Batalane Kabla 16

Timoteo Ɔ́siaku Paulo Ku Silas

1Amu na Paulo ku Silas bátɔlɔ bésie ɔma ɔni baalɔ Derbe, na bákɛ mmɔ bávi bésie Listra. Na mmɔ na bésie bátánu ɔƒɔtaadine ɔni baalɔ Timoteo. Na uni ɔdi Yudani, na anwu lɛnɔ ɔ́ƒɔ Kristo ɔ́di. Nsu ɔti ɔdi Grikini. 2Na baƒɔtaadine bani ƒui nkya Listra ku Ikonion ni, baabu Timoteo kaduɛ. 3Anwu geen na Paulo ɔ́wia ka utiku na ɔsiaku-nwu. Anwuɔsu ɔ́bla-nwu Yudaƒuɔ ɔlɔna bukulo ɔdi, ɔsika Yudaƒuɔ bani nkya amadɔ mmɔ ƒui bagyi ka ɔti ɔdi Grikini. 4Na ka báta ni, bakɛ baaví lɛma lɛni ƒui kemmo, na baasu lɛla lɛni na Yerusalem benengu básu. Na básu-ma banii badi-nya lɛlɔ. 5Anwuɔsu bekyuli bammɔ bémomo bébu, na lɛni kani na bana bɔƒɔtaadi lɛnɔ bɔ́yu ɔkplu búbu.

Paulo Ɔ́nu Budie Bɔtina Na Troa

6Na nwuna kama ni, bávi bésie Ƒrigia ku Galatia, ɔsika Katɔti Kɔyu kútete-ma kuƒi ka basu litemi buni na Asia kalɔ lɛlɔ. 7Na ka bétédu Misia ni, báwia ka batávi Bitinia kalɔ lɛlɔ. Nsu mɛni lɛnɔ ni, Katɔti Kɔyu kútatuna ka besie mmɔ. 8Anwuɔsu básɔ bénwini básia Misia kalɔ na bétédu ɛpu kudɔ na ɔma ɔni baalɔ Troa. 9Usien ɔmmɔ ni, Paulo ɔ́nu budie bɔtina bɔdi na kɔna kemmo. Na kɔna kɔmɛni kemmo ni, ɔ́nu ɔnana ɔdi ɔni nási Makedonia na unye uuvele-nwu ɔnini, “Via bo Makedonia mɛni na ebebunku-bu o-o!” 10Amu na budie bɔtina bɔmɛni ɔsu ni, bɔ́klibi lɛlɔ na bɔ́tɔlɔ búsie Makedonia. Ɔsika ɔmɛni ɔɔtina-bu ka Blɔti ɔɔwia ka ɔtala-bu na busie butásu litemi buni lɛmɛni na mmɔ.

Lidia Úti Lɛlɔ Úte Katɔti Na Ƒilipi

11Amu na bútélie ɔkɔlɔ ɔdi kemmo na Troa, na bɔ́via búsie Samotrake. Na ka kadi kégye ni, búsie bútéduo Neapoli. 12Ka bɔ́si mmɔ ni, bútéduo Ƒilipi ɔni ndi Makedonia ɔma udeedi. Na mmɔ lɛnɔ ɔdi Romaƒuɔ kalɛkɛ. Na búlie mmɔ emeyi adi.

13Amu na lɛnwunameyi lɛlɔ ni, bɔ́vi bɔ́lɛ ɔma ɔmɛni kemmo na búsie ketu kadi kudɔ na kesii kani na bɔ́kali ka mmɔ na bekyuli beesié taatákpali katɔ. Na búlie mmɔ bɔ́su beleku bani nébo mmɔ Blɔti litemi. 14Na bana kemmo unwi baalɔ banii Lidia. Uuyé adi egyiedi na Tiatira, na ɔdi ukyuli ɔni mɔɔbu Katɔti geen. Na uwi ɔni na ɔkya uunú bula butemi bɔmɛni ni, Blɔti úbimi-nwu kasusu na ɔ́ƒɔ etemila ani na Paulo ɔ́su mɛni ƒui. 15Amu ka anwu ku nwuna kaduli bekyuli ƒui báƒɔ ntu bɔkpila ɔdi ni, úvele-bu ɔnini, “Si bɛ́tuna bɛnii ndi ɔƒɔtaadine geen nte Blɔti ni, na bibeduo-mi kudɔ.” Na ɔ́ni litemi lɛmɛni úneneku-bu útédu ka búsie bútéduo-nwu kudɔ.

Bákya Paulo Ku Silas Aban Ɔtɔ

16Amu na limeyi lɛdi uwi ɔni na búsela butákpali katɔ ni, bɔ́siaku ugblebi ɔdi ɔni lɛlɔ na kɔyu kukpidi kulie na uubó like. Na ɔɔbla egulabi kaduɛ teete nwuna benwoti. 17Amu na ugblebi ɔmɛni ɔ́siaku abu ku Paulo kama na ɔɔva taasu ɔnini, “Bekyuli bamɛni badi Katɔti kabla bablane, na bébo mɛni bani babatina-mii ngba bɔƒɔ ulu!” 18Amu na lɛla lɛmɛni lísie anumi emeyi pii. Na ka Paulo ɔ́nɔ bɔnu ni, únwini na ɔ́su kɔyu kɔni nsiaku ugblebi ɔmɛni ɔnini, “Mɔɔbɔku-ɔ na Yesu Kristo lɛnyi kemmo nnii vi lɛ-nwu lɛlɔ!” Na kɔnakunwi ni, kɔyu kukpidi kɔmɛni kɔ́vi kɔ́lɛ-nwu lɛlɔ kemmo!

