Luka 19
19
Yesu na Sakeyo
1Yesu ayinjile mumushi wa Yeliko nokupitilila. 2Nomba mwali umukulu wabamusonko ishina lyakwe ni Sakeyo, ali umusambashi. 3Sakeyo alikufwaya ukubona Yesu, kuntu pamulandu wabwipi tamubwenepo, elo kwali nabantu abenji. 4Epo abutukile kuntanshi yebumba nokunina kuchiti cha sokomole, ukuti abone Yesu ulo alikupita pali njilya nshila. 5Ulo Yesu afikilepo pali nchilya chifulo, ayinwine amenso nokulabila ati, “Sakeyo, angufyanya ika, pakuti lelo nakwikala nawebo kunanda yobe.”
6Bwangu-bwangu Sakeyo alikile, nokupokelela Yesu nensangalashi. 7Ulo abantu bamubwene, batatikile ukuyilishanya bati, “Ngu muntu ayinjila munanda nokwikala pamo nembifi!”
8Naye Sakeyo alimine nokusosa kuli Bashikulu ati, “Umfweni, mwe Mfumu! Nakupela ichipande chabuboni bwanji. Fimbi mpeleko abachula, nakambi kati nalichenjelekapo umuntu uuli onse, nakumubweseshapo ukuchila imiku ine.”
9Elo Yesu amwebele ati, “Nkano kasuba ipusukilo lili muli njino nanda, pantu ngu muntu, naye mwana wakwa Abulahamu. 10Pakuti Umwana wa Muntu ayishile mukufwaya nokupulusha abaluba.”
Ichelusho chandalama sha golide
(Mat. 25.14-30)
11Ulo abantu balikumfwa nga mashiwi, Yesu apitilile mukubeba ichelusho pakuti ali apepi nokufika ku Yelusalemu. Abantu nabo balangulukile ukuti Ubufumu bwaku Lesa buli apepi ukufika. 12Epo asosele ati, “Kwali umuntu umuchindami uwalikuya kuchalo ichakutali, ukuya mukuba imfumu. Alangulukile ukubwelela kumushi. 13Ulo atalaya, ayitile abapyungi bakwe ikumi ukubapela umo-umo indalama yagolide nokubeba ati, ‘Fungashanyeni, tubone isho mwakusangamo ukufikila nkabwele.’ 14Nomba abekashi balimupatile. Elo batumine intumi uko ayile ati, ‘Tatukofwayapo ngu muntu ukuti abe mfumu yesu.’
15“Nangu chali mfi, ngulya muntu alibikilwepo pabufumu nokubwelelamo. Bwangu-bwangu ayitile abapyungi bakwe abo apele indalama ukuti asange isho bafungashenyemo. 16Uwakwamba asosele ati, ‘Mwe mfumu, nafungashenyemo indalama ikumi pali imo iyo mwampele.’ 17Imfumu yamwebele ati, ‘Wachita bwino, we mupyungi uuweme! Apo uli uwachetekelwa patunini, nkokubika ukuti ube kateka wamishi ikumi.’ 18Uwachibili naye asosele ati, ‘Mwe mfumu, nafungashenyemo indalama shisano pali imo iyo mwampele.’ 19Elo imfumu yamwebele ati, ‘Webo walikuteka imishi isano.’ 20Umupyungi uwakulekelesha naye alishile nokuti, ‘Mwe mfumu, indalama yenu ninji. Naliyikakilile kukasalu nokuyisunga. 21Nalitinine pakuti uli mukali. Ubula nefitali fyobe nokulobolola umo utaminshilemo.’ 22Imfumu yamwebele ati, ‘We mupyungi mubi! Walishiba ukuti ndimukali, elo ndabula nefitali fyanji nokulobolola umo ntaminshilemo. 23Chiweme, nga nindo utabikilepo ndalama yanji uko babika indalama? Nandibo pakubwela nga ndisangile nambiikilapo.’
24“Nomba imfumu yaebele abayimakene apepi ati, ‘Mupokeni indalama yakwe mupele uyo uukwete indalama ikumi!’ 25Nomba baebele imfumu ati, ‘Mwe mfumu, ngu alikwete kale indalama ikumi!’
