Ala Kalɔ Buse 34
34
Hamor Ubidi Sekem Úbile Dina
1Na uwi ɔmmɔ kemmo ni, Lea ubidi ugblebi ɔni baalɔ Dina ɔ́vi ɔgbami ɔnii utánu kalɔ kammɔ beleku. 2Uwi ɔni na Hamor ubidi Sekem ɔni ntɔnku Hiwiƒuɔ ɔ́nu ulekubi ɔmɛni ni, úƒie-nwu na ɔ́yɔ-nwu mmɔ kani. 3Ɔ́si ɔmmɔ lɛlɔ ni, Yakob ubidi Dina litemi lɛ́da Sekem kayi geen. Na ka ɔɔyɔ́-nwu ɔsu ni, ɔɔtɛmiku-nwu kpɛtɛ kpɛtɛ. 4Na úsie utásu ɔti Hamor ɔnini, “Tévele ulekubi ɔmɛni te-mi na unwini-mi ulekudi.”
5Ɔƒɛni ka Yakob únu ka bébile ubidi ulekubi ni, útebimi kenye laa utédu ka nwuna bebi bananabi bási bébo, ɔsika béti bebuo bésienku kadikɔ.
6Na uwi ɔni na Sekem ɔti Hamor úsie Yakob kudɔ utátɛmiku-nwu ni, 7Yakob bebi báasi alakpi akɔ bébeduo. Ka bénu lɛla lɛni nálɛ ni, béti kɔnyi geen na kɔƒa kubendi lɛla lɛni na Sekem ɔ́blaku bana ɔnwani Dina ka bátɛ ɔsu. Ɔsika ɔmɛni ɔdi lɛla lɛni na útalɛka nka ɔbla na Israel.
8Nsu Hamor ɔ́su-ma ɔnini, “Mina ubi Sekem ni, úti nwuna kayi ƒui ɔ́sia awɔ Yakob ubidi lɛlɔ. Anwuɔsu na buvele kemmo ni, ti ƒ'ubidi ulekubi ɔmɛni te-nwu na uti. 9Na bɛya na buteeti lɛlɔ bebi. Biti bina belekubi bite-bu na buti na amii lɛnɔ biti abu badi. 10Bɛkana na bilie-bu akɔ, ɔsika kalɔ kewi kete-mii ƒaa. Bilie na bɛdi kuye na bɛbla akɛla pii bite lɛlɔ.”
11Ɔmmɔ kama ni, Sekem ɔ́su Dina ɔti ku banwani ɔnini, “Bɛya na mina lɛlɔ lɛda-mii ebiti, na lɛla biala lɛni na bɛdubuye-mi ni, ndubɔbla lite-mii. 12Uleku buti elila ku etela biala na bɛnii bɛɛƒɔ́ ni, ndubute-mii kalɛ kani na amii bɛ́su. Ndubɔƒɔ kayu biala na bɛdubɔkya-mi si amii bíti uleku ɔmmɔ bíte-mi kani ɔ́sa.”
13Na ka úubile Dina ɔsu ni, Yakob bebi bátɔlɔ Sekem ku ɔti Hamor na bédie kenye básu-ma lɛla lɛni mayɔ-ma kaƒɔ kani. 14Na básu-ma banini, “Bulakana lɛla lɛmmɔ udu bɔbla. Bulakana na buti bula ɔnwani bute kadi kani ukyuli nétekulo lego, ɔsika ɔdi-bu kɔƒa. 15Na lɛla lɛni kani maya na bunu ɔmɛni kalɔ ndi ka bina bebi bananabi ƒui babla aani kalɛ na buse. Na babla-ma lego bukulo ɔdi ɔni na bula ƒui bɔ́bla. 16Si bɛ́bla ɔmɛni ni, bɔdubute-mii bula belekubi na biti, na abu lɛnɔ buti amii badi. Bɔdubo-mii kudɔ bulie na bula ƒui bunwini bekyuli benwi. 17Nsu si bilénu kalɔ bɛnii bekulo-mii ago bɔdi ni, bɔdubo bula ɔnwani bɔkpanku na bɔtɔlɔ-mii kalɔ lɛlɔ.”
