Luka 21

Ubupe bwachokolo

(Mk. 12.41-44)

1Yesu aliloleshe nokubona abantu abasambashi uko balikuposamo ifyabupe muchipawo chamunanda yaku Lesa.#21.1 chamunanda yaku Lesa: Munanda yaku Lesa mwali amabokoshi ikumi na atatu umo balikubika indalama ishakubomfya munanda njilya. 2Nakambi abwene ichokolo ichachula chabikamo utumakobili tubili utwamukuba. 3Elo Yesu asosele ati, “Nkomweba nati, ichokolo nchi chabikamo ukuchila bonse. 4Pantu bambi bapela ifyabupe fyabo ukufumya pamwina, kuntu nchi ichachula, chapela tonse uto chaali nokulilamo.”

Yesu asosa ukonaulwa kwananda yaku Lesa

(Mat. 24.1-2; Mk. 13.1-2)

5Bambi abakusambila balikusosa pafyananda yaku Lesa ifyo yalikuboneka bune namabwe ayiko aaweme ukwinekantu nefyabupe ifyalikupelwa kuli Lesa. Elo Yesu asosele ati, 6“Fyonse mfi ifyo mwabona, inshita yakwisa ulo tapakashalepo ibwe nangu limo pamulu walinakwe, onse nga akubungumuka.”

Amafya namachushi

(Mat. 24.3-14; Mk. 13.3-13)

7Elo bafumbile Yesu ati, “We musambishi, nilwisa mfi fintu fyakwisa kubako? Chishibilo ndo chakubako?”

8Elo Yesu abasukile ati, “Chenjeleni ukuti umuntu nangu umo ekamubepapo. Pakuba abenji bakwishila mwishina lyanji nokusosa ati, ‘Nine Klistu!’ Nakambi, ‘Inshita nomba yafika!’ Nomba mwibakonka. 9Mwilenga mube nomwenso ulo mwakumfwa ilyashi lyankondo nefyafitala muchalo. Mfi fili nokwisa kuchitika, kuntu tafikoyalulapo ati ukushila kwachalo kwapalamina.”

10Yesu alipitilishe mukusosa ati, “Ifyalo fyakwisa mukulwa nefyalo finakwe, nobufumu nabo bwakwisa kulwa nobufumu bunakwe. 11Kwakwisa kuba ifinkukuma, insala, nemyalu konse-konse. Kwakwisa kuba ifyakutinya nefishibilo ifinji ifyakufuma kumulu. 12Ulo mfi fyonse, fitalachitika, bakumwikata nokumuchusha. Elo bakumutwala mukupingulwa mumananda akulombelamo Lesa, nokumuposa muchifungo. Bakumutwala kuli bakateka nabapingushi pamulandu wanji. 13Ndi lyakuba lishuko lyenu ilyakubilisha Ubutumi Bwawama. 14Ishibileni limo, mwiyisa mukusakamikwa nokulanguluka ifyo mwakuyichingilila. 15Pakuti nakumupela amashiwi nomulangwe ichakweba ati nangu utupondo twenu tatwakamuchile nangu ukulengulula ifyo mwakusosa. 16Mwakwisa kwembulwa kubafyashi benu, bawenu, abamukowa wenu, nefibusa fyenu. Elo bambi abamuli mwe bakwipayikwa. 17Bonse bakumupata pamulandu muli bantu banji. 18Nomba takupo pali mwe uwakulofya nangu umushishi umo kumitwi yenu. 19Mube abakosele, elo mwakwipulusha mwebene.

Yesu asosa ukonaulwa kwaku Yelusalemu

(Mat. 24.15-21; Mk. 13.14-19)

20“Ulo mwakubona Yelusalemu washingulukwa nefita, elo mwakwishiba ukuti nibwangu akonaulwa. 21Nomba abamu Yudeya bakabutukile kumpili, na bo abakuba mumusumba kabafumemo, kuntu abali kumabala bebwelelamo. 22Pakuti nji eshita yamachushi, nku ekufikilisha fyonse ifyalembwa.#Ab.Lef. 26.31-33; Deut. 28.15-68; 32.35; 1 Ishamf. 9.6-9; Dan. 9.26; Mik. 3.12; Sek. 11.6 23We shamo we kubanakashi abali kwimitile nakubali konsha muli nshilya nshiku! Kwakuba ubuchushi ubukulu muchalo, nobukali bwaku Lesa bwakwisa kuba pali mba bantu. 24Bambi bakwisa kwipayiwa nemyele yankondo, bambi bakwisa kupintwa ubusha mufyalo fyonse. Abenafyalo bakunyantaula Yelusalemu ukufikila apo inshita yabo yakukumanina.

Ukwisa kwa Mwana wa Muntu

(Mat. 24.29-31; Mk. 13.24-27)

25“Kwakwisa kuba ifishibilo kukasuba, kumwenshi nakuntandala. Napanonshi, kwakwisa kuba ifyakutinya nefinkukuma fyaku bemba namatamba ayiko. 26Abantu bakwisa kufwa chipunge-punge kumwenso wakulinda ichikoyisa muchalo chonse pakuti ifiso fyamumulu fyakwisa kutenkana. 27Elo Umwana wa muntu akwisa kuboneka mumakumbi ali nefiso, elo nobuleme ubukulu. 28Ulo mfi fyakuchitika imakaneni, musansule imitwi yenu pakuti ukupuluka kwenu kwafika apepi.”

Isambililo lyachiti chamukunyu

(Mat. 24.32-35; Mk. 13.28-31)

29Elo Yesu abebele nchi chelusho ati, “Langulukeni nechiti chamukunyu nefiti fimbi. 30Ulo mubona amabula atatika ukusoka ulutundwa, muleshiba ukuti amayinsa apalama. 31Munshila imo yenka, ulo mwakubona mfi fintu fikochitika, mwakwishiba ukuti Ubufumu bwaku Lesa buli apepi.

32“Nachine nkomweba ati, abantu banjino nkulo pakufwa, sembi mfi fintu fyonse fikabale fikachitike. 33Umulu nechalo fyakupita, kuntu amashiwi anji akubelelela umuyayaya.

Ukulindilila ekufwayikwa

34“Ikaleni abayibukila! Muyiposa mukulya namukukolwa namumasakamiko yaku mbuno bumi, ichakuti nkalya kasuba keyisa kumupumikisha bwaka nokwikatwa 35nga chitembo. Pantu kakwishila abantu bonse panonshi. 36Beni abayibukila nokulomba inshiku shonse ukuti mube nefiso fyakwisa kupulamo muli fyonse ifyakuchitika. Elo mwakwisa kwimakana kuntanshi ya Mwana wa Muntu.”

37Yesu aposele shonse nshi nshiku akosambisha munanda yaku Lesa. Elo kuchungulo alikuya ku Lupili lwa Maolife. 38Muchalo chonse abantu bonse balikuya kunanda yaku Lesa mukumfwa ukusambisha kwakwe.

Currently Selected:

Luka 21: LalaNT

Highlight

Copy