Marko 4

Yesu Úbo Lɛgba Na Edula Ɔgyane Lɛlɔ

1Yesu ɔ́sɔ úsie Galilea Ɛpu kudɔ na úsie ɔɔtina litemi buni lɛmmɔ. Na bekyuli pii bani nábaka bámana-nwu bumomo ɔsu ni, úduo ɔkɔlɔ ɔdi nsia ntu anumi kemmo na úlie kalɔ. Na bekyuli bammɔ bébenye utubili na Yesu ɔɔtɛmiku-ma. 2Uwi pii na nwuna ala bɔtina kemmo ni, agba na uubó teeti teedie lɛla lɛni na ɔɔyɔ́ ka ɔsu kalɔ taatina-ma. Ala ani na ɔ́tina-ma ndi amɛni.

3Ɔ́su-ma ɔnini, “Binu! Uwi ɔdi ni, ɔnana ɔdi úsie kemo ɔnii utágya edula adi. 4Ka ɔkya ɔɔgya edula amɛni ni, adi álɛ ébo kuludɔ, na baasɛ bébo na bála-nya bádi. 5Adi álɛ ébo atabi lɛlɔ, kesii kani na lɛti liiibo pii. Anwuɔsu edula amɛni ákwɛ pla. 6Nsu ka ɔƒɛ ɔ́sia ni, áyɛyɛ na ékpi. Ɔsika ana lidu lítakɛ adila ɔ́si atabi ammɔ ɔsu. 7Edula ammɔ adi álɛ ébo liyu akɔ. Na liyu lɛmmɔ líyi lɛ́da-nya na átakɛ lɛlɔ. Anwuɔsu átama bebi. 8Na adi álɛ ébo kalɔ kabuni lɛlɔ. Na ákwɛ, na ádia, na áma bebi. Na adi ánwu ebi liti ku leevu, na adi lɛnɔ ánwu ebi eti anyɔ.”

9Kawɔlɔkɔ ni, Yesu ɔ́su-ma ɔnii, “Anwuɔsu, si bibo atu ni, na binu kaduɛ!”

Yesu Údie Lɛgba Lɛmmɔ Kalɔ Úte Nwuna Basiakune

10Uwi ɔni na Yesu lɛti ulie ni, bekyuli bani nénu nwuna lɛgba lɛmmɔ badi ku nwuna leevu-inyɔ bammɔ bébo-nwu kudɔ na béye-nwu banii udie lɛgba lɛmmɔ kalɔ ute-ma. 11Amu na Yesu ɔ́su-ma ɔnini, “Katɔti úti nwuna lɛga bɔdi abɛla ani na bekyuli pii baaagyi ɔ́tina-mii. Na bakladi bani nkya kama ni, ama agba kemmo kani na badubunu etemila. 12Anwuɔsu úbo aani kalɛ na Katɔti kenye udiene ɔdi únweni úse ɔnii,

“ ‘Badubo bɔnu,

nsu balanu baláti.

Badubo bunu,

nsu belénu kalɔ.

Ɔsika si ɔɔɔdi lɛni ni,

nka badubunu kalɔ

na benwini bebo-mi kudɔ

na liti bana alaekpidi

lɛkyiɛ-ma.’ ”

13Amu na Yesu úye-ma ɔnini, “Bilenu lɛgba lɛmɛni kalɔ? Dɛ na bɛdubɔbla asa na binu lɛgba lɛbambadi biala kalɔ? 14Ala ɔgyane ɔmɛni ɔɔgya Katɔti litemi. 15Bekyuli badi bese aani ebi ani nálɛ ébo na kuludɔ. Ka bánya bénu kani na Satan ɔ́da-ni údie-ma kuli kemmo ɔ́tɔlɔku. 16Bekyuli babambadi lɛnɔ bese aani ebi ani nálɛ ébo atabi akɔ. Na si uwi ɔni na beenú-ni ni, ebiti aada-ma. 17Nsu litemi lɛmmɔ lidu lítada kalɔ kaduɛ. Báƒɔ bádi uwi blii suɛ kani. Nsu si lɛsɛ lɛdi iye bukpoku bɔdi búbo-ma lɛlɔ na litemi lɛmɛni lɛlɔ ɔsu ni, baasɔ teenwini teesie kama.

18“Na bekyuli badi lɛnɔ bese aani ebi ani nálɛ ébo liyu akɔ. Na ama ndi bekyuli bani nénu litemi buni lɛmɛni, 19nsu kayawi liƒu bɔda ku lɛnungyie likpidi na sika lɛlɔ ku ɔlɔna ɔkwɛ adala akya-ma kayi kemmo. Ala amɛni ényimi litemi lɛmmɔ na litanwu ebi.

20“Na bekyuli badi lɛnɔ bénu Katɔti litemi aani egyiibi ani nálɛ ébo kalɔ kabuni lɛlɔ. Bekyuli bammɔ báƒɔ-ni ku kayi kemmo ƒui. Na uwi ndi uwi ni, baalɛ́ lili na baanwu kɔyu kemmo ebi. Badi bese aani edula ani nánwu ebi avlaatɛ, iye liti ku leevu, iye eti anyɔ.”

