MALEKO 7

Ko Akoakoga a Tupuga o Tino Iutaia

(Mata 15.1-9)

1Ne fakapotopoto mai ki a Iesu a Falesaio mo faiakoga o te Tulafono kola ne o'mai mai i Ielusalema. 2Ne matea ne latou a nisi soko o Iesu e 'kai, kae e seki 'fano olotou lima.

3A Falesaio pela foki mo tino Iutaia katoa, e tausi eiloa latou ki akoakoga ne maua ne latou mai i olotou tupuga: e se mafai eiloa o 'kai seiloga ko oti ne 'fano faka'lei olotou lima, 4io e se mafai foki o 'kai ki so se meakai e aumai i te maketi seiloga ko oti ne 'fulu faka'lei.#7.4: sose mea e aumai i te maketi vagana ke oti ne fulu muamua; io me so se mea mai i tua o te aumaiga a latou mai i te maketi vagana ko oti ne koukou a latou muamua. E se gata fua i feitu pena, kae e tausi foki latou ki tulafono i te 'muluga o ipu, ulo, pesini mo mea 'moe.#7.4: I nisi o lomiga e seai e sae mai i ei mo moega.

5Tela, fesili atu ei a Falesaio mo faiakoga o te Tulafono ki a Iesu penei, “Ai a e se tau'tali i ei ou soko i akoakoga ne tuku mai ne o'tou tupuga ki a tatou, i te 'kai o latou mo lima se 'fano?” 6#Isa 29.13 Ne tali atu a Iesu, “Ko tonu ei te valoaga a Isaia ne fai e uiga mō koutou! Ne tusi ne ia i a koutou ne tino fia amiotonu:

‘Muna a te Atua i tino konei e faka'malu io me ava mai ki a au i olotou pati,

Ka ko olotou loto ko oko eiloa i te 'mao mai i a au.

7E se aoga te lotou tapuaki mai ki a au,

I te mea e akoako a fakatonuga a tino e pela me ne tulafono a te Atua!”’

8Muna a Iesu, “Ko tuku fakaatea ne koutou a fakatonuga a te Atua, kae faka'logo koutou ki akoakoga a tino.”

9Ne toe fai atu foki a Iesu: “Ko oko eiloa i te 'poto o koutou mo te otou auala e 'teke atu ei koutou ki tulafono a te Atua, ko te mea ke mautu ei otou akoakoga! 10Ne fakatonu mai ne Mose, ‘Ava ki ou matua,’ ka ko ‘So se tino e fai ne ana muna se 'tau e uiga ki ona matua, e 'tau o tamate.’ 11Kae ne akoako ne koutou me kafai se tino e isi sena mea e fesoasoani ei a ia ki ona matua, kae fai ake pela, ‘A te mea nei se Kopani’ ko tona uiga se mea ko tuku atu mo te Atua, 12ko kalo keatea a ia mai tena tiute ko te fesoasoani ki ona matua. 13Mai se vaega faiga penei, ko fakaseaoga ei ne koutou a te muna a te Atua mo akoakoga e taku atu ne koutou ki nisi tino. Kae e uke ake foki a nisi vaega mea penei e fai ne koutou.”

Ko Mea e Fakamasei ne ia a te Tino

(Mata 15.10-20)

14Ne toe kalaga atu a Iesu ki te vaitino ke o'mai ki a ia, ana muna: “Faka'logo mai koutou katoa, kae e 'tau foki o malamalama ia koutou. 15E se fakamasei a te tino ne mea kola e kai ne ia, ka ko mea kola e mafaufau ki ei kae faipati ne ia.#7.15: I nisi lomiga e fakaopoopo a te foaitau e 16: Fakalogo mai, manafai e isi ne otou taliga! (onoono ki te 4.23). 16(Tela la, kafai e isi ne otou taliga, na faka'logo mai ki muna e fai atu ne au!)”

