Luka 20
20
Bekyuli Bákyaku Yesu Unyeƒi Na Nwuna Ɔyikun Lɛlɔ
1Limeyi lɛdi ka Yesu ɔkya ɔɔtina bekyuli ala na Katɔti kakpakɔ na ɔɔsu-ma litemi buni ala ni, bakpane benengu ku ɔda bubo ala batinane ku ɔma benengu bébo mmɔ. 2Amu na bábasu-nwu banini, “Su-bu kenyekɔ kani na ebo asa na aabla ala amɛni udu? Na ɔma néte-ɔ kenyekɔ kammɔ?”
3Amu na Yesu údie kenye ɔnini, “Bɛya na liye-mii lɛla lɛdi linu na bɛsu-mi. 4Kenyekɔ kani na Yohane ɔ́kɛ asa na ɔ́bla ntu bɔkpila ɔdi úte bekyuli ni, Katɔti kudɔ na kási munuu ukyuli kudɔ na kási?”
5Mmɔ na bese kalɔ ku unyeƒi bɔkya ama alati bana akɔ banii, “Bi na ɔlɛka bɔsu? Si bɔ́su bɔnii Katɔti kudɔ na ɔ́kɛ kenyekɔ kammɔ ɔ́siku ni, ɔdubuye-bu ɔnii, ‘Bi ɔsu na bítaƒɔ Yohane bítadi?’ 6Na si bɔ́su bɔnii ukyuli kudɔ na ɔ́kɛ-ka ɔ́siku ni, kasalakɔ bekyuli bamɛni ƒui badubo-bu atabi bubo, ɔsika bana ƒui báƒɔ bádi ka Katɔti kenye udiene na Yohane ɔdi.”
7Ɔmmɔ ɔsu bédie kenye banii, “Bɔɔɔgyi kesii kani na ɔ́kɛ kenyekɔ kammɔ ɔ́siku.”
8Mmɔ na Yesu lɛnɔ ɔ́su-ma ɔnini, “Lɛni kani na ami lɛnɔ lɛɛɛdubo-mii bɔsu kenyekɔ kani mbo asa na mɔɔbla ala amɛni udu.”
Yesu Úbo Lɛgba Na Kemo Lɛlɔ Banune Lɛlɔ
9Amu na Yesu úbo bekyuli bammɔ lɛgba lɛmɛni ɔnini, “Dii ni, ɔnana ɔdi ɔ́bla adingyii kemmo kadi. Ka úsela ulu ɔdi utákya na uwi utu ɔsu ni, úti-ka ɔ́kya bekyuli badi enu ɔnii bataanu-ka lɛlɔ teete-nwu. 10Ka uwi údu ka bese kalɔ ku ebi ammɔ bude ni, ɔ́tala nwuna kabla ɔblane ɔdi ɔnii usie na utáƒɔ nwuna kadikɔ na kemmo kammɔ lɛlɔ banune kudɔ uboku. Nsu kemmo lɛlɔ banune bammɔ bébo kabla ɔblane ɔmmɔ na bábɔku-nwu, na bétete-nwu lɛla lɛdi. 11Ɔmmɔ ɔsu ɔ́tala kabla ɔblane ɔbambadi. Nsu kemmo lɛlɔ banune bammɔ bébo anwu lɛnɔ na béwi-nwu anumi kalɔ, na béti-nwu bémene, na bétete-nwu lɛla lɛdi. 12Ɔ́tala kabla ɔblane ɔtɛdi. Na kemmo lɛlɔ banune bammɔ bébo-nwu na bákya-nwu ɔlɛ lɛlɔ na bábɔku-nwu bálɛku mmɔ.
13“Mmɔ na kemmo ɔlati ɔmmɔ úye lɛlɔ ɔnii, ‘Bi na ɔlɛka lɛbla? Ndubɔtala mina ubidi ɔyɔne na lɛ́ƒɔ lɛ́di ka badubɔƒalɛ-nwu.’
14“Nsu ka kemmo lɛlɔ banune bammɔ bánu ubi ɔmmɔ ni, básu lɛlɔ banii, ‘Aanu kemmo ɔlati ɔmmɔ ubi geen mɛni. Bɛya na bɔdu-nwu na nwuna ala amɛni ƒui enwini abu adi!’ 15Anwuɔsu báni-nwu bálɛku ɔba ɔmmɔ kemmo na bádu-nwu.”
