Luk 2

Raakuukaŋ Yeesu

1Ŋ jamanoocaam, buura yakkaŋ Rom teeksee Ogis nakohha ne tiik caŋ ɓooɓa jen fiissaat. 2Fiisiŋ tiik ceem nikka wa koc, wa hendee ŋ jamanoona Kiriñus nikoh goornooraŋ Siri. 3Ŋ ineem, yaa nu nga ɗah, kaɗeeɗa ne a fiisu ŋ kur ka a cosaankoh. 4Suseef nammba puloh kur ka na woyse Nasareet ŋ Galile, a kaɗta Betlehem ŋ Yudee, kur ɓi Dawuuda laam a ɓaahee ŋ ɓi rimkoh nga ɗe. 5A kaɗta bindka na ɓitiice Maryaama tel ɗe rook. 6Noha a joy ɓasloh raak ɓa reyiɗ Betlehem, 7a ɓasilla kuɓu ƴaar saawiŋ ɗe, a lemessa ɗe ŋ daah. Ina ɓa haɓeeɗi ŋ dalohaanaŋ hanheeca, tahha po a faannda ɗe ŋ ñamohaanaŋ ɗoopaat ca.

Malaaka teeɓkiɗ niiɗoh ca

8Ŋ bilaf faŋ kur ka, ɓi niiɗoh meeɗeen neeh nga ne ɓa taambkoh ɗoopaat caŋ ɓa. 9Malaaka teeɓukka ɓa, siñaariŋ Heɗ ɓoo yipukka nga ɓa, ɓa feyuusa lool. 10Waaye malaakaana woosa ɓa ne : « Kinaat neƴƴoh, ŋ kom ɗu woo neɓiɗ wi fu inah ne ɓooɓi jen hey sume nga keeh-keeh. 11Woti ŋ kur ɓi Dawuuda, Mucɗoh wuu ɗu rimkiɗ nga ; a yi Kiristaani, weɗ Heɗ ɓoo, Mucɗohi Kooh gapohe. 12Inii weɗ na hee ɗu wa teeɓe : Ɗu hey hote kuɓu lemesuuɗ ŋ daah, a faanu ŋ ñamoha ɗoopaat. » 13Ɗekka po, mboolo malaaka laayoh na laayoh nikka na ya koc ŋ ɗiska, ca ƴeekeeɗa Kooh an :

14« Yakkiŋ Kooh ƴeekaah

ŋ ɗiska uup ɗafuk ŋ Eel ca

te ɓooɓi neɓ ɗe,

ɓa raakaat jam ŋ kehƴi. »

15Wa malaakaaca faɗ ɓa ndaam, dokukka Eel ca, niiɗoh ca woosa ŋ harmban ɓa ne : « Ɓoo kaɗaat Betlehem, marka ini raak nga, wi Heɗ ɓoo woo. » 16Ɓa arra kaɗ, ɓa raakka Maryaama na Suseef nga na kuɓka faanuuɗ ŋ ñamoha ɗoopaat. 17Wa ɓa hot kuɓka, ɓa naandsukka ɓooɓa ini ɓa woyu nga ɗe. 18Ɓooɓa kerah naandsukaŋ niiɗoh ca jen feyuusa. 19Ŋ ini kaɗ ŋ Maryaama, a ammba woo ceem jen ŋ hafiŋ ɗe, a markiseeɗa ca ŋ ɗooƴ ce. 20Niiɗoh ca dokkeeɗa, ɓa ƴeekeeɗa yakkiŋ Kooh, ŋ ina ɓa kerah te ɓa hottaa laam wa raakoh ɗaa findi ɓa woyohsee wa.

Yeesu teeɓohuuɗ ŋ Kahan Kooh

21Wa mbeha Maryaama ɓasloh dokuk, kuɓka nguɗukka ; ɓa teekka ɗe Yeesu, tiika malaakaana eɗohee bala yaay ɓa amban rook.

22Wa neeh ca ɓa farsukohee reeh findi waasiŋ Musaa nakoha, ɓa ɓayya kuɓka Yerusalem ne ɓa eɗ ɗe Heɗ ɓoo. 23Laam, ŋ waasiŋ Heɗ ɓoo, wa fiisuuɗ ne : « Komaaki saaw ƴaar nu nik ɗah, Heɗ ɓoo hey ɗe waɗse.#Pula 13:2-12 » 24Ɓa nammba seeƴuk ne Maryaama hool findi wa nakohu ŋ waasiŋ Heɗ ɓoo : hoɗ kanak mbaa banuut ƴin kanak.#Lewiici 12:8

Simeyong na Aana yakɗiɗ Kooh sagu Yeesu

25Ŋ Yerusalem, raakiɗ ƴaara teeksee Simeyong nga, a nikee ƴaar yurhiɗ te a kerhiɗta Kooh, a nikee sekeeɗa mbehi Israayel hirpohsan. Fuuɗsi Hoolohngaani, Fuuɗsiŋ Kooh nikee na Simeyong. 26A teeɓeen ɗe ne bala a kaanan ɗah, a hey hote Mucɗohi Gapohse Heɗ ɓoo woos. 27Fuuɗsi Hoolohngaani hiirra ɗe ŋ kaɗ Kahan Kooh, raak Maryaama na Suseef ɓayiɗ Yeesu ne ɓa wik ɗe Kooh findi waasiŋ Musaa nakoha. 28Simeyong ammba gooya, a yakiɗta Kooh, an :

29« Ɗiski wa nik ndii Heɗ ɓoo,

fu miniɗ faɗ ñaamiŋ ɗa a coot ŋ jam.

