Chhóng-sṳ Ki 27

Yî-sat vi Ngâ-kok Chuk-fuk

1Yî-sat ngièn-ló ke sṳ̀, muk-chû fâ-fâ khon m̀-tó lé; kì ham thai lai-é Yî-so lòi, kóng: “Ngài ke lai-é â!”

Yî-so en-kóng: “Ngài chhai liá!”

2Yî-sat kóng: “Ngì khon, ngài yí-kîn án-ló, m̀-tî hàn sṳ̍t kí-kiú? 3Ngì tai kiûng-chien hi ngoi-poi vi ngài tá-lia̍p, 4cheu ngài hau sṳ̍t ke khiéu-mi chú-hó, nâ-lòi pûn ngài sṳ̍t, yèn-heu ngài oi chhai màng-sí yî-chhièn chuk-fuk ngì.”

5Yî-sat lâu kiâ lai-é Yî-so kóng fa ke sṳ̀, Li-pak-kâ ya thâng-tó. Yî-so chhut-hi tá-lia̍p ke sṳ̀, 6Li-pak-kâ chhiu tui kiâ lai-é Ngâ-kok kóng: “Ngài thâng-tó ngiâ-pâ tui ngiâ-kô Yî-so kóng: 7‘Ngì hi chiông yâ-chhu tai-lòi, chú-hó pûn ngài sṳ̍t, yèn-heu ngài oi chhai màng-sí yî-chhièn, chhai Song-chú mien-chhièn chuk-fuk ngì.’ 8Ngài ke lai-é â! Ngì oi chu-yi thâng, cheu ngài ke fa hi cho. 9Ngì to yòng-khiùn chûng chhìm lióng-chak yu-phì yu-nun ke se sân-yòng lòi, ngài voi cheu ngiâ-pâ hau sṳ̍t ke khiéu-mi chú-hó. 10Ngì nâ-hi pûn ngiâ-pâ sṳ̍t, hó pûn kì màng sí yî-chhièn siên chuk-fuk ngì.”

11Ngâ-kok tui kiâ-mê Li-pak-kâ kóng: “Chúng-he ngì tî ngâ-kô Yî-so chhiòn-sṳ̂n sâng-mô, ngài vòn-sṳ̂n kông-va̍t. 12Van-yit ngâ-pâ miâ ngài, fat-hien ngài phien kì; ngài m̀ tân-chhiang tet m̀-tó chuk-fuk, fán-chón voi vi chhṳ-kâ tai-lòi chu-chú.”

13Kiâ-mê en-kóng: “Ngâ lai-é â! Ngài lòi sṳ̀n-tâm chu-chú! Ngì cheu ngài ke fa hi-cho, khiên sân-yòng lòi!”

14Ngâ-kok chhiu hi chiông sân-yòng khiên-lòi, kâu-pûn kiâ-mê; kiâ-mê chhiu cheu kiâ-pâ hau sṳ̍t ke khiéu-mi chú-hó. 15Li-pak-kâ yu chiông chóng-chṳ́ Yî-so liù chhai vuk-hâ chui-hó ke sâm-fu nâ chhut-lòi pûn se ke lai-é Ngâ-kok chok, 16yu yung sân-yòng phì pâu kì ke sûng-sú lâu kiáng-kîn kông-va̍t ke phu-fun, 17chang chiông chú-hó ke ngiuk lâu piáng kâu-pûn kiâ lai-é Ngâ-kok.

18Ngâ-kok to kiâ-pâ ke-vi, hêm-kóng: “Â-pâ!”

Yî-sat mun-kóng: “Lai-é! Ngì he nai-ke?”

19Ngâ-kok tui kiâ-pâ kóng: “He ngì ke chóng-chṳ́ Yî-so. Ngì fûn-fu ngài cho ke, ngài cho-hó lé! Chhiáng chhô hí-lòi, sṳ̍t ngài vi ngì tá-lòi ke yâ-mi, hó chuk-fuk ngài.”

20Yî-sat kóng: “Lai-é! Ngì ngióng-pân án-kiak chhiu tá-tó!”

Ngâ-kok en-kóng: “Song-chú — ngì ke Song-ti pûn ngài tông hó-yun!”

21Yî-sat tui Ngâ-kok kóng: “Lai-é! Ko-lòi têu-é, pûn ngài miâ khon â, ngì yû-yáng he ngâ lai-é Yî-so mò?” 22Ngâ-kok hàng ko-hi, Yî-sat miâ-miâ, chhiu kóng: “Sâng he Ngâ-kok ke sâng, sú he Yî-so ke sú.” 23Kì ngin m̀-chhut liá he Ngâ-kok, yîn-vi miâ hí-lòi chhiong Yî-so ke sú khiung-yong yû mô. Kì oi chuk-fuk Ngâ-kok ke sṳ̀, 24yu mun: “Ngì ton-chṳ̂n he ngâ lai-é Yî-so mâ?”

Ngâ-kok en kì kóng: “He!”

25Yî-sat kóng: “Lai-é, ngiuk nâ ko-lòi! Ngài sṳ̍t-thet chhiu chuk-fuk ngì.” Ngâ-kok chiông ngiuk nâ ko-hi pûn kì sṳ̍t, yu têu-chiú pûn kì lîm. 26Yî-sat tui kì kóng: “Lai-é, ngì hàng ko-lòi chîm ngài!” 27Ngâ-kok hàng ko-hi chîm kì; kì yit phi-tó Ngâ-kok sṳ̂n-song sâm-fu ke mi, chhiu chuk-fuk kì, kóng:

“Ngâ lai-é sṳ̂n-song ke hiông-hi

chhiu-chhiong Song-chú su-fuk ke thú-thi só fat-chhut ke hiông-hi.

