ທິນ ເຕີ່ຍ ໂຕ້ວ 34

ຢຽມ ເຊເຄມ ຕສີ້ງ ທສວດ ເຍີຍ ສີ່

1ຢາໂຄບ ເຖສົາ ເລອາ ມ່າຍ ເຕົ້າ ເຊັຍ, ບົ໋ວ ເຫ່ວ ດີນາ. ມ່າຍ ຮນອຍ ດີນາ ທສວດ ມີ່ງ ເຖສົາ ວົ້ວ ນອມ ຕ໋ອງ ເຍີຍ ມເຊັຍ ຕອນ ດສຢ່າວ. 2ກຸ໊ນ ວົ້ວ ນອມ ຕ໋ອງ ເຍີຍ ຮີໄວ ມ່ຽນ, ຮາໂມ ເຍີຍ ຕອນ, ເຊເຄມ, ປວັດ ດີນາ ຕສ່ຽວ ເຍົາ ຈ໊ຽນ ນິ່ນ ທສາ. 3ນິ່ນ ໄຮ໌ ຮນ້ຳ ນ້າຍ ເຕົ້າ ເຊັຍ, ດີນາ, ຕສ່ຽວ ເຖສົາ ດີນາ ກ໊ອງ ຫລົງ, ອ໋ອຍ ດົ໊ວ ນ້າຍ ເຕົ້າ ເຊັຍ ຮນ້ຳ ນິ່ນ. 4ເຊເຄມ ບົ໋ວ ນິ່ນ ເຍີຍ ເຕຍ, ຮາໂມ, “ໂທ້ ເຕຍ ມີ່ງ ເຖງ ເຢຍ ກ໊ອງ ນ້າຍ ເຕົ້າ ເຊັຍ ໂອ່.”

5ຢາໂຄບ ຮິ້ວ ຕຸ໊ ເຊເຄມ ໂຕສ໋ວ ປຸນ ນິ່ນ ເຍີຍ ເຊັຍ ເຍີຍ ເມ່ງ ເຕົ້າ ຫວ່າຍ ມປ່າ ຢາໂຄບ ໄມ້ ແກ້ງ ກ໊ອງ ຫາຍ ຫຍູ່ງ ເຫວີ່ຍ ຕສຸ ນິ່ນ ເຍີຍ ຕອນ ບົວ ຢຽມ ວົ້ວ ນ່າ ປູ໋ງ ແຊງ-ຄູ້. ນິ່ນ ຕສົ໊ວ ຈ໊ຽນ ນິ່ນ ເຍີຍ ຕອນ ບົວ ດສ໋ວນ.

6ເຊເຄມ ເຍີຍ ເຕຍ, ຮາໂມ, ທສວດ ມີ່ງ ເຖສົາ ຢາໂຄບ ທສ່າງ ລ່າງ. 7ຢາໂຄບ ເຍີຍ ຕອນ ບົວ ຢຽມ ວົ້ວ ນ່າ ຢ໊ຽດ ໄຮ໌ ນ້າຍ ເຕີ໋ຍ ສີ່ ນິ່ນ ບົວ ຕສ່ຽວ ດສ໋ວນ ຕ້າຍ. ນິ່ນ ບົວ ໄຮ໌ ໂຮຍ້ວ ຫວ່າຍ ເດສ່ງ, ເຖຈຍ ເຈ໌ຍ ໄຫ່ ເຊເຄມ ຮນັ້ງ ນ້າຍ ນໍ ໂຕສ໋ວ ໂຕະ ທສາ ຢາໂຄບ ເຍີຍ ເຊັຍ. ເຊ ໄມ້ ຫອບ ຕສຸ ໂຕສ໋ວ ເຍີຍ ສີ່ ຢ່າ ໝັ່ງ ເຜຍ ໄຫ່ ນິ່ນ ບົວ ອິສະລາເອນ ມ່ຽນ.

