Chhóng-sṳ Ki 42

Yok-sit ke Hiûng-thi to Âi-khi̍p Tha̍k-liòng

1Ngâ-kok yit thâng-tó Âi-khi̍p yû liòng-sṳ̍t, chhiu tui kì ke lai-é kóng: “Ngì-têu cho-má-ke m̀ sióng-têu phan-fap nè? 2Thâng-kóng Âi-khi̍p yû-liòng, ngì-têu hi tha̍k-têu chón-lòi, miên-tet ngài-têu ngo-sí!” 3Án-ngiòng, Yok-sit sṳ̍p-ke â-kô chhiòn-phu hi Âi-khi̍p tha̍k-liòng lé. 4Chúng-he Ngâ-kok m̀-hén Yok-sit ke ló-thâi Phien-ngâ-mén lâu kì-têu khiung-ha hi, yîn-vi Ngâ-kok kiâng kì tù-tó châi-hoi.

5Yî-set-lie̍t ke-têu lai-é lâu khì-thâ ke ngìn lûng-chúng hi tha̍k-liòng, yîn-vi Kâ-nàm chhiòn-thi ya yû kî-fông. 6Yok-sit cho Âi-khi̍p chái-siong, fu-chit thiau-liòng pûn kok-thi lòi ke ngìn; só-yî Yok-sit ke-têu â-kô lòi-to kì mien-chhièn, phu̍k chhai thi-song khúi kì. 7Yok-sit yit khon-tó kì ke-têu â-kô chhiu ngin chhut-lòi, chúng-he cha-yi m̀ ngin-sṳt, yung ngiàm-li ke fa mun kì-têu: “Ngì-têu he tui nai-vi lòi ke?”

Kì-têu en-kóng: “Ngài-têu he tui Kâ-nàm lòi tha̍k-liòng ke.”

8Yok-sit ngin-chhut ke-têu â-kô, chúng-he kì ke â-kô ngin m̀-chhut kì. 9Kì sióng hí thèu-pái chhṳ-kâ pot-ko ke mung, chhiu ku-yi tui kì-têu kóng: “Ngì-têu he tham-é, sióng-lòi tá-tham ngài-têu koet-kâ ke pi-me̍t!”

10Kì-têu en-kóng: “Thai-ngìn â! Phu̍k-ngìn m̀-he tham-é, he lòi tha̍k-liòng ke. 11Ngài-têu chhiòn-phu he chhîn hiûng-thi, he ló-sṳ̍t ngìn; ngiâ phu̍k-ngìn m̀-he tham-é.”

12Yok-sit ngang-kóng: “Phien ngài! Ngì-têu yit-thin he lòi tá-tham ngài-têu koet-kâ ke pi-me̍t.”

13Kì-têu kóng: “Thai-ngìn â! Phu̍k-ngìn pún-lòi yû sṳ̍p-ngi hiûng-thi, he khiung â-pâ kiung ke; kì he̍t chhai Kâ-nàm. Ngài-têu chui-se ke ló-thâi lâu â-pâ cho-phân, hàn-yû yit-ke ló-thâi mò thet-hi.”

14Yok-sit chai yit-pái khiòng-thiau kóng: “Ngài thèu-siên kóng-ko, ngì-têu yit-thin he tham-é. 15Ngài oi chhṳ ngì-têu yû sṳ̀n-sṳ̍t mò. Ngài chṳ́ vòng ke miàng fat-sṳ: Ngì-têu na-mò chiông chui-se ke ló-thâi tai-to liá-vi lòi, ngài chhie̍t-tui m̀-chún ngì-têu lì-khôi. 16Ngì-têu phai yit-ke ngìn hi-tai ngiâ ló-thâi lòi; khì-thâ ke ngìn koân chhai liá-vi, tén-to ngì-têu só-kóng ke fa tet-tó chṳn-mìn he m̀-he yû-yáng! Na-he mò-yáng, ngài chṳ́ vòng ke sin-miang fat-sṳ, ngì-têu yit-thin he tham-é.” 17Án-ngiòng Yok-sit chiông kì-têu khiung-ha koân-ngi̍p yit-kiên kâm-ngiu̍k sâm-ngit.

18Thi-sâm ngit, Yok-sit tui kì-têu kóng: “Ngài he kin-vi Song-ti ke; na-he ngì-têu chiap-su ngài ke thiàu-khien, ngài chhiu ngièu ngì-têu ke miang. 19Vi-tó oi chṳn-mìn ngì-têu he sṳ̀n-sṳ̍t ke ngìn, ngì-têu oi liù yit-sà chhai kâm-ngiu̍k cho ngìn-chṳt; khì-thâ ke ngìn cho-tet chón-hi, chiông liòng-sṳ̍t tai chón-hi kiu kî-fông chûng ke vuk-hâ ngìn. 20Yèn-heu chiông chui-se ke ló-thâi tai-lòi ngài liá-vi. Án-ngiòng chhiu chṳn-mìn ngì-têu ke fa he chṳ̂n-sṳ̍t ke, ngì-têu chhiu m̀-sṳ́ sí.”

Kì-têu chiap-su liá-ke thiàu-khien, 21fu-siông kóng: “Tông-chhû ên ham-hoi ló-thâi, liá-ha su po-yin lé. Tông-sṳ̀ ên khon-tén kì su thung-khú, kì khiù ên piong kì yit-thiàu miang, ên m̀-tap kì; só-yî ên tù-tó liá-ke châi-nan.”

