Matthew 21

Jisua inlaltakin Jerusalema a lût

(Mk 11:1-11; Luk 19:28-40; Joh 12:12-19)

1Jisua le a ruoisingei Jerusalem an hongtung rangtôn Olive Muola Bethphage khuo an hongtunga. Mahan Jisua'n a ruoisingei lâia mi inik a tîr ngeia, 2an kôm, “Nin motona khuo son se ungla, sakuording, akôla ate leh ânthung mu kelen nin tih. Sût ungla, ko kôm hong kai roi. 3Tukhomin nin kôm imini an ti khomin, ‘Pumapa'n#21:3 Pumapa; aninônchuAn Pumapa. amin nâng kêng,’ tiin ril ngei roi; hanchu nangni hong min chôi kelen a tih,” a tipe ngeia.

4Dêipu'n a lei ti sai ahongtung dik theina ranga mahah ahong om ani:

5“Zion khopuilien hah ril roh,#Zak 9:9

En ta, ne rêng hah no kôm a hong zoi ani!

Ama hah rangâiinchîn takin sakuording chunga chuongin,

male sakuording ate innoi chunga chuongin,” ti hih.

6Masikin ruoisingei hah an va sea, Jisua'n tho ranga a tipe ngei ang han an va thoa: 7Sakuording leh ate hah an hong kaia, an chunga han an puonngei an dâpa, male Jisua a chuonga. 8Mipui tamtakin lampuia an puonngei an dâpa; adangngeiin thingbuo an tuka, lampuia an dâpa. 9Mipui Jisua moton tienga lônngei le a nûk tienga jûingei han, “David Nâipasal minpâkin om rese! Pumapa riminga juongpu chu Pathien'n satvur rese! Pathien minpâkin om rese!”#Lap 118:25,26 tiin an in-ieka.

10Jisua hah Jerusalem a lûtin chu, khopuilien pumpui anrêngin anin tirnata, “Hi mi hih tu mini?” tiin mipui ngeiin an rekela.

11Lokongei han, “Hi mi hih Dêipu Jisua, Galilee ram Nazareth renga ani,” tiin an thuona.

Jisua Biekina a se roi

(Mk 11:15-19; Luk 19:45-48; Joh 2:13-22)

12Jisua hah Biekina a lûta, Biekin sûnga neinun juorngei le rochôkngei murdi a rujûlpai ngeia. Sumthûlngei dosângngei le pharvali juorngei sukmunngei khom a nammelet pe ngeia, 13male an kôm, “Pathien lekhabua Pathien'n, ‘Ki in chu chubaithona in tîng an tih,’ tiin ânziek ani. Hannirese nangnin chu inru ngei inthupna khûrin kêng nin sin hi!”#Isa 56:7; Jer 7:11 a tipe ngeia.

14Biekina han mitcho ngei le kholrangei a kôm an honga, a lei mindam ngeia. 15Ochaisingei le Balam minchupungeiin sinkamâmruoi a sinngei le nâipangngei Biekina, “David Nâipasal kôm Hosanna, Minpâkin om rese!” tia an in-iek hah an mûn chu an ningathik zoia. 16Masikin Jisua kôm, “Hi mingei an ti hih ni riet mo?”#Lap 8:2 (LXX) tiin an rekela.

Jisua'n, “Adiktakin ki riet, Minpâkna akipphar pêk rangin nâipangngei le nâitesenngei nin minchu zoi, ti hih nin la pore tet ngâiloi mini?” tiin a thuona.

17Hanchu Jisua'n anni ngei hah a mâka, khopuilien renga Bethany'a a sea, mahan jân a riek zoi.

Jisua'n theichang kung khomâk a sâm

(Mk 11:12-14,20-24)

18Anangtûk jînga chu khopuilien tieng a kîr nôkin Jisua a vonchâm zoia. 19Lampui kôla theichang kung ava mua, male ava pana, hannirese abuongei tiloiin chu ite man mâka. Masikin theichang kung kôm han, “Inra nôk tet khâi no roh!” a tipea. Voikhat rengin theichang kung hah ahong thêm zoi.

20Ruoisingeiin maha an mua, an kamâmzala, “Kho angin mo theichang kung hih athêmpiel kelen hi?” tiin an rekela.

21Jisua'n an kôm, “Adiktakin nangni ki ril, iemna nin dôna mulungokchâna nin dôn tet nônchu hi theichang kung chunga ko tho ang hin tho thei nin tih. Mahi vai niloiin hi muol kôm khom hin, ‘Inthon inla, tuikhangliena juon pai roh,’ ti ungla juon pai atih. 22Nin iemin chu, chubaithoa nin ngên murdi chu man nin tih,” tiin a thuona.

Jisua rachamneina chungroia chongrekel

(Mk 11:27-33; Luk 20:1-8)

23Jisua hah Biekina a hong nôka, a minchu lâitakin, Ochaisingei le upangei an honga a kôm, “Tu rachamin mo hi neinunngei hih ni sin? Tumo hi racham nang pêk?” an tia.

24Jisua'n an kôm, “Chongrekel inkhat kei khomin nangni lei rekel rong, ni nin thuon theiin chu, tu rachamin mo hi neinunngei hih ki sin nangni ril ki tih. 25John Baptisma hah kho renga rachamneina mo: Pathien renga mo, miriem renga mo?” a tia.

Anni le anni an inkhal zoia, “Imo ei ti rang hi? ‘Pathien renga tiin ei thuon lakin,’ ama'n ei kôm, ‘Ithomo John hah nin iem loi?’ mi tîng a ta. 26‘Miriem renga ei ti lakin,’ mipui ngeiin imo minlo rang ei chi, mipui ngeiin John hah Dêipua an be sikin,” an tia. 27Masikin Jisua kôm, “Riet mak me.” tiin an thuona.

Jisua'n an kôm, “Kei khomin tu rachama mo hi neinunngei hih ki sin, nangni ril uol noning,” a tipe ngeia.

Nâipasal inik ngei chongmintêk

28“Atûn, Imo nin mindon? Tienlâia han mi inkhatin nâipasal inik a dôna. A nâi ulienpu kôm ava sea, a kôm, ‘Ka Nâipasal, avien chu grapebila senla, sin va tho roh,’ a tia. 29‘Ama han nuom mu-ung,’ tiin a thuona, aninâka chomolte suole chu a mindon a thûla male a se zoia. 30Male inkhat kôm han khom a sea, ma angdênin ava ti nôka. Ama han, ‘O, Pa,’ sêng ki tih, tiin a thuona. Hannirese se maka. 31Ha mi inik ngei han tu ha mo an pa nuomlam a sin uol?” a tia.

“Ulienpu han,” tiin an thuona.

Masikin Jisua'n an kôm, “Nangni ki ril: sum rusuongpungei le notizuorngei hin Pathien Rêngrama lût nangni an khêl rang ani hi. 32Baptispu John'n lampui dik nin jûi rang nangni a juong min mua, ama lei iem mak cheia; sum rusuongpungei le notizuorngeiin chu an lei iem ani. Nangni chu nin mu suonûk khomin nin mulungbôkngei thûlin ama iem mak chei.”#Luk 3:12; 7:29-30

Grapebila inlo mingei Chongmintêk

(Mk 12:1-12; Luk 20:9-19)

33Jisua'n an kôm nanâk, chongmintêk dang rangâi nôk roi a tia. “Voikhat chu tu mini ram pumapa a oma, hah mi han grapebil a thoa, bêr a minkula, grape epna rang khur a choia, a ngâkna rang in insâng a sina. Hanchu grapebil hah inlo mingei ngâk rang ngei kuta bângin, ram danga khuolchai a se zoia.#Isa 5:1-2 34Grape mara pot zora ahong tungin chu, ânlo mingei kôm han a chang rangtum va lâk rangin a suokngei a tîra. 35Ânlo mingei han a suokngei hah an lei sûra, inkhat an jêma, inkhat an thata, inkhat lung leh an dênga. 36Atharin suok dangngei motona nêka tam uolin a tîr nôka, motona ngei angdênin an lei tho nôk rêka. 37Anûktaka chu, ‘Ka nâipasal hi chu lei jâ ngêt an tih,’ tiin a nâipasal hah an kôm a tîra. 38Hannirese, ânlo mingei han a nâipasal hah an lei mûn chu, ‘Hi mi hih a pumapa nâipasal ani. Hong roi lei that rei u, male a rochon ei man rang ani!’ an tia. 39Masikin an sûra, grapebil pêntieng an vôrpaia, ama hah an that zoi.”

40“Atûn, grapebil pumapa a hong tikin, ha ânlo mingei hah imo hong lo ta nih?” tiin Jisua'n a rekela.

41Anni han a kôm, “Ha mi saloi ngei hah that ngei ngêt a ta, grapebil hah ânlo mingei adang, amara pot zora diktaka changrangtum a pêk ngâi rangpu kôm pêng a tih,” tiin an thuona.

42Jisua'n an kôm, Pathien Lekhabu'n,

“In sinpu ngeiin lung mangmunboi anga an hengpai hah,

akila lung kâmomtak achang zoi.

Ma hah Pumapa tho ania;

ei mitmua hin kamâmom ani! a ti hih nin pore ngâiloi mo?” #Lap 118:22-23 a tipe ngeia.

43Jisua'n a bôksa nôka, “Masikin nangni ki ril, Pathien Rêngram hih nin kôm renga lâkpai nîng ata, amara musuo rang mingei kôm pêk nîng atih. #21:43 Miziek senkharngei chu archang 44 na an bôksa: Tutu hi lung chunga inpal chu ahârhârin om an ta; male hi lungin adel vang chu innôichit an tih Luk 20:18 en roh. 44Tutu hi lung chunga ânpal chu ahârhârin om an ta, hi lungin adel vâng chu innôichit an tih,” a tia.

45Ochaisingei le Phariseengeiin Jisua chongmintêk misîr hah an rietin chu, an chungroi a misîr ani ti an riet zoia. 46Masikin ama sûr rang an pût zoi. Aniatachu anni ngei han mipui ngei an chia, mipui ngeiin Jisua hah dêipu'n an be sikin.

Currently Selected:

Matthew 21: SAKNT

Highlight

Copy