸຈ໊ວຍ ຕີ໋ງ ລ່າຍ.
ກໍ໋-ໂຢ໌ວ ໂຕສ໋ວ ຕ່ອງ ເມີ່ຍ
15“ເຊ ກ໊ອງ ເມີ່ຍ ເຍີຍ ກໍ໋-ໂຢ໌ວ ໂຕສ໋ວ ຕ່ອງ ເມີ່ຍ, ເມີ່ຍ ກັ້ນ ອ໋ອຍ ຕສຸ ມີ່ງ ລໍ໌ ນິ່ນ, ປີ໋ງ ຈ໊ຽນ ບົ໋ວ ນິ່ນ, ນິ່ນ ໂຕສ໋ວ ຕ່ອງ ເຍີຍ ສີ່. ເຊ ກ໊ອງ ນິ່ນ ໝວັງ ເມີ່ຍ ເຍີຍ ຫວ່າ ນໍ, ເມີ່ຍ ຕສ່ຽວ ຕຸ໊ ນິ່ນ ແອ໋ງ ໂຕສ໋ວ ກໍ໋-ໂຢ໌ວ. #ລູກາ 17:3 16ເຊ ກ໊ອງ ນິ່ນ ໄມ້ ໝວັງ, ເມີ່ຍ ຕສ່ຽວ ອ໋ອຍ ຕສຸ ລໍ໌ ຈ໊ຽນ ຢຽດ ເຕົ້າ ໄຟ ອີ ເຕົ້າ ເຖສົາ ເມີ່ຍ ມີ່ງ ເຖງ ໝວັງ ຫວ່າ ຕສ່ຽວ ໄຮ່ ເຕສ໊າະ ໂຈ໋ວໆ ຫວ່າ ໂຕສ໋ວ ຕສອງ-ເຕສ໋ງ. #ດສ່ຳ ເລີ໌ຍ-ຫລັດ 19:15 17ເຊ ກ໊ອງ ວົ້ວ ເຕົ້າ ຖສໍ່ ໄມ້ ໝວັງ ນິ່ນ ບົວ ນໍ, ອ໋ອຍ ຕສຸ ເຕສ໊າະ ນ້າຍ ເຕີ໋ຍ ສີ່ ບົ໋ວ ເດສ່ງ ຈິວ-ປາງ. ນິ່ນ ຖສໍ່ ໄມ້ ຄັ້ງ ໝວັງ ຈິວ-ປາງ ນໍ, ອ໋ອຍ ຕສຸ ຝຸນ ນິ່ນ ເຊ ຮນັ້ງ ໄມ້ ສຽນ ເຍີຍ ມ່ຽນ ໄຟ ເຖງ ໂລມາ ຮູ່ງ ຈາ ຊຽວ ໂດສວ ເຍີຍ ມ່ຽນ.
ໂດ້ ເຍີຍ ເຈົ໊າ ເຖສົາ ປູ໋ງ ເຍີຍ ເຈົ໊າ
18“ເຢຍ ບົ໋ວ ຕສຽນ ເມີ່ຍ ບົວ, ເມີ່ຍ ບົວ ຢຽມ ປ້າມ ເກນ ໂດ້ ຫາຍ ຫຍູ່ງ, ຢຽມ ວົ້ວ ທິນ-ຕ້ອງ ວົ້ວ ຫຍູ່ງ ຢ່າ ຕສຸ ໂດ້ ອ໊ະ. ເມີ່ຍ ບົວ ຢຽມ ປ້າມ ເກນ ປູ໋ງ ຫາຍ ຫຍູ່ງ, ຢຽມ ວົ້ວ ທິນ-ຕ້ອງ ຢ່າ ປູ໋ງ ວົ້ວ ຫຍູ່ງ ອ໊ະ. #ມັດທາຍ 16:19; ໂຢຮັນ 20:23
19“ເຢຍ ແອ໋ງ ບົ໋ວ ເມີ່ຍ ບົວ, ເຊ ກ໊ອງ ເມີ່ຍ ບົວ ຢຽມ ນ້າຍ ປ້າມ ເກນ ມ່າຍ ອີ ລ່ານ ມ່ຽນ ຕົ້ງ ໂຮຍ້ວ ກັ໊ບ ເອີ໋ຍ ເຕົ໋າ ເກົ໋າ ໂທ້ ຫາຍ ຫຍູ່ງ, ເຢຍ ເຍີຍ ທິນ-ຕ້ອງ ເຕ໋ຍ ຕສູ໊ງ ເຫວີ່ຍ ເມີ່ຍ ບົວ ໂຕສ໋ວ ຕສຢັ໋ງ ເດສ່ງ. 20ເຫວີ່ຍ ຕສຸ ໄມ້ ກຸ໊ນ ຢຽມ ຫາຍ ນອມ ຕ໋ອງ, ມ່າຍ ອີ ປົວ ລ່ານ ມ່ຽນ ເຕ໊ງ ເຢຍ ເຍີຍ ບົ໋ວ ກັ໊ບ ຕສຸ໊ນ, ເຢຍ ຕສ່ຽວ ຢຽມ ນິ່ນ ບົວ ບຸດົ໋ງ.”
