Īmbōmbo Sya Batumịgwa 9

Ukupīnduka kwa Saulị

(Batu. 22:6-16; 26:12-18)

1Umwene Saulị bo akāli ịkutūjanịka nubukalale bwa kubatị̄lisya nukubafị̄nga ukuti abagogege abafụ̄ndịgwa ba NTWA. Alinkubūka kumpụ̄tị unkulūmba 2alinkwakunsūma bakalata abā kubūka nabo nnyụ̄mba sya kwịpụ̄tilamo mụ Ndamasịka, ukuti linga ịkubāga bamo aba bịkukōnga īnjila ja NTWA jijiji, abanyāmbala na bakị̄kulu, abapịnyege nukubatwala mụ Jelụsalemụ. 3Lelo bo ali mụnjila ịkusegelela mụ Ndamasịka, nakalīnga ulumụlị ulu lwafụmịle kumwanya lulinkumụlika kōsa kōsa. 4Umwene alinkugwa pāsi, alinkupilika ilịsyu lịkuti: Gwe Saulị, gwe Saulị, kūfwima fịkị? 5Lolị umwene Saulị alinkulālūsya alinkuti: Gwanị, gwe NTWA? Ilịsyu lila lilinkummwamụla lilinkuti: Jo une ne Jesụ ne kūfwima. 6Loli sụmụkaga ubūkege nkāja, mo kwakubūlịgwa isị fịkuti syo ubōmbēge. 7Abēne lolị abāndu aba bēndaga nagwe, balinkwima bo sịsobịle nisya kujoba, namanga ilịsyu lyo bāpilị̄ke lolị bakālimmbwene najumo. 8Po papo Saulị alinkusụmụka ukufụma pāsi, lelo bo ịkuti ngēte, alinkwaga atịkukēta. Po papo balinkunkola ikiboko, balinkunndōngosya ukubūka mụ Ndamasịka. 9Alinkugona amasịku matatu kisịta kukēta, alinkusịta nukulya nukunwa.

10Lelo ālimo umfụ̄ndịgwa jumo mụ Ndamasịka, uju ali jo Ananịja īngamụ. Jō UNTWA alinkujobela nagwe nkisetuka alinkuti: Ananịja! Umwene alinkuti: Une apa gwe NTWA. 11Po papo UNTWA alinkummbūla alinkuti: Sụmụkaga ubūkege mụmpūlo ugu tụkuti Nngolofụ, mo ukanndōndege mụnyụ̄mba ja Jụ̄ta umụ̄ndụ gwa mụ Talịsị, uju bịkuti Saulị īngamụ. 12Kēta, namanga ali pakwịpụ̄ta, kangi ịkummbona umụ̄ndu nkisetuka uju bịkuti Ananịja īngamụ ịkwịngila nukummbīkapo amaboko ukuti akētege kangi. 13Umwene lolị Ananịja alinkwamụla alinkuti: Gwe NTWA, mbilị̄ke ukufụma kubāndu ba bị̄ngị isya mụ̄ndu jujuju, nububị̄bị bōsa ubu ababombị̄le abịkemo bako mụ Jelụsalemụ. 14Mope na mụnomụno āpēgị̄gwe amaka ukufụma kubapụ̄tị abakulūmba, aga kubapị̄ndula bōsa aba bịkujijoba īngamụ jako. 15Lolị UNTWA alinkummbūla Ananịja alinkuti: Būkaga ịtolo, buno umụ̄ndu jujuju kibōmbelo kyangu ikisūngulịgwa, ikya kubatwalilamo īngamụ jangu abāpānja na banyafyale, na bany'Ịsịlaelị. 16Namanga nịsakunnāngisyaga jujune syosa īngubilo isị fịkuti akubilwege panōngwa ja ngamụ jangu.

17Po papo Ananịja alinkubūka, alinkwakwịngila nnyụ̄mba, alinkummbīkapo amaboko alinkuti: Gwamyitu Saulị, UNTWA Jesụ, uju ākusetukị̄le mụnjila bo kwịsa, āndumịle kumyako ukuti ukētege kangi, nukuti gwịsulege Mbepo Mwịkemo. 18Lelo nakalīnga ịtolo utūndu utu tulīti makakala tulinkusatuka ukufụma mmāso gāke, alinkwenda nukukēta. Alinkusụmụka alinkōsịgwa. 19Po papo alinkulya ifị̄ndu nukukaba amaka.

Saulị ịkulūmbilila mụ Ndamasịka

Umwene Saulị alinkutūgasya pamopēne na bafụ̄ndịgwa mụ Ndamasịka amasịku manāndi. 20Nakalīnga alinkwanda ukulūmbilila nnyụ̄mba sya kwịpụ̄tilamo, ukuti Jesụ jo mwana gwa Kyala. 21Bōsa aba bāpilikaga sịsịsị, balinkuswịganịka balinkuti: Ākāja jo uju ābanyāmbanịaga mụ Jelụsalemụ aba bajijobaga īngamụ jijiji? Kangi sịkaja syo isị ālị̄sịle na mụno, ukuti abapịnyege nukubatwala kubapụ̄tị abakulụ̄mba? 22Umwene Saulị alinkōngelapo ukukaka, alinkubālīnganịa Abajụ̄ta aba bāli mụ Ndamasịka, alinkunsịsịmikisya ukuti Jesụ jo ju Kilisịtị.

