Эхин 7

Уһан галаб

1Эзэн Нойдо айладхаба:

— Зай, гэр бүлэеэ абаад, ханза-онгосо руугаа оро. Энэ үеын зоной дунда гансал шамайе Би үнэн зүб юумэ хэхэеэ эрмэлзэжэ ябадаг, гэм зэмэгүй хүн гэжэ хаража байнаб. 2Онгосодо ороходоо, ши бузаргүй амитадһаа эрэ, эмые, хамта дээрээ нэгэ түрэлэй долоон эрэ, эмэ зүйл, тиихэдэ бузартай амитадһаа түрэл түрэлөөрнь хоёролжон зүйл нэгэ нэгээр абаарай. 3Шубуудай янза бүриин долоон зүйлнүүдые хоёрлон ханза-онгосо руугаа абахаш. Иигэжэ түби дэлхэйдэ амитадай, шубуудай уг бү таһалдаг. 4Долоон хоногой удаа Би энэ дэлхэйдэ үер бороо оруулжа эхилхэб. Дүшэн үдэр, дүшэн һүни тэрэ үргэлжэлхэ. Иигэжэ Би Өөрынгөө бии болгоһон хамаг амитадые газар дайдаһаа үгы хэн хюдахаб.

5Эзэнэй зарлигые Ной дүүргэхэеэ оролдоо һэн.

6Уһан галабай эрьеһэн тэрэ үедэ Ной зургаан зуун наһатай байгаа.

7Уһан галабай эрьехын урдахана Ной, һамганиинь, мүн хүбүүдынь, бэреэдынь ханза-онгосо руу хорон оробо. 8-9Бурханай зарлигаар Ной янза бүриин сээртэй, сээргүй ан амитадые, мүлхигшэдые, жэгүүртэниие ханза-онгосодоо хоёр-хоёроор оруулба.

10Долоон хоног үнгэрөөд, дэлхэй дээрэ уһан галаб эхилбэ.

11Нойн зургаан зуудахи наһанда, жэлэй хоёрдохи һарын арбан долоондо оёоргүй гүн гүнзэгыһөө, мүн огторгойн орьёлһоо уһан адхараад, 12аадар бороо түби дэлхэйдэ дүшэн үдэр, дүшэн һүни орожол байба. 13Уһан галабай эхилһэн үдэр Ной һамгантаяа, Шеэм, Хаам, Яапэт хүбүүдтэеэ, гурбан бэреэдтэеэ ханза-онгосо руу оробо. 14Мүн энэ дэлхэйдэ амидардаг янза бүриин тэжээмэл, зэрлигшье амитад, мүлхигшэд, шубууд онгосо руу оробо. 15Амин голтой гэдэг зүйл бүриин амитад хоёр хоёроороо Нойтой хамта иигэжэ ханза-онгосо руу ороо бэлэй. 16Тиигэжэ айладхалай ёһоорнь янза бүриин амитадые эрэ, эмээрнь хоёр хоёроор Нойн ханза-онгосо руу оруулһанай удаа Эзэн Бурхан онгосын үүдэ хааба.

17Галабай эхилһээр дүшэн хоног соо уһан улам нэмэжэ, ханза-онгосонь долгиндо абтан, тамаран урдаба. 18Уһан ехэ үер болоһоор хамаг газар дэлхэйе шэнгээбэ. Ханза-онгосо оршон тойрон тамаржал байба.

19-20Үерэй уһан улам ехэ болоһоор эгээл үндэр уулын орьел хушаба, тиигээд үшөө дээшээ долоон метр үндэр болотороо нэмэбэ. 21Янза бүриин гэрэй болон зэрлиг ан амитад, мүлхижэ амидарагшад, жэгүүртэн болон бүхы зон уһанда абтажа хосорбо. 22Иигэжэ амиды голтой гэхэ юумэн хүрьһэтэ дэлхэй дээрэ үлэбэгүй. 23Газар дэлхэй дээрэхи хамаг юумэн — хүн түрэлтэншье, малшье, ан арьяатаншье, жэжэ бага амитадшье, шубуудшье — булта хосорбо. Гансал Ной болон тэрээнтэй ханза-онгосо соо байгшад амиды үлэбэ.

24Зуун табин үдэрэй туршада уһан зааханшье татангүй байгаа бэлэй.

Currently Selected:

Эхин 7: BurOTp

Highlight

Copy