Nya-mangaji Mirningiya Jujiba 50

Jikaba kumba-mirra, kalu-kurrama baji Kinin

1[Kulu baku barra, malbu Jikaba, kumba-mirra bawuji, ngalalu likili-ardu kalu-arri baji yilaa kumba-mirra bawuji kurdan.]

Kulu Jujiba, kumba-walima wajkaliya na-manka nyiki-biyila yilaa lhangka. Ka-rarri kurdandu yiku, kilu-lhuji. Nganinya ka-rarri baji, bawuji. 2Kulu ka-alarri barra, kumba-lumbuma na-wurdu, kulu kalili-jirrinyma li-jawina likungu li-maralnguji, alu yabimanthawu na-manka ngabangaku, yiwa anmanthawu yabi barni-wurrungkayawu ngalalu kalakantharra akarriya bajinju ki-Kinin. Kulu li-mangaji li-maralnguji, kalu-yabima ngabangaku, kalu-yibarra na-mirdijin na-mangaji yabimanthawu ki-ngabangakuwu nyiki-biyiyu ki-Jujiba, yiwa kurdardi wardirrinjawu.

3Kalu-arri baji jabunka nganinya li-maralnguji arrkula ngakarla kulu buyi ngakarla, na-40-bala na-wunbarr, barranamba kala-ninya jabungka li-mangaji nganinya yurrngumantha ki-ngabangakuwu baji. Kulu li-mbangu li-jibiya Yijiba, kalu-rarri yiku ki-ngabangakuwu kanymarda ngakarla kulu buyi ngakarla, na-70-bala na-wunbarr. Bawuji.

4Bajingu yiwa Jujiba, kili-ja wuka yiku ki-king nganinya, ka-arri alunga liyi-jawinawu yiku ki-king, “Marrirru, kirna-barlirra. Kirru-wingkala yilalu ki-king, kirru-yalbangala ngatha barra nganinya. 5Kirri-nala ngatha, nyangathi-biyi, ngaliwa lhungku, kumba-lhaa wunumbarra nyamba-mirranthawu kulu karnili-jirrinyma, ngarna waninjangumanthawu na-manka akarriya bajinju Kinin, ngarna yibarranthawu na-manka baji nungku-ajinjala wumba kilu-yabima wabarrangu. Kulu karni-nu, ngarna anmanthawu kalngiya ngayangaya yiku nganinya. Kirru-yalbangala king, yiwa wirranganthawu ngatha, ngarna lhuwarrinjawu nganinya, ngarna kurramanthawu ki-ngabangakuwu wurrbi baji bawuji. Kulu bajingu karna-wanila yarlajka karakarra. Nganinya kirru-yalbangala king ngatha barra, kirrirna-barlirra.”

6Kalu-yalbanga king kulu kumba-ngarninyma, “Jarni-janji ngarna-mulu yiku ki-Jujiba nganinya, ‘Ngabinya! Lhuwarriya ankaya bajinju ki-Kinin kurramanthalu ngabangaku barranamba kirnili-nu! Anmaya ngayangaya yiku nganambaji!’” Kulu kali-nu Jujiba barra.

7Kulu ka-lhuwarri ankaya kurramanthalu nyiki-biyi na-manka baji akarru Kinin. Kalu-lhuwalhuwarri alu li-jawina yiku ki-king, li-malbumalbu li-mbangu wumba kala-ninya yilaa ki-king, marda nalarrku li-malbumalbu li-jibiya Yijiba, alu wiji barra. 8Kalu-wingkalwingka yilaa ki-Jujiba mili alu likili-nganji ki-malbuwu, likili-baba ki-Jujiba marda li-mbangu nalarrku li-wulu likili-nganji wiji. Minja kalu-arri wambu li-nhanawa kulu li-ardubirri, kulu buluki, jibi, yukularri kala-nda baji wambu Kujin ngala kalu-lhuwalhuwarri li-wulu wiji kurramanthalu. 9Baki nalarrku kalu-wingkalwingka aluwa naluyirdi ki-wilbarrawu kulu ki-wawiyu, alu wiji nalu-rarrawumba kalu-lhuwalhuwarri...i akarriya bajinju Kinin.

