Batalane Kabla 3

Blɔti Ɔ́bwi Ukyuli Ɔni Náƒɛ Uwi Kalɔ

1Limeyi lɛdi ni, Petro ku Yohane bésie Katɔti kakpakɔ uwi ɔni na Yudaƒuɔ beesié taatákpali katɔ. Ɔbla aani lɛdɔ ɛtɛ kemmo. 2Ka bédu kakpakɔ mmɔ na kayakun kani baalɔ banii Kayakun Buni kenye ni, mmɔ na bánu ɔnana ɔdi, ɔni náƒɛ uwi kalɔ ɔ́si nwuna bɔwɔ. Na nwuna bekyuli beeti-nwu taabava mmɔ limeyi ndi limeyi kalɛ na uteevele bekyuli bani muusié mmɔ egulabi. 3Ɔni na Petro ku Yohane bási baaví ni, úye-ma ɔnii bete-nwu egulabi adi. 4Amu na bédi bénye na bánu-nwu kpoo, na Petro ɔ́su-nwu ɔnini, “Nu mɛni!” 5Amu na ukyuli ɔmmɔ ɔ́talaku anumi ɔɔnu-ma, na ɔ́bla kasusu ka badubo-nwu lɛla lɛdi bute.

6Amu na Petro ɔ́su-nwu ɔnini, “Ami liiibo egulabi adi na mete-ɔ! Nsu ni, ndubute-ɔ lɛla lɛni nse-mi! Mɔɔsu-ɔ na Yesu Kristo Nasareni lɛnyi kemmo ka ni, ta na esie!” 7Na Petro ɔ́da ukyuli ɔmɛni kɔdianu na ɔ́ya na ɔ́ta únye. Amu na nwuna lɛgba ku kasoma ekubi ƒui áyu ɔkplu! 8Na ɔ́ba lɛgyu ɔ́kɔ katɔ na úbenye lɛgba lɛlɔ. Na úse kalɔ uusié taavi na ɔɔba agyu na uumwi Blɔti. Na ɔ́siaku-ma útéduo kakpakɔ mmɔ. 9Na bekyuli bani nkya mmɔ ni, bánu-nwu na bénu kalɛ na ɔkya uumwi Unwoti. 10Ka bábanu-nwu báti ka anwu mɔɔyɔ́ Kayakun Buni kudɔ bulie mmɔ ni, útakɔsi na ɔ́bla-ma dɛye dɛye.

Petro Údie Yesu Ɔyikun Kenye Na Kakpakɔ

11Amu na bekyuli pii békeli bésie-ma kudɔ na kesii kani baalɔ banii Ɔga Salomo lɛgbanya kemmo na Katɔti kakpakɔ mmɔ. Bébo bábanu ka ukyuli ɔmmɔ ɔ́tu ɔda Petro ku Yohane kpakplaa na nwuna bɔbwi bɔ́bla-ma kalɛ kadi! 12Amu ka Petro ɔ́nu bekyuli bammɔ ni, ɔ́su-ma ɔnini, “Israelƒuɔ, bi mɔɔbla-mii dɛye dɛye pii taasiku lɛla lɛmɛni lɛlɔ lɛni? Na bi ɔsu na bɛɛnu-bu aani bekyuli kedee badi na bɔdi? Bitakali bɛnii abu alati ɔyikun kemmo na búti bɔ́bwi ukyuli ɔmɛni! 13Ɔsika Unwoti úti ɔbu úte Ubidi Yesu. Na Unwoti ɔmɛni ndi Abraham ku Isak ku Yakob lɛnɔ Ɔti. Na anwu kani ndi bula bati kuuku lɛnɔ Unwoti. Ubidi Yesu ɔmmɔ na amii bíti bíte bɛnii badu. Na bíni-nwu na Pilato anumi bɛnii bɛɛɛgyi-nwu ina ka Pilato ɔ́yɔ ka ɔnyonu-nwu. 14Bíni ukyuli ɔbuni mmomu, na bɛ́tuna bɛnii ɔnyonu bekyuli ɔdune na ukyuli ɔbuni ɔmmɔ kenye. 15Amii bɛ́ya na bádu ukyuli ɔni muute bekyuli ngba. Nsu Unwoti ɔ́sɔ ɔ́gyila-nwu ɔ́lɛku bekpine akɔ! Na abu alati bɔ́nu-nwu ku bula anumi! 16Ɔkɛnku Yesu lɛnyi kemmo ɔsu na ɔnana ɔni na bɛgyi na bɛɛnu mɛni ɔ́kɛ lɛlɔkplu. Na ka ɔ́ƒɔ Yesu ɔ́di ɔsu ni, Blɔti ɔ́bwi-nwu na bina anumi.”

17“Banwa, ngyi ka tati tati ɔsu na amii ku bina benengu bɛ́bla lɛla lɛmɛni udu. 18Nsu ni, Unwoti ɔ́su ka nwuna Ukyuli Ɔƒunadi webo abi lɛni. Na ɔmɛni ndi kalɛ na ɔ́ya na nwuna kenye bediene linyese líbo líte. 19-20Anwuɔsu ni, binwini kama bɛkya ekpidi bɔbla na biti anumi bɛsia Unwoti lɛlɔ, kalɛ na waƒɔ bina ekpidi wedie-mii lɛlɔ na bɛkɛ bɔnwuna buɛɛ na Blɔti kudɔ, kalɛ watala Kristo Yesu wakya-mii aani bina Ɔƒɔne kalɛ. 21Ɔlɛka Yesu ɔƒɔ lɛlɔ ɔkya katɔ mmɔ wetédu uwi ɔni na Ɔti wasɔku lɛla biala webese ligeen aani kalɛ na nwuna kenye bediene básu bése. 22Ɔsika Mose ɔ́su ɔnini, ‘Bina Unwoti Katɔti ɔdubudie kenye udiene ɔdi ɔlɛku bina akɔ aani ami kalɛ. Anwuɔsu binu litemi biala lɛni na wasu-mii. 23Na ukyuli biala ɔni naaadubo nwuna litemi bunu ni, badubukulo kɔna kɔni nkya anwu ku Blɔti bekyuli ntɛ ƒui.’

24“Sɔsɔ geen ni, Katɔti kenye bediene ƒui ɔ́si Samuel úsela ni, básu ala ani mɔɔlɛ́ ɔmwi mɛni bése kukuuku. 25Unwoti nényimi kenye kamɛni ku bina bati ɔkɛ nwuna kenye bediene lɛlɔ. Na amii ndi bunyimi bɔmɛni ala badine. Ɔ́su Abraham ɔnini, ‘Na ɔkɛ ƒula kaba kemmo na ndubute kayawi ƒui bekyuli kusɛ kusɛ.’ 26Anwuɔsu ka Katɔti údie nwuna kabla ɔblane keyi ni, ɔ́tala-nwu ɔnii ɔka-mii kudɔ bubo bubebunku-mii kalɛ na bɛkana kama bunwini bɔkya bina ekpidi.”

Currently Selected:

Batalane Kabla 3: lef

Highlight

Copy