8ຮາໂມ ກ໊ອງ ບົ໋ວ ຢາໂຄບ ບົວ ຕອນ-ເຕ໋ຍ ຕ່ອຍ, “ເຢຍ ເຍີຍ ຕອນ, ເຊເຄມ, ຮນ້ຳ ໄຫ່ ນ້າຍ ເຕົ້າ ເຊັຍ. ໂທ້ ເມີ່ຍ ບົວ ປຸນ ນ້າຍ ເຕົ້າ ເຊັຍ ເຢຍ ເຍີຍ ຕອນ ຫລົ່ງ ໂຕສ໋ວ ເອົ໊າ. 9ຢຽມ ນ້າຍ ມີ່ງ ບົວ ລົ່ມ ດສ້ອຍ ຈິວ ທົງ. ປູ໋ງ ເມີ່ຍ ບົວ ເຍີຍ ເຊັຍ ປຸນ ເຢຍ ບົວ ເຍີຍ ຕອນ ຫລົ່ງ, ຢ່າ ຕໍ້ ເຢຍ ບົວ ເຍີຍ ເຊັຍ ປຸນ ເມີ່ຍ ບົວ ເຍີຍ ຕອນ ຫລົ່ງ. 10ຮນັ້ງ ນ້າຍ ເມີ່ຍ ບົວ ໄຮ່ ເຖສົາ ເຢຍ ບົວ ຈວັ່ງ ເຕີ່ຍ-ປູງ ຢຽມ. ເມີ່ຍ ບົວ ອ໋ອຍ ຢຽມ ຫາຍ ນອມ ຕ໋ອງ, ກຸ໊ນ ຢຽມ ຕຸ໊ ເຍີຍ, ແອ໋ງ ລໍ໌ ເດົາ ຫລຽບ ກັ້ນ ເຍີຍ ງວ໌າ-ກອນ, ເປັຍ ທສວດ ໂຕສ໋ວ ແຊງ-ເອີ໋ຍ.”

11ເຊເຄມ ຢ່າ ກ໊ອງ ບົ໋ວ ດີນາ ເຍີຍ ເຕຍ ເຖສົາ ນິ່ນ ເຍີຍ ກໍ໋ ບົວ, “ໂທ້ ເມີ່ຍ ບົວ ອກອຍ ຟິມ ອກອຍ ເອີ໋ຍ ເຢຍ. ເມີ່ຍ ບົວ ອ໋ອຍ ຫລົ່ງ ຫາຍ ຫຍູ່ງ ເຢຍ ຕສ່ຽວ ປຸນ. 12ອ໋ອຍ ຫລົ່ງ ເລີ໌ຍ-ກີງ ເຖສົາ ຕສີ້ງ ເຫຍີ່ຍ ບຸເຕສ໋ຍ ກຸ໊ນ ກ໊ອງ ມ່າະ! ເມີ່ຍ ບົວ ອ໋ອຍ ຫລົ່ງ ຫາຍ ຫຍູ່ງ ບຸເຕສ໋ຍ ເຢຍ ປຸນ ເດສ່ງ, ຕະຟ່ານ ຕຸ໊ ເມີ່ຍ ບົວ ເຍີຍ ເຊັຍ ຮນັ້ງ.”

