LUKA 19

Ko Iesu mo Sakaio

1Ne fanatu a Iesu ki Ieliko kae sasale i loto i te fa'kai. 2Kae e isi se tagata e igoa ki a Sakaio, tela ko te ao lafoga sili kae maukoloa. 3Ne fia lavea ne ia me ko oi Iesu, i a ia se tagata toetoe fua kae se mafai ne ia o lavea a Iesu ona ko te vaitino. 4Ne tele ei a ia i mua o te vaitino, kae kake ake i te lakau ko te sukamolo ke lavea ne ia a Iesu, tela e vau i tena auala. 5I te okoatuga a Iesu ki te koga tena, ne kilo ake a ia ki luga kae fai atu, “Sakaio vave ifo ki lalo, me e 'tau au o nofo i tou fale i te aso nei.” 6Ne fakavave ifo ki lalo Sakaio kae ne talia ne ia a Iesu mo te fiafia lasi. 7A tino katoa ne matea ne latou a te mea tena, ne kamata o mui'mui kae fai ake. “Kiloke ko fanatu a ia o fai mo malo i te fale o te tagata agasala.” 8Ne tu ake ki luga Sakaio kae fai atu ki te Aliki, “Te Aliki, kiloke! Ka tuku atu ne au a te afā o aku mea ki tino mativa; kafai foki ne ave ne au se mea a se tino i te auala fakaloiloi, ka taui atu ne au ki ei fakafa.” 9Ne fai atu a Iesu ki a ia, “Ko oko mai te fakaolataga ki te kaiga nei i te aso nei; a te tagata nei foki, se mokopuna o Apelaamo. 10#Mata 18.11 Me i a au te Tama a te Tagata, ne vau o 'sala kae fakaola a tino ko 'galo.”

Ko te Tala Fakatusa ki te Tupe Aulo

(Mata 25.14-30)

11 # Mata 25.14-30 I te lagonaga ne latou a mea kona, ne toe faipati atu a Iesu ki a latou ki te tala fakatusa, me ko pilipili atu latou ki Ielusalema, me ne fai ake foki latou pela i te Malo o te Atua ka vave oko mai. 12Tela, fai atu ei a ia, “Ne fano te sua tagata sili ki se fenua 'mao atu ke fai a ia mo tupu, ko toe foki mai ei ki tena fenua. 13Ka koi tuai o fano, ne kalaga ki ana tavini e tinoagafulu, kae tuku atu ki a latou tupe aulo e sefulu, kae fai atu ki a latou, ‘Taumafai o fakagalue ne koutou ke oko ki te taimi e foki mai ei au.’ 14Ka ko tino tonu o tena fenua ne ita ki a ia, uga atu ei ne latou ne avefekau o fai atu ki ei, ‘E se ma'nako matou ke fai te tagata nei mo tupu o matou.’

15“I tena fokimaiga, ko maua ne ia te 'malu fakatupu, ne fakatonu ne ia ana tavini kola ne tuku atu ki ei tupe, ke o'mai ki a ia, ko te mea ke iloa ne ia te mea ne maua mai i te fakagaluegaga o te tupe. 16Ne vau ki ona mua te tavini muamua kae fai mai, ‘Te aliki, ko maua ne au a tupe aulo e sefulu, i te fakagaluegaga o te tupe aulo e tasi tela ne tuku mai ne koe ki a au.’ 17Ne fai atu a ia, ‘Ko oko eiloa i te 'lei, a koe se tavini 'lei! Ona ko tou fakamaoni i mea fo'liki, ka tuku atu ei ne au fa'kai e sefulu ke pule ne koe.’ 18Ne vau te tokolua o tavini kae fai mai, ‘Te aliki, ko maua ne au a tupe aulo e lima i te fakagaluegaga o te tupe aulo e tasi tela ne tuku mai ne koe ki a au.’ 19Ne fai atu a ia, ‘Ka pule ne koe fa'kai e lima.’ 20Ne vau ki a ia te sua tavini kae fai mai, ‘Te aliki, tenei tau tupe aulo; ne kofukofu kae ne tausi ne au i te solosolo; 21i te mea i a au ne mataku i a koe se tagata faigata; e ave ne koe a mea kola e se ne mea a koe, kae tau foki ne koe a fuaga o lakau e seki toki ne koe.’ 22Ne fai atu a ia, ‘A koe se tavini masei! Ko au muna eiloa ka fakasala ei ne au a koe! E iloa ne koe i a au se tagata faigata, e ave ne au a mea e se ne aku mea, kae tau foki ne au a fuaga o lakau e seki toki ne au. 23Ai a ne seki tuku atu ei ne koe taku tupe ki te fale teutupe? E penei la e foki mai au, ko maua ne au te tupe tena fakatasi mo tena pasene.’ 24Ne fai atu ei a ia ki a latou kola ne tu mai i kona, ‘'Fao keatea te tupe aulo mai i a ia, kae avatu ki te tavini tela e i a ia te sefulu tupe aulo.’ 25Ne fai mai latou ki a ia, ‘Te aliki, e i a ia nei tupe aulo e sefulu.’ 26#Mata 13.12; Male 4.25; Luka 8.18 ‘Au e fai atu ki a koutou, so se tino tela e isi ana mea, ka fakaopoopo atu ana mea ke uke, ka ko ia tela e seai ne ana mea, e tusa eiloa me mu'tana te mea e i a ia, kae ka ave eiloa keatea mai i a ia. 27Tenei la, ko oku fili kola ne seki manako ke fai au mo tupu o latou; aumai latou ki konei ke tamate i oku mua!’ ”

