Tum ci 2

Hayiŋ Fuuɗsi Hoolohngaani

1Wa mbehiŋ Paantakot#2:1 Paantakot : Paantakotiŋ Yawuut ci, wa feetiŋ Nguɗ ci koc (marka teerndiŋ Pula 23:16; Lewiici 23:15-21; Rohƴiɗi 16:9-11). Wa na nike neeh ndaŋkiyaah-yatuus (50) ŋ finho feetiŋ Paakiŋ Yawuut ci. Feeteem weɗ ɓa na naandsukohe pulohaŋ ɓa Misra (marka teerndiŋ Pula 12). Paantakotiŋ Kerceen ci, weɗ ɓa na naandsukohe hayiŋ Fuuɗsi Hoolohngaani. Wa na name nik neeh ndaŋkiyaah-yatuus (50) ŋ finho Paakiŋ Kerceen ci. Paakeem, weɗ ɓa na naandsukohe kakaan ki na hultiŋ Yeesu. Yeesu kaan ŋ jamanoona Yawuut ca feetkohee Paakiŋ ɓa ; Fuuɗsi Hoolohngaani nam hay ŋ jamanoona Yawuut ca feetkohee Paantakotiŋ ɓa. ree, ɓa jen ɓa cohha ŋ ɗisik yino. 2Ɗekka po ɗuuɗ pulohha Eel ci findi ɗuuɗ puuɗis yakak. Wa riiffa kahna ɓa nikohee del. 3Ŋ ineem, ɓa hotta ɓi in haa peɗeem, findi jaal yongkaah. Ca paysukohha, ca degukka ŋ yaa nu nga ɗah. 4Ɓa jen ɓa riiffa na Fuuɗsi Hoolohngaani, Fuuɗsiŋ Kooh. Ɓa jombeeɗa ŋ ɓi peɗeem wiiriis findi Fuuɗsi Hoolohngaani onoh ɓa ne ɓa woo.

5Waam raak ɓi Yawuut pulohiɗ kur na kur, ɓa hayya Yerusalem, ɓa nikee ɓo' nupiɗ Kooh. 6Wa ɓooɓa kerah ɗuuɗa, ɓa nangɗukohha ŋ mboolo yakak. Ɓa feyuusa lool laam yaa nu nga ɓa ɗah, kerheen kosiɗ ca woyeeɗa ŋ peɗma a ɓap. 7Ɓa jaahiɗta lool, wa feyya ɓa, ɓa woyeeɗa ne : « Ɓi na woye ɓii jen, ɓa gen Galile haa e ? 8Wa min na nikoh po yaa nu nga ɓoo ɗah, fu kerhee ɓa, ɓa woyee ŋ peɗmi fu ɓap ? 9Te ɓoo puloh Paarte, Medi, Elaam. Raakiɗ ɓi puloh Mesopotami, Yudee, Kapados, Pontos, na Asi. 10Raakka ɓi puloh Firisi, Pamfili, Misra na ɓaka reɓ Sireen ŋ Libi, na ɓi ɓaah ŋ ɓi Rom, 11ɓi nikee Yawuut nga ɓa, na ɓi aas ŋ waasiŋ Yawuut ci. Raakiɗ ɓi puloh Keret na Arabi, ɓoo jen, ɓoo ɓeɗi kerah ɓa, ɓa woyee ŋ peɗeem ciŋ ɓoo in ci yakiɗ ci Kooh tum. »

12Ɓa jen, ɓa feyuusa po haf ciŋ ɓa rangukka mak, ɓa woytiɗoheeɗa ne : « Moo ! Inii wa tokis ye ? » 13Ɓum njembtoheeɗa an : « Ɓa laar laar. »

Woo kiŋ Piyeer

14Teemb ndeem Piyeer tufukka, na Apootar ci ndaŋkiyaah na yinooci (11) ɓinooɓi, a woosa ŋ ɗafka ne : « Ɗu ɓi Yawuut ci, na ɗu ɓi gen Yerusalem jen, rangsaat nof, ɗu sikɗuk woo ciŋ ngo, ɗu inah baahiɗ ini raak.