Mmɔ na Yesu úye-ma ɔnini, “Bi na kemmo ɔlati ɔmmɔ ɔdubo kemmo lɛlɔ banune bammɔ bɔbla? 16Mɔɔyá na bɛti ka ɔdububo ubadu kemmo lɛlɔ banune bammɔ ƒui na uti kemmo kammɔ ɔkya lɛlɔ banune babambadi lɛkɔkɔ.”
Ka bekyuli bammɔ bénu lɛni ni, básu banii, “Oowo! Utebo lɛni!”
17Yesu ɔtɛ anu ɔ́nu-ma na úye-ma ɔnini, “Bi na Bunweni Kedee bɔmɛni kalɔ bɔɔtina bɔni mɔɔsu bɔnii,
“ ‘Lɛtabi lɛni na batune béni báva banii lɛɛɛdia ni,
ani mmomu nébenwini lɛtabi lɛni náƒɔ kuye litulo na atabi ƒui akɔ’?
18Ukyuli biala ɔni mebuli mebo lɛtabi lɛmmɔ lɛlɔ ni, ɔdubo-nwu bukulo eku eku. Na si lɛtabi lɛmmɔ lɛnɔ lɛlɛ libo ɔdi lɛlɔ ni, lɛdubo-nwu bɔbwɛ kpɛtɛ kpɛtɛ.”
Yesu Ɔ́tɛmi Ɔ́siku Kuyi Bute Lɛlɔ
19Ɔda bubo ala batinane ku Katɔti bakpane benengu bákya ɔkplu banii beeƒie Yesu na mmɔ, ɔsika bánu báti ka bana lɛlɔ geen ɔsu na úbo lɛgba lɛmmɔ. Nsu baayia bekyuli bammɔ. 20Ɔmmɔ ɔsu ni, báwia ulu ɔbambadi ɔni lɛlɔ basia na beƒie-nwu. Béte bekyuli badi ala na bɔbɛ kemmo. Na bása ku-ma lili banii besie Yesu kudɔ. Na babla lɛlɔ aani si litemi lɛmmɔ geen na ama alati baawia bati bete lɛlɔ. Na bátala-ma banii batákywɛ Yesu kakpagyuɛ ku etemila adi. Na bakɛ ulu ɔni na beti-nwu bakya Roma aban unengu enu kemmo. 21Ɔmɛni ɔsu kenye bewine bamɛni bésie Yesu kudɔ. Na béye-nwu banini, “Ɔtinane, bɔgyi ka ala ani na aasu ku ani na aatina ƒui adi etemila geen. Na bɔgyi lɛnɔ ka alánu ukyuli anumi taabla ala. Mmomu aatina litemi geen lɛni na Katɔti ɔɔyɔ́ ka bekyuli babla. 22Ɔmɛni ɔsu bɔɔwia ka bɔti si ɔdia ka buteeyi kuyi teete Romaƒuɔ Ɔga Unengudi iye ɔɔɔdia?”
23Nsu Yesu ɔ́ɔnu bana lɛkwɛ likpidi ɔ́ti na ɔ́su-ma ɔnini, 24“Biti sika ɔƒualadi ubi ɔmmɔ bɛtina-mi. Ɔma bɔtaa ku lɛnyi nsia mɛni?”
25Amu na bédie kenye banini, “Ɔga Unengudi Kaesare ɔdi na ɔdi.”
Mmɔ na Yesu ɔ́su-ma ɔnini, “Bɛƒɔ lɛla biala lɛni ndi Ɔga Unengudi ɔdi bite Ɔga Unengudi. Na bɛƒɔ lɛla biala lɛni ndi Katɔti lɛdi bite Katɔti.”
26Na bekyuli anumi mmɔ ni, bátakana na beƒie-nwu na lɛla lɛdi lɛlɔ. Bana kenye kékpi-ma na bábla yaa na kenye kani na Yesu údie ɔsu.
