Псалманууд 89
89
1[Эзраахай Һэмаанай ирагуу үгэнүүд.]
2Эзэн, би Танай энэрэл хайра тухай мүнхэдөө дуулан байхаб,
үеһөө үедэ Танай үнэн байдалые амаараа мэдүүлэн байхаб.
3Юуб гэбэл, «энэрэл хайратнай мүнхэдөө байгуулагданхай,
Танай үнэн байдалыетнай огторгой мэтэ хододоо оршохо» гэнэб.
4Шэлэн абаһан нэгэнтэйгээ хэлсээ баталааб,
Өөрын зараса Давидта иигэжэ тангариглааб:
5«Хэтэ мүнхэдөө үрииеш тогтоожо,
хан шэрээеш үеһөө үедэ дамжуулан байгуулхаб».
[Хүгжэм]
6Эзэн, Танай гайхамшагта хэрэгүүдые,
үнэн байдалыетнай гэгээнтэнэй суглаанда
огторгой алдаршуулна.
7Юуб гэбэл, тэнгэридэ Эзэнтэй сасуулмаар хэн байхаб?
Бурханай хүбүүдэй дунда хэн Эзэнтэй адли бэ?
8Гэгээнтэнэй ехэ суглаанай дунда
Бурхан һүрдэмөөр,
тойроод байгаашуулда бултандань Тэрэ аймшагтай.
9Түмэн Сэрэгтэ Эзэн Бурхан! Хэн Тантай адли хүсэтэйб?
Үнэн байдалтнай Таниие тойроно.
10Та далайн дошхоролые захиран удариданат.
Долгинуудайнь хүсэтэй долгилходо Та номгоруунат.
11Та Рааһабые бута сохёот,
хүсэ шандааһаараа дайсадаа тараагаат.
12Огторгой болон газар — Танай,
юртэмсые болон тэрниие бүридүүлэгшэ бүхы юумэ Та байгуулаат.
13Хойто болон урда зүг Та бүтээгээт,
Табоор болон Хэрмоон Танай нэрые магтана.
14Шадал шандааһантнай хүсэтэй,
гартнай шанга, баруун гартнай дээрэ үргөөтэй.
15Зүб шударга болон шударга хуули — шэрээгэйтнай һуури мүн,
энэрэл хайра болон үнэн байдал урдатнай ябадаг.
16Баярай дуу мэдэхэ арад юрөөлтэй!
Эзэн, тэдэ нюурайтнай гэрэл соо ябанал.
17Бүхэли үдэрөө тэдэ нэрэдэтнай баярлана,
зүб шударгаартнай тэдэ үргэмжэлэгдэнэ.
18Юуб гэбэл, Та тэдэнэй хүсэ шадалай алдар,
талархалаартнай бидэ толгойгоо үргэнэбди.
19Юуб гэбэл, бидэнэй бамбай болбол Эзэн,
манай хаан — Израилиин нангин Бурхан.
20Нэгэтэ Та Өөрын арюун зондо үзэгдэл соогоо айлдажа,
«Би нэгэ баатарта туһалжа,
арад зон сооһоо шэлэгшэ нэгэниие үргэмжэлөөб.
21Өөрын зараса Давидые оложо,
Өөрын арюун тоһоор тэрэниие тоһолооб.
22Гарни тэрээндэ туһалан байха,
шандааһамни тэрэниие бүхэ болгохо.
23Дайсан тэрэниие диилэхэгүй,
хорото муу хүн тэрэниие зобоохогүй.
24Хараһаар байтарнь дайсадынь һалгахаб,
тэрэниие үзэн ядагшадые бута сохихоб.
25Минии үнэн байдал болон энэрэл хайрамни тэрээнтэй байха,
Минии нэрээр тэрэ эбэрээ дээшэнь үргэхэ.
26Гарыень далай дээгүүр һунгуулхаб,
хүсэ шадалынь гол мүрэн дээгүүр байлгахаб.
