IOANE 4
4
Ko Iesu mo te Fafine Samalia
1Ne 'logo Falesaio me ko tokouke soko o Iesu ne fai, kae e tokouke atu foki ana soko ne papatiso i lo Ioane. 2E seki papatiso ne Iesu se tino, ka ko ona soko fua ne papatiso atu. 3I te lagonaga ne Iesu te tala tenei, tuku ei ne ia Iutaia kae toe foki ki Kalilaia. 4Kae 'tau eiloa mo ia o tipa atu i loto i Samalia.
5 #
Kene 33.19; Iosu 24.32 Ne oko atu a ia ki te fa'kai o Samalia e igoa ki a Sukala, e pili ki te laumanafa tela ne tuku atu ne Iakopo ki tena tama ko Iosefa. 6E tu i kona a te vaikeli o Iakopo; ka ko Iesu ko oko eiloa tona gafuia i te malaga, tela sagasaga ifo ei i tafa o te vaikeli, ka ko tai tutonu te la.
7Ne vau a te fafine Samalia o asu vai. Ne fai atu a Iesu ki a ia, “Aumai ake ne mo vai ke inu au.” 8Me i ona soko ne olo atu ki te fa'kai o 'togi meakai. 9#Esela 4.1-5; Nee 4.1-2 Muna a te fafine Samalia ki a ia, “A koe se Iutaia, ka ko au se Samalia. E mafai pefea ne koe o fai mai ki a au ke inu koe?” A Iutaia mo Samalia e se fai mea fakatasi.#4.9: A tino Iutaia e se mafai o fakaaoga a te ipu mo te poola e tasi tela e fakaaoga ne tino Samalia; io me A tino Iutaia e se mafai o fai mea fakatasi mo tino Samalia.
10Ne tali atu a Iesu ki a ia penei: “Moi iloa ne koe te meaalofa a te Atua, mo ia foki tenei e fai atu ki a koe, ‘Aumai ke inu au,’ penei ko fai mai koe ki a ia, kae ka tuku atu ne ia ki a koe te vaiola.” 11Ne fai mai te fafine ki a ia, “Tou 'malu, e seai sau 'soni, ka ko te vaikeli e to 'poko; e maua la ne koe mai i fea a te vaiola? 12E sili atu koe i te motou tupuga ko Iakopo, tela ne tuku mai ne ia ki a matou a te vaikeli tenei? Ne inu i ei a ia mo ana tama, e pela foki mo ana manu.” 13Ne tali atu a Iesu ki a ia penei: “So se tino e inu ki te vai tenei, e toe fia inu foki; 14ka ko te tino e inu ki te vai tela ka tuku atu ne au ki a ia, e se toe fia inu eiloa. I te mea, a te vai tela ka tuku atu ne au ki a ia, ka fai mo punavai i a ia, kae ka puna ake ki te ola se gata mai.” 15Ne fai mai te fafine ki a ia “Tou 'malu, tuku mai ki a au a te vai tena, ko te mea ke se toe fia inu au, kae ke se toe vau foki au ki konei o asu vai.” 16Ne fai atu a Iesu ki a ia, “Fano la o kalaga ki tau avaga, ko vau ei koe ki konei.” 17Ne tali mai a te fafine penei: “E seai saku avaga!” Ne fai atu a Iesu ki a ia, “E tonu eiloa tau pati tena me seai sau avaga. 18Ko oti koe ne avaga ki tagata e tokolima, ka ko te tagata tena e 'nofo nei koulua, e se ko tau avaga tonu; tela la, ko tonu ei au pati ne fai mai.” 19Ne fai mai te fafine ki a ia, “Tou 'malu, ko iloa nei ne au i a koe se pelofeta. 20A omotou tupuga ne tapuaki i te mauga tenei, kae fai mai koutou me ko Ielusalema a te koga e tapuaki i ei a tino.” 21Ne fai atu a Iesu ki a ia, “Toku fafine, talitonu mai ki a au, me ka oko mai aso ka se toe tapuaki ei tino ki te Tamana i te mauga tenei io me ko Ielusalema. 22A koutou e tapuaki mo te se iloa, ka ko matou e tapuaki mo te iloa, i te fakaolataga ne alatu mai i tino Iutaia. 23Ko oko nei ki te taimi, ka ko oko foki eiloa ki ei. Tela la, ko latou kola e tapuaki fakamaoni, ka tapuaki ki te Tamana i te agaga mo te fakamaoni. Ko vaega tino penei e manako ki ei te Atua ke tapuaki atu ki a ia. 24A te Atua ko te Agaga eiloa, ko tino kola e tapuaki ki a ia, e 'tau o tapuaki i te agaga mo te fakamaoni.”
25Ne fai mai ki a ia te fafine, “E iloa ne au i te Mesia e vau, tela e igoa ki te Keliso. Kafai e oko mai, ka taku mai ne ia a mea katoa ki a matou.” 26Ne fai atu a Iesu ki a ia, “A te tino tela e faipati koe ki ei, ko au tena.”
