LUKA 4

Ko te Fakaosoosoga o Iesu

(Mata 4.1-11; Male 1.12-13)

1Ne foki mai a Iesu mai i te Iolitana, ko fonu i te Agaga Tapu, kae ne takitaki ne te Agaga Tapu ki te vao, 2tela ne fakaosoosogina ei a ia ne te Tiapolo i aso e fa sefulu. Ne seki kai eiloa a ia i te vaitaimi tena, kae ne lagona ne ia te likiliki i te otiga.

3Ne fai atu a te Tiapolo ki a ia, “Kafai ko koe te Tama a te Atua, fakatonu ake ke liu falaoa te fatu tenei.” 4#Teu 8.3 Ne tali atu a Iesu, “Muna a te Tusi, ‘E se ko meakai fua e ola ei te tino.’ ”

5Ne toe ave fakavave a ia ne te Tiapolo ki te koga maluga, kae ne fakaasi atu ki a ia malo katoa o te lalolagi. 6Muna a te Tiapolo, “Ka avatu ne au te pule mo te 'malu katoa ki a koe, me ko oti ne tuku mai ki a au te pule, tela e mafai o tuku fua ne au ki so se tino e loto au ki ei. 7Tela la, e a koe katoa mea konei, manafai e tapuaki mai koe ki a au.” 8#Teu 6.13 Ne tali atu a Iesu, “Muna a te Tusi, ‘Tapuaki ki te Aliki tou Atua, me na ko ia fua e 'tau o tavini koe ki ei!”’

9Ne toe ave a ia ne te Tiapolo ki Ielusalema ki te koga tafa maluga o te Fale Tapu. Ana muna ki a ia, “Kafai ko koe te Tama a te Atua, eva ki lalo mai konei. 10#Sala 91.11-12 Me ne fai mai te Tusi, ‘Ka fakatonu ne te Atua ana agelu ke tausi ki a koe.’ 11Ne muna mai foki, ‘Ka apai ne latou koe i olotou lima, ko te mea ke se pa'kia ou vae i fatu.”’ 12#Teu 6.16 Ne tali atu a Iesu ki a ia, “Muna a te Tusi, ‘E se 'tau mo koe o tofotofo ki te Aliki tou Atua.”’ 13I te otiga ne fakaosooso a Iesu ne te Tiapolo i ala kesekese, tiakina ei ne ia ke oko ki se isi aso.

Ko te Kamataga o te Galuega a Iesu i Kalilaia

(Mata 4.12-17; Male 1.14-15)

14Ne foki a Iesu ki Kalilaia, kae ne nofo i a ia te mana o te Agaga Tapu. Ne pa te tala e uiga ki a ia i koga katoa o te fenua tena. 15Ne akoako ki a latou i loto i olotou fale tapuaki, kae ne tavaegina ne latou katoa.

Ko se Talia a Iesu i Nasaleta

(Mata 13.53-58; Male 6.1-6)

16Ne foki Iesu ki Nasaleta, ki te koga ne tupu ake ei a ia, kae i te isi Sapati, ne fanatu a ia ki te fale tapuaki e pela eiloa mo tena masani. Ne tu ki luga o faitau te Tusi, 17kae ne tuku atu ki a ia te Tusi a te pelofeta ko Isaia; Ne 'tala ne ia te Tusi, kae ne maua ne ia a te koga e tusi i ei a pati konei:

18 # Isa 61.1,2 “Ko i luga i a au te Agaga o te Aliki.

Ne faū ne ia au o lauga atu te Tala 'Lei ki tino ma'tiva,

Ne uga mai ne ia au o takutaku atu te saolotoga ki tino kola ne 'kave fakapagota,

O faka'kite mata o tino 'kivi,

Kae fakasaoloto latou kola ko fakasauagina,

19O takutaku atu foki te tausaga ka fakaola ei ne te Aliki ona tino!”

