Yohane 4
4
Yesu nomwanakashi umwina Samaliya
1Nomba Abafalisi balyumfwile ukuti Yesu alikoobola nokubatisha abakusambila abenji ukuchila Yohane. 2(Ukwebesha Yesu umwine tabatishepo nangu umo, kuntu abakusambila bakwe.) 3Ulo Yesu aumfwile ifyalikusoswa, alifumine ku Yudeya nokubwelela ku Galili. 4Mulwendo ulo akalangenye pakati kachalo cha Samaliya.
5Ulo ali mu Samaliya, afikile kumushi umo uwitwa Sika, apepi nebala ilyo Yakobe apele umwana wakwe Yosefe.#Ukut. 33.19; 48.22; Yos. 24.32 6Kuchifulo uko kwali ichishima chakwa Yakobe. Pakuti Yesu alikatele palwendo, ayikele pambali yachishima. Chali kubati akasuba pakati kamutwi.
7Elo umwanakashi umwina Samaliya ayishile mukutapa amenshi. Yesu asosele kuli ye ati, “Mpelako amenshi aakunwa.” ( 8Panshita iyo abakusambila bakwe bayile mumushi mukushita ifyakulya.)
9Umwanakashi ngulya alimwasukile ati, “Webo uli mu Yuda, nandibo ndi Musamaliya. Mba nindo ukonombela amenshi aakunwa?” (Pakuti Abayuda tabomfwanapo nabena Samaliya.)
10Yesu alyasukile ati, “Nga wayishibilepo ifyo Lesa apela nokwishiba uyo uukokulomba amenshi aakunwa, nawebo nga wamulomba amenshi aabumi, naye nga akupela.”
11Umwanakashi asosele ati, “Mwe mfumu, tamukwetepo mbeketi, ichishima nacho chitali, mba nikwisa mwingafumya amenshi aabumi? 12Ichikolwe chesu Yakobe ewatupele nchi chishima, umwine nabana bakwe nefitekwa fyakwe emo balikunwa. Napo webo kuti wayilinga ukuba umukulu ukuchila Yakobe?”
13Yesu alimwasukile ati, “Muntu onse uunwa nga menshi akwisa kumfwa ichilaka nakambi, 14kuntu onse uunwa amenshi nakumupa tayise kumfwapo chilaka nakambi. Amenshi awo nakumupa akwisa kuba muli ye akamfuku-mfuku nokumupela amenshi aabumi butapwa.”
15Umwanakashi asosele ati, “Mwe mfumu, mpeleniko nga menshi! Ekuti niyisa kumfwako ichilaka nakambi, nangula ukubwela mukutapa amenshi nakambi.”
16Elo Yesu amwebele ati, “Koya kete umulume obe, nokubwela nakwe.”
17Umwanakashi aasukile ati, “Nshakwatapo mulume.”
Yesu amwasukile ati, “Wasosa bwino pakweba ati tawakwatapo mulume. 18Pakuti webo walyupwapo kubalalume basano. Uyo uli nakwe nomba temulume wobepo. Nachine wasosa ukwebesha.”
19Umwanakashi asosele ati, “We mfumu, nayishiba ukuti uli musoseshi. 20Ifikolwe fyesu fyalikulombela Lesa muli ndu lupili,#4.20 Ndu lupili: Ndu lupili lwa Gelisimu apepi na Samaliya. Akale abena Samaliya bayimekepo inanda yakulombelamo. Ulo inanda nji yabongolelwe, abena Samaliya batwalilile ukulombelapo palupili ndu. kuntu mwebo mwe Bayuda musosa ati mu Yelusalemu echifulo chakulombelamo Lesa.”
21Yesu asosele ati, “We mwanakashi, nachine inshita yakwisa apo abantu tabayise kulombelapo Bata muli ndu lupili nangu mu Yelusalemu. 22Mwebo mulomba uyo muteshibilepo, kuntu fwebo tulomba uyo twishibile pakuti chipulusho chifuma ku Bayuda. 23Nomba inshita ikoyisa, nanomba ilifikile kale, ulo abamulomba mukwebesha bakalomba Bata kufiso fyaku Mupashi Wabuta ukubati niumo afwayila. Ukulomba ukwinenene uko Bata bafwaya. 24Lesa Mupashi, nikufiso fyaku Mupashi Wabuta uko abantu bangamulombela mwenka umo abela.”
25Umwanakashi asosele ati, “Nalishiba ukuti Uwasubwa waku Lesa akwisa. Ulo Ye akwisa, akutubusha ifintu fyonse.”
26Yesu alimwasukile ati, “Nine nkososhanya nobe.”