19Amu ka nwuna benwoti bánu ka bana lɛlakɛ lɛ́yii ɔsu ni, béƒie Paulo ku Silas na báni-ma bésienku litemi katɛkɔ benengu na kuyentɛ. 20Na básu na kuye mmɔ banini, “Bekyuli bamɛni badi Yudaƒuɔ, na bakya beebile bula ɔma. 21Bakya baatina bekyuli ala ani na muunye teetile Romaƒuɔ ɔda bubo lɛlɔ.”

22Na bekyuli pii bábaka bámana-ma, na benye beedí Paulo ku Silas teete lɛlɔ. Na litemi batɛne bamɛni báya na báni-ma lɛwu bábwɛ, na béte kuƒi banii bebo-ma kugyiimi. 23Amu ka ebola éduo-ma lɛlɔ kaduɛ ni, béti-ma bátákya aban ɔtɔ. Na básu ukyuli ɔni mɔɔnu ama bani ntɛ ɔtɔ mmɔ lɛlɔ banii ɔda Paulo ku Silas kaduɛ. 24Na ka bébo-nwu ɔda lɛni ɔsu ni, úti-ma útákya kasuudikɔ ƒui na bébo-ma kɔgba.

25Amu na usientɛ uwi ɔni na Paulo ku Silas bakya baakpali katɔ na beedie lɛnu teete Katɔti ni, bani ntɛ ɔtɔ mmɔ bakya beenú. 26Kɔnakunwi ni, kalɔ kákunku momoomo, na ɔtɔ ɔmmɔ ƒui lɛnɔ ɔ́kunku ɔni na ɔtɔ kɔyakun ƒui kɔ́lɛmi, na kɔgba kɔni bébo báda batɔntɛne bammɔ ƒui kɔ́ƒɛ. 27Amu na bana lɛlɔ ɔnune úkeyi lɛlɔ ɔ́gyinya na ɔ́nu ka ɔtɔ ɔmmɔ kɔyakun ƒui kɔ́lɛmi kuwi. Na ka ɔ́kali ɔnii ɔtɔ batɛne bammɔ ƒui békeli ɔsu ni, ɔ́kpa nwuna kewii ɔnii ɔɔdú lɛlɔ. 28Nsu ka Paulo ɔ́nu ɔ́ti lɛla lɛni na ɔ́yɔ ka ɔbla lɛlɔ ɔsu ni, ɔ́kpali-nwu ɔ́su ɔnini, “Tabla! Bula ƒui bɔkya mɛni.”

29Amu na ukyuli ɔmɛni ɔ́lɔ ɔnii beti ukpo beboku. Na lɛlɔ bɔtɔ kemmo ni, úbalɛ akɔnkɔ na Paulo ku Silas anumi. 30Na ka ɔ́da-ma údie ɔtɔ ɔmɛni kemmo ni, úye-ma ɔnini, “Ati bene, bi na ɔlɛka lɛbla asa na lɛkɛ bɔƒɔ?”

31Amu na básu-nwu banini, “Ƒɔ Blɔti Yesu Kristo di, na adubɔkɛ bɔƒɔ, awɔ ku ƒula kaduli bekyuli ƒui.” 32Na bésie bátásu anwu ku nwuna kaduli bekyuli ƒui Blɔti lɛlɔ litemi buni lɛmɛni. 33Na usien ɔmmɔ kani na ɔ́mana-ma alɛbi ani nsia-ma lɛlɔ, na anwu ku nwuna kaduli bekyuli ƒui báƒɔ ntu bɔkpila ɔdi. 34Amu na béduo ɔtɔ na úte-ma lɛla lɛdi bádi. Na nwuna kaduli bekyuli ƒui bákɛ ebiti geen, ɔsika báƒɔ Katɔti bádi.

35Amu na kadi kégye ni, ɔma ɔmmɔ litemi batɛne bátala beƒiene banii bátásu ukyuli ɔni mɔɔnu batɔntɛne lɛlɔ mmɔ banii, “Nyonu baƒɔ bammɔ na beteesie.”

36Amu na bana lɛlɔ ɔnune ɔmɛni ɔ́su Paulo ku Silas ɔnini, “Litemi batɛne banii nnyonu-mii na biteesie. Anwuɔsu biteesie ku keyi buɛɛ.”

37Amu na Paulo ɔ́su beƒiene bammɔ ɔnini, “Bébo-bu na bekyuli ƒui anumi ɔni bátatɛku-bu litemi lɛdi asa na béti-bu bátákya aban ɔtɔ kemmo. Nsu ni, Romaƒuɔ na bɔdi! Na ɔƒɛni na baawia ka bɔbɛ bɔtɔlɔ? Kudii! Ya ama alati bebo bebedie-bu!”

38Amu na beƒiene bamɛni bénwini bésie bátásu litemi batɛne kenye kamɛni. Na ka bénu ka Paulo ku Silas badi Romaƒuɔ ni, liƒu lɛ́da-ma geen! 39Ɔmɛni ɔsu bésie bétékpi-ma kɔtɔ, na bákpanku-ma bálɛku aban ɔtɔ. Na bévele-ma banii batɔlɔ ɔma ɔmmɔ kemmo na beteesie likpo bamba. 40Amu na Silas ku Paulo bátɔlɔ bésie Lidia kesii. Na mmɔ na bátánu baƒɔtaadine bakladi. Na básɔ bákya-ma ogya bébu asa na bátɔlɔ ɔma ɔmmɔ kemmo.

Currently Selected:

Batalane Kabla 16: lef

Highlight

Copy