Asogya Kabla Ndi Ka Ute Bukeye

21Yesu ɔ́sɔ úye-ma úsienku anumi ɔnini, “Ukyuli ɔdi ɔɔtu asogya taakya kagyigyɛ iye nwuna atɛla kalɔ? Ɔɔɔdi asogya kasiakɔ na beeti asogya taasia? 22Lɛla biala lɛni na bekyuli béti babala lɛdubɔlɛ keyi, na Katɔti ɔdububimi lɛla biala na bébi-ni ala. 23Anwuɔsu si bibo atu ni, na binu kaduɛ!”

24Amu na Yesu ɔ́sɔ ɔ́su-ma ɔnini, “Bise atu kaduɛ na lɛla lɛni biinú lɛlɔ! Ɔsika kalɛ na aakɔ́ku bekyuli bamba taanu ni, lɛni kani na Katɔti ɔdubɔkɔku-ɔ bɔnu, utulo muedi! 25Lɛni básu bése ka ukyuli ɔni mbo lɛla lɛdi ni, anwu na Katɔti ɔsɔ ɔdubute ubunku-nwu. Na ukyuli ɔni neeebo lɛla lɛdi na ute ni, ubliidi ɔni na ubo muedi ni, Katɔti ɔdubɔƒɔ nwuna ƒui ɔsiku-nwu kudɔ.”

Yesu Ɔ́tɛmi Na Kegyiibi Bɔkwɛ Lɛlɔ

26Yesu ɔ́sɔ ɔ́su-ma ɔnini, “Katɔti lɛga kadikɔ kese aani ɔnana ɔni nágya egyiibi. 27Ɔɔtɛ taata limeyi biala, na ebi ammɔ aakwɛ́ na aalɛ́ lili. Nsu ɔɔɔgyi kalɛ na ɔ́bla asa na úbo lɛni. 28Kalɔ kani lɛlɔ na báva ala kani mɔɔtumini ebi ammɔ lɛni. Kudeedi, si kɔ́kwɛ ni, kɔdubudie lili asa na nwuna kugyii kɔlɛ. Na si kɔɔlɛ́ lili ni, na kɔɔnwu ebi pii. 29Si ebi ammɔ ábi lɛlɔ ni, na béede-nya. Ɔsika na edula udewi úudu.”

Lɛgba Na Kegyiibi Blii Suɛ Kadi Lɛlɔ

30Yesu úye ɔnini, “Bi na ndubuti Katɔti lɛga kadikɔ bɔkɔku? Bi lɛgba na meti medie-ni kalɔ? 31Use aani si ukyuli úti kegyiibi kebliidi ƒui na kayawi útáva. 32Uwi uletu asa na kaakwɛ́ na kaabla kugyii. Na kugyii kɔmɛni muubómo teetulo na lɛku egyii ƒui akɔ. Kɔɔta kɔgba pii na kɔɔbla ɔyuli. Na baasɛ baabla ayu taakya kugyii kɔmmɔ lili.”

33Yesu ɔ́su-ma etemila buni na agba amɛni udu kemmo kalɛ na baakana kalɔ bunu. 34Útetemi útete-ma ɔni na útebo agba. Nsu si uwi ɔni na anwu ku nwuna batɛyane lɛti belie ni, na uudie-nya kalɔ taatina-ma.

Yesu Ɔ́bala Ɔƒɛƒɛɛ Kenye

35Limeyi lɛmmɔ kani useyi uwi ni, Yesu ɔ́lɔ nwuna batɛyane ɔnini, “Bɛya na busie ɛpu ɔmɛni ɔvi ɔni ngye.” 36Anwuɔsu bátɔlɔ bekyuli lisu lɛmɛni kudɔ na bétéduo ɔkɔlɔ ɔdi kemmo na Yesu úuduo úlie kalɔ kemmo, na bétiku-nwu báviaku. Lɛkɔlɔ lɛbambadi lɛnɔ lisie mmɔ. 37Kɔnakunwi ni, ɔƒɛƒɛɛ ubendi ɔdi úse kalɔ uukpó, na uubó ntu teewi ɔkɔlɔ lɛlɔ na buuduo-nwu kemmo ɔni na ubu blii na nka ɔkɔlɔ ɔmmɔ uyi na ɔnyi. 38Uwi ɔmmɔ na Yesu ulie ɔkɔlɔ kama na úti lili ɔ́sia ɔsiadi lɛlɔ ɔɔlɛɛ. Amu na nwuna bakpana bágyila-nwu na básu-nwu banini, “Ala ɔtinane, ulekpoku-ɔ ka bɔdaku bukpi?”

39Yesu ɔ́ta únye na údie lɛdi na ɔ́su ɔnini, “Ɔƒɛƒɛɛ, da bukpo ya!” Na ɔ́sɔ ɔ́su ntu lɛnɔ ɔnini, “Ntu, bla buɛɛ.” Amu na ɔƒɛƒɛɛ ɔ́da bukpo ɔ́ya, na ntu anumi ƒui bɔ́bla kpoo.

40Amu na Yesu uuye nwuna batɛyane ɔnini, “Bi ɔsu na bibo liƒu lɛni? Bitakɛ tɔ bɔƒɔtaadi?”

41Nsu liƒu lɛni mɔɔda-ma ɔsu ni, bakya beeye lɛlɔ banii, “Ɔma geen na ukyuli ɔmɛni ɔdi? Na ntu ku ɔƒɛƒɛɛ ƒui beenú-nwu litemi!”

Currently Selected:

Marko 4: lef

Highlight

Copy