15Ɓo' cii laarɗi findi ɗu liiɓoha, ɓoo ɓii ŋ yoor-yoor dong. 16Inii weɗ Kooh woyee taamboh ŋ woosuuɗi Yowel an : 17“ Kooh woo ne :

‘Ŋ mbeh ci mirndoh ŋ Adina,

ŋ hey pasarohe Fuuɗsiŋ ngo

ngaŋ ɓooɓi jen.

Kuɓuuciŋ ɗu, ƴaar na ɓitiɓ,

hey woye findi woosuuɗ.

Fiir ci hey hote in ci ŋ teeɓ ɓa

te yaɓkoociŋ ɗu hey ca heeƴe.

18Ee, ŋ mbeh ceem,

ŋ hey tume Fuuɗsiŋ ngo

ŋ ñaam ciŋ ngo, ƴaar na ɓitiɓ,

te ɓa hey nike woosuuɗ ciŋ ngo.

19Ŋ hey tume in feyohiɗ ŋ ɗafki, ngaŋ eel ci,

ŋ tum firnde ŋ ndii ŋ kehƴi :

ca nikan ñif, yongkaah na eel ɗuuku.

20Nohi hey ñuuse tuɗ,

caɓni ruumind findi ñif

bala mbehiŋ Heɗi hayan,

mbehi yakki hun na ndam.

21Teemb ndeem

yaa nu ɓeeɗuk Heɗi ɗah,

a hey mucɗasse.#Yowel 3:1-5’ ”

22Ɗu ɓi Israayel ci, sikɗukaat ini maa hee ɗu woye : Kooh teeɓiɗ ɗu ya ɓa Yeesu yiŋ Nasareet, ŋ firnde na keemaan na in feyohiɗ laayiɗ taamboh nga ɗe, findi ɗu inhoha.

23Ƴaareem faɗuusa ŋ yaah ciŋ ɗu, wa nikee ini Kooh inah maañiɗ, a yi kooɗkiɗoha ɗaa. Ɗu apɗukiɗ ɗe ŋ daaƴi a daaƴu ŋ kurwaa taamboh ŋ ɓi inahɗi waasiŋ Kooh. 24Waaye Kooh hultiɗiɗ ɗe, a kooɗohha ɗe ŋ miskiɗ ciŋ kakaan. Laam kakaan ki mineeɗi ɗe amb. 25Dawuuda sah woyiɗ ŋ Yeesu an :

“ Ŋ genangeen hot Heɗi ŋ fikiiso.

A yii ŋ serooso ne ŋ neƴƴohuu.

26Weɗ tah keeñiŋ ngo soosiɗ,

ƴeek ci na pulohe ŋ nguɓiŋ ngo,

teeɓohiɗ sum kiŋ ngo.

Po ŋ ɗooƴ ruy-ruyaŋ ngo sah,

faaniŋ ngo hey iɗsiɗke ŋ ooluk.

27Kooh fu, fu faɗanɗi so muk ŋ Jaanim

te fu faɗanɗi ñaamiŋ ɗa yi fu min ooluk,

a nopee ŋ ruy-ruy.

28Fu teeɓiɗ to waas ciŋ kipes ki,

fu hey yo riifɗe na sum ŋ nikiŋ ɗa ndii.#Sabuur 16:8-11 ” »

29Piyeer ɓaatta nga ne : « Ɓaah ciŋ ngo, ŋ miniɗ ɗu woo hooliɗ ŋ ini kaɗ ŋ caac ɓoo Dawuuda : A kaaniɗ, a uumbuuɗ te ruy-ruyiŋ ɗe ris na ɓoo ndii poyi. 30Dawuuda nikee buur, a nikka woosuuɗ. A inheen ne Kooh gapeen ɗe te a giñiɗta ɗe ne a hey name tum yino ŋ ɓi rimkohan nga ɗe buuri laman ɗe.#2 Samuwel 7:12-16; Sabuur 132:11 31Dawuuda hoteen ini na haye, weɗ tahee ɗe woo ŋ ini kaɗ ŋ hultiŋ Mucɗohi Gapohse ne

