Malɨka 9

1ɄYesu akajova kange akati, “Kyangʼhaani nɨkʉvavʉʉla, vamonga nkate mʉlyʉmue mwe vano mʉlɨ apa, navalafua kuhanga pano vikʉvwagha ʉVʉtwa vwa Ngʉlʉve vwisile ni ngʉfu.”

ɄYesu ikwandʉka

(Mataayi 17:1-13; Lʉʉka 9:28-36)

2Ye fikilile ifighono ntanda, ʉYesu akavatoola ʉPeteli, ʉYakovo nʉ Yohani. Akalʉta navoope kʉ kɨdunda ɨkɨtali, vakijekela, vakava veene. Ye valɨ pala, ʉYesu akandʉka pamaaso ghaave, 3nagha menda ghaake ghakava ghivalatɨka, mavalafu kyongo, nakwale ʉnsuka menda pa ɨɨsi apa, jʉno ndepoonu ivalasia enendɨɨkɨ. 4Pe vakasetʉka avavɨli avalongosi ʉEliya nʉ Moose, vijova nʉ Yesu.

5Pepano ʉPeteli akamʼbʉʉla ʉYesu akati, “Mʼbʉlanɨsi, lʉnono ʉsue tukalaghe bahaapa. Lɨno, tʉjenge ifyeve fitatu: kɨmo kɨɨve kyako, kɨmonga kya Moose, ɨkɨngɨ kɨɨve kya Eliya.” 6ɄPeteli naalyalʉtangʼhinie ajove kɨki, ʉlwakʉva ʉmwene na vanine vaale nʉ lʉdwesi.

7Pe lɨkiisa ɨlɨfunde lɨkavakupikila, lɨkapʉlɨkɨka ɨlɨsio kuhʉma mʉ lɨfunde liiti, “Ʉjʉ ghwe Mwanango ʉmʉghanɨke, mʉmpʉlɨkɨsyaghe ʉmwene!” 8Nakalɨngi vakalola kʉno na kʉno navakamwagha ʉmuunhu ʉjʉnge, looli jʉ Yesu mwene.

9Ye valɨ mʉ kɨdunda vikwika, ʉYesu akavakaana avavʉlanɨsɨvua vaake vala kuuti, navangampangɨlaghe nambe muunhu sino vasivwene, kuhanga ʉmwene ʉMwana ghwa Muunhu alaava asyʉkile kuhʉma kʉ vafue. 10Aveene vakalɨgada ɨlɨsio lɨno ajovile ʉYesu, kʉmo vakiposaniagha veene viiti, “Kusyʉka ʉkuo kwekʉti kɨki?”

11Pepano vakamposia ʉYesu vakati, “Ongo avavʉlanɨsi va ndaghɨlo sa Moose viiti aliisa taasi ʉEliya, ʉKɨlɨsite ye akyale kukwisa?”#Malaki 4:5 12ɄYesu akavamʉla akati, “Se seene, aliisa taasi ʉEliya, kuuti alɨngʼhanie vʉnono sooni. Kange, nalɨlembilue mʉ Malembe aMɨmɨke kuuti, ʉne ne Mwana ghwa Muunhu nɨlapumusivua kyongo na kubedua? 13Lɨno nɨkʉvavʉʉla niiti, ʉEliya alisile,#9:13 ɄEliya alisile: Luvoneka ʉEliya jʉno alisile ghwe Yohani ʉMwofughi (Malɨka 1:2-4). neke avaanhu vakamʼbombela sino vakighanile aveene, ndavʉle lɨlembilue vwɨmɨla ʉmwene.”

ɄYesu ɨkʉnsosia ʉnsoleka ʉnya lɨpepo

(Mataayi 17:14-21; Lʉʉka 9:37-43a)

14Ye vifika, vakavaagha avavʉlanɨsɨvua avange vikanɨngʼhana na vavʉlanɨsi va ndaghɨlo, vasyʉngʉtilue nɨ lɨpʉgha ɨlya vaanhu. 15Avaanhu vala ye vikʉmʼbona ʉYesu, vakadegha kyongo, vakaguuna kwa mwene, vakamhʉngɨla. 16ɄYesu akavaposia akati, “Mukanɨngʼhana kɨki?”

17Jʉmonga nkate mʉ kɨpʉgha, akamʉla akati, “Ghwe Mʼbʉlanɨsi, nɨmʉletile ʉmwanango kʉlyʉve, alɨ nɨ lɨpepo lɨno lɨkʉmpelela kuuva kɨnuunu. 18Jaatu pano lɨmʼbwene lɨkʉmʉghwɨsia paasi, lɨkʉmpelela ahʉmyaghe ɨlɨtotofulo mʉ mʉlomo na kugwegwenʉla amiino, neke ʉmʼbɨlɨ ghuswatʉka. Navasʉʉma avavʉlanɨsɨvua vaako valɨhʉmie, vakunua.”

19Neke ʉYesu akavavʉʉla akati, “Mwe kɨsina ɨkɨsila lwɨtɨko! Nikalile numue ʉnsiki ghwoni ʉghʉ, mʉkyale kʉkʉnhangʼhania? Nikale ndaani numue? Mʉleete kʉlyʉne!” 20Vakamʼbesia kwa Yesu. Pe ɨlɨpepo lɨla lɨkamʉghwɨsia paasi ʉnsoleka jʉla, akasaghalatagha na kuhʉmia ɨlɨtotofulo mʉ mʉlomo. 21Pepano ʉYesu akamposia ʉviise akati, “Ʉlʉ lʉlyamwandile lɨɨghi?” Akamwamʉla akati, “Kuhʉma pa vwana. 22Kekinga lɨntupiike pa mwoto, pamonga lɨkʉntaagha mʉ malenga, ʉvʉfumbue vwake lɨmʼbude. Ghwe Yesu, lɨno nave ʉlɨ ni ngʉfu kuvomba lʉmonga, sivuo ʉtʉsʉngʉkɨle, ʉtʉtange.” 23ɄYesu akamwamʉla akati, “Ghwiti nave nɨlɨ ni ngʉfu kuvomba lʉmonga! Sooni sivombeka kwa muunhu ʉnya lwɨtɨko.” 24Apuo ʉnya mwana jʉla akajova fiijo akati, “Nikwɨtɨka! Looli ʉlwɨtɨko lwango lʉdebe, ʉnhange kukwɨtɨka fiijo.”

25ɄYesu ye ilola ɨlɨpʉgha ivona avaanhu vifikwongelela, pepano akalɨdalɨkɨla ɨlɨpepo ɨlɨlamafu akati, “Ghwe lɨpepo ghwe ʉkʉmpelela ʉmwana ʉjʉ kuuva kɨnuunu na mapʉle, nɨkʉkʉvʉʉla niiti, hʉma mwa mwana ʉjʉ, nʉngamwingilaghe kange!” 26Neke ɨlɨpepo ɨlio lɨkakoola, lɨkansukania kyongo, pe lɨkahʉma. Ʉnsoleka jʉla akahwana mfimba, vamonga vakati, “Afwile!” 27Pepano ʉYesu akankola ʉlʉvoko, akamwinula ʉnsoleka jʉla, akɨɨma.

28ɄYesu akingila mʉ nyumba, avavʉlanɨsɨvua vaake ye vijekiile naghwope, vakamposia vakati, “Ongo ʉsue tʉveele tʉkunilue kʉkʉlɨdaga ɨlɨpepo lɨla?” 29ɄYesu akavamʉla akati, “Amapepo ndavʉle agha naghihʉma vʉle vʉle, looli lʉ lufuunyo lwene.”#9:29 Looli lʉ lufuunyo lwene: Ifitabu fimonga ifikʉʉlʉ valembile, ʉlufuunyo na kuvʉhɨɨla kulia.

ɄYesu ijova ʉlwa vʉvɨlɨ ɨmhola ɨja kʉfua na kusyʉka kwa mwene

(Mataayi 17:22-23; Lʉʉka 9:43b-45)

30ɄYesu na vavʉlanɨsɨvua vaake, vakavʉʉka vilʉta kukilila kʉ Galilaya. Neke ʉYesu naakakelagha ʉmuunhu ʉjʉnge akagʉle pano pwale, 31ʉlwakʉva akava ɨkʉvavʉlanɨsia avavʉlanɨsɨvua vaake kuuti, “Ʉne ne Mwana ghwa Muunhu nitapivɨkua mʉ mavoko gha vaanhu vano kyavikʉmbuda, neke ɨkɨghono ɨkya vʉtatu nisyʉka.” 32Avavʉlanɨsɨvua vaake navakalʉtangʼhania lʉno ijova, vakoghopa kʉkʉmposia.

Ʉlʉkanɨngʼhano kuuti veeni jʉno mʼbaha

(Mataayi 18:1-5; Lʉʉka 9:46-48)

33ɄYesu na vavʉlanɨsɨvua vaake ye valɨ mʉ sɨla, avavʉlanɨsɨvua vakava vikanɨngʼhana. Vakafika mʉ lɨkaaja ɨlya Kapelenaumu. Ye vingiile mʉ nyumba, ʉYesu akavaposia akati, “Mʉveele mukanɨngʼhana kɨki ye mʉlɨ mʉ sɨla?” 34Aveene vakajika kɨmihe, ʉlwakʉva vakakanɨngʼhanagha kuuti ghwe veeni ʉmʼbaha nkate mʉ veene.

35ɄYesu ye ikalile, akavakemeela vala kɨjigho na vavɨlɨ akavavʉʉla akati, “Ʉmuunhu jʉno ilonda kuuva ghwa kwanda avisaghe ghwa vʉsililo, kange mʼbombi ghwa vooni.” 36Pepano akantoola ʉmwana ʉnʼdebe, akamʼbɨɨka pakate, akamʉghumbatɨla, neke akavavʉʉla akati, 37“Ʉmuunhu jʉno ɨkʉmwʉpɨla ʉmwana ndavʉle ʉjʉ mʉ vughane vwango, ɨkʉnyʉpɨla ʉne. Kange, jʉno ɨkʉnyʉpɨla ʉne, naiiva anyʉpiile jʉʉne, looli iiva amwʉpiile najʉ Nhaata jʉno asungʼhile.”

Jʉno namʉlʉgʉ ghwitu nʼjiitu

(Lʉʉka 9:49-50)

38ɄYohani akamʼbʉʉla ʉYesu akati, “Mʼbʉlanɨsi, twamwagha ʉmuunhu jʉmonga idaga amapepo mʉ lɨtavua lyako, neke ʉsue twankaana, ʉlwakʉva naghwa kɨpʉgha kiitu.” 39ɄYesu akati, “Namʉngankanaghe, ʉlwakʉva nakwale jʉno ivomba ifidegho mʉ lɨtavua lyango, neke kange anjove fivi ʉne. 40Ʉmuunhu ghweni jʉno namʉlʉgʉ ghwitu, alɨ lʉbale lwitu. 41Kange, ʉmuunhu ghweni jʉno ɨkʉvapeela nambe ʉtʉlenga, ʉlwakʉva mʉlɨ vaanhu va Kɨlɨsite, kyangʼhaani nɨkʉvavʉʉla, ʉNgʉlʉve naangaleke kʉkʉmpeela ʉlʉvonolo.”

Kukʉvasia avange

(Mataayi 18:6-9; Lʉʉka 17:1-2)

42ɄYesu akajova kange akati, “Ʉmuunhu jʉno ɨkʉmwambʉsia kuvomba inyɨvi jʉmonga mʉ vadebe ava vano vikʉnyɨtɨka ʉne, lwale luuva kʉba kwa muunhu ʉjuo kupinyilisivua ʉlwala kʉ singo na kutaghua pa kyogho mʉ nyanja. 43Ʉlʉvoko lwako lʉngakwambʉsie, dumula. Yekʉba kukwingila kʉ vwʉmi nʉ lʉvoko lʉmo, kukila kujigha na mavoko ghe ghavɨɨlɨ, neke ʉlʉte kʉ lʉpumuko lwa mwoto ghʉno naghusima lʉsiku. 44Muno amangʼonyo ghaake naghifua, nambe ʉmwoto naghusima.#9:44 Akadebe aka namwekale mʉ fitabu fimonga ifikʉʉlʉ. 45Nalʉ lʉghʉlʉ lʉngakwambʉsie, dumula. Yekʉba kukwingila kʉ vwʉmi ʉlɨ mʉlema, kukila kujigha na maghʉlʉ ghe ghavɨɨlɨ, neke ʉtaghue kʉ lʉpumuko lwa mwoto ghʉno naghusima lʉsiku. 46Muno amangʼonyo ghaake naghifua, nambe naghʉ mwoto naghusima.#9:46 Akadebe aka namwekale mʉ fitabu fimonga ifikʉʉlʉ. 47Kange, ɨliiso lyako lɨngakwambʉsie, ngʼomotola, ʉtaaghe. Yekʉba kukwingila kʉ Vʉtwa vwa Ngʉlʉve nɨ liiso lɨmo, kukila kujigha na maaso ghe ghavɨɨlɨ, neke ʉtaghue kʉ lʉpumuko lwa mwoto ghʉno naghusima lʉsiku, 48muno, ‘Amangʼonyo ghaake naghifua, nambe naghʉ mwoto naghusima.’#Yesaya 66:24

49“Avaanhu vooni vilivalasivua nʉ mwoto,#9:49 Mwoto: Kɨhwanɨkɨsio kya mhumuko sino sikʉvaghagha avɨtɨki, isi se sino sikʉvakangasyagha mʉ lwɨtɨko lwave. ndavʉle ɨlɨtekelo vʉle livalasivua nʉ mwinyo.#9:49 Mwinyo: Ɨlɨtekelo lɨkapakwagha ʉmwinyo mʉlwa kʉlɨvalasia, neke lɨkanyanywagha pa kɨtekelelo (Valeevi 2:13; Sakieli 43:24). 50Ʉmwinyo nnofu, leelo nave ghʉsʉpʉke lwoni, ʉvɨɨke kɨki kugomosia ʉlʉnoneesi? Mʉvisaghe nʉ mwinyo nkate mʉlyʉmue, mukalaghe nʉ lʉtengaano.”

Currently Selected:

Malɨka 9: wbi

Highlight

Copy