Chhóng-sṳ Ki 43

Yok-sit ke Â-kô Tai Phien-ngâ-mén to Âi-khi̍p

1Kâ-nàm thi-khî ke kî-fông ye̍t-lòi ye̍t ngiàm-chhung. 2Ngâ-kok yit-kâ ngìn yí-kîn chiông tui Âi-khi̍p tha̍k chón-lòi ke liòng-sṳ̍t chhiòn-phu sṳ̍t-thet lé. Ngâ-kok chhiu tui ke-têu lai-é kóng: “Ngì-têu chai-hi tha̍k-têu liòng-sṳ̍t chón-lòi.”

3Yù-thai tui â-pâ kóng: “Ke-sà ngìn chhin-ngiàm kín-ko ngài-têu, na-mò tai mân ló-thâi khiung-ha hi, chhiu m̀-sṳ́ sióng-hi kien kì ke mien. 4Na-he ngì hén pûn mân ló-thâi lâu ngài-têu khiung-ha hi, ngài-têu chhiu-hi thoi ngì tha̍k-liòng; 5ngì na m̀-hén pûn kì hi, ngài-têu chhiu mò-oi hi, yîn-vi ke-ngìn kóng-ko, ngài-têu na-mò tai mân ló-thâi khiung-ha hi, chhiu m̀-sṳ́ sióng-hi kien kì ke mien.”

6Yî-set-lie̍t kóng: “Ngì-têu cho-má-ke án-ngiòng hoi ngài nè? Ngióng-sṳ́ lâu ke-ngìn kóng ngì-têu hàn-yû yit-ke ló-thâi nè?”

7Kì-têu en-kóng: “Ke ngìn thi̍t-phe̍t siòng-se chhà-mun ngài-têu lâu vuk-hâ ke chhìn-khóng, kóng: ‘Ngì-têu ke â-pâ hàn-chhôi mò? Hàn-yû khì-thâ ke hiûng-thi mò?’ Ngài-têu mò fap-thu m̀ fì-tap kì ke mun-thì; ngài-têu ngióng-pân voi-tî kì oi ngài-têu tai mân ló-thâi hi nè?”

8Yù-thai tui kiâ-pâ Yî-set-lie̍t kóng: “Chiông se-ngìn-è kâu-pûn ngài, ngài-têu ngiàm-sṳ̀ chhut-mùn, án-ngiòng chhiòn-kâ thai-se chhiu m̀-voi ngo-sí. 9Ngài chhṳ-kâ lòi tâm-pó, ngài ngien fu chhiòn-phu ke chit-ngim. Na-he ngài mò chiông kì phìn-ôn tai chón-lòi kâu-vàn ngì, ngài kâm-ngien yún-yén sṳ̀n-tâm liá-ke chhui. 10Na m̀-he ngài-têu thô-thô pâng-pâng, ngài-têu yí-kîn hi lióng-pái chón-lòi lé!”

11Kì-têu ke â-pâ Yî-set-lie̍t kóng: “Ki-yèn án-ngiòng, ngì-têu chhiu tai-têu nen-hiông, phûng-thòng, hiông-liau, mu̍t-yo̍k, khôi-sîm-kó lâu hen-yìn liá-têu pún-thi ke thi̍t-sán, cho lî-vu̍t sung-pûn ke-sà ngìn. 12Ngì-têu ya oi tai lióng-phi ke chhièn hi, chiông song-pái thoi-tú fat-hien ke chhièn-ngiùn sung-vàn kì; ke khó-nèn he yû-ngìn piong m̀-chho̍k. 13Tai-tén mân ló-thâi, ngiàm-sṳ̀ to-chón hi Âi-khi̍p kien ke-ngìn. 14Ngien chhiòn-nèn ke Song-ti sṳ́ ke-ngìn lìn-mén ngì-têu, pûn Phien-ngâ-mén lâu ngì-têu nang-ngoi yit-ke hiûng-thi phìn-ôn chón-lòi. Lun-tó ngài, na-he thin-chho̍k oi sóng-thet lai-é, sóng-thet chhiu son lé!”

15Kì-têu chhiu tai-tén lî-vu̍t, lióng-phi ke chhièn, lâu Phien-ngâ-mén chhut-fat, hi-to Âi-khi̍p, khî chhai Yok-sit ke mien-chhièn. 16Yok-sit khon-tó Phien-ngâ-mén lâu kì-têu khiung-ha lòi, chhiu tui kón-kâ kóng: “Tai liá-têu ngìn chón ngâ vuk-hâ hi; tông-chu ngài oi lâu kì-têu khiung-ha sṳ̍t-fan. Hi-chhṳ̀ yit-chak thèu-sâng, chún-phi yèn-si̍t.” 17Kón-kâ cheu min-lin chiông kì-têu tai-to Yok-sit ke vuk-hâ.

