Ala Kalɔ Buse 26
26
Isak Úsie Abimelek Kudɔ
1Na uwi ɔmmɔ kemmo ni, kɔka kɔdi kúbo kalɔ kammɔ ƒui lɛlɔ aani kalɛ na ɔ́lɛ na Abraham uwi úbavi dii. Na Isak úsie Ƒilistiƒuɔ ɔga ɔni baalɔ banii Abimelek kudɔ na kesii kani baalɔ Gera. 2Katɔti údie lɛlɔ ɔ́tina Isak na ɔ́su-nwu ɔnini, “Tatɔlɔ tesie Egyipte kalɔ lɛlɔ. Mmomu sɔ lie kalɔ kani na lɛ́tina-a lɛlɔ. 3Sɔ kya kalɔ kammɔ kemmo aani ɔƒɔ. Na ndubulieku-ɔ na lite-ɔ kusɛ kusɛ. Ɔsika awɔ ku ƒula bebi ku bawɔ na ndubuti kalɔ kamɛni lite. Na kenye kani na líse ƒ'ɔti Abraham líse ni, ndubɔbla lɛsia lɛni. 4Na ƒula bawɔ ni, ndubɔya na bemomo aani ayabi ani na aanu na kayaa. Na ɔkɛ ƒula kaba kemmo na ndubute kayawi ƒui bekyuli kusɛ kusɛ. 5Na ɔmɛni ɔdubo-nwu kemmo lɛni, ɔsika Abraham ɔ́di mina etemila lɛlɔ, na ɔ́di ɔda ɔni na líbo-nwu lɛlɔ, na ɔ́bla mina lɛƒɔyɔ ku ala ani na lɛ́su-nwu ƒui lɛlɔ.” 6Ɔmmɔ ɔsu ni, Isak ɔ́ƒɔ lɛlɔ ɔ́kya Gerar mmɔ.
7Amu ka kadi kammɔ bekyuli béye-nwu ulekudi lɛlɔ litemi ni, ɔ́su-ma ɔnini, “Mina ɔnwani na ɔdi.” Ɔsika na nwuna kakali kemmo ni, ɔ́su ɔnini, “Kadi kamɛni banana badubo-mi bɔdu na Rebeka ɔsu, ɔsika ɔɔdia bɔnu geen.”
8Ka Isak úlie mmɔ útu uwi geen kama ni, Abimelek unye nwuna ƒansili na ɔ́nu Isak úmene ka ɔda ulekudi ɔɔƒuƒwɛ na ɔɔƒianku-nwu. 9Mmɔ ni, Abimelek ɔ́ya na bálɔ Isak béte-nwu na úye-nwu ɔnini, “Ƒ'ulekudi na ɔdi nka asa na ásu-bu anii ƒula ɔnwani na ɔdi?”
Amu na Isak údie kenye ɔnini, “Lɛ́yia ka si lɛ́su nnii mina uleku na ɔdi ni, badubo-mi bɔdu.”
10Amu na Abimelek ɔ́su-nwu ɔnini, “Bi ɔsu na ɔlɛka abla-bu lɛni? Si busie na ɔnana ɔdi úusie uleku ɔmɛni kudɔ ni, nka áya na bɔ́ƒiɔ Katɔti na ɔdubɔni-bu kɔtu.”
11Ɔmmɔ ɔsu Abimelek ɔ́su nwuna kadi bekyuli ɔnini, “Ukyuli biala na mekpoku ɔgya ku ule ɔmɛni na ulu ɔdi lɛlɔ ni, ndubɔya na badu-nwu.”
12Ka edula ɔkyawi údu ni, Isak ɔ́kya edula. Na ka údu ana ɔƒɛwi ni, ɔ́ƒɛ edula liti liti ɔsia kama, ɔsika Katɔti úte-nwu kusɛ kusɛ na ɔ́ya na edula ádia-nwu geen. 13Ɔmmɔ ɔsu ni, Isak úbenwini ɔlakɛne. Na lɛni kani na nwuna lɛkɛ lɛmmɔ lɛɛkɔ́ katɔ teebu uwi biala kemmo. 14Ubo baƒonu ku ɔmantɛ bakɔ pii. Na ubo kabla bablane ɔni na ɔ́ya na Ƒilistiƒuɔ anumi égyie na Isak lɛlɔ. 15Na ɔmmɔ ɔsu ni, Ƒilistiƒuɔ béti lɛti béyile abiɔ ani na Abraham ɔ́ya na nwuna kabla bablane béku mmɔ ƒui uwi ɔni na úlie ngba.
16Amu na Abimelek ɔ́su Isak ɔnini, “Tɔlɔ-bu kalɔ lɛlɔ mɛni. Bɔɔnu ka ábakɛ ɔyikun étulo-bu ƒui.”
17Ɔmmɔ ɔsu ni, Isak lɛnɔ ɔ́ta mmɔ na útátu nwuna kevo na Gerar Ɔkwalɛ na úti mmɔ únwini keliekɔ. 18Ka ɔ́tɔlɔ mmɔ kama ni, Isak ɔ́ya na básɔ bálɛmi abiɔ ani na béku ɔ́si ɔti uwi ƒui ani na Ƒilistiƒuɔ béyile mmɔ. Na ɔ́sɔku anyi ani kani na ɔti ɔ́sia abiɔ ammɔ ɔ́sia-nya.
