KENESE 18

Ko Tauto te Aliki ke Tuku se Tama Tagata ma Apelaamo

1Ne fakasae atu te Aliki ki a Apelaamo i te koga e 'tu ei a lakau tapu i Mamele. A Apelaamo ne sagasaga eiloa i te mataloa o tena faleie i te taimi 'vela eiloa o te aso, 2#Epe 13.2kae i te kiloakega o ona mata, ne matea ne ia a tino e tokotolu e tu i tua. I te mateaga ne ia, ko ia eiloa ko tele o fakafetaui ki a latou. Ne ifo atu a Apelaamo ki a latou, 3kae fai atu penei, “Te otou malu eiloa, fakamolemole, afe mai ki toku fale koi tuai koutou o olo; au ne vau o tali koutou. 4Ke fano au o aumai ne vai mo fulu otou vae, kae manava mua koutou i lalo o te lakau tenei. 5Ka aumai foki ne au ne meakai e fakamalosi ei koutou mo te otou malaga. Ko tāua faka au i a koutou ne afe mai ki toku fale, tela la, nofo mai ke tali atu ne au a koutou.”

Ne tali mai latou penei, “Fakafetai, ko talia ne matou te mea tena e fai mai ei koe.”

6Ne fakavave atu Apelaamo ki loto i tena faleie, kae fai atu ki a Sala penei, “Onoono fakavave aka ki se sake falaoa tafasili i te 'lei o faite aka ne falaoa ke tao.” 7Tela, fano ei a Apelaamo ki te lafu pulumakau, puke aka ne ia te tama pulumakau lei kae putaputa, tuku ei ne ia ki te tavini ke fakatoka ne ia. 8Ne puke aka ne ia ne sua susu, mo mea fasi, tuku ei ne ia ki mua o tagata kola e tokotolu. Ne tali eiloa ne Apelaamo a tino kola e tokotolu i lalo o te lakau tena, tela kai ei latou.

9Ne fesili mai te tokotolu kola ki a Apelaamo penei, “Tefea tau avaga ko Sala?”

Ne tali atu Apelaamo penei, “Tela i te faleie.”

10 # Loma 9.9 Ne fai aka te tino e tokotasi mai te tokotolu kola penei, “E iva masina mai te taimi nei#18.10: E iva masina mai te taimi nei; io me I te taimi penei i te sua tausaga. kae toe foki mai au, i te taimi tena ka fanau ei ne Sala se tamaliki tagata.”

A Sala i te taimi tena e tu fua i tua o ia i te mataloa o te faleie, o fakalogologo. 11A Apelaamo mo Sala ko to matua, ko se tau o maua ne laua se Tamaliki. 12#1Pete 3.6Tela, kata ei a Sala, kae fai ifo i tena loto penei, “Au nei ko matua ka ko vaivai foki, koi mafai nei ne au o fiafia i te olaga fakatau avaga? A taku avaga foki la ko matua.”

13Tena faipati mai ei te Aliki ki a Apelaamo penei, “Ai a ne kata ei a Sala kae fai aka pela, ‘E tonu eiloa e mafai o maua saku tamaliki i a au ko matua?’ 14#Luka 1.37E isi se mea e faigata i te Aliki? E pela mo aku muna, e iva masina mai te taimi nei kae toe foki mai au ka ko Sala ka maua tena tamaliki tagata.”

15Ne mataku a Sala, seki takutonu ei ne ia i a ia ne kata. Muna a te Aliki, “A koe ne kata eiloa.”

Ko Fakamolemole Apelaamo ke Fakasao Sotoma

16Ne tiakina ne te tokotolu kona te koga ne kai ei, o olo ki se koga e mafai ei ne latou o matea Sotoma. A Apelaamo ne tautali atu foki i a latou ke tai mao ko tuku ei ke olo. 17Ne fai ifo te Aliki ki a ia eiloa penei, “Ka se funa ne au mai i a Apelaamo te mea ka fai ne au. 18A tena gafa ka fai mo malo takutakua, kae ka fakamanuia foki ne au a malo e auala i a ia.#18.18: ka tupu ... malo; io me a malo katoa ka fakatagi mai ki a au ke fakamanuia atu latou e pela mo taku fakamanuiaga ki a ia. 19Ko oti ne filifili ne au a ia ke fakatonu atu ki ana fanau mo tino o tena gafa ke fakalogo mai ki a au kae fai te mea tonu mo te fakamasinoga tonu. Kafai e fai latou pena, kae ka fakataunu ne au a mea katoa kola ne tauto ei au e uiga ki a ia.”

