Chhóng-sṳ Ki 29

Ngâ-kok to Lâ-pân ke Vuk-hâ

1Ngâ-kok ki-siu̍k hiong-chhièn hàng, lòi-to tûng-fông ngìn ke só-chhai. 2Kì chhai thièn-tú khon-tó yit-héu chiáng, yû sâm-khiùn yòng-è soi chhai chiáng-sùn. Mu̍k-ngìn pûn yòng-khiùn sṳ̍t ke súi he liá-héu chiáng ke; chiáng-héu khièm-tén yit-te thai sa̍k-thèu. 3Yòng-khiùn to-chhè ke sṳ̀, mu̍k-ngìn chang chan-khôi chiáng-héu ke thai sa̍k-thèu, pûn yòng-khiùn sṳ̍t-súi, yèn-heu chai chiông sa̍k-thèu khièm chón-hi.

4Ngâ-kok mun ke-têu ngìn kóng: “Phèn-yû â! Chhiáng-mun ngì-têu tui nai-vi lòi?”

Kì-têu en-kóng: “Ngài-têu tui Ha̍p-làn lòi.”

5Kì yu mun kì-têu kóng: “Ngì-têu ngin-sṳt Nâ-ho̍k ke sûn-é Lâ-pân mò?”

Kì-têu en-kóng: “Sṳt.”

6Ngâ-kok yu-mun: “Kì phìn-ôn mò?”

Kì-têu kóng: “Chhin phìn-ôn! Ngì khon, kiâ moi-é Lùi-kiet tai-tén yòng-khiùn lòi lô!”

7Ngâ-kok kóng: “Ngit-thèu hàn án-kô, màng-to yòng-è oi koân hí-lòi ke sṳ̀, yin-kôi pûn yòng-è sṳ̍t-súi, chai to-chón hi sṳ̍t-chhó!”

8Kì-têu kóng: “Na-mò tén-to yòng-è to-chhè, ngài-têu cho m̀-tet chiông chiáng-sùn ke sa̍k-thèu chan-khôi pûn yòng-è sṳ̍t súi.”

9Ngâ-kok hàn lâu mu̍k-ngìn kóng-fa ke sṳ̀, Lùi-kiet tai-tén kiâ-pâ ke yòng-è lòi-to, yîn-vi kì he chóng-yòng ke. 10Ngâ-kok yit khon-tó Lùi-kiet lâu mû-khiû Lâ-pân ke yòng-khiùn, chhiu hi chan-khôi chiáng-héu ke-te sa̍k-thèu pûn yòng-è sṳ̍t-súi. 11Yèn-heu kì chîm Lùi-kiet, fôn-hí to khôi-sâng kieu. 12Ngâ-kok lâu Lùi-kiet kóng: “Ngài he ngiâ-pâ ke ngoi-sên, he Li-pak-kâ ke lai-é.”

Lùi-kiet chhiu chéu-chón hi lâu kiâ-pâ kóng. 13Lâ-pân yit thâng-tó ngoi-sên Ngâ-kok lòi, chhiu chéu chhut-hi chiap kì, nám kì, chîm kì, tai kì chón vuk-hâ hi. Ngâ-kok chiông yit-chhiet ke kîn-ko lâu Lâ-pân kóng. 14Lâ-pân kóng: “Ngì khok-sṳ̍t he ngài kut-ngiuk chṳ̂-chhîn.” Ngâ-kok chhiu chhai ke-vi he̍t yit-ke ngie̍t.

Ngâ-kok Vi-tó Lùi-kiet Fu̍k-sṳ Lâ-pân

15Yû yit-ngit, Lâ-pân tui Ngâ-kok kóng: “Sûi-yèn ngì he ngài ke chṳ-chhîn, ya m̀ yin-kôi thoi ngài cho pha̍k-kûng; lâu ngài kóng, ngì oi kí-tô kûng-chhièn?” 16Lâ-pân yû lióng-ke moi-é, thai ke ôn-to Li-â, se ke ôn-to Lùi-kiet. 17Li-â ke muk-chû mò-sṳ̀n mò-sṳ̀n, Lùi-kiet sâng-lòi chhiu chhin-chiâng. 18Ngâ-kok chhin chung-yi Lùi-kiet, chhiu yêu-khiù kóng: “Na-he ngì chún ngài lâu ngiâ se ke moi-é Lùi-kiet kiet-fûn, ngài ngien-yi vi ngì cho chhit-ngièn kûng.”

