Luk 3
3
Woo kiŋ Yahya Ɓoktohi
1Wa nikee ŋ jamanoonaŋ buura yakkaŋ Rom na woyse Tibeer, wa a tum kiis ndaŋkiyaah na kiis yatuus (15) ŋ hafaŋ kur ka, waam a Ponse Pilaat nikee goornooraŋ Yudee, Herod adgohha Galile, Filip taambɗoh ce adgohha Iture na Tarakonit, Lisañas adgohha Abileen ; 2Hannas na Kayif nikka seeƴkiɗoh ca yakak ca#3:2 Hannas a yi nikee seeƴkiɗoha yakka, waaye e ɓi Rom nihsohee ɗe nga, tufkiɗta Kayif. Kon ŋ jamanoonaam, ɓa kanak jen, ɓa ɓeeɗkohsee seeƴkiɗoh yakak.. Ŋ kiis kaam, Kooh dengkohha kuɓkiŋ Sakariya na woyse Yahya#3:2 Yahya : a na name ɓeeɗkohu Yahya Ɓoktohi. A yi Saaŋ Batiis ŋ farañse. woo kiŋ ɗe, raak ɗe genee nduufa. 3Yahya wileeɗa ŋ ɓakaŋ kalaŋ Yurdan jen, a inhiɗeeɗa ɓa ne ɓa hayaat ɓa ɓoktuk, wa teeɓoh ne ɓa teyiɗ ɓoƴsoh pesohaaɗ, ɓa min ɗaasu bakaaɗ ciŋ ɓa. 4Wa raakohha ɗaa findi wa fiisohu ŋ teerndiŋ woosuuɗi Esayi an :
« Hooso wa ɗaa leehuk ŋ nduufa ne :
“ Haɓɗaat waasiŋ Heɗ ɓoo,
haɓɗiɗaat ɗe waas ciŋ ɗe jen, ca yurah.
5Oon ci jen hey uumbse,
tangooci na tund ci jen hey girtasse,
waas ci nduuɗkiɗ ci hey yurhiɗasse
te ci raak atoh hey luhtasse.#Esayi 40:3-4
6Ɓooɓi jen hey hote findi Kooh na mucɗohohe. ” »
7Ɓo' laayiɗ hayeeɗa ŋ Yahya Ɓoktohi ne a ɓokit ɓa, a woosa ɓa ne : « Ini ɗu añaand haa ne iiñ jen, ɗu liiɓiɗ ne ɗu miniɗ penduk ayrukiŋ Kooh wi na haye e ? 8Tumohaaɗ ciŋ ɗu baahaat, wa teeɓoh ne ɗu ɓoƴsohiɗ pesohaaɗ, te kinaat ɗaar rek ɗu woyee ŋ ɗooƴ ɗu ne “ Ɓoo rimkoh ŋ Ibrahiima. ” Ñam na woyee ɗu ne atoh cii, Kooh miniɗ pulɗiɗ Ibrahiima kuɓu nga ca. 9Ɗiski wa nik ndii, kiw ki ƴutiɗ ne wa giing tas kidig, te waa nu raakɗi rim baahiɗ ɗah, wa hey ƴoɓse wa njafu ŋ yongkaaha. »
10Ɓooɓa meekseeɗa Yahya ne : « Ɓoo tuman na ? » 11A loffa ɓa ne : « Ɓo' nu raak kulɓa kanak ɗah, eɗa ɓoyi raakɗi winoori, te ɓo' nu nam raak kañam ɗah, paysohaa na ɓoyi raakɗi. » 12Ɓi juuti'oh nammba hay nga ɗe ne ɓa ɓoktu, ɓa meekissa ɗe ne : « Ɓoo joy ye haɓiɗ Jangɗohohi ? » 13A woosa ɓa ne : « Kanaat ɓaat tus ŋ ini ɗu naku. » 14Ɓi soldaar hayya nga ɗe, ɓa woosa ɗe ne : « Moo ! Ɓoo joy ye haɓiɗ ? » A woosa ɓa ne : « Kinaat ɓay kopor ɓo' ŋ naafiɗ wala ŋ lee ; topaat ŋ ini ɗu na wirndasse. »