10Kulu wumbiji kalu-yibalyibanda ki-awarala, na-wini awara Kurina-Adad. Bajarnu na-wulangi karinguthunda, narnu-wini Judin, kulu baji barra barrawu Kurina-Adad wulanginda barra akarrakarimba. Bawuji barra kalu-arri baji rarrinjarra...i, na-kanymarda kulu kanymarda kulu kanymarda arrkula na-wunbarr, bawuji. Nganinya kalu-rarri yiku ki-ngabangakuwu.

11Kulu kalu-arri baji akarimba li-mbangu, li-jibiya Kinin. Kalala-nykarri rarrinjarra, kalala-kala li-mangaji nalu-rarrawumba, kulu kalinyamba-wukanyi, “Ayi! Kalngiya jalu-rarrinji wakulamba, jalu-rarrinji kurdandu barra li-mangaji li-jibiya Yijiba, bajalu akarrakarimba.” Kulu li-mangaji, ngulakari kalu-wundarrba mili nya-mangaji awara akarrakarimba Abil-Mijrayima, kalu-wundarrba nya-mangaji awara akarru wulanginda nganinya kangka kalu-rarri baji li-mangaji nalu-rarrawumba, li-jibiya Yijiba li-mangaji.

12Kulu li-mbangu, likili-ardu ki-ngabangakuwu, kalu-arri ngayangaya yiku kalngiya barranamba kalili-nu, 13kulu kala-ka mili aya, kalu-lhuwarri nungku-wulanginda aya bajinju Kinin. Kulu kala-ka nyala bajinju ki-awaralu Makibila, nya-mangaji awara akarrunga ki-awarawu Mamuri, kala-ka bajinju nungku-ajinjalu, na-mangaji na-ajinja wumba ki-Yiburama kilu-rduma badiki baji wabarrangu alunga kurramanthawu. Li-mbangu li-wulu li-Yidaj kala-ninya baji, nyalunga awara barra, kulu ki-Yiburama kilu-bayima badiki nakaringu ki-arrkulangka ki-Yidaj, na-wini mirningiya Yibruna. Kulu bajarnu ki-badikila na-mangaji na-ajinja alunga kurramanthawu, kulu kala-ka ngabangaku bajinju, kalu-yibarra baji arndaarnda wambu bawuji, kulu nganinya likili-ardu kalu-arri ngayangaya yiku.

14Kulu kalu-walwani alu wiji barra karakarra, kalu-lhakalhakanba aya...i yurrngumantha, kalu-walwani bajingu Yijiba, bawuji.

Ki-Jujiba kalilu-yabima likili-baba nalu-wurdu

15Bawuji barra kulu likili-baba ki-Jujiba, kalinyamba-wukanyi yiku ki-Jujiba kulu kalu-wardanka yiku kurdandu. Kalinyamba-wukanyi nganinya, “Kumba-mirra ngambalanga wunyatha, bawuji ngambalalumba kambalila-nda. Nungka bajiwa Jujiba wardirrinjawu na-wurdu ngambalanga, nungka ja-yinjathirrinji na-wurdu ngambalanga. Wabarrangu kambala-wardima awara yiku wakulamba. Nungka nganinyanga, jabarri kilu-wardimanma awara ngambalanga kangka marningambala ngambalalumba.”

16Bajingu kali-ja wuka yiku ki-Jujiba, kalu-wukanyi yiku nganinya, “Wunhaka, ngaliwa lhungku nyinki-biyi, kambalili-jirrinyma nganinya, ‘Nyirri-naya Jujiba, “Nyamba-yabimaya nda-wurdu alunga liyi-ja liyinkiliyi-babawu! Kalngiya kalu-wardima awara yinku wakulamba ngalinda nda-yalkuyi ngala nyamba-yabimaya nda-wurdu alunga nuwu-mangaji nuwarnu-wardiyu!’”, nganinya ka-wukanyi wunyatha. 17Kulu ngambala marda, kirninganu-yalbanganji, kirna-barlirra wunhaka, nyamba-yabimaya nda-wurdu nganunga nuwarnu-wardiyu nuwarnu-nganunga. Marninganu barra li-jawina likungu ki-Yijan ki-Kud barranamba wunyatha jawina nyikungu marda,” nganinya kali-ja wuka yiku ki-Jujiba. Kila-nykarri ki-Jujiba, kulu ka-rarri barra alunga kangka kalu-arri nganinya yiku.

