Ubwandilo 18

Kyala ịkufị̄nga na Abụlahamụ ukumpa Umwana unndumyana

1Po papo UNTWA alinkunsetukila Abụlahamụ pa bupị̄pị ni mịpịkị gya pị̄syeto lya Mamule, bo ị̄tūgēle pakifịgo kya hēma jāke bo ulumụ ulukali lubalịle. 2Bo ịkwịnula amāso gāke, alinkunyomoka abāndu abanyambala batatu bīmịle nkyenị mmyake. Bo ababwene, alinkubopa ukufụma pakifịgo kya hēma ukwakwaganịla nabo, alinkufụgama pāsi alinkuti: 3Gwe NTWA gwangu linga ndyagịle une ilịpyana kumyako, po ngukusūma ungakisanịaga pali ne mụ̄ndu gwako. 4Gị̄se amīsi manāndi mụsụgụsụle mmalūndi, kangi mụtūsyepo pa mpịkị ugu. 5Po une mbatwalile ifyakulya fịnāndi ukuti mụlyemo mụkabe amaka, nāpō mwendege injila jīnụ, namanga mụnyị̄sḹle ne mụ̄ndu gwinụ. Abēne balinkuti: Bōmbaga bo mụmo ujobị̄le. 6Po papo Abụlahamụ alinkukūja ukwakwịngila mụ hēma mụmo ālịmo Sāla, alinkummbūla alinkuti: Gwege ubufụ ubunụnụ ifịkufị fịtatu mbibimbibi utendekesye ifịsyesye. 7Umwene Abụlahamụ alinkubopa ukubūka kuntịmo (kwịtēmbe) alinkwakwega īngwata indubwa inụnụ alinkumpa ummbōmbị gwake ukuti atendekesye mbibimbibi. 8Po papo lelo alinkwega uluketa nulukama kangi ni ngwata iji jātendekesigwe, alinkubategelekesya: alinkwima pabupị̄pị nabo, bo abēne bịkulya pāsi pampịkị gula gula.

9Abēne balinkunndālūsya Abụlahamụ balinkuti: Alikūgu Sāla unkasịgo? Umwene alinkwamụla alinkuti: Alịmo mụ̄hēma mụla. 10Po papo umwene alinkummbūla alinkuti: Nịsakwịsaga kangi nalolị nndapāpāpa nkyinja, nịsakwagaga Sāla unkasịgo ali nu mwana unndumyana, umwene Sāla alinkupilikisya bo īmịle kūnyụma kumyake, kūnyụma kulwigi lwa hēma. 11Lolị Abụlahamụ na Sāla bākāngēle fị̄jo, kangi Sāla akabalilo ka bupāpị kākīndịle. 12Buno buno Sāla alinkuseka mwene alinkuti: Ne ngangēle buno buno jōpe unndume gwangu akangēle, kali mbagị̄le ukubwāga kangi ubusāle nu nnyāmbala? 13Po papo UNTWA alinkunndālūsya Abụlahamụ alinkuti: Fịkị Sāla ịkuseka, kangi ịkuti: Kali nalolị nịsakupāpaga umwana apa ngāngēle? 14Ngīmba sịlịko sịmo isị sịntolịle Kyala? Mma ngwakwịsa nndapāpāpa nkabalilo aka kajobị̄gwe, nalolị Sāla ịsakupāpaga umwana unndumyana. 15Umwene Sāla alinkukāna alinkuti: Mma ngāsekaga, alinkujoba bo buno buno papo ātị̄laga. Lolị umwene alinkuti: Mma usekịle.