15Ɓooɓa nikee sekeeɗa Mucɗohi Gapohse sek keeh-keeh, yaa nu nga woyeeɗa ŋ ɗooƴ ce ne : « Andi e Yahya Mucɗohi Kooh gapohe ? » 16Yahya loffa ɓa jen ne : « Mi na ɓoktee ɗu na masuɓ, waaye raakiɗ ɓoyi na haye yi uup po nik kilifa, te ŋ yeyyooɗi nik ñaamiŋ ɗe ne ŋ toksiɗee ɗe ñafaɗ ciŋ ɗe. A yi, a ɓoktohan ɗu Fuuɗsi Hoolohngaani, na yongkaah. 17A amb saliŋ ɗe ŋ yaah, ne a nistoh pees na fuñind. A nangɗoh pees ci ŋ ndapiŋ ɗe, a doh fuñndi ŋ yongkaahi heyɗi ƴime. » 18Yahya ñaaheeɗa ɓooɓa ŋ inaa laayiɗ ne a woo ɓa Yegɗohiŋ Muci. 19Ŋ mirndaani, Yahya woytohha Herod ya adgoh Galile ŋ ini a kooɗ Herojaad, yi ɓiti taambɗoh ce, na in ca moɗaaɗiica wiiriis ca a tumee jen. 20Herod taƴɗukka Yahya ŋ kasoona, ɓaatta ŋ in ca moɗaaɗiica a tume.
Cambiŋ pangkiŋ Yeesu
21Ŋ jamanoona Yahya ɓoktohee ɓooɓa jen, Yeesu nammba ɓoktu. Wa a na kiime Kooh, Eel ci rangsukka, 22Fuuɗsi Hoolohngaani, Fuuɗsiŋ Kooh yipukka nga ɗe, ŋ mandohaaɗ banuut. Hooso kerhukka ŋ Eel ci an : « A fu kuɓkiŋ ngo ŋ waaɗ keeh-keeh te ŋ neɓuuɗ nga ɗa lool.#Sabuur 2:7; Esayi 42:1 »
23Wa Yeesu na cambe pangkaŋ ɗe raak ɗe ŋ ɓak kiis ndaŋkiyaah-kaahay (30). Ɓooɓa ammba ne a kuɓu Suseef.
Suseef, a Heeli rim ɗe,
24Heeli a kuɓu Matat,
Matat nikka kuɓu Lewi,
Lewi a yiŋ Melki,
Melki nikka yiŋ Yanayi,
Yanayi yiŋ Suseef,
25Suseef Matacas,
Matacas Amos,
Amos Nahum,
Nahum Esli,
Esli Nagayi,
26Nagayi Maat,
Maat Matacas, Matacas Semeyin,
Semeyin Yosek, Yosek Yoda,
27Yoda Yowanan, Yowanan Resa,
Resa Sorobabel, Sorobabel Salacel,
Salacel Neri, 28Neri Melki,
Melki Adi, Adi Kosam,
Kosam Elmadam, Elmadam Er,
29Er Yeesu, Yeesu Eliyeser,
Eliyeser Yorim, Yorim Matat,
Matat Lewi, 30Lewi Simeyong,
Simeyong Yudaa, Yudaa Suseef,
Suseef Yonam, Yonam Eliyakim,
31Eliyakim Meleya, Meleya Menna,
Menna Matata, Matata Natan,
Natan Dawuuda, 32Dawuuda Yesay,
Yesay Obed, Obed Boos,
Boos Salmon, Salmon Nahson,
33Nahson Aminadaab, Aminadaab Admin,
Admin Arni, Arni Hesroon,
Hesroon Peeres, Peeres Yudaa,
34Yudaa Yaŋhooɓa, Yaŋhooɓa Isaahha,
Isaahha Ibrahiima, Ibrahiima Tera,
Tera Nahor, 35Nahor Serug,
Serug Reyu, Reyu Peleg,
Peleg Eber, Eber Selah,
36Selah Kaynan, Kaynan Arpaksad,
Arpaksad Sem, Sem Noohin,
Noohin Lemek, 37Lemek Matusalem,
Matusalem Henok, Henok Yered,
Yered Mahalal'el, Mahalal'el Kenan,
38Kenan Enos, Enos Set,
Set Aadama, Aadama yi Kooh fer.
Currently Selected:
Luk 3: YM
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc
