Luka 11
11
Yesu Tàg Mpìrká Barà Bá Vig Shìdun
(Mat 6:9-13; 7:7-11)
1Ayúnn zyun Yesu shi, mi ri vig Shìdun á byar zyun. I byar-à hi wunù zyun áyau yann sukàwá big ni vig ku n dang rag, “Asàin Luyí, á tàg yi barà yá vig Shìdun àràg barà Yohanna tàg sig yann sukàwá big.”
2Yesu dinya big n rag, “Wà ná vig Shìdun, aning dang rag,
‘Tayí wà mà wai, á sa mpìrká abig wib zìnnwú.
Byar shu kùrwú aku bi á byaryí ni.
3A ya yi buju àyúnn ma àyúnn.
4A yafa ya yi bu pyìrká yi ri sa,
àràg barà yi ri yafa ya mpìrká ri sa yi bu-à bibai níng.
Kada á fim yi ayi sa bu-à bibai bàna.’ ”
5Ku dinya big misali jír zyun, n rag, “Mpìr zyun shi sig ma jàuwá zyun. Ku yag á byar wàníng ni á yau fi-à ni, n vig wàníng, n dang rag, a wàníng ya zu ku agir brodi sara, 6jir kai bàna kyìnn zyun tìg sig á byarwá ni, ku bàna ma bu-à kwá ya wàníng. 7Jàuwá má zìm ya ku ma dang rag, ‘Kada á sa shi mì bàna. Bigmí, n kìg rìghing nu nkyunmí. Yi ma yanká bigmí big na wann rìghing. Má dù sar fig ń ya wù bu zyun bàna tàma-à níng.’ 8N dinya ning, wà wàníng ma dù fig jirà ku í jàuwá bàna, ama wàníng má dù jirà mpìr-à níng ri sa shi ku. 9Mì ri dinya ning, aning vig, bá ya ning. Aning yàn, ná dìg. Aning kwìb nu nkyun-à, bá pù ya ning. 10Mpìr-à ma vig hing, bá ya ku. Mpìr-à ma yàn hing, kwá dìg. Mpìr-à ma kwìb hing nu nkyun-à, bá pù ya ku. 11Ning mpìrká shi sig ma yann, wà yanká buná ma vig ning jái, ná ya big bushùwí rà? 12Kó wà ba vig kìn kwìnn, ná ya big í nai rà? 13To. Aning myàng, ning zyun-à ning í mpìrká bibai má, ning yì hing barà ná ya yanká buná big bu-à ǹsàn, n bi bib Shìdun zyun-à í Tayí mà wai, kwá ya mpìr-à ma ri vig ku Awun Kyìkyàrwá.”
Yesu Ma Kùr Wàuká
(Mat 12:22-30; Mar 3:20-27)
14Ayúnn zyun Yesu ri kan zu wàu á dìr mpìr zyun ni. Wàu-à níng ri kan dim mpìr-à níng wà dang jír. Barà Yesu kan zu rìg wàu-à níng, wunù-à níng dang rag jír. Bìr mpìrká màhàn níng sa mamaki. 15Ama mpìrká káhi dang rag, ku ri kan zu wàuká níng ma gbam Baalzabul kùr wàuká.
16Mpìrká káhi ri zìm abig màg màg fig ku. Big vig ku n dang rag, aku tìya big bu-à má ya big mamaki, jirà abig yì ku bi síg mà byar Shìdun ni àjai. 17Ku yì rìghing bu-à big ri kyab á pìkyinnbá ni. I bu-à sa, ku dang rag, “Jànn-à ma gàb finn hing shinnwá byar pyànà, ba ri gbìb shùr, jànn-à hi má nonn fig bàna. Finn lu-à ma gàb finn hing kyau pyànà, finn lu-à hi má nonn fig bàna tìnn. 18Shaitan ma gàb finn hing kyau pyànà, kwá sa sar fig bu bàna. Mì ri dinya ning jír-à níng, jir kai bàna ning dang rag, mì ri kan zu wàuká ma gbam Baalzabul. 19Aning dinya mì, mpìrká buná ri kan zu wàuká ma gbam ni rà? Big ri kan zu ma gbam Shaitan rà? A jir shinn wàníng ni, bá wà ning kwonn. 20Shi fig àràg barà ning ri dang bàna. Mì ri kan zu wàu káníng ma gbam Shìdun. Wàníng ri tàg rag byar shu kùr Shìdun bi hing á byarná ni.
21“Wà mpìr gbam zyun ma sar sig á luwá ni ma tàu ma bìg, ma ri myàng kwonn ma buká buwá big, buká buwá big má jànn fig bàna. 22Wà mpìr-à ma gbam kab ku ma bi hing, ma tùshwar vinn rìghing bu-à ku sar gbam sig áni, wàníng má zìg vinn rìg buká buwá big, má gàb finn vinn rìg.
23“Mpìr-à ma bàg fig mì bàna, ku í mpìr azíbmí. Mpìr-à ma zà kwonn shang fig mì zaká bumí bàna, ku í àsàin-à ri sa yam kìfinn.”
Barà Wàu-à Kàng Bi
(Mat 12:43-45)
24“Wà wàu ma zu hing á dìr mpìr, kwá yàn byar-à aku shi ngàng awunwá, ama kwá dìg fig bàna. Kwá dang rag kwá kàng yag rìg mà byar-à ku nìm zu bi sig. 25Kwá kà kàng yag hing mà dìr mpìr-à níng ni, kwá dang rag lu-à sàn hing, n kyàr hing. 26Kwá yag, má yag dinn zìg bi wàu sùmpyànn, ká bai kab ku. Bá shi màhàn. Mpìr-à níng má wa kab shwìn tàma-à níng ma wàrì.”
Mpìrká Ma Ri Wib Shìdun, í Mpìrká Shìdun Má Sìnn Big á Byar Nsàn
27Barà ku ri dang jír àdòníng, uwà zyun áyau bìr-à ni, dang jír ma gbam, n rag, “Uwà mà sig wù n pyag gbam sig wù níng, kwá fig àjwár.”
28Ama Yesu dang rag, “Mpìrká ri fig jir Shìdun mi ri wib níng, í mpìrká má fig àjwár.”
Yesu Dang Rag Kwá Sa Aràg Barà Yunana Sa Sig
(Mat 12:38-42)
29Barà bìr mpìrká ri bi swàb kà á byar Yesu, ku dang rag, “Mpìrká á jànn-à ni tàma-à níng, big ri sa bu-à bibai. Big ri vig mì bu-à má ya big bu mamaki. Má sa ya fig big bu mamaki bàna, sai àràg bu Yunana. 30Barà Yunana shi sig á finn jái su sara níng, í barà mì má, má sa áni àdòníng tìnn. Barà Yunana kàng sig bu mamaki á byar mpìrká mà Nineve níng, í barà mì má mì Wùn Mpìr Jíkwìnn, má sa mpìrká á jànn-à tàma-à níng áni tìnn. 31Uwà zyun-à í kùr ùwài mà agunn àyúnn sàn kyùr, ku bi sig mà byar zyun ni pyunn ninonn nímá, àjirà aku myàng íri yar-à Sulemanu shi sig ma kàhi. Ama tàma-à níng zyun-à kab sig Sulemanu shi sig áyág, ama mpìrká tàma-à níng ri zìm fig abig fig jírwá bàna. Jir wàníng uwà-à níng má dang tir mpìrká tàma-à níng mà byar-à bá wà kwonn-à níng. 32Ayúnn-à Shìdun ma wà kwonnwá, mpìrká rì á Nineve má dang tir ning mpìrká tàma-à níng, jir kai bàna wà Yunana dinya big jir Shìdun níng, big dà fim rìghing bu pyìrbá. Mpìr-à kab Yunana shi sig níng. Ama ning dà fim fig bu pyìrná bàna.
Zuyí í Ayar Dìryí
(Mat 5:15; 6:22-23)
33“Mpìr má mònn bàg pitila má bir dim fig kwài áni bàna. Kwá sìnn kà fig á shar bàna tìnn. Ama kwá sìnn á shinn bu jirà pyìr-à aku yar wann bi, mpìrká abig myàng àyarwá. 34Zuyí shi sig àràg í àyar dìryí. Wà zuyí ma ágbam, dìryí bidìm pár má yar yà zu rìg. Ama wà zuyí ma sàn fig bàna, dìryí má yar la fim fig bàna. 35Aning zìm àyar á dìrná ni. Kada aning zìm fi bàna. 36Wà dìrná ma shi sig ma àyar, fi bàna, àyar-à níng má sa yar gban rìg dìrná, àràg barà pitila ri yar ya yi níng.”
Yesu Dang Bu-à Farisawaká Ma Malamká Ri Kyab á Pìkyinnbá Ni
(Mat 23:1-36; Mar 12:38-40)
37Barà Yesu dang vinn rìg jír-à àdòníng, mpìr Farisawa zyun bar ku, aku yag ji buju mà luwá ni. I byar-à Yesu kà yag, n yag shi wann. 38Ama Farisawa-à níng myàng Yesu tu fig vùwá bàna, ku sa mamaki. 39I byar-à Shinn Luyí Yesu dinya ku, n rag, “Ning Farisawaká, ning shi sig àràg akpa big ri tu kyàr íri kwíb-à. Finn-à mà yau í jín. I barà ning má, ning mònn sig íri bu pyìr. 40Ning í mpìr àning big, ning yì fig wà Shìdun àsàin-à sa sig kwíb-à níng, í àsàin-à sa sig finn-à bàna rà? 41Ning í mpìr jiju. Aning sa bu-à ǹsàn á byar mpìr ashiká ni, ma wà ná shi mpìr jiju. Wà na sa hing àdòníng í wà ná shi mpìr pìkyinn-à sìsàn á pyànn Shìdun.
42“Ning Farisawaká, buká ning ri sa níng, sàn fig bàna. Ná wa shwìn. Ning ri sa fig bu-à ǹsàn ma mpìrká bàna. Ku má, ning ri zìm fig Shìdun ma pìkyinn ńzyun bàna. Ayau buká ning shi sig ma kàhi kyau dwib níng, ning ri ya Shìdun kyau zyun, hár ashìtá ma jì byù. Bu-à sàn kab sig bàna, aning zìm Shìdun, aning zìm mpìr.
43“Ning Farisawaká, ná wa shwìn. Ning ri zìm byar shu àgbam á tonn bìr kwonn-à ni. Ning ri zìm abig wib ning mà fir ati-à ni tìnn. 44Ná wa shwìn. Ning shi sig àràg amir byar-à mpìrká ri kyann wam zu áni, big yì fig bàna.”
45Ayau malamká ni, zyun dang rag, “Malam, wa dang hing àdòníng, wù ri swau yi tìnn.”
46Yesu rag, “Ning malamká ri tàg tarkada Shìdun, ná wa shwìn. Ning zìg swánn lìlìb nímá, n zìg n sìnn kà sig á shinn mpìr káníng ni, big ri tàng kyann ma kàhi. Ning swann shang fig big bàna, kó títi nímá. 47Ná wa shwìn. Ning ri sa samyib amir mpìrká rìi dang kyann jir Shìdun, ká yàkúná big rì gban sig. 48Ning zìm hing bu-à yàkúná big ri sa sig, wato big gban mpìrká rìi dang kyann jir Shìdun. Ning bó, ning ri sa samyib amir-à. 49I bu-à sa sai-à rì Shìdun zyun-à shi sig ma yar níng, dang jírwá n rag, kwá swam ya bi big mpìrká má dang jírwá ma yann aswamká buwá. Bá gban káhi, bá du kà káhi á shwìn. 50Mpìrká tàma-à níng, ná wa shwìn á jir shinn mpìrká rìi dang jir Shìdun big rì gban sig, tun sai-à big ri màm sig dunyaru. 51Mpìrká tàma-à níng, ná wa shwìn bu-à pànn sig daka á ki Habila hár ki Zakariya, zyun-à big rì gban sig áyau byar-à big ri twìb swànn bu mà lu Shìdun.
52“Ning malamká ri tàg tarkada Shìdun, ná wa shwìn. Ning zìg rìghing bu-à big ri pù nu nkyun-à áni, byar-à mpìrká má dìg yar. Ning ngàng wà ná kà màhàn, ning kan dim rìghing mpìrká ri zìm abig kà màhàn.”
53Barà Yesu zu bi á lu-à ni àdòníng, sai malamká ma Farisawaká ri swau ku, big ri bib ku jír á shinn buká nìnànn nímá. 54Big ri wonn ku, big ri zìm abig pànn ku ma jír buká ku nìm má dang níng.
Currently Selected:
Luka 11: Jib
Highlight
Share
Copy
Want to have your highlights saved across all your devices? Sign up or sign in
© 1996, Wycliffe Bible Translators, Inc., All rights reserved.