18Bana kasusu kammɔ káda Sekem ku ɔti Hamor kubiti. 19Sekem ɔmɛni aani ubi unengudi kalɛ ni, útebile uwi ɔdi munu munu. Mmomu úsie utábla kalɛ kani na béte-ma kasusu, ɔsika ɔɔyɔ́ Yakob ubidi Dina geen. 20Anwuɔsu Hamor ku Sekem bésie ɔma ɔmmɔ ɔban kenye na bátátɛmiku bana ɔma banana. 21Mmɔ na básu-ma banini, “Kadi kamɛni bekyuli badi bekyuli babuni na bese buɛɛ bete-bu. Ɔmmɔ ɔsu bɛya na belie-bu akɔ na bula kalɔ lɛlɔ na badi kuye. Kalɔ kewi na kadubudu ama lɛnɔ. Na bɔkana na buti bana beleku na ama lɛnɔ beti abu badi. 22Nsu lɛla linwi kani na baawia taasiku-bu kudɔ asa na abu ku-ma kelie kammɔ kabla ɔbuni kawɔlɔ. Na lɛla lɛmmɔ ndi ka abu ku bula bananabi ƒui bukulo ago aani bana kalɛ. 23Bilánu ka bana bebuo ku akɛla lɛnɔ adi abu lɛnɔ adi si búnu ɔmɛni kalɔ? Ɔmmɔ ɔsu bɛya na bunu ɔmɛni kalɔ na bakya-bu akɔ.”
24Amu na bekyuli bani ƒui nésie ɔban kenye mmɔ bénu Hamor ku Sekem litemi lɛmmɔ kalɔ na ɔnana biala nkya ɔma unengudi ɔmmɔ kemmo úkulo lego.
25Na emeyi atɛ kama ni, bana ago ani na békulo mmɔ lɛlɛ lɛmu lɛsia-ma na beenú ɔlɛ geen. Amu na Yakob bebi inyɔ Simeon ku Lewi bani ndi Diana banwani báta bétéduo-ma lɛlɔ ku kuwii. Na ka bekyuli bamɛni baaagyi beeese ɔsu ni, bebi bamɛni bébeyi-ma bádu ƒui na ɔma bonwu ɔmmɔ kemmo ɔni na banana bammɔ bása ƒui. 26Bádu Hamor ku Sekem lɛnɔ na bákpanku bana ɔnwani Dina bátɔlɔku. 27Yakob bebi bábavi bekpine bammɔ lɛlɔ na bála bana ala ƒui batɔlɔku ɔma ɔni kemmo na bébile bana ɔnwani mmɔ. 28Béƒie-ma bebuo lidu lidu ku bebuo ala betine ƒui bátɔlɔku. Na beti bana akɛla ani na ɔma kemmo ku mmo edula ƒui bátɔlɔku. 29Lɛni kani na béti bana beleku ku bebi ƒui aani ala ani na kekpo kéƒie bálɛku bana lɛtɔ ƒui.
30Mmɔ na Yakob ɔ́su Simeon ku Lewi ɔnini, “Bíti lɛbibo bonwu bíboku-mi lɛlɔ. Na bíti lɛla libudi bibawɛɛ-mi lɛlɔ. Na ndubo buteenwenyi na Kanaanƒuɔ ku Perisiƒuɔ kadi bekyuli kudɔ na kalɔ kamɛni lɛlɔ. Bɛɛnu ka buuumomo na si básala lɛlɔ na báta kekpo na mina lɛlɔ ni, badubɔyila mina kaduli bekyuli ku ala ƒui udu.”
31Amu na ama bédie kenye banini, “Na ábu anii bɔdubunye bɔnu na uti-bu ɔnwani ulekubi unwini ɔyalɛ na kadi kamɛni bekyuli akɔ?”
Currently Selected:
Ala Kalɔ Buse 34: lef
Highlight
Share
Copy
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
