ທິນ ເຕີ່ຍ ໂຕ້ວ 44

ຍ່ານ ຕສ໊ານ ຕີ໋ງ ລ່າຍ

1ໂຢເຊບ ພ້າຍ ໂກ໋ວ ນິ່ນ ເຍີຍ ເປຢົ໊າ ເຍີຍ ຕົ້ມ ໂປວ, “ເຕສ໊າະ ເບຢົ້າ ຕັ໊ບ ນ້າຍ ເຕີ໋ຍ ມ່ຽນ ເຍີຍ ບົວະ. ຕັ໊ບ ເກົ໋າ ນິ່ນ ບົວ ຕໍ້. ແອ໋ງ ເຕສ໊າະ ເກ໊າະ-ມ່ຽນ ມ໌າຍ ເບຢົ້າ ເຍີຍ ຍ່ານ ຕັ໊ບ ເກ໊າະ-ມ່ຽນ ເຍີຍ ບົວະ ດສຸ້ຍ. 2ເຕສ໊າະ ເຢຍ ເຍີຍ ຕສ໊ານ, ຕົ້ງ ຍ່ານ ຕສ໊ານ ວົ້ວ ນອມ, ເຖສົາ ມ໌າຍ ເບຢົ້າ ເຍີຍ ຍ່ານ ຕັ໊ບ ຈ໊ຽນ ໂຢ໌ວ-ລາຍ ວົ້ວ ເຕົ້າ ເຍີຍ ບົວະ ດສຸ້ຍ.” ໂປວ ຕສ່ຽວ ເອີຍ ຈ໊ຽນ ໂຢເຊບ ເຍີຍ ຫວ່າ ໂຕສ໋ວ.

3ຕະເຫຍີ່ຍ ດອມ ດສ໊ຽວ ເຍີຍ, ລູ່ງ ບ໌ຽວໆ ອຈັງ, ຕົ້ມ ໂປວ ຕສ່ຽວ ຝູງ ນິ່ນ ບົວ ເຖສົາ ນິ່ນ ບົວ ເຍີຍ ລໍ່ ທສວດ ເຈົ໊າ ດສ໋ວນ. 4ທສວດ ຕສິ ຕສີ້ງ ມີ່ງ ໄມ້ ແກ້ງ ໜັ່ງ ໂກ, ໂຢເຊບ ກ໊ອງ ບົ໋ວ ນິ່ນ ເຍີຍ ຕົ້ມ ໂປວ, “ກ໊ານ ມີ່ງ ຕສຸ່ນ ວົ້ວ ເຕີ໋ຍ ມ່ຽນ. ຕສຸ່ນ ຕສ່າຍ, ອ໋ອຍ ຕສຸ ໜ່າຍ ກ໋າ ນິ່ນ ບົວ, ‘ເຢຍ ບົວ ໂຕສ໋ວ ຫລົງ ປຸນ ເມີ່ຍ ບົວ. ເມີ່ຍ ບົວ ເຫວີ່ຍ ຫາຍ ຕິ່ວ ໂຕສ໋ວ ຫວ່າຍ ປຸນ ເຢຍ ບົວ? 5ເມີ່ຍ ບົວ ເຫວີ່ຍ ຫາຍ ຕິ່ວ ໜິ່ມ ເຢຍ ເຍີຍ ຕສ໊ຽວ ເຍີຍ ຍ່ານ ຕສ໊ານ ມີ່ງ? ນ້າຍ ນອມ ຕສ໊ານ ນິ່ນ ຫລົ່ງ ຮົບ ຢ່າ ຫລົ່ງ ໜ່າຍ ຕສິ້ນ ໂຮ໌ ເຍີຍ ເຈົ໊າ. ເມີ່ຍ ບົວ ຕສະເກ້ງ ໂຕສ໋ວ ຕ່ອງ ໂດ ໄຫ່ ອ໊ະ.’”