27Тэрэ намайе иигэжэ нэрлэхэ:
«Та минии эсэгэт, минии Бурханта, абарагша хабсагаймнит».
28Би тэрэниие ууган хүбүүн болгохоб,
дэлхэйн хаашуулһаа дээгүүр табихаб.
29Энэрэл хайрамни тэрээнтэй мүнхэдөө байха,
тэрээнтэй хэлсээмни бата мүн.
30Үрииень хэтэ мүнхэ үргэлжэлүүлэн байлгахаб,
хан шэрээнь тэнгэриин үдэрнүүдтэл хэтэ байха.
31Хэрбээ үри хүүгэдынь һургаалым орхин мартажа,
Минии заабаринуудые сахихаа болёо гээшэ һаань,
32хуулинуудым эбдэжэ,
тогтоол ёһонуудым бэелүүлээгүй һаань,
33Би тэдэнэй муу ябадалые баягаараа,
гэм бурууень һабаагаар сохин шиидхэхэб.
34Гэбэшье энэрэл хайраяа тэдээнһээ таһалхагүйб,
үнэн байдалаа хубилгахагүйб.
35Хэлсээгээ эбдэхэгүйб,
амалһанаа хубилгахагүйб.
36Нэгэтэ Би арюун нангинаараа тангариглаа бэлэйб,
Давидые мэхэлхэгүйб.
37Үри һадаһадынь хэтэ мүнхэдөө оршохо,
хан шэрээнь урдамни наран мэтэ толорхо.
38Һарадал адли тэрэ мүнхэдөө шанга байха,
тангаригай үнэн гэршэ тэнгэридэ мүн.
[Хүгжэм]
39Харин Та Өөрын тоһолон шэлэгшэдээ уурлажа,
хаяжа, буруушаажа байнат.
40Өөрын зараса болохо тэрээнтэй хэлсээгээ эбдэжэ,
титимынь газар тооһондо унагаабат.
41Та тэрэнэй бүхы хана эбдээт,
бата хэрэмүүдынь һүйрэл болгоот.
42Хажуугаарнь үнгэрэгшэ бүхэн тэрэниие дээрмэдэнэ,
хүршэнэрынь тэрэниие баһана.
43Дайсадайнь гарые тэрээн руу үргүүлээт,
бүхы дайсадынь баярлуулаат.
44Һэлмыень һөөргэнь харуулаат,
байлдаанай үедэ туһалаагүйт.
45Хаан титимынь буляагаат,
хан шэрээень газарта унагаагаат.
46Залуу наһыень богони болгоот,
эшхэбтэр байдалаар тэрэниие хушаат.
[Хүгжэм]
47Эзэн, хэды болотор хоргодохобта?!
Хэды болотор уур хилэнтнай гал мэтэ дүрэлзэхэб?!
48Ами наһанайм хугасаае һаныт.
Та хүнэй хүбүүдые юундэ дэмы бүтээгээбта!
49Хэн хүн үхэл үзэнгүй амидаржа шадахаб?
Хэн һүлдэеэ Үхэлэй оронһоо абаржа шадахаб?
[Хүгжэм]
50Эзэн, Танай урданай энэрэл хайра хаанаб?
Өөрын үнэн байдалаар Та Давидта тангариглаа бэлэйлта.
51Танай зарасанарые яажа доромжолһые һаныт.
Харинн зоной баһаһые досоогоо тээжэ-тэсэжэ байналби.
52Эзэн, дайсадайтнай доромжолдогые,
алхам бүхэндэнь Танай тоһолон шэлэгшые баһажа байһые һаныт.
53Эзэн хэтэ мүнхэдөө магтагдахань болтогой!
Амен, амен!
Currently Selected:
Псалманууд 89: BurOTp
Highlight
Share
Copy
Want to have your highlights saved across all your devices? Sign up or sign in
© Bible Society in Russia, 2002-2007, 2011, 2013, 2018.
