LUKA 10

Ko Uga atu ne Iesu a te Tinofitu mo te Tokolua ke Olo

1Fakamuli ifo, ne filifili ne te Aliki te isi tinofitu mo te tokolua tagata,#10.1: fitu sefululua; i nisi lomiga e isi iei fitusefulu kae ne uga atu ke olo takitokolua, ke 'mua i a ia ki fa'kai mo koga katoa kola ka fano a ia ki ei. 2#Mata 9.37-38 Ana muna ki a latou: “Ko foki te lasi o te saito ko 'tau o 'kati, ka ko te mea e se lava a tino faigaluega mo 'kati te saito. Fakamolemole ki te tino e o ia te toga saito, ke toe uga mai ne tino faigaluega o fakaputu tena saito. 3#Mata 10.16 Olo! Ko uga atu ne au koutou pela me ne tama mamoe i va o luko. 4#Mata 10.7-14; Male 6.8-11; Luka 9.3-5 Sa 'kavegina se pausi tupe, io me se pausi, io me ne taka; sa 'tu o fakafetaui ki se tino e tokotasi i te alatu. 5So se fale e ulu atu koutou ki ei, te pati muamua e fai atu ne koutou, ‘Ke manuia te fale tenei!’ 6Kafai e nofo i kona te tama o te filemu, ko te fakamanuiaga a koutou ka tumau i luga i a ia; kae kafai e seai, ka toe fakafoki mai ki a koutou. 7#1Koli 9.14; 1Timo 5.18'Nofo i te fale tena, 'kai kae inu i mea e tuku atu ne latou; me e 'tau i te tino faigaluega o maua tena 'togi. Sa ulu valevale ki so se fale. 8So se fa'kai e olo koutou ki ei kae talia i ei koutou, 'kai i mea e laulau atu ne latou, 9fai ke 'lei a tino ma'saki i te fa'kai tena, kae muna atu ki tino i te fa'kai tena, ‘A te Malo o te Atua ko pili mai ki a koutou.’ 10#Galu 13.51 So se fa'kai foki e olo koutou ki ei, kae se talia ne ia koutou; olo ki alatu o fai'pati atu penei: 11‘A pefu mai te otou fa'kai kola e 'piki ki omotou vae, e tuetue atu ne matou ki a koutou; kae masaua a te mea tenei: a te Malo o te Atua ko pili mai ki a koutou!’ 12#Kene 19.24-28; Mata 11.24; Mata 10.15 Au e fai atu ki a koutou, me e tai alofa atu a te Atua ki a Sotoma i lo te fa'kai tena i te Aso Fakamasino!”

Ko Fa'kai se Talitonu

(Mata 11.20-24)

13 # Isa 23.1-18; Eseki 26.1—28.26; Ioelu 3.4-8; Amo 1.9-10; Saka 9.2-4 “Kalofa eiloa i a koe Koasini! Kalofa foki eiloa i a koe Petesaita! I te mea moi fai ne fai i Tulo mo Saitonu a vavega kola ne fai ki a koutou, e penei ko leva loa a tino i kona ne 'nofo ki lalo, kae fakaaoga gatu ma'sei, kae tuku ake a lefu ki olotou ulu, e fakaasi mai ei i a latou ko sala'mo. 14Kafai e oko mai a te Aso Fakamasino, ka iloa ei i te Atua e tai alofa atu ki a Tulo mo Saitonu i lo koutou. 15#Isa 14.13-15 Ka ko koe e Kapanaumi! A koe ne manako ke siki ake koe ki luga i te lagi! A koe ka pei ki lalo i Seoli!”

16 # Mata 10.40; Male 9.37; Luka 9.48; Ioa 13.20 Ne fai atu a Iesu ki ona soko: “A te tino e fakalogo ki a koutou, e fakalogo mai foki ki a au; a te tino e se talia ne ia koutou, e se talia foki ne ia au; ka ko te tino tela e se talia ne ia au, e se talia foki ne ia a te tino tela ne uga mai ne ia au.”

Ko Toe 'Foki mai a te Tinofitu mo te Tokolua

17A te tinofitu mo te tokolua#10.17: tinofitu mo te tokolua; nisi lomiga e isi iei tino fitu (onoono ki te foaitau e 1). ne 'foki mai mo te fiafia, olotou muna, “Te Aliki, a temoni ne faka'logo foki ki omotou fakatonuga kola ne fai i tou igoa!” 18Ne tali atu a Iesu ki a latou: “Ne lavea ne au Satani e to ifo pela me se uila mai i luga i te lagi. 19#Sala 91.13 Faka'logo mai! Ko oti ne tuku atu ne au ki a koutou a te pule, ko te mea ke mafai ne koutou o sasale i luga i gata mo akalava, pela foki te malosi katoatoa o te Fili, kae e seai se mea ka faka'mae ne ia koutou. 20Sa fia'fia ona ko agaga ma'sei ko fakalogo ki a koutou; kae fia'fia i te mea ko tusi otou igoa i te lagi.”

Ko Fiafia a Iesu

(Mata 11.25-27; 13.16-17)

21I te taimi eiloa tena, ne fakafonu a Iesu i te fiafia ne te Agaga Tapu,#10.21: mai i te Agaga Tapu; i nisi lomiga e isi iei mai i te Agaga Tapu; nisi lomiga e isi i te agaga. kae fai ake: “Toku Tamana, te Aliki o te lagi mo te lalolagi! Au e fakafetai atu ki a koe, i te mea ko fakaasi ne koe ki tino seki akoakogina, a mea kola ne 'funa ne koe mai tino 'poto mo tino kola ne a'koga. Tamana, e tonu ne fai ne koe a te mea tenei ki tau filifiliga mō te mea ko loto malie koe ki ei.

