Псалманууд 91
91
1Ши, Дээдэ Бурханай халхабша доро ажаһуугша,
Түгэс Хүсэтэ Бурханай һүүдэр доро амидарагша,
2Эзэн тухай «Тэрэ болбол минии хорохо газар,
минии цайза хэрэм,
Бурхамни, найдални!» гэжэ хэлэгшэ,
3Бурхан шамайе ангуушанай урьхаһаа,
үхэл хаталһаа абарха,
4үдэ һодоороо хушаха,
дали жэгүүрынь шинии халхабша болохо,
үнэн сэхэнь бамбай ба хана халхабша болохол.
5Һүниин аймшагһаашье,
үглөөнэй эшхэрэн ниидээшэ годлиһоошье айхагүйш.
6Үдэшын амадан ябааша тахал үбшэнһөөшье,
үдэ дунда мүлжэгшэ үхэлһөөшье айхагүйш.
7Мянган хүн шинии дэргэдэ,
түмэн хүн шинии баруун гар талада унабашье,
энэнь шамда халдахагүй.
8Ши гансал нюдөөрөө хараад лэ,
нүгэлтэй муу зондо хүрэдэг хэһээлтые харахаш!
9Эзэниие ши өөрын хорохо газар,
Дээдэ Бурханай оршохо газар болгоош.
10Ямаршье муу юумэн шамтай тохёолдохогүй,
ямаршье гай тодхор гэртэшни дүтэлхэгүй.
11Юуб гэбэл, бүхы замдашни шамайе аршалан хамгаалхые
Тэрэ Өөрынгөө Эльгээмэлнүүдтэ захиралта үгэхэ.
12Шулуунда бүдэржэ унахагүйншни тула тэдэ шамайе гар дээрээ үргөөд ябаха.
13Арсалангые болон хорото могойе гэшхэн байхаш,
залуу арсалан, лууе дэбһэхэш.
14Бурхан иигэжэ айладхаа:
«Тэрэ намда дуратай, тиимэһээ тэрэниие абархаб.
Тэрэ намда мүргэдэг, тиимэһээ тэрэниие хамгаалхаб.
15Дуудахадань, Би тэрэниие дуулахаб.
Гай тодхорто ороходонь, Би тэрээнтэй хамта байхаб.
Тэрээндэ туһалхаб, тэрэниие суута хүн болгохоб.
16Ута наһа үршөөхэб,
Өөрын абарал тэрээндэ үзүүлхэб!».
Currently Selected:
Псалманууд 91: BurOTp
Highlight
Share
Copy
Want to have your highlights saved across all your devices? Sign up or sign in
© Bible Society in Russia, 2002-2007, 2011, 2013, 2018.