6ວົ້ວ ເຕົ້າ ໂປວ ຕສຸ່ນ ຕສ່າຍ, ນິ່ນ ຕສ່ຽວ ເອີຍ ໂຢເຊບ ເຍີຍ ຫວ່າ ກ໊ອງ. 7ມປ່າ ວົ້ວ ເຕີ໋ຍ ມົ໌ວ-ຕ່ອຍ ກ໊ອງ, “ຕົ້ມ ກໍ໋ ອ່າ, ເມີ່ຍ ໂຕສ໋ວ ຫາຍ ຫຍູ່ງ ຮນັ້ງ ນ້າຍ ນໍ ກ໊ອງ? ເຢຍ ບົວ ຕສູ໊ງ ໄມ້ ຮນ້ຳ ເຖົາ ຮນັ້ງ ນ້າຍ ນໍ ໂຕສ໋ວ. 8ໝັ່ງ ກ໋າ, ມ໌າຍ ຕ້າວ ດສຸ່ນ ເບຢົ້າ ເຍີຍ ຍ່ານ ຢຽມ ເຢຍ ບົວ ເຍີຍ ບົວະ ເຢຍ ບົວ ຕສູ໊ງ ຢຽມ ຄານາອັນ ເຕີ່ຍ-ປູງ ຕໍ້ ຕ້າຍ ຖຸຍ ດສ໋ວນ ປຸນ ເມີ່ຍ. ເຢຍ ບົວ ຝູ່ງ ໄຮ່ ໜິ່ມ ຢຽມ ເມີ່ຍ ເຍີຍ ຕສ໊ຽວ ເຍີຍ ເປຢົ໊າ ເຍີຍ ຈຽມ ຍ່ານ? 9ເຊ ກ໊ອງ ເມີ່ຍ ປວັດ ວົ້ວ ນອມ ຕສ໊ານ ຢຽມ ຫາຍ ເຕົ້າ, ປຸນ ວົ້ວ ເຕົ້າ ຕສຸ ໄຕ່ ອ໊ະ. ເຕສ່ງ ວົ້ວ ເຕີ໋ຍ ແລ໌ງ ໂຕສ໋ວ ເມີ່ຍ ເຍີຍ ໂນ່ວ.”

10ໂປວ ກ໊ອງ, “ຫອບ ເຍີຍ. ເອີຍ ຈ໊ຽນ ເມີ່ຍ ບົວ ເຍີຍ ຫວ່າ ໂຕສ໋ວ ອ໊ະ. ມປ່າ ລໍ໌ ປວັດ ຢຽມ ຫາຍ ເຕົ້າ ເຍີຍ ບົວະ, ວົ້ວ ເຕົ້າ ກັ້ນ ອ໋ອຍ ຕສຸ ໂຕສ໋ວ ເຢຍ ເຍີຍ ໂນ່ວ. ເຕສ່ງ ເອຈ່ຍ ວົ້ວ ເຕີ໋ຍ ໄມ້ ຕ່ອງ ຫາຍ ຫຍູ່ງ.”

11ເຕົ້າໆ ຕສ່ຽວ ຊຽບໆ ເຍີຍ ໂປ້ວ ບົວະ ເອຈ່ຍ ຕົນ ຈ໊ຽນ ວົ້ວ ເດົາ ຄອຍ. 12ໂປວ ຕສ່ຽວ ໂຊວ ອ໊ະ, ຢຽມ ຕົ້ມ ກໍ໋ ເຍີຍ ໂຊວ ຈ໊ຽນ ມີ່ງ ເຖົາ ໂຢ໌ວ-ລາຍ ເຍີຍ. ເຖົາ ເບນຢາມິນ ເຍີຍ ບົວະ ຕສ່ຽວ ໂຊວ ທສວດ ວົ້ວ ນອມ ຕສ໊ານ. 13ວົ້ວ ເຕີ໋ຍ ມົ໌ວ-ຕ່ອຍ ເດສົ້າ ໄຫ່, ເປ໊ດ ນິ່ນ ບົວ ເຍີຍ ລຸຍ, ແອ໋ງ ໂປ້ວ ບົວະ ຝາວ ປຸນ ລໍ່ ທໍ ຈ໊ຽນ ຕ໋າວ ອກາງ ດສ໋ວນ ວົ້ວ ຕສີ້ງ ອ໊ະ.