22 # Ioa 3.35; 10.15 “Ko oti ne tuku mai ne toku Tamana a mea katoa ki a au: e seai se tino e tokotasi e iloa ne ia me ko oi te Tama, na ko te Tamana fua, kae seai foki se tino e tokotasi e iloa ne ia me ko oi te Tamana, na ko te Tama fua, mo tino ei kola e manako te Tama o fakaasi a ia ki ei.”

23Tela, fuli atu ei a Iesu ki ona soko kae faipati malie atu ki a latou: “Amutia a mata kola e 'kilo ki mea kola e lavea ne koutou. 24Au e muna atu ki a koutou, me e tokouke pelofeta mo tupu ne ma'nako o lavea a mea ko 'kilo nei koutou ki ei, kae ne seki mafai ne latou, kae ne fia faka'logo foki ki mea ko lagona nei ne koutou, kae ne seki mafai ne latou.”

Ko te Samalia Alofa

25 # Mata 22.35-40; Male 12.28-34 E isi se faiakoga o te Tulafono ne vau, kae ne taumafai o tofotofo a Iesu, ana muna: “Te Faiakoga, se a te mea e 'tau o fai ne au, ko te mea ke maua ne au a te ola se gata mai?” 26Ne tali atu a Iesu ki a ia, “Ne a muna e tusi i te Tulafono? Se a tou iloa i ei?” 27#Teu 6.5; Levi 19.18 Ne tali mai a te tagata tena penei: “‘E 'tau mo koe o alofa ki te Aliki tou Atua mo tou loto katoa, mo tou agaga katoa, mo tou malosi katoa, mo tou mafaufau katoa,’ kae ‘E 'tau foki mo koe o alofa ki tou tuakoi, e pela eiloa mo koe ki a koe.’ ” 28#Levi 18.5 Ne tali atu a Iesu, “E tonu tau tali, ke fai la ne koe a te mea tenei, ke ola ei koe.”

29Ka ko te faiakoga o te Tulafono ne manako ke tonu a ia, tela ne toe fesili mai ei ki a Iesu, “Ko oi la toku tuakoi?” 30Ne tali atu a Iesu penei, “E isi se tagata ne vau mai i Ielusalema o fano ki Ieliko, kae ne puke ne tino faomea: Ne 'tala ne latou ona gatu kae ta, tiakina ei me ko tai mate. 31I mo taimi eiloa kona, ne livaliva ifo a te faitaulaga i te alatu tena. I te laveaga ne ia a te tagata tena, ne fakasili eiloa o fano i te isi feitu o te alatu. 32I te alatu foki tena, ne livaliva ifo i ei se tagata mai te matakaiga o Levi, ne fanatu o kilokilo ki te tagata tena, kae ne toe fakasili foki o fano i te isi feitu o te alatu. 33#2NTupu 28.15 Kae isi se tagata Samalia ne malaga atu i te alatu tena, ne oko atu ki te tagata tena, kae i te laveaga ne ia, ko oko eiloa i tena alofa ki a ia. 34Ne fanatu ei ki te tagata tena, 'ligi ne ia te sinu mo te uaina ki luga i ona pa'kiaga kae fusi, fakamuli ake fakasopo ei ne ia ki luga i tena manu, ave ei ne ia ki se fale talimalo, o tausi ne ia i ei. 35Taeao ake, ne tapale ne ia te fa sefulu sene, kae tuku atu ki te pule o te fale, kae fai atu, ‘Tausi ne koe, kafai e foki mai au i te ala tenei, ka 'togi atu ne au ki a koe so se mea ne fakaaoga ne koe mo ia.”’ 36Muna a Iesu, “Ko oi la te tino i te tokotolu konei i tau faka'tau, ko te tuakoi o te tagata tela ne ta ne tino faomea?” 37Muna a te faiakoga o te Tulafono, “Ko te tino tela ne alofa ki a ia.” Muna a Iesu ki a ia, “Fano la koe, kae ke fai foki ne koe pena.”

Ko Fanatu a Iesu ki a Maleta mo Malia

38 # Ioa 11.1 I te ologa a Iesu mo ona soko, oko atu ei latou ki se fa'kai e tasi. E isi se fafine i kona e igoa ki a Maleta, kae ne fakaafe ne ia a Iesu ki tena fale. 39E isi sona taina e igoa ki a Malia, tela ne nofo i vae o te Aliki kae ne fakalogologo ki tena akoakoga. 40Ne seki toka te mafaufau o Maleta i te uke o galuega e 'tau o fai, tela vau ei o fai atu ki a Iesu, “Te Aliki, a koe e se manatu mai ki a au i toku taina ko tiaki mai au tokotasi, ke fai ne au a galuega katoa? Fai ki ei ke vau o fesoasoani ki a au!” 41Ne tali atu a te Aliki ki a ia penei: “Maleta, Maleta! A koe ko manavase ka ko fakalavelavegina ou manatu i mea e uke, 42kae tasi faeloa a te mea e fia maua. Ko oti ne filifili ne Malia a te mea tonu, kae ka se ave keatea a te mea tena mai i a ia.”

Currently Selected:

LUKA 10: Tusi Tapu

Highlight

Copy