Luka 3
3
Ntu Ɔkpilane Yohane Ɔ́kɔ Litemi Buni Lɛsa
1-2Na lɛkwa leevu-lɛlɔndi lɛni na Ɔga Unengudi Kaesare Tiberio ɔɔdi lɛga ni, Kenye Udiene Yohane ɔni ndi Sakaria ubidi ɔ́kɛ linyesia lɛdi ɔ́siku Katɔti kudɔ uwi ɔni na uli ketele kemmo. Na Pontio Pilato ɔɔtɔnku aban na Yudea kalɔ lɛlɔ. Na Herode ɔɔdi Galilea kalɔ lɛlɔ. Na uwi ɔmmɔ kani kemmo ni, Herode ɔnwani Ƒilipo lɛnɔ ɔɔdi kalɔ kani baalɔ Iturea ku Trakoniti kalɛkɛ lɛlɔ. Na Lɛlɔ Ɔdine Lisania lɛnɔ ɔɔdi Abilene kalɔ lɛlɔ. Na uwi ɔmɛni kemmo ni, Hana ku Kaiaƒa badi Katɔti bakpane benengudi. 3Amu na Yohane ɔkɛ ɔɔví Yordan utuvi ku kalɛkɛ mmɔ bene ƒui ɔɔsu Katɔti litemi ɔnii, “Binwini kama bɛkya bina ekpidi na bɛƒɔ ntu bɔkpila ɔdi kalɛ na Katɔti uti bina ekpidi ɔkyiɛ-mii.” 4Na Katɔti Kenye Udiene Yesaia ɔku kemmo ni, lɛni na bénweni bákya banini,
“Ukyuli ɔdi ɔɔva na ketele kemmo ɔnini,
‘Binye kagyumana bite Blɔti.
Bɛklibi bina lɛlɔ kaduɛ bite nwuna bubo.
5Biyile lɛbonka
na bɛbwɛ abi ku abinkpo ƒui na atɛ kalɔ.
Na binyene lilu lɛni nábu.
Na kesii kani nse kpukplo kpukplo ni, bɛbla-nwu suɛlɛ suɛlɛ.
6Mmɔ na bekyuli ƒui badubɔnu Ɔƒɔne ɔni na ɔ́tala!’ ”
7Bekyuli pii bálɛ bébo banii Yohane ɔkpila-ma ntu. Nsu Yohane ɔ́su-ma ɔnini, “Bibo likyulikpi aani balakpi! Bitatɔlɔ lɛlɔ bɛnii si bákpila-mii ntu kani ni, ɔ́sa na bɛ́lɛ Katɔti kɔtu kɔni na ɔdubɔni bekyuli bekpidi kemmo. 8Bɛtina na bina ɔbladu kemmo ka bínwini kama bɛ́kya bina alaekpidi. Na bitakali ka Abraham kaba kemmo bebi bɛdi ɔsu ni, Katɔti ɔɔɔdubo-mii kɔtu bɔni. Mɔɔsu-mii nnii Katɔti ɔkana udie kaba ɔsiku atakpɛ amɛni kemmo ute Abraham. 9Bɛɛnu ka bada kadadi benye kugyii lɛlɔ na bada-ku ku ligyiitu. Kugyii biala naaanwu ebi buni ni, badubɔmɛnɛ-ku bakya lɛgyavonku kemmo!”
10Amu na bekyuli bammɔ béye-nwu banii, “Na bi na ɔlɛka bɔbla ɔƒɛni?”
11Amu na údie kenye ɔ́su-ma ɔnini, “Awɔ ɔni mbo awu ɔkyadi na údu inyɔ ni, ti unwi te ukyuli ɔni neeebo ɔdi. Na ukyuli ɔni mbo adila lɛnɔ ni, na ule-nya lɛni kani.”
12Kuyi baƒɔne badi lɛnɔ bébo banii ɔkpila-ma ntu. Ama béye-nwu banini, “Ala ɔtinane, bi na ɔlɛka bɔbla?”
13Amu na Yohane ɔ́su-ma ɔnini, “Bitaƒɔ kuyi bitetulo lɛla lɛni na ɔda bubo búte ulu bɔ́wɔ.”
14Bekpone badi lɛnɔ béye-nwu banini, “Na abu nɔɔ? Bi na ɔlɛka bɔbla?”
Amu na ɔ́su ama lɛnɔ ɔnini, “Bɛya na bina lɛyuƒɔla lɛda-mii ebiti. Na bɛsɔ bitasia ɔmɛni kama bitanya ukyuli ɔdi bitamana na bɛƒɔ-nwu egulabi adi iye bitadu ukyuli ɔdi kɔtɔ na ulu ukpidi lɛlɔ.”
15Bekyuli bamɛni lɛnunsia lɛ́kɔ katɔ líbu na bákali ka Yohane ndi Ukyuli Ɔƒunadi ɔni na benye bagya. 16Anwuɔsu Yohane ɔ́su bana ƒui ɔnini, “Ntu na ami líti mɔɔkpila-mii. Nsu ukyuli ɔdi ɔsia-mi kama ɔdubo ɔni na utulo-mi ƒui! Ńtedu ka lɛbla kabla kadi lite-nwu muedi. Na ukyuli ɔmɛni ndubuti Katɔti Kɔyu ku ogya ɔkpila-mii. 17Ɔda nwuna kɔɔlɛ kɔni na ɔdubɔƒɛ nwuna edula udie na uti uwi unwu kemmo. Nsu ɔdubɔkyula aƒaƒa ku lɛmuyɔ lɛkladi na ogya ɔni naaadubo buni kudii kemmo.” 18Na Yohane ɔ́su Katɔti litemi na lilu pii lɛlɔ úte bekyuli, na ɔ́su-ma geen ka bavumana udu ku bana ngba bulie.
