KENESE 15

Ko te Feagaiga a te Atua mo Apelamo

1I te otiga o mea kona, ne oko mai te fakaasiga mai i te Aliki ki a Apelamo, muna a ia penei, “Apelamo, sa mataku. Ka puipui ne au a koe mai fakalavelave, kae fakamanuia ne au a koe.”

2Ne tali atu Apelamo penei, “Te Aliki Maluga, se a te aoga o au fakamanuiaga ki a au me e seai ne aku tamaliki? Te tino tokotasi e maua ne ia aku mea mafai e mate au ko Eliesa o Tamaseko. 3E seai ne aku tamaliki ne aumai ne koe; ko taku tavini fua ka puke ma ia aku mea mafai e mate au.”

4Ne toe lagona ne ia a te Aliki e faipati atu ki a ia penei: “E se maua ne tau tavini ko Eliesa au mea; ko tau tama tonu eiloa ka maua ne ia au mea mafai e mate koe.” 5#Loma 4.18; Epe 11.12Ne taki a Apelamo ne te Aliki ki tua kae fai mai ki a ia penei, “Kilo ki te lagi, kae taumafai o lau a fetu kona i ei; ka pena te tokouke o tou gafa.”

6 # Loma 4.3; Kala 3.6; Iako 2.23 Ne talitonu Apelamo ki te Aliki, tela ne fiafia ei te Aliki ki a Apelamo kae talia ne ia.

7Tena ne muna mai ei te Aliki ki a ia penei, “Au ko te Aliki; ne taki mai ne au a koe mai Ulo i Papelonia, o tuku atu te fenua tenei ke fai mo ou tofi.”

8Kae ne fesili atu a Apelamo penei, “Te Aliki Maluga, e iloa pefea ne au me ka fai mo oku tofi a te laukele tenei?”

9Ne tali mai te Aliki penei, “Aumai ki a au se pulumakau, se kouti, mo se mamoe tagata e tau katoa o taki tolu olotou tausaga. Aumai foki se lupe mo se tamā lupe.” 10Ne aumai ne Apelamo ki te Atua a manu vae fa o katikati i laina e lua; ka ko manu eva e seki 'kati ne ia. 11Ne olo ifo a manu eva fakamataku e igoa ki valatua, o kai a foitino o manu kona, kae ne atuli ne Apelamo keatea.

12 # Iopu 4.13,14 I te toga o te la, ne to te moe o Apelamo, te mea eiloa ko oko atu ki a ia a te mataku. 13#Eso 1.1-14; Galu 7.6Muna a te Aliki ki a ia, “A au fanau ka nofo i se fenua fakaatea; ka fai latou mo pologa i te fenua tena, kae ka fakafi'tagina olotou olaga e tusa mo te fa selau tausaga. 14#Eso 12.40,41; Galu 7.7Kae ka fakasala eiloa ne au a te malo tela e fakapologa ne ia latou. Kafai ko tiakina ne latou te fenua tena, kae ka olo latou mo te koloa lasi o te fenua tena. 15A koe ka ola ki tou toeaina kae ka mate koe mo te filemu. 16Ka mavae atu te fa o tupulaga ko 'foki mai ei koutou ki konei, me ka se afuli ne au a tino Amoli ke oko eiloa ki te taimi e lasi ei te olotou agasala ko fakasala ei latou.”

17I te toga o te la, ka ko pouli foki, ne sae aka se au mo te afi i va o manu vaefa kola ne kati vaelua. 18#Galu 7.5I kona ne fai ei te feagaiga a te Aliki mo Apelamo, fai atu ei te Aliki penei, Au e tauto ke tuku atu ki tou gafa a te fenua katoa tenei mai te gataga o Aikupito ki te vaitafe o te Eufilate, 19fakatasi ei mo fenua o tino Keni, tino Kinasa, tino Katemoni, 20tino Heti, tino Pelise, tino Lefaima, 21tino Amoli, tino Kanana, tino Kilikase mo tino Iepuse.

Currently Selected:

KENESE 15: Tusi Tapu

Highlight

Copy