13ຫລາຍ ເຊເຄມ ໂຕສ໋ວ ຫວ່າຍ ນິ່ນ ບົວ ເຍີຍ ໝົ່ວ, ດີນາ, ເຍີຍ ເມ່ງ ເຕົ້າ, ຢາໂຄບ ເຍີຍ ຕອນ ບົວ ດົ໊ວ ເຊເຄມ ເຖສົາ ນິ່ນ ເຍີຍ ເຕຍ, ຮາໂມ. 14ນິ່ນ ບົວ ກ໊ອງ, “ເຢຍ ບົວ ໄມ້ ໄຮ່ ປູ໋ງ ເຢຍ ບົວ ເຍີຍ ໝົ່ວ ປຸນ ໄມ້ ເຈ໋ຍ ກ໊າດ ເຍີຍ ເລີ໌ຍ ເຍີຍ ມ່ຽນ ຫລົ່ງ. ຮນັ້ງ ນ້າຍ ໂຕສ໋ວ, ເຢຍ ບົວ ເຍີຍ ເມ່ງ ເຕົ້າ ຫວ່າຍ ເດສ່ງ ອ໊ະ. 15ເຢຍ ບົວ ມ່າຍ ດຸ ຕິ້ວ ເລີ໌ຍ ຮນັ້ງ ຖສີງ ໄຮ່ ແລ໌ງ ປຸນ, ເຊ ເມີ່ຍ ບົວ ເຕົ້າໆ ມຈັ່ງ ຕອນ ອ໋ອຍ ຕສຸ ຮນັ້ງ ເຢຍ ບົວ ນໍ, ເຈ໋ຍ ກ໊າດ ເຍີຍ ເລີ໌ຍ ເດສ່ງ. 16ຮນັ້ງ ໜ່າຍ ເຢຍ ບົວ ຕສ່ຽວ ໄຮ່ ປູ໋ງ ເຢຍ ບົວ ເຍີຍ ເຊັຍ ປຸນ ເມີ່ຍ ບົວ, ຢ່າ ຕໍ້ ເມີ່ຍ ບົວ ເຍີຍ ເຊັຍ ຕ້າຍ ຫລົ່ງ ໂຕສ໋ວ ເອົ໊າ. ເຢຍ ບົວ ຢ່າ ໄຮ່ ເຖສົາ ເມີ່ຍ ບົວ ຈວັ່ງ ເຕີ່ຍ-ປູງ ຢຽມ. 17ມປ່າ ເຊ ກ໊ອງ ເມີ່ຍ ບົວ ໄມ້ ໝວັງ ເຢຍ ບົວ, ໄມ້ ເຈ໋ຍ ກ໊າດ ເຍີຍ ເລີ໌ຍ ເດສ່ງ, ເຢຍ ບົວ ຕໍ້ ເຢຍ ບົວ ເຍີຍ ໝົ່ວ #34:17 ຮິບລູ ຫວ່າ ກ໊ອງ ເຊັຍ. ເປຢົ໋າ ອ໊ະ.”

18ຮາໂມ ເຖສົາ ນິ່ນ ເຍີຍ ຕອນ, ເຊເຄມ, ໄຮ໌ ນ້າຍ ເຕີ໋ຍ ຫວ່າ ຫອບ ໂຮຍ້ວ ເຍີຍ. 19ວົ້ວ ເຕົ້າ ຕອນ ຕສ່ຽວ ໄມ້ ໄງ່, ເອີຍ ຈ໊ຽນ ຢາໂຄບ ເຍີຍ ຕອນ ບົວ ເຍີຍ ຫວ່າ ກ໊ານ ຈ໊ຽນ ໂຕສ໋ວ, ເຫວີ່ຍ ຕສຸ ນິ່ນ ຮນ້ຳ ໄຫ່ ຢາໂຄບ ເຍີຍ ເຊັຍ. ນິ່ນ ບົວ ຢຽດ ຕສູ໊ງ ມົ໌ວ-ຕ່ອຍ ເຊ ເຊເຄມ ໂຕສ໋ວ ເກົ້າ ໂຮລ ເຈ໋ຍ. 20ຮາໂມ ເຖສົາ ນິ່ນ ເຍີຍ ຕອນ, ເຊເຄມ, ຕສ່ຽວ ມີ່ງ ຕສີ້ງ ແກ້ງ ດ່າງ ເຖສົາ ຢຽດ ນອມ ຕສີ້ງ ເຍີຍ ກໍ໋-ໂຢ໌ວ ກ໊ອງ. 21ນິ່ນ ບົວ ກ໊ອງ, “ນ້າຍ ເຕີ໋ຍ ມ່ຽນ ເຖສົາ ບົວ ໂຕສ໋ວ ກໍ໋-ໂຢ໌ວ ຕ່ອຍ. ບົວ ອ໋ອຍ ຕສຸ ປຸນ ນິ່ນ ບົວ ເຖສົາ ບົວ ຈວັ່ງ ເຕີ່ຍ-ປູງ ຢຽມ, ເປັຍ ທສວດ ມ໌າຍ ໝ່າຍ. ບົວ ເຍີຍ ເຕີ່ຍ-ປູງ ຈັ໊ງ ເຍີຍ, ເກົ໋າ ຕຸ໊ ປຸນ ນິ່ນ ບົວ ຢຽມ ເຍີຍ. ບົວ ຢ່າ ໄຮ່ ຫລົ່ງ ນິ່ນ ບົວ ເຍີຍ ເຊັຍ. ນິ່ນ ບົວ ຢ່າ ໄຮ່ ຫລົ່ງ ບົວ ເຍີຍ ເຊັຍ. 22ນ້າຍ ເຕີ໋ຍ ມ່ຽນ ອະເຮນີ້ຍ ເຖສົາ ບົວ ຈວັ່ງ ເຕີ່ຍ-ປູງ ຢຽມ, ເປ໋ນ ຢຽດ ຝີງ, ມປ່າ ມ່າຍ ຢຽດ ຕິ່ວ ນິ່ນ ບົວ ຖສີງ ຕ້າຍ ແລ໌ງ, ເຊ ບົວ ເຕົ້າໆ ມຈັ່ງ ຕອນ ອ໋ອຍ ຕສຸ ຮນັ້ງ ນິ່ນ ບົວ ນໍ, ເຈ໋ຍ ກ໊າດ ເຍີຍ ເລີ໌ຍ. 23ນິ່ນ ບົວ ເຍີຍ ແຊງ-ຄູ້, ນິ່ນ ບົວ ມ່າຍ ເຍີຍ ຫຍູ່ງໆ ກະນ້າຍ ຕສ່ຽວ ເປ໋ນ ບົວ ເຍີຍ ໄມ້ ເຕສີ໌ຍ? ໂທ້ ປຸນ ບົວ ຮນັ້ງ ນ້າຍ ນໍ ໂຕສ໋ວ. ນິ່ນ ບົວ ຕສ່ຽວ ເຖສົາ ບົວ ຢຽມ ນ້າຍ ອ໊ະ.”