18Kulu kalu-wingka yilalu likili-baba, kulu kala-nba yilalu mududu, kulu kalu-arri, “Wirdi, marninganu li-jawina linkungu, li-ngayangaya yinku.”

19Ngala Jujiba, ka-arri alunga, “Barni-wardankaya rra-nmaya! Kurdardi Kud ngarna, ramanthawu yirrunga wirangu nuwarnu-wardiyu, kurdardi. 20Yirru barra wabarrangu, kalngiya kirrinyamba-nykalanykarri wardimanthawu awara ngatha, ngala yiwa Yijan, bajingulaji barra, kalngiya kumba-nykalanykarri yabimanthawu awara, yabimanthawu alunga liyi-wuluwu, nalu-rarrawumba winkanda. Narnu-wirndajku karnu-arri, kalngiya narnu-wirndajku narnu-wardi, ngala kurdardi kambalamba-mirranma. Marningambala nyala nyamba-wudurrumantharra, nyala lhungku. Karnila-ka marnajinju ki-Yijandu, ngarna marakamanthalu wudurru, ngarna wudurrumanthalu li-wulu wiji. 21Barni-wardankaya rra-nmaya ngatha! Kirrirna-wudurrumanthanama yirru lirrungali-ardu,” nganinya ka-wukanyi alunga, yabimanthawu nalu-wurdu, mirlilmirlilmanthawu nalu-wurdu bawuji.

Jujiba kumba-mirra

22Kulu Jujiba, kiwa-ninya baji barra nambalu 110-bala lhabayi yiku. 23Kulu rrikirri-arduwujara ki-Jujiba, Manaja wula Yibrayim, kawula-arri alinda baji Yijiba, kawulamba-kajakajama. Kulu Jujiba, kalila-kala likili-ardu baki likili-murima ki-Yibrayim, kila-kala mili Makira nyiki-ardu ki-Manaja, kulu likili-murima ki-Manaja marda, kalila-kala li-ja likungu.

24Bawuji barra, jinangu Jujiba, kumba-lhaa wunumbarra nyamba-mirranthawu. Ka-wukanyi alunga liyikiliyi-babawu, ka-arri nganinya, “Marningarna barra, marningarna wunumbarra nyamba-mirranthawu, marnaji Yijiba. Ngala Kud jambalila-nganji karanka, ngambala li-jawina likungu, kulu nungkarnarrku baku kirrila-kala marningu, kirrilu-waninjangumala akarriya bajinju ki-Kinin, nya-mangaji awara wumba kalili-nu yiwa ngundayawu alunga, alu Yiburama, kulu nyiki-ardu Yajika nyangambalanga-murimuri, kulu nyangambalanga-biyi Jikaba, kalili-nu ki-Kud yiwa kalngiya ngundayawu jinangu awara alunga kulu liyalungaliyi-nganjingku nakaringu aluwa. Kulu nganinya barra kirrilu-waninjangumala akarriya bajinju.

25“Kulu yirru, nganhirri-naya kalngiya, namba kirrilu-waninjangumala bajinju ki-Kud, kulu yirru karnilu-waninjangumala ngarna-buyu marningu, karnila-kala ngarna-buyu bajinju, yibarranthalu baji nyungku-ngatha ki-awarala.” Kalilu-maramarama nganinya kulu kalu-ngayama yiku.

26Bawuji barra kulu kumba-mirra Jujiba, kalngiya malbu, 110-bala lhabayi yiku. Kulu kalu-yabima na-manka ngabangaku, yiwa anmanthawu yabi barni-wurrungkayawu, kalu-yabima linji-mangaji linji-mankarnilu wumba kalu-arri mirdan nyuwu-mangajiwuthu. Kalu-yibarra ki-larlangka barra, kalu-yibarra ki-larlangka bajingulaji Yijiba, nganinya kalu-arri, bawuji barra.

Currently Selected:

Nya-mangaji Mirningiya Jujiba 50: jao

Highlight

Copy