Luk 1
1
Rangsoha
1Tewofiil kilifaani, ɓo' laayiɗ ndengɗukiɗ ŋ fiisiŋ in ci haɓɗu ŋ harmban ɓoo ; 2ɓa kooɗ naandsuk ciŋ ɓooɓi maasoh ina amboh ŋ cambohaaɗa te ɓooɓeem mirndohha nik ɓi na taambkohe woo kiŋ Kooh. 3Mi nak, ŋ meeksohiɗ baahiɗ findi in ceem jen raakoh ŋ cambohaana po ŋ reehɗohaana, weɗi tah po ŋ namiɗ ɗa waaɗ teeɓ ngaŋ fiis, findi in ceem taambtiɗohohe. 4Ŋ fiisiɗ in ceem jen ne fu min inah ne, ini fu jangɗu, wa ɗaa.
Jibriil gapohiɗ raakuukiŋ Yahya
5Ŋ jamanoona Herod nikoh buuraŋ Yudee, wa raakeen ƴaar teeku Sakariya, a ɓaahee ŋ seeƴkiɗoh caŋ cuuɓaŋ Abiya#1:5 Seeƴkiɗoh caŋ cuuɓaŋ Abiya nikee cuuɓ seeƴkiɗoh ; wa teeksee Abiya, wa ɓaahee ŋ cuuɓ ca ndaŋkiyaah-kanak na cuuɓ yatuus (25) caŋ Israayel ca meeɗ seeƴkiɗoh. Ɓa jen, ɓa nikee set ciŋ Aaruna.. Ɓitiice teeksee Elisabet, a ɓaahee ŋ ɓi kahan Aaruna, caaciŋ seeƴkiɗoh ciŋ Israayel. 6Ɓa kanak jen ɓa nikee ɓo' yurhiɗ ŋ fiki Kooh ; ɓa meeɗta taambiɗ in ci Heɗ ɓoo nakoh jen na waasiŋ ɗe te ali ɓo' raakeeɗi woyaah ɓa. 7Waaye ɓa raakeeɗi kuɓu laam Elisabet jaasiree jaasir, te ɓa kanak jen, ɓa nikee yakak.
8Wa raakka mbeh, Sakariya seeƴkeeɗa wuu Kooh sagu ne e cuuɓaŋ Abiya raakɗohee seeƴka ŋ neeh caam. 9Findi ɓa meeɗa tumoh, seeƴkiɗoh ca markiskeeɗa ne Kooh teeɓ ɓa ɓoyi joy aas ŋ Ɗiska Hooliɗaŋ Kahnaŋ Kooh Heɗ ɓoo, ne a fuuɗ cuuraay nga, wa hennda nga ɗe.
10Ŋ jamanoona cuuraaya na fuuɗohse, tel mboolnda jen ŋ hara kiimeeɗa Kooh. 11Malaaka Heɗ ɓoo teeɓukka Sakariya, a nikee ŋ ñaahmaŋ seeƴkohaana na suusohse cuuraaya. 12Sakariya hot ɗe hot rek, a feyuusa, a tiitta. 13Malaakaana woosa ɗe ne : « Kana neƴƴoh Sakariya, kiimiŋ ɗa teyɗukuuɗ : ɓitiifu Elisabet hey raake kuɓu ƴaar yi fu na hee teeke Yahya#1:13 Yahya Ɓoktohi : a yi Saaŋ Batiis ŋ farañse.. 14A hey soosɗe keeñiŋ ɗa te ɓi ɓo' laayiɗ hey sume ŋ raakuukiŋ ɗe. 15Laam a hey nikee ɓo' yakiɗ ŋ fiki Heɗ ɓoo, a heyɗi ane biiñ mbaa sangara wiiriis, te a rimkan riifiɗ na Fuuɗsi Hoolohngaani, Fuuɗsiŋ Kooh. 16Ɓi ɓo' laayiɗ ŋ Israayel, a hey ɓa dokne ŋ Heɗi, Koohiŋ ɓa. 17A hey adge Heɗ ɓoo, a hun na hatiliŋ Fuuɗsi Hoolohngaani, Fuuɗsiŋ Kooh, findi woosuuɗi Ilyas hunohee naa. A hey ɓeke kerhiɗoh ŋ harmban baab na kuɓu, a yurhiɗ ɓooɓi kerhiɗɗi Kooh ; ŋ ineem, a hey kooɗkiɗe Heɗ ɓoo cuuɓ tufkiɗuuɗ po ƴutiɗ. »
18Sakariya meekissa malaakaana ne : « Ŋ min inhoh na ne ineem wa keeh ? Laam ŋ yakak te ɓitiiso ɓitfiɗ. » 19Malaakaana loffa ɗe ne : « Ñam Jibriil, yi nik na Kooh. A yi woos so ne ŋ gap ɗa in ci neɓiɗ cii. 20Fu kosɗi woo kiŋ ngo, wa tahiɗ po fu hey muume, fu minissanɗi jomb po mbaɗna ini ŋ woo ɗa raakan ŋ jamanoonaŋ wa. »
21Waam raak ɓooɓa sekeeɗa Sakariya, ɓa feyuusa ŋ maaña a maañ ŋ Ɗiska Hooliɗa. 22Wa a pul, a minɗi woo, ɓooɓa inahha ne in hayɗohiɗ ɗe findi heeƴ ŋ ɗiska. A nikka muum, a woyee na ɓa woo muum.