19Ɔmmɔ kama ni, Isak ɔ́ya na nwuna kabla bablane béku ɔkwalɛ kesii kani na úsie uli mmɔ. Na bánu libiɔ ku ntu bɔbuni bɔdi. 20Nsu Gerar bebuo badane ku Isak bebuo lɛlɔ banune bádɔ kadɔ geen na libiɔ lɛmmɔ ɔsu na básu banii, “Abu mbo ntu bɔmɛni.” Ɔmmɔ ɔsu na Isak ɔ́sia libiɔ lɛmmɔ lɛnyi ɔnii Unyeƒi, ɔsika mmɔ na ama ku nwuna badi bádɔ.
21Na ɔ́ya na bésie bétéku libiɔ bamba. Na lɛmmɔ lɛnɔ líboku kadɔ. Na ɔ́sia libiɔ lɛmmɔ lɛnɔ lɛnyi ɔnii Lɛnungyie. 22Ɔmmɔ kama ni, ɔ́sɔ ɔ́tɔlɔ mmɔ lɛnɔ úsie útéku libiɔ bamba. Na ɔdi ɔ́sɔ útakya-nwu kadɔ kadi. Na ɔ́sia-ni lɛnyi ɔnii Rehobot iye Kuƒi Kɔtɛ. Na údie-nwu kalɔ ɔnini, “Ɔƒɛni amu Unwoti Katɔti úte-bu keliekɔ, na bɔdubɔlɛ lili na kalɔ kamɛni kemmo.”
23Ka Isak ɔ́si mmɔ ni, úti ɔ́kɔ úsie Beer-Seba kakɛ. 24Usien ɔmmɔ ni, Unwoti Katɔti údie lɛlɔ ɔtina-nwu na ɔ́su-nwu ɔnini, “Ami ndi ƒula ɔti Abraham Katɔti. Tayia, ɔsika nsiaku-ɔ. Ndubute-ɔ kusɛ kusɛ na lɛya na ƒula bebi ku bawɔ bemomo bebu na mina kabla ɔblane Abraham ɔsu.”
25Na mmɔ ni, Isak ɔ́tu lɛkpabi lɛdi na ɔ́kpali Katɔti úmwi-nwu na mmɔ. Na ɔmmɔ kama ɔ́tu nwuna kevo, na ɔ́ya na nwuna kabla bablane béku libiɔ lɛdi na mmɔ.
26Na uwi ɔmmɔ kemmo ni, Abimelek ɔ́si Gerar úbo Isak kudɔ na kesii kawɔdi kani na úsie útáda nwuna keliekɔ mɛni. Na nwuna kasusu betene akɔ unwi ɔni baalɔ Ahusa ku nwuna bekpone ɔtɔnkune ɔni baalɔ Pikol basiaku-nwu. 27Mmɔ ni, Isak úye-ma ɔnini, “Bi na bɛɛwia-mi kudɔ mɛni ka bɛ́bla-mi lili ɔkplu na bɛ́gya-mi na lɛ́tɔlɔ bina kudɔ?”
28Mmɔ na bédie kenye banini, “Bɔ́nu bɔ́ti nwaa ka Unwoti Katɔti ɔsiaku-ɔ, anwuɔsu bɔ́su lɛlɔ bɔnini, ‘Bunyimi bɔdi ɔlɛka bɔkya abu ku-ɔ ntɛ.’ Anwuɔsu na búbo ka abu ku awɔ bunyimi lɛla lɛdi aani likposela ka bula ƒui bulie na atu bɔyɔ kemmo, 29na alabla-bu lɛla likpidi lɛdi, kalɛ kani na abu lɛlɔ bútabla-a lɛla likpidi uwi ɔni na ákya-bu kudɔ, mmomu bɔ́da-a kaduɛ na bɔ́ya na átɔlɔ buɛɛ. Na ɔƒɛni ni, bɔ́nu bɔ́ti ka Unwoti Katɔti úte-ɔ kusɛ kusɛ.”
30Amu na Isak ɔ́ya na bánwa adila abuni geen béte-ma na bádi na báni na bákɛ ebiti kaduɛ. 31Ka kadi kégye ɔtanta ni, belusiene bammɔ báta na ama ku Isak bényimi ala kalɛ kani na básu. Na Isak údie-ma ulu na bátɔlɔ. Na anwu ɔ́kya keliekɔ kawɔdi kammɔ, na atu áyɔ-nwu.
32Limeyi lɛmmɔ kani lɛlɔ ni, Isak kabla bablane bébo na bábasu-nwu ka libiɔ lɛni na bétéku ni, bákɛ ntu! 33Anwuɔsu Isak ɔ́sia libiɔ lɛmmɔ lɛnyi ɔnii Siba, ɔni kalɔ ndi Lilidia. Na úti úbedu ku ɔmwi ni, ɔma ɔmmɔ lɛnyi ndi Beer Seeba.
34Ka Esau ɔ́bi lɛlɔ na ɔ́ƒɔ akwa aavlene ni, úti Hitini ulekubi ɔdi baalɔ Yudit ɔni ndi Beeri ubidi. Na ɔ́sɔ úti uleku bamba ɔni baalɔ Basmat na ɔdi Hitini kani na ɔti baalɔ Elon. 35Lɛla lɛmɛni lɛdi lɛla lɛni nékpoku Isak ku ulekudi Rebeka geen.
Currently Selected:
Ala Kalɔ Buse 26: lef
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.