18Kì-têu yîn-vi pûn-ngìn tai-to Yok-sit ke vuk-hâ, chhiu tông chho̍k-kiâng, sîm-tú sióng: “Yit-thin he vi-tó song-pái piong-chón ngài-têu thoi-tú ke-têu chhièn, ngài-têu chang-voi pûn-ngìn tai-to liá-vi lòi. Mò yit-thin kì-têu he sióng-oi kûng-kit ngài-têu, hoi ngài-têu, chhióng-chéu ngài-têu ke lì-è, khiòng-pet ngài-têu cho nù-chhòi.” 19Yîn-vi án-ngiòng, kì-têu yit-to Yok-sit vuk-hâ mùn-héu, chhiu tui kón-kâ kóng: 20“Sîn-sâng â! Chhiáng-thâng ngài-têu kóng; ngài-têu song-pái he vi-tó tha̍k-liòng to liá-vi lòi ke. 21Ngài-têu chón-hi, pan-lu ko-ya ke sṳ̀, tá-khôi thoi-é, fat-hien tak-sà chhṳ-kâ ke chhièn chhiòn-phu hàn chhai thoi-tú; liá-ha ngài-têu chiông ke-têu chhièn tai chón-lòi vàn ngì. 22Ngài-têu nang-ngoi yu tai-chhièn lòi tha̍k-liòng; song-pái m̀-tî má-ngìn chiông chhièn piong-chón ngài-têu ke thoi-tú?”

23Kón-kâ kóng: “Fong-sîm, m̀-sṳ́ kiâng, yit-thin he ngì-têu ke Song-ti, ngì-têu â-pâ ke Song-ti, chiông chhòi-pó piong chhai ngì-têu ke thoi-tú; ngì-têu ke chhièn ngài chó chhiu sû hí-lòi lé!” Chiap-tén kì chiông Sî-mién tai chhut-lòi kâu-vàn kì-têu.

24Kón-kâ tai kì-têu ngi̍p Yok-sit ke vuk-tú, têu-súi pûn kì-têu sé-kiok, yu vi kì-têu ke lì-è. 25Kì-têu chiông lî-vu̍t chún-phi hó-se, oi tén tông-chu Yok-sit chón-lòi ke sṳ̀ sung-pûn kì, yîn-vi kì-têu tet-tó thûng-tî oi lâu Yok-sit khiung-ha sṳ̍t-chu. 26Yok-sit chón vuk-hâ ke sṳ̀, kì-têu chiông lî-vu̍t tai ngi̍p-lòi hien-pûn kì, khúi kì. 27Yok-sit mun kì-têu yû phìn-ôn mò? Yu mun: “Ngì-têu sṳt kóng-ko ngièn-ló ke â-pâ, kì ló-ngìn-kâ phìn-ôn mò? Hàn-khien mò?”

28Kì-têu en-kóng: “Ngì ke phu̍k-ngìn ngài-têu ke â-pâ hàn chhin-khien.” Chiap-tén kì-têu yu khúi kì.

29Yok-sit khon-tó chhṳ-kâ khiung-ôi ke ló-thâi Phien-ngâ-mén, chhiu kóng: “Liá-vi chhiu-he ngì-têu kóng-ko ke mân ló-thâi he-mò?” Yu kóng: “Heu-sâng-é! Ngien Song-ti su-fuk pûn ngì!” 30Yok-sit khon-tó chhṳ-kâ ke chhîn ló-thâi, kit-thung to voi ngiûn m̀-he̍t, chhiu kiak-kiak lì-khôi, sám-ngi̍p chhṳ-kâ ke kiên-tú hi-kieu. 31Kì sé-ko mien chang chhut-lòi, khiòng-khiòng ngiûn-tén, min-lin khôi-chok sṳ̍t-fan. 32Kì-têu vi Yok-sit pài yit-chok, kì ke hiûng-thi nang-ngoi yit-chok, khiung-ha sṳ̍t ke Âi-khi̍p-ngìn yu nang-ngoi yit-chok, yîn-vi Âi-khi̍p-ngìn ngin-vì lâu Hî-pak-lòi-ngìn khiung-chok sṳ̍t-fan chhin-mò thí-mien. 33Yok-sit sṳ́ kì ke hiûng-thi chhai kiâ mien-chhièn chhô-si̍t, lûng cheu thai-se ke sun-si chhô-tén. Án-ngiòng ke ôn-phài sṳ́ hiûng-thi kám-kok tông khì-koai, pí-chhṳ́ kín-khon. 34Yok-sit chiông kì ke-chok ke chhoi pûn-pûn kì ke-têu hiûng-thi; Phien-ngâ-mén pûn-tó ke he phe̍t-ngìn ke ńg-phi. Kì-têu lâu Yok-sit khiung-ha lîm-sṳ̍t, fî-sòng khoai-lo̍k.

Currently Selected:

Chhóng-sṳ Ki 43: THV12Rdb

Highlight

Copy