Sat-kâ-li-â Sû 1

Song-chú Fû-seu Kì ke Chṳ́-mìn Chón-hiong Kì

1Thai-liù-sṳ cho Pô-sṳ̂ fòng-ti thi-ngi ngièn pat-ngie̍t, Song-chú chiông hâ-poi ke sin-sit khí-sṳ pûn Yi̍t-tô ke sûn-é, Pí-li-kâ ke lai-é siên-tî Sat-kâ-li-â.

2-3Song-chú — Van-kiûn ke Ngièn-soi ham Sat-kâ-li-â chhòn-fa lâu ngìn-mìn kóng: “Ngài — Song-chú, Van-kiûn ke Ngièn-soi sṳt hiong ngì-têu ke chú-siên thai fat-khién; chúng-he Ngài liá-ha tui ngì-têu kóng: ‘Ngì-têu oi chón-hiong Ngài, Ngài chhiu chón-hiong ngì-têu. 4Ngì-têu m̀-hó chhiong ngì-têu ke chú-siên. Yî-chhièn ke siên-tî chiông Ngài — Song-chú, Van-kiûn Ngièn-soi ke sin-sit lâu kì-têu kóng, ham kì-têu m̀-hó chai ki-siu̍k ko sià-ok, fam-chhui ke sên-fa̍t; chúng-he kì-têu m̀-thâng, ya m̀-tap Ngài. 5Ngì-têu ke chú-siên liá-ha chhai nai-vi nè? Ke-têu siên-tî voi sâng-to yún-yén mâ? 6Khì-sṳ̍t, Ngài thûng-ko Ngài ke phu̍k-ngìn, chhiu-he ke-têu siên-tî, só min-lin yu kín-ko ngì-têu chú-siên ke fa, chhiòn-phu fat-sên chhai kì-têu ke sṳ̂n-song. Kì-têu chang fí-kói; kì-têu sṳ̀n-ngin Ngài — Song-chú, Van-kiûn ke Ngièn-soi he cheu chhṳ-kâ ke kie-va̍k, cheu kì-têu só-hàng só-cho ke chit-fa̍t kì-têu lé.’ ”

Mâ-é ke Yi-siong

7Thai-liù-sṳ cho fòng-ti ke thi-ngi ngièn sṳ̍p-yit ngie̍t, chhiu-he Se-pa-thi̍t ngie̍t ngi-sṳ̍p si#1:7 “thi-ngi ngièn sṳ̍p-yit ngie̍t ... ngi-sṳ̍p si”: Cheu hien-thoi ke ngit-la̍k lòi son he kûng-ngièn chhièn ńg-pak yit-sṳ̍p kiú-ngièn ngi-ngie̍t sṳ̍p-ńg ngit; ya he khôi-sṳ́ chhùng-kien sṳn-thien heu ńg-chak ngie̍t (chhâm-kháu Ha̍p-kâi Sû 1:15)., Song-chú yung yi-siong chiông sin-sit kâu-pûn Yi̍t-tô ke sûn-é, Pí-li-kâ ke lai-é siên-tî Sat-kâ-li-â.

8Chhai ke am-pû ngài khon-tó yit-ke ngìn#1:8 “yit-ke ngìn”: Yû hien-thoi yi̍t-pún kié-sṳt cho “Song-chú ke thiên-sṳ́”, chhâm-kháu 1:10-12. khì-tén fùng-mâ, thìn chhai sân-lak ke sa̍k-liù-su yèn-chûng; kì heu-poi yû yit-khiùn fùng-set, vòng-set lâu pha̍k-set ke mâ. 9Yû yit-ke thiên-sṳ́ lâu ngài kóng-fa; ngài mun kì: “Chú â, ke-têu he má-ke yi-sṳ?”

Kì kóng: “Ngài oi chṳ́-sṳ ngì ke he má-ke yi-sṳ.”

10Yèn-heu, ke thìn#1:10 “thìn” ya-he yi̍t-cho “khî”. chhai sa̍k-liù-su yèn-chûng ke ngìn kóng: “Liá-têu he Song-chú phai lòi thi-song sùn-chhà ke.”

11Ke-têu khì-mâ ke chhiu hiong khî chhai sa̍k-liù-su yèn-chûng Song-chú ke thiên-sṳ́ po-ko, kóng: “Ngài-têu sùn-hàng chhiòn sṳ-kie, fat-hien chhiòn sṳ-kie lûng-chúng phìn-ôn vù-sṳ.”

12Yèn-heu, Song-chú ke thiên-sṳ́ kóng: “Song-chú — Van-kiûn ke Ngièn-soi â, Ngì hiong Yâ-lu-sat-lâng lâu Yù-thai kok-sàng fat-khién yí-kîn chhit-sṳ̍p ngièn lé, hàn-oi ko kí-kiú chang voi lìn-mén kì-têu nè?”

13Song-chú yung vûn-yù ôn-ví ke fa fì-tap ke lâu ngài kóng-fa ke thiên-sṳ́. 14Ke thiên-sṳ́ chhiu ham ngài siên-ko: “Song-chú — Van-kiûn ke Ngièn-soi án-ngiòng kóng: Ngài chhṳ̂m-chhṳ̂m thung-siak Yâ-lu-sat-lâng — Ngài ke sṳn-sàng Siak-ôn, 15chúng-he Ngài tui ke-têu hióng-su ôn-lo̍k ke koet-kâ thai fat-khién. Yîn-vi Ngài tui Ngài chṳ́-mìn lio̍k-lio̍k-é fat-khién, kì-têu chhiu chen-kâ Ngài chṳ́-mìn ke thung-khú. 16Só-yî, Ngài chón-to Yâ-lu-sat-lâng, oi lìn-mén liá-sàng. Ngài ke sṳn-thien yit-thin oi chhùng-kien, sṳn-sàng yit-thin oi cháng-hó. Liá he Ngài — Song-chú, Van-kiûn ke Ngièn-soi kóng ke.”

17Thiên-sṳ́ yu ham ngài siên-ko: “Song-chú — Van-kiûn ke Ngièn-soi án-ngiòng kóng: Ngài chhai Yù-thai ke-têu sàng oi chhùng-sîn fàn-yùng hí-lòi; Ngài oi chai yit-pái ôn-ví Siak-ôn, kién-sién Yâ-lu-sat-lâng cho Ngài chhṳ-kâ ke sàng.”

Kok ke Yi-siong

18Ngài chhai nang-ngoi yit-ke yi-siong chûng khon-tó si-kî kok. 19Ngài mun siên-chhièn lâu ngài kóng-fa ke thiên-sṳ́: “Liá-têu kok yû má-ke yi-sṳ?”

Kì en-kóng: “Liá-têu kok he tá-san Yù-thai, Yî-set-lie̍t lâu Yâ-lu-sat-lâng ngìn-mìn ke sṳ-li̍t.”

20Heu-lòi Song-chú yu pûn ngài khon-tó si-ke sṳ̂-fu. 21Ngài mun: “Liá-têu ngìn lòi cho má-ke?”

Kì en-kóng: “Liá-têu sṳ̂-fu he lòi khiúng-hak lie̍t-koet pin thûi-fân kì-têu ke sṳ-li̍t; yîn-vi lie̍t-koet pho-fái Yù-thai ke thú-thi, tá-san Yù-thai ke ngìn-mìn.”

Currently Selected:

Sat-kâ-li-â Sû 1: THV12Rdb

Highlight

Copy