14ຢູດາ ເຖສົາ ນິ່ນ ເຍີຍ ມົ໌ວ-ຕ່ອຍ ດສ໋ວນ ເຖົາ ໂຢເຊບ ເຍີຍ ເປຢົ໊າ ວົ້ວ ຕສັ່ນ, ໂຢເຊບ ຖສໍ່ ຢຽມ ເປຢົ໊າ ເຍີຍ. ນິ່ນ ບົວ ຢຽມ ນິ່ນ ເຍີຍ ດສະຮມຽນ ບ໊າບ ເອຈ່ຍ ເດົາ. 15ໂຢເຊບ ກ໊ອງ ບົ໋ວ ນິ່ນ ບົວ, “ນ້າຍ ເມີ່ຍ ບົວ ໂຕສ໋ວ ຫາຍ ຫຍູ່ງ ແລ່? ເມີ່ຍ ບົວ ໄມ້ ຮິ້ວ ຕຸ໊ ເຢຍ ນ້າຍ ຫຍູ່ງ ມ່ຽນ ໄຮ່ ໝັ່ງ ຕຸ໊ ທສວດ ຕສິ້ນ ໂຮ໌ ເຍີຍ ສີ່, ໄຮ່ ເຕສ໊າະ ຕຸ໊ ເມີ່ຍ ບົວ ໄຟ?”

16ຢູດາ ກ໊ອງ, “ເຢຍ ບົວ ຮນັ້ງ ຫາຍ ນໍ ໄຮ່ ເຕົາ ຕສ໊ຽວ? ຮນັ້ງ ຫາຍ ນໍ ໄຮ່ ກ໊ອງ? ເຢຍ ບົວ ຮນັ້ງ ຫາຍ ນໍ ໄຮ່ ໄຈ໊ ຊິນ? ທິນ-ຮູ່ງ ເວດ ທສວດ ເດສ່ງ ເຢຍ ບົວ ໂຕສ໋ວ ຕ່ອງ ເຍີຍ ສີ່. ອີ້ ຕສັ່ນ ໄມ້ ເຕສີ໌ຍ ຂູງ ຕສ໊ານ ຢຽມ ບົວະ ວົ້ວ ເຕົ້າ ເປ໋ນ ເມີ່ຍ ເຍີຍ ໂນ່ວ ຮນັ້ງ. ລ່ຽມ ເຢຍ ບົວ ຢຽດ ຕສູ໊ງ ເປ໋ນ ເມີ່ຍ ເຍີຍ ໂນ່ວ ອ໊ະ.”

17ໂຢເຊບ ກ໊ອງ, “ໄມ້ ເຕສີ໌ຍ ຮນັ້ງ ໜ່າຍ ເຫລາະ. ຂູງ ຕສ໊ານ ຢຽມ ບົວະ ວົ້ວ ເຕົ້າ ອ໋ອຍ ຕສຸ ໂຕສ໋ວ ເຢຍ ເຍີຍ ໂນ່ວ ຮນັ້ງ. ເຕສ່ງ ວົ້ວ ເຕີ໋ຍ ກຸ໊ນ ແປ້ງ ອອນ ເຍີຍ ດສ໋ວນ ເມີ່ຍ ບົວ ເຍີຍ ເຕຍ ວົ້ວ ອ໊ະ.”

ຢູດາ ໂທ້ ໂຢເຊບ ປູ໋ງ ເບນຢາມິນ

18ຢູດາ ແອ໋ງ ມີ່ງ ຟັດ ເຕີ໋ຍ ຕ໋ອຍ ໂຢເຊບ ກ໊ອງ, “ເຢຍ ເຍີຍ ຕສ໊ຽວ ອ່າ, ເຢຍ ໂທ້ ເຖສົາ ເມີ່ຍ ກ໊ອງ ໂຈ໋ວ ຫວ່າ. ເມີ່ຍ ໄມ້ ຕູ໋ງ ແກ້ງ ເຖຈຍ ເຈ໌ຍ ເຢຍ, ເມີ່ຍ ເຍີຍ ໂປວ, ໄມ້ ກຸ໊ນ ເມີ່ຍ ດົ່ງ ຟາໂລ ຮູ່ງ ໂຮລ. 19ຕສ໊ຽວ ໜ່າຍ ເຢຍ ບົວ, ເມີ່ຍ ເຍີຍ ໂປວ, ‘ເມີ່ຍ ບົວ ຖສໍ່ ມ່າຍ ເຕຍ, ມ່າຍ ໂຢ໌ວ ເຍີຍ ໄຟ?’ 20ເຢຍ ບົວ ເຕົາ, ‘ເຕຍ ມ່າຍ ເຍີຍ ມປ່າ ໂກ໋ ໄຫ່ ອ໊ະ. ໂຢ໌ວ ຢ່າ ມ່າຍ ເຍີຍ. ເຕຍ ຕສູ໊ງ ໂກ໋ ໄຫ່ ຖສີງ ຕຸ໊ ນ້າຍ ເຕົ້າ ຕອນ-ລາຍ. ນ້າຍ ເຕົ້າ ຕອນ ເຍີຍ ກໍ໋ ໄຕ່ ໝີ່ ອ໊ະ. ນິ່ນ ບົວ ອີ ມົ໌ວ ຈວັ່ງ ມາ ມປ່າ ອີ້ ຕສັ່ນ ຂູງ ມ່າຍ ນິ່ນ ກັ້ນ ຮນັ້ງ. ນິ່ນ ເຍີຍ ເຕຍ ຢ່າ ຮນ້ຳ ໄຫ່ ນິ່ນ.’