27Penka pali njilya nshita, abakusambila baku Yesu balibwelele. Elo balishimbilwe ukwinekantu ulo basangile Yesu akososhanya nomwanakashi. Nomba tapalipo nangu umo mubaku bo uwasosele kumwanakashi ati, “Findo ukofwaya?” Nangula ukufumba Yesu ati, “Mulandu ndo mukososhanya nangu mwanakashi?”
28Elo umwanakashi ngulya ashile umutondo wakwe, abwelele kumushi nokuya kusosa kubantu ati, 29“Iseni mubone umuntu uwambusha fyonse ifyo nachita. Napo kuti aba Ewasubwa waku Lesa?” 30Nachine balifumine mumushi nokuya kuli Yesu.
31Muli njilya nshita, abakusambila balikumupapatila Yesu ukuti alye.
32Nomba alibasukile ati, “Ndikwete ichakulya icho mwebo muteshibilepo.”
33Elo abakusambila bakwe batatikile ukufumbashanya mukati kabo ati, “Napo kuti kwabapo umuntu uumuletele ichakulya?”
34Yesu asosele kuli bo ati, “Ichakulya chanji kumfwila uyo uwantumine nokushilisha umulimo wakwe uwo ampele ukubomba. 35Tempalya mwebo mweba ati, ‘Kwashala imyeshi ine, elo kwakuba ukulobolola.’ Nomba nkomweba ati lolekesheni mumabala, imbuto shilipile kale nenshita yakusepa ilifikile. 36Umuntu uukolobolola ulalipilwa mumulimo wakwe nakambi akalobolola ifitwalo fyabumi butapwa. Epo umuntu uubyala nangulya uulobolola bakwisa kusekelela pamo. 37Nku kusosa kwakwebesha ukwakuti, ‘Umuntu umo alabyala, umunakwe naye alalobolola.’ 38Nebo namutuma ukuti mukalobolole umo mutalimine. Abantu bambi ebalimine, mwebo mwasangamo bwaka ifitwalo fyamilimo yabo.”
39Abena Samaliya abenji abafumine mumushi ngulya, balichetekele muli Yesu pamulandu wamashiwi asosele umwanakashi ati, “Alinjebele ifintu fyonse ifyo nachita mubumi bwanji.” 40Ulo bafikile kuli Yesu, balimupapatile ukuti bekale nakwe mumushi uyo. Elo Yesu ayikele nabo inshiku shibili.
41Elo abantu abenji balimuchetekele pamulandu wamashiwi abasambishe. 42Epo basosele kumwanakashi ati, “Twachetekela nomba, tepamulandu wakuli mfilya ifyo watubusha, kuntu pantu twayumfwila fwebene. Elo twayishiba ukuti nachine ngu Mupulushi wachalo.”
Yesu aposha mwana-chilolo umwalalume
43Panuma yakwikala inshiku shibili nkulya, Yesu alifumineko nokuya kuchalo cha Galili. 44Yesu umwine asosele ati, “Umusoseshi tapelwapo muchinshi muchalo chakumyabo.” 45Ulo afikile mu Galili abantu bamuchalo nchilya balimupokelele bwino, pakuti ulo bayile ku Yelusalemu kukulya Chakulya Chakuchilila, balibwene ifintu fyonse ifyo achitile mu Yelusalemu panshita yanku kulya.
46Epo Yesu alibwelelemo kumushi wa Kana waku Galili, uko asangwile amenshi ukuba waini. Elo kwali chilolo wabuteko uwali nomwana wakwe umwalalume uwalikulwala mu Kapenaumu.#Yoh. 2.1-11 47Ulo aumfwile ati Yesu alishile ukufuma ku Yudeya ukuya ku Galili, alileko kuli Ye nokumufumba ukuti aye akaposhe umwana wakwe uwali apepi nokufwa. 48Yesu asosele kuli ye ati, “Nga tamubwenepo ifyafiso ifikulu nefyakushimbwisha, tekuti muchetekelepo, yii.”
49Chilolo alimwasukile ati, “Mwe mfumu, katulokuya ulo umwana wanji atalafwa.”
50Yesu asosele kuli ye ati, “Koya bwaka umwana obe alipolele.”
Elo muntu ngulya alichetekele amashiwi aku Yesu nokuya kaya. 51Ulo achili munshila, akumenye abapyungi bakwe abamwebele ati, “Umulumbwana obe alipolele.”
52Elo Ye abafumbile ati, “Ninshita ndo umwana atatikile ukubako bwino?”
Nabo balimwasukile ati, “Nimayilo mukalila-mumbwe elo apolele.”
53Elo bawishi balibwishe ukuti nji enshita iyo Yesu abebele ati, “Umwana obe alipolele.” Ulo afikile bwaka, Ye nabamunanda yakwe bonse, balichetekele.
54Nchi echafiso ichikulu ichalenga bubili icho Yesu achitile ulo afumine ku Yudeya nokuya ku Galili.
Currently Selected:
Yohane 4: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