Yesu Ɔ́tɛmi Ɔ́siku Bekpine Bɔsɔ Taata Lɛlɔ
27Amu na Sadukiƒuɔ bani mɔɔsu banii ukpine ɔsɔ ɔɔɔdubo bɔta ni, bébo Yesu kudɔ na bábasu-nwu banini, 28“Ala ɔtinane, Mose únweni ɔda bubo bɔmɛni úte-bu ɔnini, ‘Si ɔnana ɔdi úkpi na ɔ́da ulekudi úse na beeebo bebi ni, na ɔnana ɔmmɔ ɔnwani uti uleku ɔmmɔ. Na anwu ku ukpinele ɔmmɔ bawɔ. Na bebi bammɔ ni, bekyuli badubɔnu-ma aani ɔnana ɔni nsɔ neeebo mmɔ bebi.’ 29Na uwi ɔdi ni, banwani banana maatɛ bákya. Ɔnanabi unengudi úbeti uleku na úbekpi na anwu ku ulekudi bátawɔ. 30Ɔnwani unyɔdi lɛnɔ úbeti ukpinele ɔmmɔ. 31Ɔtɛdi lɛnɔ lɛni kani. Na lɛla lɛmmɔ kani nálɛku banwani maatɛ bamɛni ƒui. Bana ƒui békpi ɔni na ɔdi útawɔ. 32Kawɔlɔkɔ ƒui ni, uleku ɔmmɔ ɔlati úbekpi. 33Na ɔƒɛni ni, limeyi lɛni lɛlɔ na bekpine badubɔsɔ bata ni, ɔmani uleku na uleku ɔmmɔ wenwini ka bana ƒui béti-nwu dii?”
34Yesu údie kenye ɔnini, “Ngba bɔmɛni kemmo kani na banana ku beleku beeti lɛlɔ. 35Nsu banana ku beleku ƒui bani námanku ka bata basi bekpine akɔ na ngba bɔni nsɔ naaadubo bɔsa kudii kemmo ni, basɔ beleti lɛlɔ. 36Badubuse aani kalɛ na Katɔti batu bese, na basɔ belekpi lɛnɔ. Badi Katɔti bebi ɔsika báta bálɛ kekpine. 37Ɔmmɔ kalɔ geen na Mose údie na Bunweni Kedee Ɔku kemmo ka bekpine basɔ baata teelie ngba. Ɔsika uwi ɔni na unye kugyii kɔni mɔɔda anumi ni, ɔ́lɔ Katɔti aani Abraham Katɔti ku Isak Katɔti ku Yakobo lɛnɔ Katɔti. 38Ɔmɛni ɔɔtina ka ama bani néekpi ni, bamu beli ngba. Anwuɔsu ɔdi ama lɛnɔ Katɔti.”
39Mmɔ ni, ɔda bubo ala batinane bammɔ badi bédie kenye banini, “Ala ɔtinane, édie kenye kammɔ geen!” 40Ɔmmɔ kama ni, ɔdi ɔ́sɔ útese kayi na uye lɛla bamba lɛdi lɛnɔ.
Ɔma Ubidi Na Ukyuli Ɔƒunadi Ɔmmɔ Ɔdi?
41Yesu úye-ma ɔnini, “Dɛ na ɔ́bla asa na bekyuli básu banii Ukyuli Ɔƒunadi ɔmmɔ ɔdubɔsi Dawid kaba kemmo? 42Na Dawid ɔmmɔ ɔlati ɔ́su na kɔgya ɔku kemmo ɔnini,
“ ‘Unwoti ɔ́su mina Ɔti ɔnii,
“Sɔ lie-mi kɔdianu kakɛ
43wetédu uwi ɔni na meti ƒula bekisine
makya-a lɛgba kalɔ.” ’
44Na si Dawid ɔ́lɔ-nwu ɔnii Ɔti ni, dɛ na ɔ́bla na Ukyuli Ɔƒunadi ɔmmɔ ɔɔbla Dawid kaba kemmo ubi?”
Yesu Úbo Nwuna Batɛyane Ɔda Na Ɔda Bubo Ala Batinane Lɛlɔ
45Uwi ɔni na bekyuli ƒui benye beenú ala ani na Yesu ɔɔsu ni, ɔ́su nwuna batɛyane ɔnini, 46“Binye kagyumana bite lɛlɔ kaduɛ na ɔda bubo ala batinane lɛlɔ. Bekyuli bamɛni baayɔ́ busie taavi na bakya bana lɛwu bonwu bonwu. Na baayɔ́ ka bekyuli beteebo kalɔ teegyele-ma na kuyeya. Ama mɔɔyɔ́ kuliekɔ kunengudi bulie na Yudaƒuɔ kasalakɔ ku kuliekɔ kɔbuni na emeyi kadikɔ. 47Beesié bekpinele kudɔ ka betébunku-ma, nsu baatɔ́lɔ-ma taaƒɔ-ma ala. Na baakpali katɔ gyɔlɔɔ taabu bekyuli kɔdɔlɔ. Anwuɔsu bana kɔtu bɔni bɔdubɔkɔ katɔ butulo ƒui!”
Currently Selected:
Luka 20: lef
Highlight
Share
Copy
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
