Mâ-khó 11

Kông-yùng Ngi̍p Yâ-lu-sat-lâng

(Mâ-thai 21:1-11; Lu-kâ 19:28-40; Yok-hon 12:12-19)

1Yâ-sû lâu ho̍k-sâng hàng voi to Yâ-lu-sat-lâng, chiông-khiun Pak-fap-khì lâu Pak-thai-nì, chhai Kám-lám-sân, Yâ-sû ham lióng-ke ho̍k-sâng siên hàng, 2fûn-fu kì-têu kóng: “Ngì-têu hi thèu-chhièn ke chhûn-chông. Ngì-têu yit ngi̍p-hi, chhiu voi khon-tó yit-chak hàn-màng yû-ngìn khì-ko ke se lì-è thò chhai ke-vi. Ngì-têu chiông kì kié-khôi, khiên-lòi liá-vi. 3Na-he yû-ngìn mun ngì-têu: ‘Ngióng-pân cho liá-ke sṳ?’ ngì-têu chhiu lâu kì kóng: ‘Chú#11:3 “Chú” ya-he yi̍t-cho “Kì ke chú-ngìn”. oi yung kì; kì ngiàm-sṳ̀ voi sung-chón-lòi.’ ”

4Kì-têu chhiu hi, khon-tó lu-sùn yû yit-chak se lì-è thò chhai mùn-héu, chhiu chiông kì kié-khôi. 5Khî chhai ke-vi ke ngìn mun kì-têu kóng: “Ngì-têu cho-má-ke kié-khôi se lì-è?”

6Kì-têu chhiu cheu Yâ-sû só fûn-fu ke fì-tap; ke-têu ngìn chhiu chún kì-têu chiông se lì-è khiên-chéu. 7Kì-têu chiông se lì-è khiên-to Yâ-sû ke-vi, chiông chhṳ-kâ ke sâm tap chhai lì-è ke poi-nòng-táng, Yâ-sû chhiu khì sông-hi. 8Yû chhin-tô ngìn yung chhṳ-kâ ke sâm phû chhai lu-song, ya yû-ngìn nâ yâ-thi chám-lòi ke su-kî phû chhai lu-song. 9Thèu-chhièn hàng lâu heu-poi thèn ke ngìn thai-sâng hêm-kóng:

“Hò-san-nâ! Siung-chan Song-ti!

Ngien Song-ti su-fuk pûn ke fung Chú miàng lòi ke!

10Ngien Song-ti su-fuk pûn ngài-têu chú-siên Thai-ví ke koet,

chhiu-he mò kí-kiú voi lìm-to ke!

Hò-san-nâ! Siung-chan kûi-pûn Chṳ-kô ke Song-ti!”

11Yâ-sû to Yâ-lu-sat-lâng, ngi̍p-hi sṳn-thien, si chû-vì khon yit-ha. Yîn-vi thiên yí-kîn am, kì chhiu lâu sṳ̍p-ngi-ke ho̍k-sâng chhut-sàng to Pak-thai-nì hi.

Chu-chú Vù-fâ-kó-su

(Mâ-thai 21:18-19)

12Thi-ngi-ngit, kì-têu tui Pak-thai-nì to-chón sàng-tú hi; chhai lu-song, Yâ-sû tú-kî. 13Kì khon-tó thèu-chhièn mò kí-yén ke só-chhai yû yit-thèu vù-fâ-kó-su, ya̍p-é cha̍t-cha̍t, chhiu hàng-ko-hi, sióng-oi khon yû kó-chṳ́ mò. Kì hàng-to su-chhièn, khon-tó chṳ́-yû ya̍p-é, yîn-vi ke-sṳ̀ m̀-he vù-fâ-kó ke sṳ̀-chiet. 14Yâ-sû chhiu tui ke-thèu su-é kóng: “Chhiùng-kîm yî-heu, m̀-voi chai yû-ngìn sṳ̍t ngì ke kó-chṳ́!”

Kiâ ho̍k-sâng lûng-chúng thâng-tó liá-ke fa.

Yâ-sû Kiet-chhiang Sṳn-thien

(Mâ-thai 21:12-17; Lu-kâ 19:45-48; Yok-hon 2:13-22)

15Kì-têu lòi-to Yâ-lu-sat-lâng, Yâ-sû yit ngi̍p sṳn-thien chhiu chiông só-yû chhai sṳn-thien-tú cho sên-lî ke ngìn kiuk chhut-hi. Kì súng-vang von-chhièn ke ngìn ke chok-è lâu mai ngie̍t-kap-è ke ngìn ke ten-é, 16ya m̀-chún yû-ngìn kông tûng-sî chhai sṳn-thien hàng-lòi hàng-hi. 17Kì kau-hiun kì-têu kóng: “Sṳn-kîn kám m̀-he ki-chai Song-ti ke fa kóng: ‘Ngài ke sṳn-thien oi cho van-mìn khì-tó ke thien’, ngì-têu sa chiông kì pien-cho chhe̍t-teu!”

18Chi-sṳ̂-chóng lâu kîn-ho̍k kau-sṳ̂ thâng-tó liá-ke fa, chhiu sióng phan-fap oi sat-hoi Yâ-sû. Chúng-he kì-têu kiâng kì, yîn-vi chung-ngìn tû khîm-fu̍k kì ke kau-hiun.

19Lìm-am-é, Yâ-sû chhiu lâu ho̍k-sâng hi sàng-ngoi.

Tui Vù-fâ-kó-su Tet-tó Kau-hiun

(Mâ-thai 21:20-22)

20Thi-ngi-ngit tá-chó, Yâ-sû lâu ho̍k-sâng yu tui ke-thiàu lu kîn-ko, khon-tó ke-thèu vù-fâ-kó-su lièn kîn chhiòn-phu châu-thet. 21Pí-tet sióng-hí liá-khien sṳ ke kîn-ko, chhiu tui Yâ-sû kóng: “Sîn-sâng, ngì khon, ngì só chu-chú ke vù-fâ-kó-su châu-thet lô.”

22Yâ-sû fì-tap kóng: “Tui Song-ti oi yû sin-sîm! 23Ngài sṳ̍t-chhai lâu ngì-têu kóng, ngì-têu na-he tui liá-chho sân kóng: ‘Sái-khôi, lo̍k hói-tú hi!’ sîm-chûng mò ngì-fù, khok-sin só kóng ke yit-thin voi sṳ̍t-hien, liá-ke sṳ chhiu voi vi-tó ngì-têu lòi sṳ̍t-hien. 24Só-yî, ngài lâu ngì-têu kóng, ngì-têu khì-tó ke sṳ̀, siông-sin ngì-têu só khiù ke he yí-kîn tet-tó, chhiu voi tet-tó. 25Ngì-têu khî-tén khì-tó ke sṳ̀, oi siên sa-miên tet-chhui ngì-têu ke ngìn; án-ngiòng, ngì-têu chhai thiên-táng ke Â-pâ chang voi sa-miên ngì-têu ke ko-fam.”#11:25 Yû-têu kú-kién kâ 26 chiet: “Na-he ngì-têu m̀ sa-miên phe̍t-ngìn, ngì-têu chhai thiên-táng ke Â-pâ ya m̀-voi sa-miên ngì-têu ke ko-fam.”

Chṳt-mun Yâ-sû ke Khièn-piang

(Mâ-thai 21:23-27; Lu-kâ 20:1-8)

27Kì-têu yu lòi-to Yâ-lu-sat-lâng. Yâ-sû chhai sṳn-thien-tú hàng ke sṳ̀, chi-sṳ̂-chóng, kîn-ho̍k kau-sṳ̂, lâu chóng-ló lòi-kien kì, 28mun kì kóng: “Ngì kho má-ke khièn-piang cho liá-têu sṳ? Má-ngìn pûn ngì liá khièn-piang cho liá-têu sṳ nè?”

29Yâ-sû en-kóng: “Ngài siên mun ngì-têu yit-ki fa, na-he ngì-têu fì-tap ngài, ngài chhiu lâu ngì-têu kóng, ngài kho má-ke khièn-piang cho liá-têu sṳ. 30Lâu ngài kóng, Yok-hon hàng sé-lî ke khièn-piang, he tui Song-ti lòi ke, ya-he tui ngìn lòi ke?”

31Kì-têu chhiu pí-chhṳ́ chên-lun, kóng: “Na-he ngài-têu kóng: ‘Tui Song-ti lòi ke’, kì voi kóng: ‘Án-ngiòng, ngì-têu cho-má-ke m̀ sin Yok-hon nè?’ 32Na-he ngài-têu kóng: ‘Tui ngìn lòi ke’, ngài-têu ke mun-thì chhiu tông-thai lé#11:32 “ngài-têu ke mun-thì chhiu tông-thai lé”: Ngièn-vùn mò liá-ki fa..” (Kì-têu kiâng ngìn-mìn voi tui-fu kì-têu, yîn-vi chung-ngìn lûng-chúng siông-sin Yok-hon he siên-tî.) 33Tui án-ngiòng, kì-têu en Yâ-sû kóng: “Ngài-têu m̀ tî.”

Yâ-sû tui kì-têu kóng: “Án-ngiòng, ngài ya m̀ lâu ngì-têu kóng ngài kho má-ke khièn-piang cho liá-têu sṳ-chhìn.”

Currently Selected:

Mâ-khó 11: THV12Rdb

Highlight

Copy