23Wa mbeh ca a joyee panguk reeh, a haadda kahan ce. 24Wa maañɗi ɓitiice Elisabet ammba rook, a ɗemmba naa caɓin yatuus. A woyeeɗa ŋ ɗooƴ ce an : 25« Inii, a Heɗ ɓoo tuma, a baahohiɗ to po, a paƴɗiɗ to kaciikiŋ ngo ŋ ɓooɓi. »
Jibriil gapohiɗ raakuukaŋ Yeesu
26Wa Elisabet nik ŋ caɓnaŋ ɗe yasna-yino'ɗoh, Kooh woossa malaakaaniŋ ɗe Jibriil ŋ kur ka nik ŋ Galile na woyse Nasareet. 27A tuuƴ ɗe ŋ cafaƴ inhaaɗi ƴaar na woyse Maryaama. Maryaama yeem, fiira nguɗee cakiim nga ɗe teeksee Suseef te a ɓaahee ŋ cuuɓiŋ Dawuuda.
28Malaakaana reɓpa, a woosa ɗe ne : « Mi yii kañiɗ ɗa Maryaama, fu yi baahohu ; Heɗ ɓoo a yi na ɗa. » 29Kañɗoheem feyya Maryaama, a liiɓeeɗa ini wa joy tokis. 30Malaakaana woosa ɗe ne : « Kana neƴƴoh Maryaama, Kooh baahohiɗ ɗa. 31Fu hey ambe rook, fu raak kuɓu ƴaar ; yi fu na hee teeke Yeesu. 32A hey nike ɓo' yakak, a hey ɓeeɗkasse Kuɓkiŋ Kooh yi ŋ ɗafka ɗafka, te Kooh Heɗ Ɓoo hey ɗe eɗe Nguuriŋ caac ɓa Dawuuda. 33A hey adgohe cuuɓiŋ Yaŋhooɓa po faw te Nguuriŋ ɗe moosanɗi reeh. »
34Maryaama meekissa malaakaana ne : « Ineem na hee nikohe na te ŋ inahɗi ƴaar ? » 35Malaakaana loffa ɗe ne : « Fuuɗsi Hoolohngaani, Fuuɗsiŋ Kooh hey haye nga ɗa, hatiliŋ Kooh yi ŋ ɗafka ɗafka hey ɗa saangne. Ineem weɗi tah po kuɓki hoolɗi fu na hee raake hey ɓeeɗkohse Kuɓkiŋ Kooh. 36Marka, Elisabet yi ndaamu nga ɗa, a rook ; a hey raake kuɓu ƴaar ŋ kiɓitfiŋ ɗe wii. A yi ɓooɓi woyee ne, a jaasir jaasir, moona a rook po wa raakiɗ caɓin yasna-yino. 37Laam raakɗi ini wooñ Kooh.#Camba 18:14 » 38Maryaama loffa ne : « Mi deey, ŋ ñaamiŋ Heɗ ɓoo. Ineem rahsaat to findi fu woyoha. » Malaakaana cootta.
Maryaama ŋ ɗiskaŋ Elisabet
39Ŋ neeh caam, Maryaama arra kaɗ ŋ kur, ŋ tangoocaŋ Yudee. 40Wa a ree, a aassa kahan Sakariya, a kañiɗta Elisabet. 41Elisabet kerah kerah kañɗohaŋ Maryaama rek, kuɓkiŋ ɗe yoonnda ŋ ɗooƴ rookiŋ ɗe. Elisabet riiffa na Fuuɗsi Hoolohngaani 42a woosa Maryaama ŋ ɗafka ne : « A fu uupiɗ barke ŋ ɓitiɓ ci jen te kuɓki fu na hee raake barke'iɗ. 43A mi ya ɓa po yaayiŋ Heɗ ɓoo hee so marke ? 44Wi ŋ kerah kañɗohiŋ ɗa, kuɓki ŋ rookiŋ ngo yoonnda, sagu sum. 45Suma, fu yi kos ne ini Heɗ ɓoo woo ɗa hey raake. »
Maryaama ƴeekiɗ Kooh
46Ŋ ineem Maryaama woosa ne :
« Coonndiŋ ngo weɗi ƴeek yakkiŋ Heɗ ɓoo,
47Keeñiŋ ngo soosiɗ ŋ Kooh Mucɗohiŋ ngo.
48A alɗi so, mi yi ñaamiŋ ɗe ñakiɗ njirñi.
Ee, ini camboh woti,
ɓooɓi jen ngaŋ jamano nu nik ɗah,
hey woye ne ŋ ɓitiɓ barke'iɗ.
49Laam, Koohi Min tumɗiɗ to in yakiɗ.
Tiikiŋ ɗe Hooliɗ.