ໂປວ ໄມ້ ຄັ້ງ ກວັ່ງ ແຕສ໊ະ ເຍີຍ ຫວ່າ-ເປີ໊ຍ
21ປີເຕ ແອ໋ງ ຕ້າຍ ໜ່າຍ ກ໋າ ເຢຊູ, “ຕສ໊ຽວ ອ່າ, ເຊ ກ໊ອງ ເຢຍ ເຍີຍ ກໍ໋-ໂຢ໌ວ ຕສັ່ນໆ ຕ່ອງ ເຢຍ, ເຢຍ ອ໋ອຍ ຕສຸ ກວັ່ງ ບຸເຕສ໋ຍ ດສຸ່ນ ປຸນ ນິ່ນ? ເຖົາ ເສ່ຍ ດສຸ່ນ ອ໊ະ ໄຟ?” #ລູກາ 17:3-4
22ເຢຊູ ເຕົາ, “ເຢຍ ໄມ້ ເຕສີ໌ຍ ກ໊ອງ ກວັ່ງ ເສ່ຍ ດສຸ່ນ ຮນັ້ງ. ອ໋ອຍ ຕສຸ ກວັ່ງ ທສຽດ ຕສຽບ ເຍີຍ ເສ່ຍ ດສຸ່ນ. #18:22 ໄຟ 70 ດສຸ່ນ. #ທິນ ເຕີ່ຍ ໂຕ້ວ 4:24
23“ເຫວີ່ຍ ຕສຸ ທິນ-ຮູ່ງ ໂຕສ໋ວ ຕສ໊ຽວ ກຸ໊ນ ມ່ຽນ ເຊ ຮນັ້ງ ນ້າຍ. ມ່າຍ ເຕົ້າ ຮູ່ງ ເຕ໋ຍ ອ໋ອຍ ເຖສົາ ນິ່ນ ເຍີຍ ໂປວ ຝຸນ ແຕສ໊ະ. 24ຝຸນ ຈ໊ຽນ ແຕສ໊ະ ວົ້ວ ຕສັ່ນ, ມ່ຽນ ຕໍ້ ເຕົ້າ ໂປວ ເປັຍ ຕ້າຍ. ວົ້ວ ເຕົ້າ ໂປວ ຖຈຽມ ຮູ່ງ ເຕ໋ຍ ເຕສ໋ຍ ແປ໊ະ ຫວ່ານ ນອມ ຕສິ້ນ, #18:24 ຟານ ຕສະ ກ໊ອງ 10,000 ຕະລັນ. ຢຽດ ນອມ ນ້າຍ ຫຍູ່ງ ຕະລັນ ເຊ ດົ່ງ ຢຽດ ລ່ານ ມ່ຽນ ໂຕສ໋ວ 15 ຫຮຍັງ ກົງ ເຍີຍ ກົງ-ຕສິ້ນ. 25ຢ່າ ໄມ້ ມ່າຍ ຍ່ານ ຈ໊າວ. ຮູ່ງ ເຕ໋ຍ ຕສ່ຽວ ເຫ່ວ ມ່ຽນ ຕໍ້ ວົ້ວ ເຕົ້າ ໂປວ ມີ່ງ ໝ່າຍ ປຸນ ມ່ຽນ ໂຕສ໋ວ ໂນ່ວ. ລ່ຽມ ນິ່ນ ເຍີຍ ເອົ໊າ-ເຈວີ໊ຍ ເຖສົາ ນິ່ນ ມ່າຍ ເຍີຍ ຢຽດ ຕສູ໊ງ ກະນ້າຍ ຕໍ້ ມີ່ງ ໝ່າຍ ເດສ່ງ, ຕ້າຍ ຈ໊າວ ຊູງ ແຕສ໊ະ.
26“ວົ້ວ ເຕົ້າ ໂປວ ຕສ່ຽວ ເກວີ່ຍ ເອຈ່ຍ ທຈະ ໂທ້ ນິ່ນ, ‘ໂທ້ ຕສ໊ຽວ ເຊຍ ເຢຍ, ຕສົ໊ວ ເຢຍ ລໍ໌ ຕຸ໊ ຕ້າຍ, ເຢຍ ເກ້ງ ອ໋ອຍ ຕສຸ ຈ໊າວ ເຖົາ ຊູງ ເດສ່ງ.’ 27ວົ້ວ ເຕົ້າ ໂປວ ເຍີຍ ຕສ໊ຽວ ຄໍ້-ລ່ຽນ ໄຫ່ ນິ່ນ ຕສ່ຽວ ກວັ່ງ ນິ່ນ ເຍີຍ ແຕສ໊ະ, ປູ໋ງ ນິ່ນ ດສ໋ວນ ໝີ່ ອ໊ະ.