20Tena, fai mai ei te Aliki ki a Apelaamo penei, “E uke molimau se 'lei e uiga ki a Sotoma mo Komolo, ka ko te lotou agasala ko oko eiloa i te lasi. 21E tau mo au o fanaifo o onoono fakalei me e tonu a molimau kona ne lagona ne au me ikai.”

22Ne olo atu ei te tokolua kola ne mai mo te Aliki ki Sotoma, ka ko te Aliki e tu eiloa mo Apelaamo. 23Ne fesili atu Apelaamo ki te Aliki penei, “Ea, ka ta fakapalele eiloa ne koe a tino amio tonu fakatasi mo tino agasala? 24Kafai e tinolima tino amiotonu i te fa'kai, e fakamasei eiloa ne koe te fa'kai katoa? E a, e se fakasao eiloa ne koe ke sao te tinolima amiotonu i ei? 25Ailoga eiloa e mafai ne koe o tamate a tino amiotonu fakatasi mo tino agasala; e se mafai eiloa! E se mafai eiloa ne koe o fai se mea pena. Kafai e fai ne koe, ko tena uiga ko fakasala tasi a tino amiotonu mo tino amio 'masei. E se mafai ne koe o fai te mea tena. A te famasino o te lalolagi katoa e tau o fai te fakamasinoga tonu.”

26Ne tali atu te Aliki penei, “Kafai e maua ne au se tinolima tino amiotonu i Sotoma, ka se fakamasei ne au te fa'kai katoa ona ko latou.”

27Ne toe faipati aka Apelaamo penei, “Fakamolemole a koe ke sa ita eiloa ki a au tenei e gutu faipati atu. Au se tino ola fua, e se tau o fai se pati. 28Kae kafai la e tinofa mo te tokolima fua a tino amiotonu i te fa'kai, kae se tinolima. E a, e fakamasei eiloa ne koe te fa'kai mafai ko se katoa te tinolima tino amiotonu ka ko tinofa mo te tokolima fua?”

Ne tali atu a te Aliki, “Ka se fakamasei ne au a te fa'kai mafai e maua atu ne au e tinofa mo te tokolima tino amiotonu i ei.”

29Ne toe faipati aka Apelaamo penei “Kae kafai; e tinofa fua tino amiotonu i Sotoma?”

Ne tali te Aliki penei, “Ka se fakamasei ne au te fa'kai mafai e maua ne au se tinofa tino amiotonu i ei.”

30Muna a Apelaamo, “Te Aliki, fakamolemole eiloa, sa ita ke toe faipati atu au. Kafai la e tinotolu fua tino amiotonu i te fa'kai?”

Muna a te Aliki, “Ka se fakamasei ne au a te fa'kai mafai e tinotolu tino amiotonu i ei.”

31Ne toe faipati atu Apelaamo penei, “Fakamolemole, sa ita eiloa ki toku fakamakeke o faipati atu. Kafai la e tinolua fua tino amiotonu e maua i te fa'kai?”

Muna a te Aliki, “Ka se fakamasei ne au te fa'kai mafai e tinolua tino amiotonu e maua ne au i ei.”

32Muna a Apelaamo, “Te Aliki, fakamolemole eiloa, sa ita ke toe faipati atu au, taku toe faipatiga eiloa. Kafai la e tinogafulu tino amiotonu i te fa'kai?”

Muna a te Aliki penei, “Kafai e tinogafulu tino amiotonu i te fa'kai, ka se fakamasei ne au a te fa'kai.” 33I te otiga ne faipati te Aliki mo Apelaamo, ko te Aliki eiloa ko fano ka ko Apelaamo ko foki ki tena fale.

Currently Selected:

KENESE 18: Tusi Tapu

Highlight

Copy