19Lâ-pân en-kóng: “Hó, chiông kì ka-pûn ngì, tông-yèn pí ka-pûn phe̍t-ngìn kha-yàng. Ngì cho-tet he̍t chhai ngài liá-vi!” 20Vi-tó oi-thó Lùi-kiet, Ngâ-kok chhiu cho chhit-ngièn kûng; yîn-vi kì chhin-oi Lùi-kiet, chhiu khon liá chhit-ngièn chhiong kí-ngit thin-thin.

21Ngâ-kok tui Lâ-pân kóng: “Khì-han to-liáu, pûn ngài lâu ngiâ moi-é kiet-fûn!” 22Lâ-pân chhiu chún-phi yèn-si̍t, yêu-chhiáng tông-thi ke ngìn lòi chhâm-kâ. 23To ke am-pû, Lâ-pân chiông thai ke moi-é Li-â thu ko-hi pûn Ngâ-kok, Ngâ-kok chhiu lâu kì thùng-fòng. 24(Lâ-pân ya chiông chhṳ-kâ ke sṳ́-ńg Sit-pha pûn Li-â cho sṳ́-ńg.) 25Thi-ngi chêu-sṳ̀n, Ngâ-kok chang fat-hien sîn-ngiòng he Li-â, chhiu chhìm Lâ-pân kóng: “Ngì cho-má-ke án-ngiòng tui-thai ngài nè? Ngì mìn-tî ngài he vi-tó Lùi-kiet fu̍k-sṳ ngì; ngì ngióng cho-tet phien ngài?”

26Lâ-pân en-kóng: “Cheu ngài-têu liá-vi ke fûng-siu̍k, thai ke moi-é màng-ka, cho-m̀-tet siên ka se ke moi-é. 27Na-he ngì hén chai vi ngài cho chhit-ngièn kûng, tén chhit-ngit ke sîn-fûn khin-chuk ko-heu, ngài voi chiông Lùi-kiet ya pûn ngì.”

28Ngâ-kok thùng-yi. Chhit-ngit ke khin-chuk ko-heu, Lâ-pân chhiu chiông se ke moi-é Lùi-kiet pûn Ngâ-kok cho pû-ngiòng. 29(Lâ-pân ya chiông chhṳ-kâ ke sṳ́-ńg Phit-lâ pûn Lùi-kiet cho sṳ́-ńg.) 30Ngâ-kok ya lâu Lùi-kiet thùng-fòng; kì siak Lùi-kiet yàng-ko Li-â. Án-ngiòng kì yu vi Lâ-pân cho chhit-ngièn kûng.

Ngâ-kok ke Chṳ́-ńg

31Song-chú khon-tó Li-â su lâng-lo̍k, chhiu pûn kì voi kiung, chúng-he Lùi-kiet m̀-voi kiung. 32Li-â yû sṳ̂n-hong, kiung yit-ke lai-é. Kì kóng: “Song-chú khon-tó ngài ke khú-chhìn, liá-ha ló-kûng yit-thin voi siak ngài.” Kì chhiu lâu kì ôn-miàng Lî-phien#29:32 “Lî-phien” yû “khon â, yit-ke lai-é” ya-he “khon-tó ngài ke khú-chhìn” ke yi-sṳ.. 33Kì yu yû sṳ̂n-hong, kiung thi-ngi ke lai-é. Kì kóng: “Song-chú thâng-tó ngài su lâng-lo̍k, yu pûn ngài kiung-kâ liá-ke lai-é.” Kì chhiu lâu kì ôn-miàng Sî-mién#29:33 “Sî-mién” yû “thâng-tó” ke yi-sṳ.. 34Kì yu yû sṳ̂n-hong, kiung thi-sâm ke lai-é. Kì kóng: “Liá-ha ló-kûng yit-thin voi lâu ngài kiet-ha̍p, yîn-vi ngài lâu kì kiung sâm-ke lai-é.” Só-yî kì ke miàng ôn-to Li-vi#29:34 “Li-vi” yû “kiet-ha̍p” ke yi-sṳ.. 35Kì yu yû sṳ̂n-hong, kiung thi-si ke lai-é. Kì kóng: “Liá-pái ngài oi siung-chan Song-chú.” Só-yî kì lâu kì ôn-miàng Yù-thai#29:35 “Yù-thai” yû “siung-chan” ke yi-sṳ.. Yî-heu kì chhiu mò-chai kiung.

Currently Selected:

Chhóng-sṳ Ki 29: THV12Rdb

Highlight

Copy