24ວົ້ວ ນອມ ຕສີ້ງ ເຍີຍ ຢຽດ ຕສວັ໋ງ ກໍ໋-ໂຢ໌ວ ປວັ໊ງ ໂຮຍ້ວ ຮາໂມ ເຖສົາ ເຊເຄມ ເຍີຍ ຫວ່າ. ຕສີ້ງ ກະຍົ໌ວ ເຍີຍ ຢຽດ ຕສູ໊ງ ມຈັ່ງ ຕອນ ຕສ່ຽວ ເຈ໋ຍ ກ໊າດ ເຍີຍ ເລີ໌ຍ ເດສ່ງ.

25ເຈ໋ຍ ລິ໌ວ ກ໊າດ ເຍີຍ ເລີ໌ຍ ຕະຟາມ ຮນອຍ ວົ້ວ ຮນອຍ, ວົ້ວ ເຕີ໋ຍ ມຈັ່ງ ຕອນ ຖສໍ່ ມຸນ ຈ໊ຽນ ເຍີຍ. ອີ ເຕົ້າ ຢາໂຄບ ເຍີຍ ຕອນ, ດີນາ ເຍີຍ ກໍ໋, ສິເມໂອນ ເຖສົາ ເລວີ, ປຸ໋ຍ ຈ໊ຽນ ດສຸ ດ໊າວ ເປັຍ ຕສີ້ງ, ລ່ຽມ ໄມ້ ມ່າຍ ຫາຍ ເຕົ້າ ໂກ໊ວ ເຍີ່ຍ. ນິ່ນ ບົວ ຕສ່ຽວ ເປັຍ ມີ່ງ ໄຕ໋ ເດສ່ງ ວົ້ວ ນອມ ຕສີ້ງ ເຍີຍ ມຈັ່ງ ຕອນ. 26ລ່ຽມ ຮາໂມ ເຖສົາ ເຊເຄມ ອີ ຕອນ-ເຕ໋ຍ, ນິ່ນ ບົວ ຢ່າ ໄຕ໋ ກວັ່ງ ໝີ່ ອ໊ະ. ຢ່າ ຕໍ້ ດີນາ ຢຽມ ເຊເຄມ ເຍີຍ ເປຢົ໊າ ທສວດ ມີ່ງ ໝີ່ ອ໊ະ. 27ຢາໂຄບ ເຍີຍ ຕອນ ບົວ ເປັຍ ນ້າຍ ເຕີ໋ຍ ຕສຸ ໄຕ໋ ໄຕ່ ເຍີຍ ມ່ຽນ ເຍີຍ ເປຢົ໊າ, ລູ້ ເດສ່ງ ວົ້ວ ນອມ ຕສີ້ງ, ຫລາຍ ວົ້ວ ນອມ ຕສີ້ງ ເຍີຍ ມ່ຽນ ໂຕສ໋ວ ປຸນ ນິ່ນ ບົວ ເຍີຍ ໝົ່ວ ເຍີຍ ເມ່ງ ເຕົ້າ ຫວ່າຍ. 28ນິ່ນ ບົວ ເຕສ໊າະ ປະກີ ຢູ້ງ, ຢູ້ງ, ງົ່ງ, ລໍ່, ຢຽດ ຕສູ໊ງ ກະນ້າຍ. ໄມ້ ກຸ໊ນ ຢຽມ ຕສີ້ງ ໄຟ ຢຽມ ເດີ່ຍ, ນິ່ນ ບົວ ເຕສ໊າະ ເດສ່ງ ໝີ່ ອ໊ະ. 29ຫາຍ ຫຍູ່ງ ມ່າຍ ຈ໋າ-ຕສິ້ນ ເຍີຍ ກະນ້າຍ ນິ່ນ ບົວ ຢ່າ ເຕສ໊າະ ເດສ່ງ. ລ່ຽມ ມເຊັຍ ຕອນ, ລ່ຽມ ຝຸຈ໊ວຍ ຢ່າ ຕໍ້ ຈ໊ຽນ ມີ່ງ. ລ່ຽມ ນິ່ນ ບົວ ເຍີຍ ຈາ-ຕີ້ງ ຢ່າ ລູ້ ອຈັງ ເດສ່ງ ໝີ່ ອ໊ະ.

30ຢາໂຄບ ບົ໋ວ ສິເມໂອນ ເຖສົາ ເລວີ, “ເມີ່ຍ ບົວ ຮນັ້ງ ນ້າຍ ນໍ ໂຕສ໋ວ ອ໋ອຍ ປຸນ ເຢຍ ຕສຸ ສີ່, ຕສຸ ຄານາອັນ ມ່ຽນ, ເປລິດຊີ ມ່ຽນ ເຖສົາ ຢຽດ ຕສູ໊ງ ຢຽມ ນ້າຍ ນອມ ເຕີ່ຍ-ປູງ ເຍີຍ ມ່ຽນ ດສອງ ເຢຍ ອ໊ະ. ບົວ ຢ່າ ໄມ້ ມ່າຍ ມ່ຽນ ທສ້ຳ. ເຊ ກ໊ອງ ວົ້ວ ເຕີ໋ຍ ມ່ຽນ ກັ໊ບ ທຈະ ຕ້າຍ ເບ໊າະ ເຢຍ ນໍ, ເຢຍ ເຖສົາ ເຢຍ ເຍີຍ ເປຢົ໊າ ຕສົງ ມ່ຽນ ຕສ່ຽວ ຕສຸ ໝຽດ ເດສ່ງ.”

31ນິ່ນ ເຍີຍ ຕອນ ບົວ ເຕົາ, “ເຢຍ ບົວ ໄມ້ ປຸນ ນິ່ນ ໂຕສ໋ວ ປຸນ ເຢຍ ບົວ ເຍີຍ ໝົ່ວ ຕ໋ອງ ໝ່າຍ ປ໊ວນ-ຊິນ ເຍີຍ ມເຊັຍ ຕອນ.”

Currently Selected:

ທິນ ເຕີ່ຍ ໂຕ້ວ 34: IuMiLAO

Highlight

Copy