Luka 4

Yesu Ayeshekwa kuli Satana

(Mat. 4.1-11; Mk. 1.12-13)

1Yesu afumine kumulonga wa Yolodani uwayiulamo no Mupashi Wabuta, alitanjililwe no Mupashi Wabuta ukumutwala muchiswebebe. 2Nkulya eko ayeshekelwe na Satana inshiku amakumi ane. Muli nshi nshiku shonse talilepo kantu. Napanuma yanshi nshiku, Yesu alyumfwile insala.

3Elo Satana amwebele ati, “Kati niwe Mwana Lesa, eba amabwe nga ukuti aaluke umufuba.”

4Elo Yesu amwasukile ati, “Chalilembwa ati, ‘Umuntu tangekala uwabumi pakulya umufuba wenka iyowo.’”#Deut. 8.3

5Nakambi Satana alimutwite apalundumene. Panshita inini amulangile amabufumu onse aamuchalo. 6Epo Satana asosele kuli ye ati, “Nkoyisa kukupela insambu shonse nomuchinsi washiko, pakuti fyapelwa kuli nebo. Nakambi ndinefiso fyakupela kumuntu onse uwo ntemenwe. 7Fyonse mfi fyakuba fyobe nga wanambila.”

8Yesu amwasukile ati, “Chalilembwa ati, ‘Ulokulambila Bashikulu Lesa obe, mba benka ebo ulokupyungila!’”#Deut. 6.13

9Elo Satana atwite Yesu ku Yelusalemu nokumuteka pachitumbe chananda yaku Lesa. Elo asosele kuli Ye ati, “Nga uli Mwana waku Lesa chilukila panshi. 10Pakuti chalilembwa ati, ‘Lesa akweba abangelo bakwe ukuti bese bakwanke.’#Amal. 91.11-12 11Nakambi chalilembwa ukuti, ‘Bakwisa kukwelekela pamaboko abo ukuti wiyitutulapo amakasa obe pamabwe.’”

12Yesu alyasukile ati, “Chalilembwa ati, ‘Wiyeshapo Bashikulu Lesa obe.’”#Deut. 6.16

13Ulo Satana ashilile ukumwesha Yesu munshila shonse, alimushile mukashita kanini.

Yesu atatika umulimo wakwe mu Galili

(Mat. 4.12-17; Mk. 1.14-15)

14Ulo Yesu abwelelemo ku Galili, nefiso fya Mupashi Wabuta fyali pali Ye. Epo ilyashi lyakwe lyaumfwikile konse-konse muli nchilya chalo. 15Elo alikubilisha mumananda akulombelamo Lesa, nabantu bonse abalikumfwako balimutotele.

Yesu bamukana mu Nasaleti

(Mat. 13.53-58; Mk. 6.1-6)

16Yesu ayile ku Nasaleti, uko akulile. Elo pakasuba ke Sabata ayinjile munanda yakulombelamo Lesa, ukubati kafuto kakwe. Alimine ukuti apende ifyamumalembo. 17Elo bamupele ibuku lyamusoseshi Esaya. Aliswile, asangilepo apalembelwe mfi,

18“Umupashi waku Lesa uli pali nebo,

pakuti alinsuba ukuti nkabilishe,

Ubutumi Bwawama kubachula.

Alintumine ukubile imbila

iyakuti bakakulwe abakakwa,

nakambi nempofu ukuti shibone,

nokulubula bo abasulwa.#Esa. 61.1-2

19Nokubila imbila yamwaka waku Bashikulu,

yakupulushamo abantu bakwe.”

20Yesu ayisele ndi buku nokulipela kumupyungi,#4.20 kumupyungi: Panshita njilya takwalipo amabuku kubati ninga tukwete nduno. Amashiwi aku Lesa alikulembwa pampapa napafipepala ifikosele. Kunanda yakulombelamo Lesa iili yonse, kwali umuntu uwalikuloleshapo pafintu mfi. Mba balikufumya nokubwesha pachifulo chakundelapo. Abantu mba ebo balikwita abapyungi. ayikala napanshi. Abantu bonse munanda yakulombelamo Lesa batontomekele amenso abo pali Ye. 21Elo atatikile ukusosa nabo ati, “Lelo nga Malembo afikilishiwa ukubati ifyo mwaumfwa mukupenda.”

22Nomba bonse balimulumbenye nokushimbwa pamashiwi alikusosa aamulangwe. Balikusosa bati, “Napo ngu temwana Yosefe?”