21“ເມີ່ຍ ເຫ່ວ ເຢຍ ບົວ, ເມີ່ຍ ເຍີຍ ໂປວ, ຕໍ້ ນິ່ນ ຕ້າຍ ນ້າຍ ປຸນ ເມີ່ຍ ໝັ່ງ. 22ເຢຍ ບົວ ບົ໋ວ ເມີ່ຍ, ເຢຍ ບົວ ເຍີຍ ຕສ໊ຽວ, ‘ວົ້ວ ເຕົ້າ ຕອນ ເລີ່ຍ ໄມ້ ຕຸ໊ ນິ່ນ ເຍີຍ ເຕຍ. ເລີ່ຍ ນໍ, ນິ່ນ ເຍີຍ ເຕຍ ໄຮ່ ໄຕ່ ເຍີຍ.’ 23ມປ່າ ເມີ່ຍ ບົ໋ວ ເຢຍ ບົວ, ເມີ່ຍ ເຍີຍ ໂປວ, ‘ເຢຍ ບົວ ໄມ້ ຕໍ້ ນ້າຍ ເຕົ້າ ໂຢ໌ວ-ລາຍ ເຖສົາ ຈ໊ຽນ ຕ້າຍ ນໍ, ເຢຍ ບົວ ໄມ້ ຕຸ໊ ແອ໋ງ ປວັດ ເມີ່ຍ ເຍີຍ ຮມຽນ.’ 24ເຢຍ ບົວ ຕໍ້ ເມີ່ຍ ເຍີຍ ຫວ່າ ດສ໋ວນ ມີ່ງ ກ໊ອງ ປຸນ ເມີ່ຍ ເຍີຍ ໂປວ, ເຢຍ ບົວ ເຍີຍ ເຕຍ, ໝວັງ.

25“ເຢຍ ບົວ ເຍີຍ ເຕຍ ບົ໋ວ ເຢຍ ບົວ, ‘ແອ໋ງ ມີ່ງ ມ໌າຍ ເຕີ໋ຍ ເບຢົ້າ ມ່າະ!’ 26ເຢຍ ບົວ ເຕົາ, ‘ເຢຍ ບົວ ໄມ້ ໄຮ່ ມີ່ງ. ເຊ ກ໊ອງ ເຢຍ ບົວ ເຍີຍ ໂຢ໌ວ-ລາຍ ເຖສົາ ຈ໊ຽນ ເຢຍ ບົວ ມີ່ງ ນໍ, ເຢຍ ບົວ ມີ່ງ ເຍີຍ. ເຫວີ່ຍ ຕສຸ ໂຢ໌ວ-ລາຍ ໄມ້ ເຖສົາ ເຢຍ ບົວ ມີ່ງ ນໍ, ເຢຍ ບົວ ໄມ້ ຕຸ໊ ປວັດ ວົ້ວ ລ່ານ ມ່ຽນ ເຍີຍ ຮມຽນ.’

27“ເມີ່ຍ ເຍີຍ ໂປວ, ເຢຍ ບົວ ເຍີຍ ເຕຍ, ບົ໋ວ ເຢຍ ບົວ, ‘ເມີ່ຍ ບົວ ຮິ້ວ ຕຸ໊ ເຢຍ ເຍີຍ ເອົ໊າ, ລາເຊນ, ຢູ໌ງ ຕຸ໊ ອີ ເຕົ້າ ຕອນ ປຸນ ເຢຍ ຮນັ້ງ. 28ມ່າຍ ເຕົ້າ ຕສູ໊ງ ເລີ່ຍ ອກອຍ ເຢຍ. ເຢຍ ຮນ້ຳ ຕ້າຍ ນິ່ນ ຕສຸ ເຮ່ຍ ກະນ້າຍ ເປ໊ດ ນິ່ນ ໝີ່ ອ໊ະ. ເຖົາ ອີ້ ຕສັ່ນ ເຢຍ ໄມ້ ຕຸ໊ ປວັດ ວົ້ວ ເຕົ້າ ຕອນ. 29ເຊ ກ໊ອງ ເມີ່ຍ ບົວ ຕໍ້ ນ້າຍ ເຕົ້າ ມີ່ງ, ນິ່ນ ຢ່າ ປວັ້ງ ຕສຸ ສີ່ ນໍ, ເມີ່ຍ ບົວ ຕສ່ຽວ ປຸນ ເຢຍ, ອົງ-ມອກ໊ອງ-ແປະ, ເດສົ້າ ເຖົາ ເປັຍ ຢ້ຽມ ເກນ.’” #44:29 ຢ້ຽມ ເກນ ໄຟ ໂຕສ໊ວ. ຢຽມ 44:31 ຟີ່ ຮນັ້ງ ເຍີຍ.