19Na ka aban lɛga ɔdine Herode úƒie ɔnwani ulekudi ɔni baalɔ Herodia ɔ́ƒɔ ku udunkpi ala bamba pii ani na ɔ́bla ɔsu ni, Yohane ɔ́dɔnku-nwu. 20Ɔmɛni ɔsu Herode ɔ́sɔ ɔ́bla lɛla lɛni návi ntu lítulo ƒui ɔni na ɔ́ya na béti Yohane bátákya ɔtɔ kemmo.
Yohane Ɔ́kpila Yesu Ntu
21Ka Yohane ɔ́kpila bekyuli ƒui ntu ɔ́wɔlɔ ni, ɔ́kpila Yesu lɛnɔ ntu. Na uwi ɔni na Yesu ɔkya ɔɔkpali katɔ ni, katɔ kálɛmi. 22Na Katɔti Kɔyu kɔ́yu kúbo kúbelie-nwu lɛlɔ aani abloduma kalɛ. Amu na bénu Katɔti lɛdi ka lɛ́si katɔ lɛnini, “Awɔ ndi mina Ubi Ɔyɔne. Aaƒɔ́-mi anu geen.”
Yesu Kaba Bekyuli Ndi Bamɛni
23Yesu ɔ́ƒɔ aani akwa avlaatɛ uwi ɔni na úse nwuna kabla kalɔ. Bekyuli kasusu kaatina-ma ka nwuna ɔwɔne ndi Yoseƒ ɔni ɔti ndi Eli
24ɔni ɔti ɔdi Mattat ɔni ɔti ɔdi Lewi ɔni ɔti ɔdi Melki ɔni ɔti ɔdi Yanai ɔni ɔti ɔdi Yoseƒ
25ɔni ɔti ɔdi Matatia ɔni ɔti ɔdi Amos ɔni ɔti ɔdi Nahum ɔni ɔti ɔdi Hesli ɔni ɔti ɔdi Nagai
26ɔni ɔti ɔdi Mahat ɔni ɔti ɔdi Matatia ɔni ɔti ɔdi Semein ɔni ɔti ɔdi Yosek ɔni ɔti ɔdi Yoda
27ɔni ɔti ɔdi Yohanan ɔni ɔti ɔdi Resa ɔni ɔti ɔdi Serubabel ɔni ɔti ɔdi Sealtiel ɔni ɔti ɔdi Neri
28ɔni ɔti ɔdi Melki ɔni ɔti ɔdi Adi ɔni ɔti ɔdi Kosam ɔni ɔti ɔdi Elmadam ɔni ɔti ɔdi Er
29ɔni ɔti ɔdi Yesu ɔni ɔti ɔdi Elieser ɔni ɔti ɔdi Yorim ɔni ɔti ɔdi Matat ɔni ɔti ɔdi Lewi
30ɔni ɔti ɔdi Simeon ɔni ɔti ɔdi Yuda ɔni ɔti ɔdi Yoseƒ ɔni ɔti ɔdi Yonam ɔni ɔti ɔdi Eliakim
31ɔni ɔti ɔdi Melea ɔni ɔti ɔdi Mena ɔni ɔti ɔdi Matata ɔni ɔti ɔdi Natan ɔni ɔti ɔdi Dawid
32ɔni ɔti ɔdi Yisai ɔni ɔti ɔdi Obed ɔni ɔti ɔdi Boas ɔni ɔti ɔdi Sala ɔni ɔti ɔdi Nahson
33ɔni ɔti ɔdi Aminadab ɔni ɔti ɔdi Admin ɔni ɔti ɔdi Arni ɔni ɔti ɔdi Hesron ɔni ɔti ɔdi Peres ɔni ɔti ɔdi Yuda
34ɔni ɔti ɔdi Yakob ɔni ɔti ɔdi Isak ɔni ɔti ɔdi Abraham ɔni ɔti ɔdi Tera ɔni ɔti ɔdi Nahor
35ɔni ɔti ɔdi Serug ɔni ɔti ɔdi Reu ɔni ɔti ɔdi Peleg ɔni ɔti ɔdi Eber ɔni ɔti ɔdi Sala
36ɔni ɔti ɔdi Kainan ɔni ɔti ɔdi Arƒaksad ɔni ɔti ɔdi Sem ɔni ɔti ɔdi Noa ɔni ɔti ɔdi Lamek
37ɔni ɔti ɔdi Metusala ɔni ɔti ɔdi Henok ɔni ɔti ɔdi Yared ɔni ɔti ɔdi Mahalalel ɔni ɔti ɔdi Kainan
38ɔni ɔti ɔdi Enos ɔni ɔti ɔdi Set ɔni ɔti ɔdi Adam ɔni ɔti ɔdi Katɔti.
Currently Selected:
Luka 3: lef
Highlight
Share
Copy
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