“ Kooh faɗanɗi yeem ŋ Jaanim,

faaniŋ ɗe nopanɗi ŋ ɗooƴ ruy-ruy.#Sabuur 16:10 ”

32Yeesu yeem, Kooh hultiɗiɗ ɗe, ɓoo jen, ɓoo miniɗ ɗu seede'iɗ ineem. 33Kooh Baabi meeɓiɗ ɗe po ŋ ñaahmiŋ ɗe, a eɗta ɗe Fuuɗsi Hoolohngaani gapohse, Yeesu ruhsiɗta Fuuɗsi nga ɓoo. Ineem weɗ ɗu na hote, ɗu kerhee wa wii. 34Dawuuda rapɗi ŋ Eel ci, moona a yi woo ne :

“ Heɗi woyiɗ Heɗ to ne :

‘Ɓoofa ŋ ñaahmiŋ ngo,

35po mbaɗna ŋ folan ɓi sang ɗa,

fu tum ɓa degoha kot.#Sabuur 110:1’ ”

36Kon ɗu Israayel ci jen inhaat wooriɗ ne : Yeesu yi ɗu daaƴee ŋ kurwaa, a yi Kooh tum Heɗi, tummba ɗe Mucɗohi a gapohe. »

37Wa ɓooɓa kerah ineem, keeñ ciŋ ɓa reehha, ɓa woosa Piyeer na Apootar ci tas ne : « Ɓaah ci, ɓoo joy na tum ? » 38Piyeer loffa ɓa ne : « Ɓoƴsohaat pesohaaɗ ! Yaa nu nga ɗu ɗah ɓoktukaat ŋ tiikiŋ Yeesu Kiristaa ne Kooh ɗaas ɗu bakaaɗ ciŋ ɗu te a eɗ ɗu Fuuɗsi Hoolohngaani. 39Laam gapohiŋ Kooh wa wuu ɗu na ɓi rimkohan nga ɗu ; wa wuu ɓi us ndii, wa wuu ɓi Kooh Heɗ ɓoo na hee ɓeeɗke nga ɗe, ŋ findi ɓa hend jen. »

40Piyeer taalndiɗta woytoheeɗa ɓa na ɓi woo laayiɗ, a ñaaheeɗa ɓa an : « Teyɗukaat mucɗu, usaat ɓooɓi woti, ɓa baahɗi. » 41Ɓi teyɗuk woo kiŋ ɗe ɓoktuusa. Mbaɗi, ɓi ɓaatuk ŋ kosiɗ ci nikee ŋ ɓak junni-kaahay (3000).

Kipes kiŋ kosiɗ ci ɗeɓ

42Ɓa genee ŋ sikɗuk jangɗohiŋ Apootar ci. Ɓa jen ɓa mandee na ɓooɓi taambɗoh, ɓa meeɗta ñam yino, ɓa meeɗta hun ɓa kiimee Kooh.

43Kooh taambohha ŋ Apootar ci a tumeeɗa in feyohiɗ laayiɗ na ɓi keemaan ; ɓooɓa jen, yaa nu nga ɗah feyuusa. 44Kosiɗ ca jen nikka yino, ɓa ɓaahha in ca ɓa raakee jen. 45Ɓa tooneeɗa kahan caŋ ɓa na raak-raak caŋ ɓa, ɓa paysohha kopora ŋ harmban ɓa, yaa nu nga eɗuusa in hend na ini a etoh. 46Kooh-nu-wiis, ɓa meeɗ coh ŋ Kahan Kooh ; ɓa hunnda, ɓa ɓaaheeɗa kañam ŋ kahan caŋ ɓa, ɓa ñameeɗa kañam caŋ ɓa na keeñ soosiɗ na eɗef. 47Ɓa yakɗeeɗa Kooh, ɓooɓa jen neɓuusa nga ɓa. Kooh-nu-wiis ɗah, Heɗi ɓaat ɓa mucɗuuɗ wiiriis.

Currently Selected:

Tum ci 2: YM

Highlight

Copy