23Yesu asosele kuli bo, “Ina nchi chebo mwakwisa kusosa kuli ne ukuti, ‘We ng’anga, iposhe wemwine!’ Nakambi mwakwisa kulabila ati, ‘Chita munomushi mumyenu ifyo twaumfwile wachitile ku Kapenaumu.’” 24Elo abebele ati, “Nachine takwaba umusoseshi uungapokelelwapo muchalo chakumyabo. 25Nebo nkoebesha nati, kwali ifyokolo ifinji mu Isilaeli munshiku shaku Eliya, ulo kwali ichilala ichikulu pamyaka itatu nemyeshi isanu naumo. Elo nensala iikulu yaliponene muchalo chonse.#1 Ishamf. 17.9 26Epo Eliya tatuminwepo kuli umo uwaku bo, kuntu atuminwe kuchokolo ichalikwikala mumushi wa Selepeta muchalo cha Sidoni. 27Elo eko bali abafyona abenji muchalo cha Isilaeli panshita yamusoseshi Elisha, kuntu takwalipo nangu umo uwaku bo uwaposhiwe, kuntu Namani enka uwamuchalo cha Siliya.”#2 Ishamf. 5.1

28Abantu bonse munanda yakulombelamo Lesa pakumfwa nga mashiwi, balikalipile ukwinekantu. 29Balimine nokutulumuna Yesu kunse yamushi. Bamutwala pamulu walupili apo umushi wabo wayimekwe nokuti bamusunkile muchinkunu-nkunu. 30Nomba Ye apulilile mwibumba nokuya kaya.

Umuntu uwali nomupashi uubi

(Mk. 1.21-28)

31Ulo Yesu ayile ku Kapenaumu, umushi wamu muchalo cha Galili, alikusambisha abantu pe Sabata. 32Bonse balishimbilwe pakusambisha kwakwe, pantu amashiwi akwe ali nensambu. 33Epo munanda yakulombelamo Lesa, mwalipo umuntu umo uwali nomupashi uubi. Ngu muntu alyawile neshiwi ilikulu ati, 34“Yangwee! Nindo ukofwaya kuli fwe, we Yesu waku Nasaleti? Napo wayishila ukutonaula? Ne ndikwishi, niwe Wabuta waku Lesa!”

35Yesu akalipile umupashi uubi ngulya ati, “Talala, fumamo muli ngu muntu!” Umupashi ngulya walimupamine panshi mulwalala. Penkapo walifuminemo ukwambula ukumuchena.

36Abantu bonse balishimbilwe, balikusoshanya umo nomunakwe bati, “Nga aya mashiwi alola mwisa? Munsambu nefiso uyu muntu akososa kumipashi iibi nayo ikofumamo!” 37Nomunkunta wakwe walyumfwikile konse-konse muli nchilya chalo.

Yesu aposha abantu abenji

(Mat. 8.14-17; Mk. 1.29-34)

38Yesu afumine munanda yakulombelamo Lesa, ayile kwinjila munanda yakwa Simoni. Banafyala wakwa Simoni pakuti balilwele umubili walikukaba. Epo balimwebele Yesu ifyakulwala kwabo. 39Yesu ayile kwimakana pambali yabulo bwamulwele, elo aebele ubulwele ukufumamo. Penkapo balipolele. Bwangu-bwangu batatikile nokubatebeta.

40Nomba akasuba ulo kali mukuwa, bonse abali namalwele apusene-pusene babatwite kuli Yesu. Naye alikubikapo amaboko akwe pali umo-umo nokubaposha bonse. 41Elo imipashi iibi nayo yalikufuma mubenji, yalikusosa nokusosa ati, “Webo niwe Mwana Lesa!”

Yesu naye aliyikalipile nokuyikanya ukusosa. Pakuba yena yalishibile ukuti Yesu e Wasubwa waku Lesa.

Yesu abilisha mu Yudeya

(Mk. 1.35-39)

42Kumacha, Yesu alimine nokuya kuchifulo chimo apaenka. Abantu batatikile ukumufwaya-fwaya. Ulo bamusangile balyeseshe ukumusungilila ukuti ebasha. 43Nomba asosele kuli bo, “Nebo nkowamina ukubilisha Ubutumi Bwawama ubwabufumu bwaku Lesa kumishi nayimbi pakuti echo natuminwe.”

44Epo alikubilisha mumananda akulombelamo Lesa muchalo chonse icha Yudeya.

Currently Selected:

Luka 4: LalaNT

Highlight

Copy