30ຢູດາ ແອ໋ງ ກ໊ອງ, “ເຊ ກ໊ອງ ເຢຍ ດສ໋ວນ ເມີ່ຍ ເຍີຍ ໂປວ, ເຢຍ ເຍີຍ ເຕຍ, ວົ້ວ, ຢ່າ ໄມ້ ມ່າຍ ນ້າຍ ເຕົ້າ ຕອນ ເຖສົາ ເຢຍ ດສ໋ວນ, 31ເຢຍ ເຍີຍ ເຕຍ ປວັດ ເຢຍ ເຍີຍ ໂຢ໌ວ ໄມ້ ເຖສົາ ເຢຍ ດສ໋ວນ ນໍ, ນິ່ນ ຕສ່ຽວ ໄຕ່ ອ໊ະ, ເຫວີ່ຍ ຕສຸ ນ້າຍ ເຕົ້າ ຕອນ ໂຕສ໋ວ ເຢຍ ເຍີຍ ເຕຍ ເຍີຍ ບະດສິວ-ກອນ. ຮນັ້ງ ນ້າຍ ເຢຍ ເຍີຍ ເຕຍ, ເມີ່ຍ ເຍີຍ ໂປວ, ອົງ-ມອກ໊ອງ-ແປະ, ເດສົ້າ ເຖົາ ໄຕ່. #44:31 ຟານ ຕສະ ກ໊ອງ ເຖົາ ເປັຍ ຢ້ຽມ ເກນ. 32ເຢຍ ກັ້ນ ຫລົ່ງ ເຢຍ ເຍີຍ ແໝ່ງ ໂຕສ໋ວ ດາມ-ຕ້າວ ບົ໋ວ ເຢຍ ເຍີຍ ເຕຍ, ‘ເຢຍ ໄມ້ ຕໍ້ ນ້າຍ ເຕົ້າ ໂຢ໌ວ ດສ໋ວນ ປຸນ ເຕຍ ນໍ, ເຢຍ ແລ໌ງ ຢຽມ ເຕຍ ເຍີຍ ດສະຮມຽນ ຢຽດ ເສີຍ ດາມ-ຕອງ.’

33“ຮນັ້ງ ໜ່າຍ, ເຢຍ ໂທ້ ປຸນ ເຢຍ, ເມີ່ຍ ເຍີຍ ໂປວ, ຢຽມ ນ້າຍ ໂຕສ໋ວ ເມີ່ຍ ເຍີຍ ໂນ່ວ ຕີ໊ ນ້າຍ ເຕົ້າ ຕອນ. ໂທ້ ປຸນ ນິ່ນ ກັນ ຈ໊ຽນ ນິ່ນ ເຍີຍ ກໍ໋ ບົວ ດສ໋ວນ ອ໊ະ ໂອ່. 34ເຊ ກ໊ອງ ນ້າຍ ເຕົ້າ ຕອນ ໄມ້ ເຖສົາ ເຢຍ ດສ໋ວນ, ເຢຍ ຮນັ້ງ ຫາຍ ນໍ ໄຮ່ ດສ໋ວນ ເຢຍ ເຍີຍ ເຕຍ ວົ້ວ. ເຢຍ ໄມ້ ອ໋ອຍ ປວັດ ເຢຍ ເຍີຍ ເຕຍ ຕສຸ ເຕສະ ໜ່ານ ຫ່ອຍ ນິ່ນ.”

Currently Selected:

ທິນ ເຕີ່ຍ ໂຕ້ວ 44: IuMiLAO

Highlight

Copy