MATAIO 9

Ko Fai ne Iesu ke 'Lei a te Tino Masaki Faka'mate

(Male 2.1-12; Luka 5.17-26)

1Ne sopo ake a Iesu ki te poti o foki atu ki te sua feitu o te namo, oko atu ei ki tena fa'kai tonu.#9.1:I tena fa'kai tonu: Kapanaumi (onoono ki te 4.13). 2Kae kiloke, ne aumai ne nisi tino a te tagata e masaki faka'mate, e takato i luga i te moega. Ko matea atu eiloa ne Iesu te lotou fakatuanaki, faipati atu ei a Iesu ki te tagata e masaki faka'mate penei: “Taku tama, ke nui tou manava me ko magalo au agasala.” 3Kae ne fai ake pela a nisi faiakoga o te Tulafono i a latou eiloa, “Ko muna masei a te tagata nei ki te Atua!” 4Ka ko Iesu ko iloa ne ia a mafaufauga o latou, tela fai atu ei penei: “Se a te mea e mafaufau ma'sei ei koutou? 5Tefea te mea e faigofie, ko te fai atu pela, ‘Ko magalo au agasala,’ io me ko te fai atu pela, ‘Tu ki luga o sasale’? 6Kiloke, ka fakamaoni atu ne au ki a koutou, i te mea a te Tama a te Tagata e pule i te fakamagaloga o agasala i te lalolagi nei.”Tela, fai atu ei a Iesu ki te tagata e masaki faka'mate, “Tu ki luga, puke tou moega, kae fano ki tou fale!” 7Ne tu ake te tagata tena, fano ei ki tena fale. 8I te laveaga ne tino a te mea nei, ne ma'taku latou, kae 'viki ki te Atua me ko tuku mai ne ia a te pule pena ki tagata.

Ko Kalagagina Mataio ne Iesu

(Male 2.13-17; Luka 5.27-32)

9Ko tiaki ne Iesu a te koga tena, ka koi sasale atu a ia o fano, ne lavea ne ia a te tagata e igoa ki a Mataio, e sagasaga i te ofisa o lafoga. Tela, fai atu ei a ia ki ei penei: “Tautali mai i a au.” Tela, tu ei ki luga a Mataio kae tautali atu i a ia.

10 # Luka 15.1,2 I te taimi ne kai ei a Iesu i te fale o Mataio, #9.10: i te fale o Mataio; io me i tena (fale o Iesu) te fale; e tokouke a tino ao lafoga mo tino agasala ne o'mai, ke 'kai fakatasi latou mo Iesu mo ona soko i te laulau. 11I te laveaga ne nisi o Falesaio a te 'kaiga tenei, faipati atu ei latou ki ona soko penei: “Se a te mea ko 'kai fakatasi ei te otou faiakoga mo tino ao lafoga, pela foki mo tino agasala?” 12Ne lagona ne Iesu olotou pati, tali atu ei a ia penei: “A tino se ma'saki, e se ma'nako ki se tokita, ka ko latou fua kola e ma'saki. 13#Mata 12.7; Hose 6.6 Olo o salasala ake me se a te uiga o te muna tenei: ‘Au e loto ki te alofa, kae se ko te taulaga.’ Me i a au ne seki vau o kalaga ki tino amiotonu, ka ko tino agasala.”

Ko te Fesili e Uiga ki te Fakalikiliki mō Tapuakiga

(Male 2.18-22; Luka 5.33-39)

14Ne o'mai a soko o Ioane te papatiso o fesili mai ki a Iesu penei: “Se a te mea e fakalikiliki ei matou mo Falesaio mō tapuakiga, kae e se pena ou soko?” 15Ne tali atu a Iesu penei: “Ko te otou taofi e fanoa'noa pefea a taugasoa o te tagata fatoa fakaipoipo i aso e fakatasi ei latou mo ia? Kae e oko mai eiloa a te aso e fano keatea i ei a te tagata fatoa fakaipoipo mai ona taugasoa; tenei la te pogai ko fakaliki'liki ei latou mō tapuakiga.

16“E seai se tino e fono ne ia te peleue ko leva ki se laugatu fou, i te mea kafai e masae mai keatea te fono tena mai te peleue, ko te mea eiloa ko gasolo o lasi te masaega. 17E se utu ne se tino ne uaina fou ki loto i fagu mua e utu ei a uaina. Kafai e fai pena ne se tino, ko fagu ka ma'fa, ko maligi ei te uaina ki tua, ko fagu foki ka ma'sei. Ka ko te mea e fai penei: a te uaina fou e utu ki loto i fagu fou, tela la, ka 'sao 'lei ei a fagu mo te uaina.”

