SAKALIA 9
9
Ko te Fakamasinoga o Malo Pili ki Iuta
1 #
Isa 17.1-3; Iele 49.23-27; Amo 1.3-5 #
Isa 23.1-18; Eseki 26.1—28.26; Ioelu 3.4-8; Amo 1.9,10; Mata 11.21,22; Luka 10.13,14 Tenei te fekau a te Aliki:
Ko oti ne iku i a ia ke fakasala te fenua o Hatalaka mo Tamaseko. E se ko matakaiga fua o Isalaelu e o te Aliki, kae e pena foki te laumua o Sulia. 2A Hamata, tela e tu i luga i Hatalaka, e o te Aliki foki, e pela foki mo fa'kai o Tulo mo Saitonu mo vaega poto katoa o latou. 3Ko oti ne fakatu ne tino o Tulo ona olo, kae fakaputu foki ne latou a siliva mo aulo tela ko pela fua me ne kaiga! 4Kae ka ave katoa keatea ne te Aliki ana mea. Ka pei ne te Aliki ona koloa ki te tai, ka ko te fa'kai ka sunu ke liu lefu.
5 #
Isa 14.29-31; Iele 47.1-7; Eseki 25.15-17; Ioelu 3.4-8; Amo 1.6-8; Sefa 2.4-7 Ka lavea ne te fa'kai o Asekelona te mea tenei, kae ka ma'taku. Ka lavea foki ne te fa'kai o Kasa kae ka puapuaga valevale i te mae. E pena foki a Ekelona, a ona fakamoemoega ka galo atu katoa. Ka seai se tupu o Kasa, ka ko Asekelona ka lavaki. 6A tino o fenua valevale ka nofo i Asetota. Muna a te Aliki, “Ka fakamasiasi ne au a tino fakamata'mata katoa konei o Filisitia. 7Ka se toe kai latou ki ne meafasi e isi ne toto i ei, io me so se meakai tapu aka foki. A latou katoa kola e toe mai, ka fai mo oku tino, ka pela latou me se puikaiga i te matakaiga o Iuta. A tino Ekelona ka fai mo oku tino, e pela mo tino Iepusa.#9.7 tino Iepuse: Ko tino tonu eiloa o Ielusalema, kola ne pulegina ne Tavita mai tua o te pukega ne ia a te fa'kai. 8Ka puipui faka'lei ne au toku fenua kae fakatapu foki ne au a kautau o ulu i loto i ei. Ka se toe talia ne au ne pule saua ke toe fakapuapuaga ne latou oku tino. Ko oti ne lavea ne au te puapuaga o oku tino.”
Ko te Tupu i Aso Fakamuli
9 #
Mata 21.5; Ioa 12.15 Tino o Siona, lifu kae fiafia!
Tino o Ielusalema, ka'laga mo te fia'fia!
Kiloke, te otou tupu ko vau ki a koutou!
E vau a ia mo te manumalo, kae tela la, a ia se tino malālo
Fua kae sopo mai i luga o te asini — se tamā asini.
10 #
Sala 72.8
Muna a te Aliki,
“Ka ave keatea ne au a kaliota tau mai i Isalaelu kae ave keatea foki a solofanua mai i Ielusalema;
A kausana kola e fakaaoga i taua ka fakamasei katoa.
Ka fai ne te otou tupu ke maua te filemu i va o malo kesekese;
Ka pule a ia mai te sua feitu lalolagi ki te sua feitu lalolagi,
Mai te vaitafe o Eufilate ke oko eiloa ki kapakapalagi.”
Ko te Toe Fakaolaga o Tino o te Atua
11 #
Eso 24.8
Muna a te Aliki,
“Ka fakasaoloto ne au otou tino,
Ke sao mai i lua kola e seai ne vai i ei,
E tusa mo taku feagaiga mo koutou tela ne fakamautakitaki
Ki toto o manu o taulaga.
12A koutou kola i te tafeaga, kola ko isi nei ne fakamoemoega,
Na foki, foki ki te koga e sao lei ei koutou.
Au e fai atu ki a koutou nei,
Ka taui fakalua ne au koutou ki fakamanuiaga ona ko puapuaga ne oko atu ki a koutou.
13Ka fakaaoga ne au a Iuta pela me se kausana a te sotia,
Ka ko Isalaelu pela me se matasana,
Ka fakaaoga ne au a tino o Siona e pela me se pelu,
E pela me se pelu, ke taua atu ki tino Eleni.”
14A te Aliki ka sae mai i luga o ona tino;
Ka sana ana matasana e pela me ne uila.
Ka fakatagi ne te Aliki Maluga a te pu;
Ka sasale a ia i te afā mai saute.
15Ka puipui ne te Aliki Tafasili i te Malosi a ona tino,
Kae ka ta fakapalele ne latou olotou fili.
Ka ka'laga latou i taimi o te taua e pela me ne tino ko'na,
Kae ka fakamaligi ne latou a toto o olotou fili;
Kae ka tafe e pela me se toto o se manu ne ta mo fai te taulaga,
Tela e ligi ki luga i te fata-fai-taulaga mai se pesini.
16Ka oko mai te taimi tena,
Ka fakasao ne te Aliki a ona tino e pela me se tausi mamoe
E fakasao ne ia a tena lafu mai mea faiga'ta.
Ka maina latou i tena fenua e pela me ne fatu tauā o se kalauna.
17Ko oko eiloa i te gali kae lei o te fenua!
A te kautama tuputupu ka tupu ma'losi i te lei o ona saito mo uaina.
Currently Selected:
SAKALIA 9: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