17Ko tuku ne ia te vaitino kae fano ki loto i te fale, kae ne fesili atu ona soko ki a ia e uiga mō te tala fakatusa tenei. 18Muna a Iesu, “A koutou ko oko eiloa i te va'lea. E seki malamalama eiloa ia koutou me se mafai o masei te tino i so se mea e kai ne ia, 19i te mea e se fano ki loto i tona loto kae fano ki loto i te tinae, ko fano ei i tena fanoga.” Mai muna konei a Iesu, ko fakaasi mai ne ia me i meakai katoa e 'lei faeloa te kai ki ei. 20Ne toe 'soko atu ana muna ki a latou, “Ko mea kola e mafaufau ki ei te tino kae faipati ne ia, ko mea kona e fakamasei ne ia te tino. 21Me ko te loto o te tino, e 'tupu mai ei a mafaufauga ma'sei, e takitaki ei a ia ke fai amioga fina lalolagi, te puke malo a mea a tino, te tatino, 22te mulilua, te kaimanako mo vaega amioga ma'sei valevale; te fakaloiloi, te amio se ava, te kaisanosano, te fakaloiloi, te fakamatamata mo te fakavalevale. 23A mea kona e o'mai mai loto i te tino, e fai ne ia a te tino ke masei.”

Ko te Fakatuanaki o te Fafine

(Mata 15.21-28)

24Ne tiaki ne Iesu a te koga tena kae fano ki te fenua e tu pili ki te fa'kai ko Tulo. Ne fano ki loto i te fale, kae seki manako ke iloa a ia ne se tino i a ia e nofo i kona; ka ko se mafai eiloa o fai sena togafiti ke lafi a ia. 25E isi se fafine tela e pukea tena tama fafine ne te agaga masei, ne logotala a ia i a Iesu, vau ei ki a ia i mu taimi kona, fakapaku ifo ei i ona vae. 26A te fafine tenei, se fafine o fenua fakaatea, kae ne fanau i Foinikia i Sulia. Ne fakamolemole mai ki a Iesu ke tuli keatea te temoni mai tena tama. 27Kae ne tali atu a Iesu, “Ke fagai muamua ne tatou te fanau; e se 'tau o puke atu tatou ki meakai a te fanau o pei ki kuli.” 28Ne tali mai te fafine, “Te Aliki, e oko ki kuli i lalo i te taipola, e 'kai foki ki matutuga meakai a te fanau!” 29Ne tali atu a Iesu ki a ia, “Ona ko tau tali tena, vau la o fano ki tou fale; a te temoni ko oti ne fano keatea mai tau tama!” 30Ne foki atu ki tona fale, maua atu ei ne ia tena tama e moe mai i te moega; ko seai eiloa se temoni e nofo i a ia.

Ko Faka'lei ne Iesu a te Tino Tuli kae Gūgū

31Ko tuku ne Iesu a te fa'kai ko Tulo o fano ki Saitonu. Mai kona ne toe fano ki te Namo o Kalilaia, kae ne ui i fa'kai e sefulu e igoa ki a Tekapoli. 32E isi ne tino ne aumai ne latou ki a ia a te tagata tuli kae gūgū, kae fakamolemole mai ki a Iesu ke fakaeke ona lima ki luga i a ia. 33Tela, puke atu ei a Iesu o ave ki se koga na ko laua ake eiloa, ke tai 'mao laua mai te vaitino, tuku ei ona matikao ki loto i taliga o te tagata, savale atu ki ei kae puke ki te alelo. 34Ne kilo ake a Iesu ki te lagi, kae ne manava fi'ta kae fai atu ki te tagata tenei penei, “Efata,” ko tona uiga, “Ko 'logo ou taliga!” 35I kona foki eiloa ko te mea eiloa ko 'logo ona taliga, ka ko mafai foki ne ia o faipati. 36Tela, fakatonu atu ei latou katoa ne Iesu ke mo a eiloa e faipati ne latou ki se tino a te mea nei. Kafai e fakatonu malosi atu a ia ke mo a e tala atu ne latou a te mea nei, ka ko na gasolo ei latou o tala atu ki tino a te mea nei. 37Ka ko tino katoa ne faka'logo ki te mea nei, ne ofo masei latou. Ne fai ake olotou muna penei, “Ko oko eiloa i te 'lei ana galuega ne fai. Ko fai ne ia tino 'tuli ke 'logo olotou taliga, mo tino gūgū ke fai'pati!”

Currently Selected:

MALEKO 7: Tusi Tapu

Highlight

Copy