50Yirmandeeniŋ ɗe genan gen ngaŋ ɓooɓi neek ɗe
gomal nu gomal.
51A teeɓohiɗ doolndiŋ ɗe.
A pasarohha ɓooɓi yaksiɗkiɗ ci.
52A folla buur.
A kurkiɗta ɓooɓi eɗfiɗ ci.
53A onnda aɗkiɗ ci kañam baahiɗ.
A aannja raakiɗ ci yaah ɓarang.
54A hirpiɗ Israayel ci ñaam ciŋ ɗe.
A alkohɗi teeɓoh yirmandeeniŋ ɗe
55ŋ Ibrahiima na ɓi puloh nga ɗe gomal nu gomal
findi a gapohee wa caac ciŋ ɓoo. »
56Maryaama ɓooffa ŋ ɗiskaŋ Elisabet ŋ ini ɗal ree caɓin kaahay, wala wa uupa, ƴutta a haadda.
Raakuukaŋ Yahya
57Wa noha Elisabet joy ɓasloh ree, a raakka kuɓu ƴaar. 58Gentoh ciŋ ɗe na ɓaah ciŋ ɗe kerahha ne Heɗ ɓoo baahohiɗ ɗe ŋ ineem, ɓa ambsukohha na ɗe, ɓa neɓuusa nga.
59Wa mbeha a ɓasloh dokuk, ɓa hayya ne ɓa nguɗ kuɓka. Ɓa waaɗta ɗe teek ŋ baab ɓa Sakariya 60waaye Elisabet woosa ɓa ne : « Muk, a teeksan Yahya. » 61Ɓa woosa ɗe ne : « Moo, ɗu raakɗi ali ɓaahi teeku ɗaa. » 62Ɓa meekseeɗa Sakariya na yaah findi a waaɗ ne kuɓkiŋ ɗe teeku. 63A nakohha waakɗu fiisoha, ɓa eɗta ɗe, a fiissa nga ne : « A teeku Yahya. » Ɓooɓa jen feyuusa. 64Ŋ ɗiska ɗiska, Sakariya minissa jomb, a woyeeɗa baahkiŋ Kooh. 65Ɓooɓa genee na ɗe feyuusa ŋ ina raake, ɓa laamtoheeɗaa ŋ kur caŋ tangoocaŋ Yudee jen. 66Hatiliŋ Heɗ ɓoo hunee na kuɓka, tahha po, ɓa kerhee naandsukaŋ ineem jen, ɓa liiɓeeɗa an : « Kuɓkii joy ye nik ? »
Sakariya ƴeekiɗ Kooh
67Baabiŋ kuɓki, Sakariya, wa a kaɗ po a minissa jomb, Fuuɗsi Hoolohngaani, Fuuɗsiŋ Kooh riiffa ɗe, a woyeeɗa woo ci puloh ŋ Kooh an :
68« Heɗ ɓoo Koohiŋ Israayel ƴeekaah
ŋ ini a hirip ɓooɓiŋ ɗe, a muciɗta ɓa.
69A komiɗ ɓoo Mucɗoh raakiɗ hatil
ŋ cuuɓiŋ ñaamiŋ ɗe Dawuuda,
70findi a gapohee wa maañiɗ,
a taambiɗtaa ŋ nguɓ caŋ woosuuɗ caŋ ɗe,
te ɓa jen ɓa hooliɗ,
71ne a hey ɓoo saɓsohe na sangiɗ ciŋ ɓoo,
a muciɗ ɓoo ŋ yaah ciŋ ɓi sang ɓoo jen.
72A teeɓ caac ciŋ ɓoo baahkiŋ ɗe,
a naandsuk ambtiɗohiŋ ɗe hool,
73findi a giñɗohee wa caac ɓoo Ibrahiima,
74ne a hey ɓoo pulɗe ŋ ɓi sang ɓoo,
po ɓoo ñaamkee ɗe te ɓoo neƴƴohanɗi,
75ɓoo nikan ɓo' hooliɗ,
yurhiɗ ŋ fikiice ŋ kipes kiŋ ɓoo jen.
76Te fu kuɓu,
fu nikan woosuuɗiŋ Kooh yi ŋ ɗafka ɗafka,
laam, a fu adgan,
fu paɗiɗ Heɗ ɓoo waasiŋ ɗe.
77Fu inhiɗ ɓooɓiŋ ɗe ne,
ɓa hey ɗaasse bakaaɗ ciŋ ɓa, ɓa muc.
78Laam, Koohiŋ ɓoo keeñkohiɗ ɓoo te a baahiɗ.
Weɗi tah, a hey ɓoo woosohe
siñaari na hee pulohe ŋ ɗafki,
mand na nohi na hane pul,
79ne wa siñaariɗ ɓoo,
ɗiski ɓoo ɓoof ŋ ñuusiŋ kakaan ki,
a deg ɓoo ŋ waas jam. »
80Ŋ ineem, njaanja yakeeɗa, liiɓiŋ ɗe ɓaatkeeɗa, a gennda ŋ nduufa po wa a teeɓ Israayel ci haf ce.
Currently Selected:
Luk 1: YM
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc
