Matiye 7

Ki ɗekke booro a tukki bakadá ye

(Lik 6.37-38,41-42)

1«Kun ɗekke booro a tukki wede tuuku toŋ maŋ ye, geŋ Raa toŋ yi ki ɗekka booro egguŋ ye. 2Ɗerec, tʼurzi wede kun ɗekkiyo booro a tukki ɗoŋ oŋgo geŋ, Raa toŋ yʼa ɗekka booro egguŋ, wo dooziyo ere kun dooziyo a ɗuwo gette, Raa toŋ yʼun ti dooza a kune iŋkino kay. 3Ki moo me ki wolliyo un̰umu wede adda kʼersa leemadá, wo undumu wede adda kʼersadá ki gi di yʼowwiyo ye me? 4Ɗe mummino kʼa aane ki di roote a leemadá, kʼa tʼeese: “Kʼoolo nʼa di tʼamɓo un̰umu wede adda kʼersadá en̰n̰o”, wo kaciŋ kee a-dʼede undumu adda kʼersadá me? 5Kee wede biza sire sire, ki tʼamɓo undumu wede adda kʼersadá ɗoo, iŋkino kʼa wolla keren̰, saŋ kʼa tʼamɓa un̰umu wede adda kʼersa leemadá kollo.

6Munɗa wede kamilen̰ a ɗaana Raa geŋ a gede ki-tʼele ye, para maŋ yʼaa kima ki tuddá yʼa ki ti kʼahita. Ɗogoro ere zooyatú oon̰e gette kun seɗɗa a ɗaana kinzir ye, para maŋ tode gette yʼa-tʼon̰ƴilsa mentú.»

Kun tondo ti bey Raa kun tʼoona

(Lik 11.9-13)

7«Kun tondo wo munɗa an un tʼeela, kun dehito wo kun tʼoona, kun koppo biza wo an un di-tʼihina. 8Wede tuuku yi tondiyo maŋ, munɗa an i-dʼeliyo, wede yi dehutu maŋ, yi dʼooniyo, wo wede yi koppiyo biza maŋ, an i di tʼohine. 9Wee wee ti diinaguŋ aame ulí yi tunde omɓo maŋ, yi di tʼele mokkolo me? 10Koo yi tunde puuniso maŋ, yi di tʼele miipo me? Aha umbo! 11Iŋkino maŋ kune ɗoŋ adduguŋ ulpi toŋ, kun suune eliyo sulɗi ɗoŋ majjanɗani a in̰n̰iguŋ. Wo geŋ taŋ miibi a ceere Meeguguŋ Raa a kandaane yʼaane yʼan tʼele sulɗi ɗoŋ majjanɗani a ɗoŋ i yi tondiyo me!

12Sulɗi ɗoŋ pay kun dehu ɗuwo an un dʼise geŋ, a kane toŋ kun an iso iŋkino kay. Geŋ iŋkino ita kʼono ɗoŋ pay an riiŋe ti kaaga adda mattup kʼoogoro Muusa ti ɗoŋ ki nebiyagi me.»

Urzi sire

(Lik 13.23-24)

13«Kun tʼodo ti biza perƴeƴe. Ɗerec, biza goole geŋ yoŋ urzi wede sooruzí i kʼoon̰e ye, yʼa-da tʼette kʼume daggiya, wo ɗoŋ ɓaadaŋ an aɗɗiya tʼurzi gen̰n̰o. 14Ki kotto biza perƴeƴe geŋ, yoŋ urzi sooruzí oon̰e, yʼa-da tʼette kʼume lekkiyo ere ki daayum, wo ɗoŋ baata aɗɗiya tʼurzi geŋ me.»

Undumu ti in̰n̰izí

(Matiye 7.16-17; Lik 6.44-45)

15«Kun koona mentikagi ti ɗuwo ɗoŋ an ti tʼisiyo tuddaŋ aa nebiyagi. Anʼtiyo tudduguŋ kane tasse aa damɓami, wo kaciŋ tʼadda kʼaddaŋ kane bundiɗi aa sullibagi. 16Geŋ kane kun diʼn suune a urzi sooruzaŋ. In̰n̰i kʼinda bin̰ ekkʼundumu kʼahimagi ki ki rakke ye, ise in̰n̰i tormo toŋ ekki woskani ki ki rakke ye. 17Iŋkino undumu tuuku beehiye yʼa tʼehe in̰n̰izí toŋ beehiye, wo undumu wede ulsu yʼa tʼehe in̰n̰izí toŋ ulpi. 18Undumu wede beehiye yi kʼaane yi ki tʼehe in̰n̰i ulpi ye, wo undumu wede ulsu yi kʼaane yi ki tʼehe in̰n̰i beehiye ye. 19Undumu tuuku yi kʼehiyo in̰n̰i beehiye ye maŋ, yoŋ geŋ an di ɗekka an di seɗɗa adda kʼuwwo mendí. 20Geŋ iŋkino ɗuwo ɗoŋ an ti tʼisiyo tuddaŋ kane nebiyagi kaciŋ nebiyagi ye geŋ, kun diʼn suune a urzi sooruzaŋ.»

Ɗoŋ etta ɗaana Raa

(Lik 6.46; 13.27)

21«Kane ɗoŋ an ni waaku: “Galmeegey, Galmeegey” geŋ, pay an ki tʼetta ye kʼadda Moziko Raa te. Wo etta kane ɗoŋ isiyo munɗa wede Meego Raa a kandaane yi dehu ɗaŋŋalaŋ. 22A onniyo booro gette ɗoŋ ɓaadaŋ an o di roota, an tʼeesa: “Galmeegey, Galmeegey, ki kotto ti sundá ay ruutito ono ɗoŋ Raa yʼigibo, ti sundá ay dʼilmito siitanɗani, ti sundá ay dʼizito sulɗi kʼarmika ɓaadaŋ ɗe me!” 23Iŋkino maŋ nʼan di roota keren̰, nʼa tʼeesa: “Kune toc aŋ wenɗa nʼun kiʼn zuune ye. Kun ti leɗɗo dokki ti tuddó me, kune ɗoŋ isiyo sulɗi ɗoŋ ulpi!”»

Ɓoyɗi sire

(Lik 6.47-49)

24«Iŋkino wede tuuku yʼollige ono ɗoŋ ni rootiyo en̰n̰o wo yi sooru eego maŋ, yoŋ geŋ yi deeƴiso aa wede i-dʼede elkiso yʼa tʼiiziga ɓoozí eego paŋgiragi. 25Mizzi yʼa guppe ti maaye ɓaadaŋ, oyɗayi an dʼûunite i palɗita waawiye. Maaye ti bormo geŋ an di ŋiiƴa ɓoy gen̰n̰o wo yʼa kʼiire ye, kono yoŋ itadí an ziipe ekki paŋgiragi. 26Wo ɗe wede tuuku yʼollige ono ɗoŋ ni rootiyo en̰n̰o wo yi ki sooru eego ye maŋ, yoŋ geŋ yi deeƴiso aa wede elkisadí umbo yʼa tʼiiziga ɓoozí a dolso. 27Mizzi yʼa guppe ti maaye ɓaadaŋ, oyɗayi an dʼûunite i palɗita waawiye. Maaye ti bormo geŋ an di ŋiiƴa ɓoy gen̰n̰o wo a ruuge pay.»

Isa yi dooyiso tʼurzi kʼaaye?

(Markus 1.22; Lik 4.32)

28Isa yʼa ti ɗiŋge dooyiso gettiyo maŋ, kane ɗoŋ duuru dooyisadí gette tʼan diʼn ziiɗa, 29kono yoŋ yi dooyiso ti toogo suuniyo ere ki yode batum, wo aakede ki ɗoŋ suuniyo kʼoogoro ge ki dooyiso ye.

Currently Selected:

Matiye 7: moz

Highlight

Copy