23Lelo bo gakīndịle amasịku mịngị, po papo Abajụ̄ta balinkubūngāna balinkwịtikana ukuti banngoge Saulị. 24Lolị Saulị alinkusịmanya isị bālitikēne. Abēne balinkusịgila mfịfịgo pamụ̄sị na pakilo ukuti banngoge. 25Lolị abafụ̄ndịgwa bāke balinkummwega pakilo, balinkummwendesya pị̄mato, balinkunsololosya nkị̄bo ikinywamụ.

Saulị mụ Jelụsalemụ

26Lelo Saulị bo afịkịle mụ Jelụsalemụ, alinkugela ukōngāna na bafụ̄ndịgwa. 27Po papo Balịnaba alinkwịsa, alinkummwega Saulị, alinkuntwala alinkujoba nagwe, na mụno ājifụmụkisyaga īngamụ ja Jesụ pabwelụ ịtolo mụ Ndamasịka. 28Po papo Saulị alinkutūgasya pamopēne nabo mụ Jelụsalemụ alinkusyungūtila nkāja kōsa bo ịkulūmbilila ilịsyu lya NTWA kisịta kutị̄la. 29Alinkujoba nukukānịkana na Bagịlịkị, lolị abēne balinkuti tunngoge. 30Lolị abanịne bo basyagēnịe sịsịsị, po papo balinkwakummbīka mụ Kesalịja balinkuntuma ukubūka ku Talịsị.

31Po papo pakabalilo kāko ikipānga kyosa kya mụ Jụtaị, ni Kya Galịlaị, na mụ Samalịja, kilinkuja nulutēngāno kilinkwendela ndutị̄lo lwa kuntị̄la UNTWA. Kangi kilinkubāla ndusūbisyo lwa Mbepo Mwịkemo.

Petelị ịkummbūmbulusya Eneja mụ Lịta

32Lelo bo Petelị ịkwenda mōsamōsa, po papo alinkusụlụka ukubūka kubị̄kemo aba bajēngịle mụ Lịta. 33Mo alinkwakummwaga umụ̄ndu uju āli jo Eneja īngamụ, uju ālāmbalēle pakitala ifyinja lwele āli nimbūngo ja bukokonyale. 34Umwene Petelị alinkujoba nagwe alinkuti: Eneja, Jesụ Kilisịtị ịkukubumbulusya. Sụmụka utēngege ikitala kyako. Nakalīnga ịtolo alinkusụmụka. 35Balinkummbona bōsa aba bājēngịle mụ Lịta, na mụ Salonị, balinkupīndukila ku NTWA.

Ukusyusịgwa kwa Tabịta mụ Jope

36Lelo jumo umfụ̄ndịgwa unkị̄kulu ugwa mụ Jope, uju īngamụ ali jo Tabịta, (Nkigịlịkị jo Ndolịkasị, ko kuti akasya). Unkị̄kulu ujo ābōmbaga īmbōmbo sị nyịngị īnụnụ, kangi āsōsyaga nifya busūsilwa. 37Po papo lelo mmasịku gāgo alinkubịna, alinkwenda nukufwa. Lelo bo bammōsịsye mụmmbili, balinkummbīka kunyụ̄mba ja kwịjulu. 38Papo Lịta āli pị̄pị na Jope, abafụ̄ndịgwa balinkupilika ukuti Petelị ali mụ Lịta. Po papo balinkubatuma abāndu babili aba kwakumpyelesya ukuti: Angakābilaga ukwịsa kumyitu. 39Po papo Petelị alinkusụmụka, alinkubūka nabo. Lelo bo ajịle kufịka, balinkufyuka nagwe kunyụ̄mba ja kwịjulu. Po papo abakị̄kulu bōsa abafwile balinkusegelela kwa Petelị nankunsyungūtila, balinkulila nukunnāngisya imịselekesye nimyenda igi ābasonị̄le Ndolịkasị, bo mūmị. 40Lolị umwene Petelị alinkubasōsya bōsa pānja, alinkufụ̄gama alinkwịpụ̄ta, alinkusanukila kumfị̄mba alinkuti: Tabịta, sụmụka. Po papo umwene galinkwịguka amāso gāke. Lelo bo ammbwene Petelị, alinkusụmụka alinkutūgasya. 41Po papo Petelị alinkunkola ikiboko alinkunsụmụsya. Alinkubabilikila abị̄kemo na bakị̄kulu abafwile, alinkubapa umūmị ịtolo. 42Syo sịlinkufụmụka mōsa mụ Jope, ba bị̄ngị balinkwenda nukummwịtika UNTWA. 43Po papo Petelị alinkutūgasya mụ Jope amasịku ga mịngị nnyụ̄mba ja Sịmonị umfụgụtangubo.

Currently Selected:

Īmbōmbo Sya Batumịgwa 9: NYB96

Highlight

Copy