28Ngien Song-ti tui thiên-táng su kâm-lu pûn ngì,

pûn ngì ke thú-thi chhin-phì,

pûn ngì ńg-kuk fûng-tên, sîn-chiú mân-chhò.

29Ngien van-koet fu̍k-sṳ ngì,

van-mìn khúi-pai ngì.

Ngien ngì thúng-chhṳ só-yû ke hiûng-thi;

ngien ngiâ-mê ke lai-é khúi-pai ngì.

Chu-chú ngì ke, voi su chu-chú;

chuk-fuk ngì ke, voi tet-tó chuk-fuk.”

Yî-so Khiù Yî-sat Chuk-fuk

30Yî-sat chuk-fuk Ngâ-kok yî-heu, Ngâ-kok tui kiâ-pâ ke-vi chhut-lòi, tú-hó kiâ-kô Yî-so ya tá-lia̍p chón-lòi. 31Yî-so ya chiông ngiuk chú-hó, nâ to Yî-sat mien-chhièn, kóng: “Â-pâ, chhiáng chhô hí-lòi, sṳ̍t ngiâ lai-é vi ngì tá-lòi ke yâ-mi, hó chuk-fuk ngài.”

32Kiâ-pâ Yî-sat mun kì kóng: “Ngì he má-ngìn?”

Kì en-kóng: “Ngài he ngì ke chóng-chṳ́ Yî-so!”

33Yî-sat chhiòn-sṳ̂n pi̍t-pi̍t-chhat mun kì: “Thèu-siên nâ yâ-mi pûn ngài sṳ̍t ke he má-ngìn? Ngì ngi̍p-lòi yî-chhièn ngài yí-kîn sṳ̍t lé. Ngài yí-kîn chuk-fuk kì, liá-ke chuk-fuk voi yún-yén su̍k kì.”

34Yî-so thâng-tó kiâ-pâ ke fa, fî-sòng kân-khú, thai-sâng kieu, kóng: “Â-pâ! Khiù ngì ya oi chuk-fuk ngài!”

35Yî-sat kóng: “Ngiâ ló-thâi siên ngi̍p-lòi phien ngài, yí-kîn chiông oi pûn ngì ke chuk-fuk chhióng-chéu.”

36Yî-so kóng: “Liá he kì thi-ngi pái khî-phien ngài, nàn-koai kì ke miàng ôn-to Ngâ-kok#27:36 “Ngâ-kok” yû “khî-phien” ke yi-sṳ.. Kì chhióng-chéu ngài chóng-chṳ́ ke miàng-fun, liá-ha yu chhióng-chéu ngài ke chuk-fuk. Ngì kám mò liù yit-hong chuk-fuk pûn ngài?”

37Yî-sat en-kóng: “Ngài yí-kîn pûn kì cho ngì ke chú-ngìn, pûn só-yû ke hiûng-thi fu̍k-sṳ kì. Ngài ya chuk-fuk kì, pûn kì ńg-kuk fûng-tên, sîn-chiú mân-chhò. Ngài ke lai-é â! Ngài hàn-yû má-ke hó pûn ngì nè?”

38Yî-so hàn-he kín ôi-khiù kiâ-pâ: “Â-pâ, ngì mò-liù pan-hong chuk-fuk, he-mò? Â-pâ, khiù ngì ya chuk-fuk ngài â!” Yî-so chhiu thai-sâng kieu.

39Kiâ-pâ Yî-sat en kì kóng:

“Thiên-táng ke kâm-lu m̀ kong-pûn ngì;

chhin-phì ke thú-thi ngì ya mò-fun.

40Ngì oi kho tô-kiam sên-fa̍t,

oi fu̍k-sṳ ngì ke ló-thâi;

to ngì khiòng-sṳn ke sṳ̀,

ngì voi tui ngiâ kiáng-hong

thot-thet kì kâ ke ak.”

41Yî-so tông hen Ngâ-kok, yîn-vi phien-chéu kiâ-pâ oi pûn kì ke chuk-fuk. Yî-so sîm-tú sióng: “Ngâ-pâ voi sí lé, sông-sṳ phan liáu-heu, ngài oi chiông ngâ ló-thâi Ngâ-kok chhṳ̀-thet.”

42Yû-ngìn chiông chóng-chṳ́ Yî-so ke kie-va̍k lâu Li-pak-kâ kóng, Li-pak-kâ chhiu ham se ke lai-é Ngâ-kok to kì mien-chhièn lòi, kóng: “Ngì thâng ngài kóng! Ngiâ-kô Yî-so oi chhìm ngì sû-yàng, oi chhṳ̀-sí ngì. 43Ngài ke lai-é â! Ngì oi thâng ngài ke fa, ngiàm-sṳ̀ hi Ha̍p-làn, hi ngâ-kô Lâ-pân ke-vi, 44lâu kì khiung-ha he̍t yit-chham sṳ̀-kiên, tén ngiâ-kô Yî-so ke hi sêu-thet. 45Tén-to kì m̀ ki-tet ngì tui kì só-cho ke sṳ ke-sṳ̀, ngài chang phai-ngìn chiap ngì chón-lòi. Ngài ngióng-sṳ́ yit-ngit nui sṳt-thet lióng-ke lai-é nè?”

46Li-pak-kâ tui Yî-sat kóng: “Ngài chhin-nâu Yî-so ke lióng-ke Het-ngìn pû-ngiòng; na-he Ngâ-kok ya-thó Het-ngìn cho pû-ngiòng, ngài hàn-he sí kha-hó!”

Currently Selected:

Chhóng-sṳ Ki 27: THV12Rdb

Highlight

Copy