Fu haɓɗiɗ ini fu gapohee,

30laam, na has ciŋ ngo,

ŋ hotootiɗ Mucɗohi puloh nga ɗa

31yi fu kooɗkiɗ ɓooɓi jen

32a nikka ñiini na hee ɗa teeɓohe ŋ cuuɓ ci jen,

te a yi ndamiŋ Israayel, cuuɓiŋ ɗa. »

33Baabiŋ kuɓki na yaay ɓa feyuusa ŋ in ci Simeyong woo nga ɗe, 34Simeyong barke'iɗta ɓa, a hannda woo Maryaama, yaayi ne : « Kuɓkii hay ne, ɓi ɓo' laayiɗ ŋ Israayel keen, laayiɗ kuruk. A hey nike firndeeni na hee taasse. 35Ŋ ineem, liiɓ ci ɓo' laayiɗ ɗasiɗ ŋ ɗooƴ ɓa hey teeɓohse. Te fu Maryaama, fu hey raake miskiɗ findi ɓoyi yipu salma ŋ keeñ. »

36Wa nameen raak woosuuɗ ɓitiɓ teeku Aana, a nikee kuɓu Fanuwel yi ɓaahee ŋ cuuɓiŋ Aser. A ɓitfeen lool ; wa kilookiŋ ɗe coot, a pesiɗ kiis yasna-kanak na ƴaar ce, yeem kaannda, 37a rissa raakaaɗi ƴaar. A raakee kiis ndaŋkiyaah-yasna-kaahay na kiis nikiis (84). A meeɗɗi kurkoh ŋ Kahnaŋ Kooh, a oreeɗa, a kiimeeɗa Kooh noh na wek ; a nikiɗohee ɗe ɗaa. 38A maasoheen wa Simeyong na woye, a nammba gidim Kooh, a woyeeɗa ɓooɓa seke faɗsuukiŋ Yerusalem jen ini kaɗ ŋ kuɓka.

39Wa Suseef na Maryaama ƴut haɓiɗ in ci waasiŋ Heɗ ɓoo nakoh jen, ɓa dokukka Galile, ŋ kur ɓa wi na woyse Nasareet. 40Kuɓka yakeeɗa, a ndengeeɗa, a ɓaateeɗa raak liiɓohaaɗ moɗiɗ te Kooh hunnda na ɗe.

Yeesu ŋ Yerusalem

41Kiis nu ree ɗah, Maryaama na Suseef kaɗ Yerusalem ne ɓa maasoh Paak ci, mbeh ci ɓa na naandsukohe pulohaŋ Israayel ci Misra. 42Wa Yeesu raak kiis ndaŋkiyaah na kiis kanak (12), a kaɗta na ɓa findi wa na tumohse. 43Wa hewa reeh, ɓa haadeeɗa, waaye a yi Yeesu, a tassa ŋ Yerusalem. Yaay ɓa na baab ɓa yegɗi. 44Ɓa liiɓpa haa ne a yaa ŋ huntoh caŋ ɓa ɓinooɓa, ɓa tiinnda ini ree noh mulnguus, ɓa hotɗi ɗe. Ɓa marakka ɗe ŋ nawleecaŋ ɓa na ɓaah caŋ ɓa. 45Ɓa hotɗi ɗe, ɓa dokukka, ɓa waakeeɗa ɗe po ŋ ɗooƴ Yerusalem.

46Ŋ mbeha kaahayɗoh, ɓa raakka ɗe ɓoofiɗ ŋ ɗooƴ Kahan Kooh ŋ leernaŋ jangɗohoh ca ; a sikɗukeeɗa ɓa, a nameeɗa ɓa meekis. 47Ɓooɓa kerhee ɗe jen feyuusa ŋ neɓkiŋ ɗe hel, na findi a lofohee ɓa. 48Wa yaay ɓa na baab ɓa hot ɗe, ɓa feyuusa. Yaay ɓa woosa ɗe ne : « Kuɓkiŋ ngo wa ye tah, fu haɓiɗta ɓoo inii ? Mi na baab ɗu, ɓoo feysee feyu, ɓoo ɓii waak ɗa poyi. »

49A loffa ɓa ne : « Wa ye tah ɗu waakeeɗa so ? Hanaa ɗu inahɗi ne, ŋ joy nik ŋ Kahan Baabiŋ ngo ? » 50Waaye ɓa inahɗi ini a woo ɓa. 51Ŋ ineem Yeesu hunnda na ɓa, ɓa dokukka kur ka na woyse Nasareet. Ŋ ineem, a kerhiɗeen ɓa, yaay ɓa ammba in ceem jen ŋ hafiŋ ɗe. 52Yeesu yakeeɗa, a uupeeɗa uup raak liiɓohaaɗ moɗiɗ, a neɓpa ɓooɓa, a neɓpa Kooh.

Currently Selected:

Luk 2: YM

Highlight

Copy