22Lî-phien kóng: “Ngài kám m̀-sṳt khien ngì-têu m̀-hó sông-hoi kì, chúng-he ngì-têu m̀-thâng; liá-ha liá hiet-chai kôi-tông ên lòi-vàn.” 23Yok-sit thâng tet-sṳt kì-têu ke fa, kì-têu sa m̀-tî, yîn-vi kì lâu kì-têu kóng-fa yû-ngìn fân-yi̍t. 24Yok-sit chón-sṳ̂n chhut-hi kieu, yèn-heu to-chón-lòi tui kì-têu kóng fa, chhiu sién-chhut Sî-mién, chhai kì-têu mien-chhièn chiông kì khún hí-lòi.

Yok-sit ke Â-kô Chón Kâ-nàm

25Yok-sit fûn-fu ngìn chiông ke-têu â-kô tai-lòi ke thoi-é chông-mân liòng-sṳ̍t, chiông chhièn-ngiùn piong-chón tak-sà ke thoi-é, yu thoi kì-têu chún-phi lu-hong ke sṳ̍t-vu̍t; yit-chhiet chhiu cheu án-ngiòng chún-phi hó-se. 26Kì-têu chhiu chiông tha̍k-lòi ke liòng-sṳ̍t piong chhai lì-è poi-nòng, lì-khôi ke-vi. 27Chhai ko-ya ke thi-fông, kì-têu yû-ngìn tá-khôi thoi-é oi vi lì-è, fat-hien chhṳ-kâ ke chhièn hàn chhai thoi-é tú. 28Kì tui ke-têu hiûng-thi kóng: “Ngài ke chhièn-ngiùn vàn-pûn ngài lé! Ngì-têu khon, chhiu chhai ngài ke thoi-é tú!” Kì-têu chhiòn-phu kiâng-tó voi-sí, yu pi̍t-pi̍t-chhat kóng: “Song-ti cho-má-ke án-ngiòng tui-thai ên nè?”

29Kì-têu chón-to Kâ-nàm-thi, to kì-têu ke â-pâ Ngâ-kok ke-vi, chiông kîn-ko ke sṳ siòng-se lâu kì kóng. 30Kì-têu kóng: “Âi-khi̍p chái-siong chhin-ngiàm tui ngài-têu kóng fa, chṳ́-chit ngài-têu he hi tá-tham kì-têu ke koet-kâ. 31Ngài-têu tui kì kóng: ‘Ngài-têu he ló-sṳ̍t ngìn, m̀-he tham-é; 32ngài-têu ngièn-lòi yû sṳ̍p-ngi hiûng-thi, chhiòn-phu he khiung â-pâ kiung ke. Yû yit-ke ló-thâi mò thet-hi, chui-se ke ló-thâi liù chhai Kâ-nàm lâu â-pâ cho-phân.’ 33Ke chái-siong chhiu kóng: ‘Ngài oi chhṳ ngì-têu yû sṳ̀n-sṳ̍t mò? Ngì-têu oi liù yit-sà chhai liá-vi, khì-thâ ke cho-tet chón-hi, chiông só-tha̍k ke liòng-sṳ̍t tai chón-hi kiu kî-fông chûng ke vuk-hâ ngìn. 34Yèn-heu oi chiông chui-se ke ló-thâi tai-lòi ngài liá-vi. Án-ngiòng ngài chhiu siông-sin ngì-têu he sṳ̀n-sṳ̍t ke ngìn, m̀-he tham-é. Ngài voi chiông ngì-têu ke hiûng-thi vàn ngì-têu; ngì-têu ya cho-tet he̍t chhai liá-vi cho sên-lî.’ ”

35Heu-lòi, kì-têu chiông liòng-sṳ̍t tó chhut-lòi ke sṳ̀, sà-sà tû fat-hien chhṳ-kâ ke chhièn-pâu hàn chhai thoi-é tú. Kì-têu lâu â-pâ yit khon-tó chhièn-pâu, chhiòn-phu mò-kat mò-sat. 36Ngâ-kok tui kì-têu kóng: “Ngì-têu oi ngài sóng-thet só-yû ke lai-é, he-mò? Yok-sit mò-thet, Sî-mién ya mò lé! Liá-ha ngì-têu yu-oi chiông Phien-ngâ-mén tai-chéu! Ái, châi-nan chhiòn-phu lìm-to ngài sṳ̂n-song lé!”

37Lî-phien hiong kiâ-pâ pó-chṳn kóng: “Na-he ngài mò chiông Phien-ngâ-mén tai chón-lòi, ngì khó-yî chhṳ̀-thet ngài lióng-ke lai-é. Chiông se ló-thâi kâu-pûn ngài cheu-ku, ngài yit-thin voi tai kì chón-lòi.”

38Chúng-he Ngâ-kok kóng: “Ngài liá ke lai-é cho-m̀-tet thèn ngì-têu hi! Kì ke chhîn â-kô sí-thet, liá-ha chṳ́-chhûn kì yit-sà! Kì chhai lu-hong khó-nèn voi tù-tó yi-ngoi ke sṳ. Ngì-têu oi hoi ngài liá-ke mân-thèu pha̍k-mô ke ló-ngìn-kâ, pî-pî chhám-chhám lo̍k yîm-kiên he-mò?”

Currently Selected:

Chhóng-sṳ Ki 42: THV12Rdb

Highlight

Copy