Ko te Tamaliki Fafine a te Ofisa Iutaia, mo te Fafine ne Fakapatele ki te Gatu o Iesu

(Male 5.21-43; Luka 8.40-56)

18I te palelega ne faipati atu a Iesu ki a latou, ne vau a te ofisa Iutaia ki a ia, ne totuli i ona mua kae fai mai, “A taku tama fafine fatoa mate atu nei eiloa, kae vau o fakaeke ake tou lima ki luga i a ia, ko ola ei a ia.” 19Tela, tu ake ei a Iesu, kae tau'tali atu mo ona soko i a ia.

20Kae e isi se fafine ne tafe tena sua i tausaga e sefulu lua, ne tolotolo mai tua o Iesu; kae fakapatele atu ki te kapa o tena gatu. 21Me ne fai pela tena mafaufau, “Ke patele fua au ki tena gatu, ko malosi ei au.” 22Ne mafuli atu a Iesu, kae ne lavea atu ne ia te fafine, faipati atu ei penei: “Taku tama, ke nui tou manava! Ko tou fakatuanaki ko ola ei koe.” I te taimi eiloa tena, malosi ei te fafine.

23Ne fano a Iesu ki te fale o te ofisa Iutaia. I te taimi tena, ne lavea atu ne ia a tino e usuusu pese i te mate, mo tino e 'nofo i ei ko se toka olotou loto. 24Ana muna, “Olo keatea tino katoa! A te tamafine nei e seki mate, kae moe fua!” Fakatauemu ei latou ki a Iesu. 25I te taimi ne olo ei a tino keatea, ne ulu atu a Iesu ki loto i te potu o te tamafine, kae puke ki tena lima, nofo ake ei a ia ki luga. 26Tela, salalau atu ei te tala i te koga fenua tena.

Ko Fakapula ne Iesu a Mata o te Tokolua 'Kivi

27Ne tiakina ne Iesu a te koga tena, ka ko te taimi ne sasale atu ei a ia o fano, e tokolua tagata ne tau'tali mai i a ia. Ne ka'laga mai laua penei: “Te Tama a Tavita, alofa mai ki a maua.” 28Ne ulu atu a Iesu ki loto i te fale, kae ne o'mai a te tokolua tagata 'kivi ki a ia, kae fesili atu a ia ki a laua penei: “E talitonu koulua me mafai ne au o fakalei a koulua?” Ne tali mai laua, “Ao, e te Aliki!” 29Ne fakapatele atu a Iesu ki o la mata kae fai atu: “E pela eiloa mo te mea e talitonu koulua ki ei, ke fai eiloa pena!” 30Toe kite ei laua. Faipati malosi atu ei a Iesu ki a laua penei: “Sa taku atu ne koulua a te mea nei ki so se tino!” 31Kae i te la oloatuga, ne fakasalalau atu ne laua a te tala e uiga ki a Iesu i te koga fenua tena.

Ko Fai ne Iesu a te Tagata Gūgū ke Faipati

32Ko olo atu a te tokolua konei, kae aumai ne nisi tino ki a Iesu a te tagata gūgū, me ne pukea ne te temoni. 33I te palelega ne afuli keatea te temoni, toe mafai ei o faipati faka'lei a te tagata tena. Ko oko eiloa i te ofo o tino, kae fai ake penei: “E seki lavea eiloa ne tatou se mea penei i Isalaelu!” 34#Mata 10.25; 12.24; Male 3.22; Luka 11.15 Ka ko Falesaio ne fai ake latou penei: “Ko te pule sili o temoni ne tuku atu ne ia ki a ia a te mana o afuli keatea a temoni.”

Ko te Loto Alofa o Iesu ki Tino

35 # Mata 4.23; Male 1.39; Luka 4.44 Tela, tamilo atu ei a Iesu i fa'kai 'lasi mo fa'kai fo'liki o asiasi ki ei. Ne akoako atu i loto i olotou fale tapuaki; kae folafola atu te Tala 'Lei o te Malo, kae fai ke 'lei a masaki o tino. 36#Nume 27.17; 1Tupu 22.17; 2NTupu 18.16; Eseki 34.5; Male 6.34 I te laveatuga ne ia i te tokouke o tino, ne tupu ake ei tena loto alofa mō latou, me ko se toka olotou loto i te seai o se tino e fesoasoani atu, ko pela mo mamoe e seai se lotou tino tausi. 37#Luka 10.2 Ona ko te mea tena, ne fai atu a ia ki ona soko penei:“Ko oko eiloa i te lasi o te saito e fia kati, ka ko tino ga'lue i te saito e se tokouke! 38Fakatagi atu ki te tino e a ia te fatoaga, ke uga mai se kau faigaluega e tai tokouke atu o fakaputu te saito.”

Currently Selected:

MATAIO 9: Tusi Tapu

Highlight

Copy