28“ໜ່າຍ ເຕົ້າ ໂປວ ທສວດ ມີ່ງ ຢ່າ ປວັ້ງ ຕສຸ ເຕົ້າ ໂຕສ໋ວ ໂປວ ຕ່ອຍ. ນ້າຍ ເຕົ້າ ໂປວ ຖຈຽມ ນິ່ນ ອີ ເຕສ໋ຍ ນອມ ຕສິ້ນ ຮນັ້ງ, ມປ່າ ນິ່ນ ລ່ຽມ ເຕສີ້ຍ ໂກ້ ຈ໊ຽນ ນ້າຍ ເຕົ້າ ເຍີຍ ຈາງ ຢ່າ ກ໊ອງ, ‘ກ໊ານ ຈ໊າວ ເມີ່ຍ ຖຈຽມ ເຢຍ ເຍີຍ ແຕສ໊ະ ມ່າະ!’ 29ວົ້ວ ເຕົ້າ ໂຕສ໋ວ ໂປວ ຕ່ອຍ ຕສ່ຽວ ເກວີ່ຍ ເອຈ່ຍ ທຈະ ໂທ້ ນິ່ນ, ‘ໂທ້ ເມີ່ຍ ເຊຍ ເຢຍ, ເຢຍ ເກ້ງ ຈ໊າວ ເຍີຍ ເຫລາະ.’ 30ມປ່າ ນິ່ນ ໄມ້ ຄັ້ງ, ຢ່າ ຕໍ້ ວົ້ວ ເຕົ້າ ໂປວ ມີ່ງ ຫວວນ ຈ໊ຽນ ໂລ່ ຕສົ໊ວ ນິ່ນ ຈ໊າວ ຊູງ ແຕສ໊ະ.
31“ແອ໋ງ ມ່າຍ ເຕີ໋ຍ ລົ່ມ ດສ້ອຍ ໂຕສ໋ວ ໂປວ ຕ່ອຍ ປວັດ ນ້າຍ ເຕີ໋ຍ ສີ່ ທສວດ, ໄຮ໌ ໂຮຍ້ວ ໄມ້ ຫລົງ ຢຽດ ເຕີ໋ຍ, ຕສ່ຽວ ມີ່ງ ບົ໋ວ ນິ່ນ ບົວ ເຍີຍ ຕສ໊ຽວ. 32ວົ້ວ ເຕົ້າ ໂປວ ເຍີຍ ຕສ໊ຽວ ຕສ່ຽວ ເຫ່ວ ນິ່ນ ຕ້າຍ ຢ່າ ກ໊ອງ, ‘ເມີ່ຍ ໜ່າຍ ເຕົ້າ ຫວ່າຍ ໄຫ່ ເຍີຍ ໂນ່ວ ເກົ໊າ ອ້າ! ເມີ່ຍ ທຈະ ໂທ້ ເຢຍ, ເຢຍ ຕສ່ຽວ ກວັ່ງ ເດສ່ງ ເມີ່ຍ ຖຈຽມ ເຢຍ ເຍີຍ ແຕສ໊ະ. 33ເມີ່ຍ ຫອບ ຕສຸ ຄໍ້-ລ່ຽນ ເມີ່ຍ ເຍີຍ ໂຕສ໋ວ ໂປວ ຕ່ອຍ ຮນັ້ງ ເຢຍ ຄໍ້-ລ່ຽນ ເມີ່ຍ ນໍ ຊາ.’ 34ນິ່ນ ເຍີຍ ຕສ໊ຽວ ເຖຈຍ ເຈ໌ຍ! ໄຫ່ ຕສ່ຽວ ເຫ່ວ ກຸ໊ນ ໂລ່ ຈຽນ ຕໍ້ ນ້າຍ ເຕົ້າ ໂປວ ມີ່ງ ເຕສີ໋ຍ ເຖົາ ນິ່ນ ຈ໊າວ ຊູງ ແຕສ໊ະ.”
35ເຢຊູ ແອ໋ງ ກ໊ອງ ເຊດ ເມວີ໌ຍ ຫວ່າ. “ເຊ ກ໊ອງ ເມີ່ຍ ບົວ ໂມ໌ວ ລ່ານ ມ່ຽນ ໄມ້ ຫລົ່ງ ໂຮຍ້ວ ກວັ່ງ ກໍ໋-ໂຢ໌ວ ໂຕສ໋ວ ຕ່ອງ ເມີ່ຍ ບົວ ເຍີຍ ສີ່, ເຢຍ ເຍີຍ ທິນ-ຕ້ອງ ເຕ໋ຍ ຢ່າ ຟີ່ ຮນັ້ງ ເຍີຍ ໄມ້ ກວັ່ງ ປຸນ ເມີ່ຍ ບົວ.”
Currently Selected:
ມັດທາຍ 18: IuMiLAO
Highlight
Share
Copy
Want to have your highlights saved across all your devices? Sign up or sign in
Mien Bible (Lao Script) © 2007 Thailand Bible Society, 2007.