20Ne pelu ne Iesu te Tusi, kae fakafoki atu ki te tino tausi, nofo ei ki lalo. Ko latou kola ne i loto i te fale tapuaki, ne faka'toka olotou mata ki a ia. 21Ne kamata o faipati atu a Iesu ki a latou penei: “Ko fakataunu i te aso nei a te vaega o te Tusi tenei, tela ko oti ne fakalogo'logo koutou ki ei.” 22Ko oko eiloa i te fia'fia o latou ki a ia, kae ne ofo latou i pati 'lei ne faipati ne ia. Ne fai ake ei latou pela, “E se ko ia tena ko te tama a Iosefa?” 23Ne fai atu a ia ki a koutou: “E iloa tonu ne au me ka fai mai ne koutou te muna fakatusa tenei ki a au, ‘Te tokita, fai eiloa ne koe tou masaki ke 'lei.’ Ka toe muna mai foki koutou ki a au, ‘Fai ake ne koe i konei i tou fa'kai tonu, a mea kola ne 'logo matou ne fai ne koe i Kapanaumi.’ 24#Ioa 4.44 Kae faipati tonu atu au ki a koutou, “E se mafai o talia 'lei se pelofeta i tena fenua tonu. 25#1Tupu 17.1 Faka'logo mai ki a au: Se mea tonu me e tokouke fafine ne 'mate olotou avaga i Isalaelu i taimi o Elia, i te seaiga o ne vaiua i te tolu mo te afā tausaga, kae ne poko mo te oge i te fenua katoa. 26#1Tupu 17.8-16 Ne seki uga atu a Elia ki se fafine o latou kona, kae ne uga atu fua ki te fafine Salefata tela ko mate tena avaga, i te fenua ko Saitonu. 27#2Tupu 5.1-14 E tokouke foki lepela i Isalaelu i te vaitaimi o te pelofeta ko Elisaia; kae e seai eiloa se tino o latou ne faka'ma, kae na ko Namanu te Sulia.” 28Ka ko tino kola ne 'nofo i loto i te fale tapuaki, ko oko eiloa i te kaitaua, i te lagonaga ne latou te mea tenei. 29Ne 'tu ki luga kae soso Iesu ki tua i te fa'kai, takitaki ei a ia ne latou ki te feitu o te mauga tela e tu i ei te lotou fa'kai, ke pei ifo a ia ki lalo. 30Kae ne sasale atu eiloa i te lotou va, fano eiloa.

Ko te Tagata ko Pukea ne te Agaga Masei

(Male 1.21-28)

31Ne fano Iesu ki Kapanaumi, ko te fa'kai o Kalilaia tela ne akoako atu ei a ia ki tino i te Sapati. 32#Mata 7.28-29 Ne ofo latou i ana akoakoga, me isi te mana i ana muna. 33E isi se tino i loto i te fale tapuaki ne pukea ne te agaga masei, kae ne pakalaga penei: 34“Iesu te Nasaleta, se a te mea e manako ei koe mai i a matou? Ne vau koe o fakamasei matou? E iloa ne au me ko oi koe: Ko koe te avefekau 'malu a te Atua!” 35Ne 'liko atu a Iesu ki a ia kae fai atu, “Nofo malie, fano keatea mai i a ia!” Ne pei 'tuki a ia ki lalo ne te agaga masei i olotou mua, kae ne fano keatea mai i a ia, kae e seai sena mea masei ne fai ki ei. 36Ne ofo latou kae fai ake pela: “Se a te vaega pati e fai mai penei? I te pule mo te mana ko fakatonu atu ne te tagata nei a agaga masei ke olo keatea, ko te mea eiloa ko olo keatea!” 37Kae ne pa te tala e uiga ki a Iesu i koga katoa o te fenua tena.

Ko Fai ne Iesu a Tino ma'saki ke 'Lei

(Mata 8.14-17; Male 1.29-34)

38Ne tuku ne Iesu te fale tapuaki o fano ki te fale o Simona. Ne masaki malosi te matua o te avaga a Simona; ne pokotia ne te fiva, kae ne fakailoa atu ne latou ki a Iesu. 39Ne fanatu a Iesu, tu i ona tafa, kae fakagata ne ia te fiva. Ne 'lei tena fiva, tu ake ki luga, kamata eiloa o tavini atu ki a latou o laulau meakai.

40I te toga o te la, ne aumai a tino kola ne maua ne masaki valevale ne olotou taugasoa ki a Iesu. Ne tuku ona lima ki luga i a latou takitokotasi, kae ne ma'losi latou katoa. 41E tokouke agaga ma'sei ne olo keatea mai i te tokoukega, kae ne kalaga penei: “A koe ko te Tama a te Atua!” Ne 'liko atu a Iesu ki a latou, ko se mafai foki ne latou o faipati i te mea ko iloa ne latou me ko ia ko te Keliso.

Ko Lauga atu a Iesu i te Faletapu

(Male 1.35-39)

42Ne tuku ne Iesu a te fa'kai i te vaveao o fano ki se koga lavaki. Ne salasala a tino ki a ia, kae i te mauaga ne latou, ne taumafai o taofi ke se fano keatea mai i a latou. 43Ne fai atu ki a latou, “E 'tau mo au o takutaku atu te Tala 'Lei o te Malo o te Atua ki nisi fa'kai, me tena eiloa te mea ne uga mai ei au ne te Atua, ke vau o fai.” 44Tela la, ne lauga atu ei a ia i fale tapuaki o Iutaia.

Currently Selected:

LUKA 4: Tusi Tapu

Highlight

Copy