27I kona foki eiloa, ne oko mai ei a soko o Iesu, kae ne ofo me sau'tala mo te fafine. E seai foki se tino o latou ne fesili atu, “Se a te mea e manako koe ki ei, io me ai a foki e sau'tala ei koulua?”
28Ne tuku ne te fafine tena a te fagu vai kae fano ki te fa'kai, fai atu ei ki tino, 29“O'mai ake o onoono ki te tagata tela ne taku mai ne ia ki a au a mea katoa kola ne fai ne au. E se ko ia tenei ko te Keliso?” 30Ne olo atu a tino Samalia mai i te fa'kai ki a Iesu.
31I kona foki eiloa, ne fakamolemole mai ona soko ki a ia penei, “Te Faiakoga, tapa ake tou alo.” 32Ne fai atu a ia ki a latou, “E isi saku meakai e se iloa ne koutou.” 33Ne faipati ona soko i a latou eiloa, “E isi nei se tino ne aumai ne ia ki ei ni meakai?” 34Ne fai atu a Iesu ki a latou, “A taku meakai, ko te fai ne au a te loto o ia tela ne uga mai ne ia au, kae o fakapalele foki a te galuega ne tuku mai ne ia ki a au ke fai.
35“E isi se faigamuna a koutou, ‘E toe fa mai masina ko 'kati ei te saito.’ Au e fai atu ki a koutou, 'kilo otou mata ki fatoaga, ko iloa ei ne koutou me ko 'tau o 'kati. 36A ia tela e kati saito e maua ne ia tona 'togi, kae fakaputu foki ne ia ana fuagalakau mo te ola se gata mai, ko te mea la tena ka fiafia fakatasi ei te tino toki saito mo te tino kati saito. 37Ko tonu ei te faigamuna pela, ‘E toki ne te sua tino, kae 'kati ne te sua tino.’ 38Ne uga atu ne au koutou ke 'kati saito i te fatoaga tela ne seki galue ne koutou, kae ne galue ne nisi tino, ka ko manuia ei koutou i olotou galuega.”
39E tokouke a tino Samalia mai i te fa'kai tena ne talitonu ki a Iesu, ona ko te molimau a te fafine penei, “Ne taku mai ne ia ki a au a mea katoa kola ne fai ne au.” 40Tela la, i te okomaiga o tino Samalia ki a ia, ne fakamolemole mai ei ki a ia ke 'nofo latou; nofo ei a Iesu i kona i aso e lua.
41Ko na gasolo ei o tokouke a tino e talitonu ki tena muna. 42Olotou muna ki te fafine, “Ko talitonu nei matou, e se mai i au pati ne fai mai, ka ko matou eiloa ko oti ne fakalogologo ki a ia, ko iloa ei ne matou me ko ia tonu eiloa ko te Fakaola o te lalolagi.”
Ko Fakaola ne Iesu a te Tama a te Ofisa o te Malo
43I te otiga o aso e lua ne nofo ei a Iesu i kona, fanatu ei a ia ki Kalilaia. 44#Mata 13.57; Male 6.4; Luka 4.24 Me ko Iesu eiloa ne fai atu penei, “A te pelofeta e se fakaaloalogina i tona fenua tonu.” 45#Ioa 2.23 I tena okoatuga ki Kalilaia, ne fakafetaui atu ki a ia a tino i kona, me ne fakatasi atu foki latou ki te 'Kaiga o te Paseka i Ielusalema, kae ne lavea ne latou a mea katoa kola ne fai ne ia i aso o te 'kaiga.
46 #
Ioa 2.1-11
Tela la, toe foki ei a Iesu ki Kana i Kalilaia, ko te fa'kai tela ne fuli ei ne ia te vai ki te uaina. E isi foki se ofisa i Kapanaumi e masaki tena tama. 47I tena logoga i a Iesu ko vau mai Iutaia ki Kalilaia, ne fanatu o fakamolemole ki a ia, ke fanatu ki Kapanaumi o fakaola tena tama tela ko tai mate ake eiloa. 48Ne fai atu a Iesu ki a ia, “E seai eiloa se tino o koutou ko talitonu, seiloga ke matea ne koutou fakailoga mo mea fakaofoofogia.” 49Ne tali mai te ofisa, “Tou 'Malu, vau ke olo taua ka koi tuai o mate taku tamaliki.” 50Ne fai atu a Iesu ki a ia, “Vau o fano, ka ola tau tama!” Ne talitonu ki te muna a Iesu, fano eiloa. 51I te fanoga i tena ala ki tona fale, ne fakafetaui atu ana tavini ki ei mo te tala, “A tau tama tagata ko gasolo o 'lei.” 52Ne fesili atu ki a latou, me ko te itula fea ne kamata ei o 'lei tena tama. Ne tali mai latou, “Ko te itula e tasi i te ao anafi ne 'lei ei tona fiva.” 53Masaua ei ne te tamana me ko te itula tonu eiloa tena ne fai atu ei a Iesu ki a ia, “Fano, ka ola tau tama tagata.” Ne talitonu ei a ia mo tona kaiga katoa.
54Tenei te lua o fakailoga ne fai ne Iesu i tena vauga mai Iutaia ki Kalilaia.
Currently Selected:
IOANE 4: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