Abụlahamụ ịkukasūmila akāja ka mụ Sotomụ

16Abēne abāndu bala balinkusụmụka ukufụma pala pala, balinkulabila kukāja akakulūmba kā Sotomụ: Abụlahamụ alinkwakubasịndikila kūnjila. 17Po papo UNTWA alinkuti: Ndịkumfịndaga Abụlahamụ isị nịkuja pakusịbōmba. 18Mmēnye ukuti Abụlahamụ jo ịsakujaga kikolo ikikulūmba ikya maka, nukuti fyosa ifịkolo fya bāndu ba nkị̄su fịsakusajilịgwaga mmyake. 19Nunsalịle umwene ukuti abalagilege abānāke naba nnyụ̄mba jāke na aba bịkwịsaga kūnyụma, ukuti bēndege mụnjila ja NTWA, babōmbege inụnụ ni sya bugolofụ, kokuti jōpe UNTWA mo asịmalikisyege isị āfị̄ngịle na Abụlahamụ. 20Po papo UNTWA alinkuti: Panōngwa jakuti ingụ̄to ja mụ Sotomụ na mụ Gomola ngulūmba, kangi īmbị̄bị jābo nywamụ, 21fịkuti nsụlụke ngasịkēte isị babōmbịle linga nalolị sịfwene ni ngụ̄to iji jīnyāgịle: linga bo sịkaja ngwakusyaganịaga.

22Abāndu bala balinkusyụtụka balinkulabila ku Sotomụ, lolị Abụlahamụ alinkusyala pala pala nkyenị mụ NTWA. 23Abụlahamụ alinkusegelela alinkuti: Ngīmba abagolofụ kwa kubapyụtilaga lumo nabanịongafụ? 24Linga balịmo abagolofụ amalōngo mahāno (50) nkāja kala, bule ngīmba kwakukapyụtaga? Kali utisakukalekaga panōngwa ja bagolofụ aba balịmo amalōngo mahāno (50)? 25Sịsịsị syo fịkuti sịtāndamalege kumyako, ukubagogela lumo abagolofụ bafwanege nabanịongafụ ukukubilwa. Mma syo sịngakwịsilaga sịsịsị. Kali unndōngị gwa kị̄su kyosa jo āti asị̄te ukulōngela mbwanalolị? 26Po papo UNTWA alinkwamụla alinkuti: Linga njịle kubāgamo nkāja mu Sotomụ abagolofụ amalōngo mahāno (50) nịkwakukaleka akāja kōsa panōngwa jābo. 27Po papo Abụlahamụ alinkwamụla alinkuti: Gwe NTWA mfụfụlị̄le ukujoba na nụngwe, nelufụ̄mbi kangi ne mfwandilo. 28Bule linga ujịlekwaga ukuti bāgịlwe abāndu bahāno mbagolofụ bala amalōngo mahāno, kali pōpe kwakukapyụtaga akāja kōsa papo bāgīlwe? Umwene alinkuti: Linga njịlekubāgamo amalōngo mana na bạndu bahāno (45) ndịkukapyụtaga, mma. 29Po papo Abụlahamụ alinkujoba kumyake kangi alinkuti: Bule linga ubāgilemo amalōngo mana 40? Umwene alinkummbūla alinkuti, panōngwa jā bāndu amalōngo mana (40) ndịsakukapyụta. 30Kangi Abụlahamụ alinkunsūma alinkuti: Gwe NTWA ungakalalaga nikwandisya kangi ukujoba. Bule linga ujịle kubagạmo abāndu amalōngo matatu (30) ịtolo? Umwene alinkummwamụla alinkuti: Ndịsakukapyụtaga; linga mbāgịlemo abāndu amalōngo matatu (30). 31Umwene alinkuti: Gwe NTWA; mfụfụlị̄le ukujoba nanụngwe. Bule; linga ujịlekubāgamo amalōngo mabili 20? Umwene alinkummwamụla alinkuti: Panōngwa ja bāndu bala amalōngo mabili (20) ndịsakukapyụta. 32Alinkwandisya alinkujoba alinkuti: Gwe NTWA ungakalalaga nātigi njobe kamokēne ịtolo akammalīkisyo. Bule, linga ubāgịlemo kalōngo? Umwene alinkwamụla alinkuti: Panōngwa ja bāndu bala kalōngo, ndịsakukapyụta mma. 33Po papo UNTWA alinkusōkapo alinkubūka bo amalịle ukujoba nagwe; Abụlahamụ alinkugomokela kumyake.

Currently Selected:

Ubwandilo 18: NYB96

Highlight

Copy