Malɨka 14

Ʉvwʉvɨsi ʉvwa kʉmʼbuda ʉYesu

(Mataayi 26:1-5; Lʉʉka 22:1-2; Yohani 11:45-53)

1Filyakyale ifighono fivɨlɨ kuuva kyɨmɨke kya Pasaka na makate ghano naghavɨkilue ɨkɨlʉle,#14:1 Kyɨmɨke kya Pasaka na makate ghano naghavɨkilue ɨkɨlʉle: Ɨmba ɨlɨsio Pasaka kʉ Vʉghanʉle vwa Masio aMahesia. avavaha va vatekesi na vavʉlanɨsi va ndaghɨlo, vakava vifilonda ɨsɨla ɨja kʉnkola ʉYesu kɨsyefu kuuti vamʼbude. 2Vakijovasyagha veene vakatisagha, “Nave tʉʉti tʉnkole ɨkɨghono ɨkyɨmɨke, avaanhu kyande vileeta amabaatu.”

ɄYesu ipakua amafuta amanofu

(Mataayi 26:6-13; Yohani 12:1-8)

3ɄYesu alyale mʉ lɨkaaja ɨlya Betania, mʉ nyumba ja Simoni jʉno ʉlʉtasi alyale nɨ bʉʉba. Ye ikalile mʉ nyumba ɨjio alɨ pilia, akingila ʉmʉkɨjʉʉva jʉmonga, akolile ɨsupa ɨja lɨvue#14:3 Ɨsupa ɨja lɨvue: Ɨjɨ jɨlyale supa jɨno jatendilue nɨ lɨvue ɨlɨvalafu ɨlya lʉtogo fiijo, jatendilue nɨ lɨvue lɨno lɨkatambʉlwagha alabasita. Ɨlɨvue ɨlio lɨlyale lihʉma mʉ ɨɨsi ɨja Misili. Ɨsupa ɨja lɨvue ɨlio, jɨkavombagha ɨmbombo ɨja kʉvɨkɨla amafuta amanya lʉnuusi ʉlʉnono, kange amanya lʉtogo fiijo. ɨnya mafuta amanofu agha kʉpakala agha ndalama nyinga. Akadindula ɨsupa, pe akakungʼilila pa mutu ghwa Yesu kʉkʉmwɨmɨka. 4Avaanhu vamo vano pwevalyale vakakalala, vakijovasyagha vakatisagha, “Lwakɨki kunangania amafuta amanofu agha? 5Ʉlwakʉva ghaale ghighʉsɨvua idinali filʉndo fitatu#14:5 Idinali filʉndo fitatu, salɨngʼhiine nʉ lʉhombo ʉlwa mʼbombi jʉmo kʉ mwaka ghwoni. na kukila, neke indalama isio sale sikʉvatanga avakotofu.” Pe vakanʼdalɨkɨla ʉmʉkɨjʉʉva jʉla.

6ɄYesu akati, “Mʉleke, kɨki mʉkʉnʼgasia ʉmʉkɨjʉʉva ʉjʉ? Ambombiile ɨmbombo ɨnofu. 7Avakotofu mʉlɨ navoope jaatu, mʉnoghiile kʉkʉvatanga ʉnsiki ghwoni. Neke ʉne, nanɨlɨ numue ifighono fyoni. 8Ʉmʉkɨjʉʉva ʉjʉ ambombiile vʉnofu mʉ fino aveele nafyo, apakile amafuta ʉmʼbɨlɨ ghwango kʉkʉghʉlɨngʼhania kusyɨlua. 9Kyangʼhaani nɨkʉvavʉʉla niiti, pano ɨMhola ɨNofu jipʉlɨsɨvua mʉ ɨɨsi sooni, najɨ mbombo jