Luka 23
23
Yesu aatwalwa kuli Pilato
(Mat. 27.1-2,11-14; Mk. 15.1-5; Yoh. 18.28-38)
1Abantu abenji balimine nokutwala Yesu kuli Pilato. 2Nkulya batatikile ukumwebaula ati, “Twayikete ngu muntu pakuti akolufyanya abantu besu. Akobeba ati mwilokupelapo imisonko kuli kateka mukulu waku Loma nakambi akoeba ukuti Ewasubwa waku Lesa, imfumu.”
3Pilato alimufumbile ati, “Napo webo niwe mfumu ya Bayuda?”
Yesu amwasukile ati, “Wasosa.”
4Elo Pilato asosele kuntungulushi shabachipupila nakumabumba ati, “Nebo tanshisangilemo umulandu muli ngu muntu.”
5Nomba bo balikatishe ukwinekantu ati, “Mukusambisha kwakwe akotatika ifimfulunganya mukati kabantu ukupita monse muchalo cha Yudeya. Atatikile mu Galili nakambi ayisa nankuno.”
Yesu atumwa kuli Helodi
6Ulo Pilato aumfwile nchi, alifumbile ati, “Kanshi ngu muntu waku chalo cha Galili?” 7Ulo ye ayishibile ati Yesu afumine kuchalo chitekwa na Helodi, atumine Yesu kuli Helodi, uwali mu Yelusalemu pali njilya nshita. 8Helodi alitemenwe ukwinekantu ulo abwene Yesu pakuti alikufwayisha ukumubona panshita iitali. Pantu alikufwayisha ukuti abonepo ichishibilo icho Yesu angachita. 9Epo Helodi afumbile Yesu amafumbo ayenji, kuntu Yesu tamwasukilepo. 10Elo intungulushi shabachipupila nabasambishi ba Mafunde bayishile kuntanshi nokusosesha nefiso mukwebaula Yesu mufintu ifinji. 11Nakambi Helodi pamo nabashilikali bakwe basekulukile Yesu nokumusalula ukwinekantu. Elo bamufwikile umwinjila uuweme nokumubwesesha kuli Pilato. 12Mwenka muli nkalya kasuba, Helodi na Pilato baambene buchibusa, kuntu afitalabako mfi balipatene.
Yesu apingulwa ukwipayiwa
(Mat. 27.15-26; Mk. 15.6-15; Yoh. 18.9—19.16)
13Pilato ayitile pamo intungulushi shabachipupila, bafilolo nabantu. 14Asosele kuli bo ati, “Mwaletele ngu muntu kuli nebo nokweba ati alikupufyanya abantu. Nomba nebo namufumbile pamenso enu, tanshisangilemo umulandu nangu umo muli fyonse ifyo mwamwebelela. 15Nangu ni Helodi naye tasangilemo umulandu. Echo amubweseshe kuli fwebo. Takupo nangu chimo icho ngu muntu achitile ichingalenga ukuti epayiwe. 16Epo nkomupanda bwaka ifikoti nokumuleka alokuya.” [ 17Panshita yakulya Chakulya Chakuchilila Pilato alikubakakwila umo uwaku bo abafungwa.]
18Nomba ibumba lonse ilyabantu lyalibilikishe ati, “Mwipayeni ngu! Utukakwile Balabasi.” ( 19Balabasi ngu abikilwe muchifungo pantu ewali intanjishi wafimfulunganya ifyali mumusumba, pamulandu wakwipaya umuntu.)
20Nomba Pilato afwayile ukukakula Yesu, epo alifumbile abantu nakambi. 21Elo abantu balibilikishe bati, “Musamikeni! Musamikeni!”
22Pilato asosele kuli bo inshita yachitatu ati, “Nomba mulandu ndo uwo achitile? Nshisangilepo umulandu uwo achitile uwakuti alingile epayiwe! Nebo nkomupanda bwaka ifikoti nokumuleka alokuya.”
23Nomba balikatishe nokubilikisha ukwinekantu mumashiwi abo ukuti Yesu alingile ukusamikwa pamutashi. Kumupwilo chilya chongo chabo chalyumfwikilwe. 24Elo Pilato alipingwile Yesu ukulingana nomo abene balikufwayila. 25Abakakwilile Balabasi, uyo uwaposelwe muchifungo pamulandu wachimfulunganya nokwipaya, elo abapele Yesu ukuti bamuchitile ifyo balikufwaya.
Basamika Yesu pamutashi
(Mat. 27.32-44; Mk. 15.21-32; Yoh. 19.17-27)
26Elo abashilikali bapintile Yesu. Ulo balikuya, bakumenye umuntu uwafumine kumushi wa Sailini, uwitwa Simoni. Alikwisa mumusumba wa Yelusalemu ukufuma mumpanga. Balimwikete nokumutwika umutashi ukuti apinte nokukonka Yesu panuma.
27Elo ibumba ilikulu ilyabantu lyalimukonkele. Mukati kabo mwali nabanakashi abali kulila imisowa. 28Yesu achebele kunuma nokuti kuli bo, “Mwe banakashi bamu Yelusalemu! Mwindilila, kuntu muyililile mwenka nabana benu. 29Pantu inshita ikoyisa ulo abantu bakwisa kusosa bati, ‘Balishuka abanakashi abatafyalapo nokonsha abana!’ 30Yakuba ninshita iyo abantu bakusosa kumpili ati, ‘Wileni pali fwebo!’ Nakutupili ati, ‘Tufiseni fwebo!’ 31Kati mfi fikochitika kuchiti ichibishi, mba kwakwisa kuba shani kuchauma?”
32Abantu mbalya bapintile utupondo tubili ukuti tukepayiwe pamo na Yesu. 33Ulo bafikile kuchifulo ichitwa, “Ifupa Lyamutwi,” bapopele Yesu pamutashi pamo notupondo ntulya. Kamo kukuboko kwakwe ukwamulyo, kambi nako kuchipiko. 34Yesu asosele ati, “Bata, banakilileni pantu tabeshibilepo icho bakochita.”
Elo bayakene amalaya yakwe mukuchita bumwine-mano. 35Abantu bambi abayimakene mpalya balikutamba ulo intanjishi sha Bayuda shalikumusekuluka ati, “Alikupulusha bambi, lekeni ayipulushe umwine enka, kati chine e Wasubwa waku Lesa, wasalwa!”
36Nabo abashilikali balimusekulukile. Baletele waini uwasasa nokumupela ukuti anwe. 37Epo basosele ati, “Ipulushe wemwine kati niwe Mfumu ya Bayuda!”
38Pamutashi wamutwi wakwe palilembelwepo nga mashiwi, “Ngu ni Mfumu ya Bayuda.”
39Umo uwaku bo bandeta-twebo uwasamikilwe mpalya alimwebawile nokumusalula Yesu ati, “Napo te wepo Uwasubwa waku Lesa? Ipulushe wemwine nafwe pamo!”
40Umbi ngulya, nangu chali mfilya, alimukalipile nokuti, “Taukotinapo Lesa? Pantu nobe wapingulwa ukufwa pamo naye. 41Fwebo nangu chili mfi, chatulinga pantu twapokelela ukulingana nefyo twachita. Nomba ngu tabifyapo akantu.” 42Elo asosele kuli Yesu ati, “Mwe Yesu mukanjibukishe ulo mwakwisa mubufumu bwenu!”
43Yesu asosele kuli ye ati, “Nachine, nkano kasuba wakuba nandibo muchifulo chakusekelela.”
Imfwa yaku Yesu
(Mat. 27.45-56; Mk. 15.33-41; Yoh. 19.28-30)
44Inshita yali kubati 12 koloko, kwayishile imfinshi muchalo chonse ukufika panshita ya 3 koloko wachungulo. 45Epo nechansalu ichali munanda yaku Lesa chalyabakene pakati. 46Yesu ayawile neshiwi ilikulu ati, “Bata! Nabika umupashi wanji mumaboko enu!” Ulo asosele nga mashiwi, nokufwa kafwa.
47Umukulu wabashilikali ulo abwene ifyachitikilwe, achinshikile Lesa ati, “Nachine ngu umuntu takwetepo umulandu!”
48Elo abantu balongene nkulya mukutamba ifyalikuchitika, babwelelemo kumyabo ulo bayikunkunsha pafifuba. 49Abo bonse abali kwishiba Yesu nabanakashi abafumine ku Galili, bayimakene akatalamukila nokubona mfi fyonse.
Ukushikwa kwaku Yesu
(Mat. 27.57-61; Mk. 15.2-47; Yoh. 19.38-42)
50Kwali umuntu uwalikwitwa Yosefe, uwamu chilye cha Bayuda. Ye ali muntu uuweme nakambi uulungeme. 51Afumine muchalo cha Yudeya, mumushi wa Alimateya alikulindilila ukwisa kwa Bufumu bwaku Lesa. Nangu ali uwamukabungwe kafilolo, tasuminishenyepo nabo mukupingula nemichitile yabo. 52Ayile kuli Pilato mukulomba umubili waku Yesu. 53Elo asamwine umubili ngulya, aupombele munsalu iyambafuta nokuubika mumanda iyo bafukwile mwibwe, iitashikwamo umuntu. 54Kali kasuba kakupekanya pakuti Isabata lyali apepi ukutatika.
55Abanakashi abayishile na Yesu ukufuma ku Galili bakonkele Yosefe nokubona imanda nefyo umubili waku Yesu baulalikile. 56Elo babwelelemo kumushi mukupekanya utwanunji amafuta ayanunkila.
Nomba pakasuba ke Sabata balitushishe ukulingana ne Funde.#Ukuf. 20.8-11
Currently Selected:
Luka 23: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