Ko te Uluatuga Manumalo o Iesu ki Ielusalema

(Mata 21.1-11; Male 11.1-11; Ioa 12.12-19)

28I te otiga ne faipati a Iesu ki te mea tenei, ne mua atu ei a ia i a latou ki Ielusalema. 29I tena piliatuga ki Petefake mo Petania, i te mauga o Olive, ne uga atu ne ia ona soko e tokolua ke mua atu, 30kae fai atu, “Olo ki te fa'kai tena i mua atu o koulua; ka ulu koulua ki loto, e maua ne koulua se tama asini e tukau, e seki sopo eiloa i ei se tino. 'Tala kae aumai ki konei. 31Kafai e fesili atu se tino ki a koulua, ‘Ai a e 'tala ei ne koulua?’ Fai ki ei, ‘E manako ki ei te Aliki.’ ”#19.31: te pule; io mete tino i a ia. 32Ne olo atu a laua kae ne maua katoa mea kola ne taku atu ne Iesu. 33Ka koi 'tala ne laua te tama asini, kae fai mai tino kola e a latou te manu, “Ai a e 'tala ei ne koulua?” 34Ne tali atu laua, “E manako ki ei te Aliki.” 35Ne aumai ne laua ki a Iesu; kae ne 'fola olotou gatu ki te tua o te manu, kae fakasopo ne latou a Iesu ki luga. 36I tena fanoga i luga i te asini, ne 'fola olotou gatu i luga o te alatu. 37I te piliatuga ki Ielusalema ki te koga tela e masifo ei te auala ki lalo i te mauga o Olive, e tokouke ona soko ne kamata o fakafetai kae 'viki atu ki te Atua i te leo lasi, ona ko galuega 'lasi fakaofoofogina ne lavea ne latou, 38#Sala 118.26 kae fai mai, “Ke manuia te Tupu tela e vau i te igoa o te Aliki! Ko te filemu i te lagi mo te vikiga i mea tautafa ki luga!”

39Ne fai mai nisi o Falesaio mai loto i te vaitino ki a Iesu penei. “Te Faiakoga, 'liko atu ki ou soko.” 40Ne tali atu a ia, “Au e fai atu ki a koutou, kafai e se kalaga latou, ko fatu ka ka'laga.”

Ko Tagi Alofa Iesu mō Ielusalema

41I tena piliatuga ki Ielusalema, ne lavea ne ia te fa'kai, tagi ei a ia penei, 42“Moi iloa ne koe i te aso nei a mea e manakogina ne koe mō tou manuia i aso mai mua, kae nei ko se mafai o matea ne koe. 43Me ka oko mai eiloa ki a koe aso e ati ake ei te olo e nikoi ei koe ne ou fili, e alai foki eiloa koe ne latou, ko tolo mai ei koe ki loto i feitu katoa. 44Ka tukipalapala ne latou koe, pela foki mo tino kola i loto i ou 'pui. E seai eiloa se fuafatu e tasi ka 'toe i te koga ne iai, me ne se iloa ne koe a te aso ne oko mai ei te Atua o fakaola koe!”

Ko Fano a Iesu ki te Fale Tapu

(Mata 21.12-17; Male 11.15-19; Ioa 2.13-22)

45Ne ulu atu a Iesu ki loto i te Fale Tapu, kae ne afuli ne ia ki tua tino fakatau koloa, 46#Isa 56.7; Iele 7.11 ne fai atu a ia ki a latou, “Ko oti ne tusi i toku fale se fale 'talo. Kae tenei ko fuli ne koutou mo fai te ana o tino kai'soa!”

47 # Luka 21.37 Ne akoako atu a Iesu i te Fale Tapu i aso takitasi. Ka ko faitaulaga sili, mo faiakoga o te Tulafono, mo takitaki o te fenua, ne manako o tamate a ia, 48kae se mafai ne latou o maua se ala e fai ei, me i tino katoa ko fia fakalogo'logo ki a ia.

Currently Selected:

LUKA 19: Tusi Tapu

Highlight

Copy