26“Imfumu yabasukile ati ‘Nkomweba ati, kumuntu onse uukwete akubikilwapo nafimbi, kuntu uukwete akanini, nakanini ako akwete akupokwa. 27Nomba kuli ntulya utupondo twanji, ututalikumfwayapo ukuti mbe mfumu yatuko, tuleteni nkuno ukuti mutwipayile pamenso anji.’”
Basekelela Yesu pakwinjila mu Yelusalemu
(Mat. 21.1-11; Mk. 11.1-11; Yoh. 12.12-19)
28Ulo Yesu asosele nga mashiwi, abatanjilile ukuya ku Yelusalemu. 29Ulo apalamine apepi nemishi ya Betefage na Betani yaku Lupili lwa Maolife, atumine abakusambila bakwe ukuya mumushi ngulya. 30Elo abebele mfi, “Kamuya kumushi uuli kuntanshi yenu. Pakwinjilamo, mwakusanga umwana punda uwakakwa kuchiti, uyo uutaninwapo umuntu. Mukakuleni, nokumuleta nkuno. 31Kati umuntu akumufumba ati, ‘Mba nindo mukomukakwila?’ Mumwasuke mwati, ‘Bashikulu ebakomufwaya.’”
32Abatuminwe balile nokusanga mwenka umo Yesu abebele. 33Ulo balikukakula mwana punda, umwine asosele ati, “Nindo mukomukakwila?”
34Bayasukile ati, “Bashikulu ebakomufwaya.” 35Elo batwite mwana punda kuli Yesu. Epo bayanshikile ifyakufwala fyabo pamwana punda nokumuninikapo Yesu. 36Ulo Yesu alikuya ku Yelusalemu alininine pali mwana punda, abantu bayanshikile ifyakufwala fyabo mumusebo.#2 Ishamf. 9.12-13
37Ulo apalamine ku Yelusalemu, alikutentemuka Ulupili lwa Maolife, ibumba ilikulu ilyabakusambila bakwe lyatatikile ukutota Lesa nokumutondayisha mumashiwi ayakubilikisha pafintu ifyakushimbwisha ifyo babwene. 38Basosele ati, “Lesa ashukishe Imfumu iikoyishila mwishina lyaku Bashikulu! Umutende mumulu nomuchinshi kuli Lesa Mukulu!”
39Bambi abamu Bafalisi abali mwibumba ndilya basosele kuli Yesu ati, “We musambishi, bakanyeni abakusambila bobe ukupanga ichongo!”
40Yesu abasukile ati, “Namweba ati, nga mba bayikala chelele, amabwe akotatika ukwaula.”
Yesu alilila umusumba wa Yelusalemu
41Ulo Yesu apalamine apepi nomusumba wa Yelusalemu nokuubona, alililile 42nokwebati, “Chilibipile ukweba ati nanduno abantu bobe tabeshibilepo ichakubaletela umutende! Nomba chafiswa ukufuma kuli we! 43Echo inshita yakukufikila ulo utupondo tobe tukakushingulusha amalinga nokukubika pakati, elo nokukuchilikila mumbali shonse. 44Bakwisa kutobaula umusumba nokwipaya abantu bobe. Tabayise kushapo ibwe nangu limo pamulu walinakwe, pakuba tawayishibilepo inshita iyo Lesa ayishile mukukupulusha!”
Yesu aya munanda yaku Lesa
(Mat. 21.12-17; Mk. 11.15-19; Yoh. 2.13-22)
45Nomba Yesu ayinjile munanda yaku Lesa. Elo atatikile ukutamfisha panse abantu abali kushitishamo. 46Elo asosele kuli bo ati, “Chalilembwa Mumalembo ati Lesa akoti, ‘Inanda yanji yakuba ninanda yakulombelamo.’ Nomba mwebo eyo mwasangula ukuba uluchengo lwabang’o!”#Esa. 56.7; Yel. 7.11
47Inshiku shonse Yesu alikusambisha munanda yaku Lesa. Intungulushi shabachipupila nabasambishi ba Mafunde, nabafilolo babantu, balikufwaya ukumwipaya. 48Nomba tabasangilepo inshila yakuchitilamo nchi pakuti abantu bonse balikumfwisha ifyo Yesu alikusosa.
Currently Selected:
Luka 19: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
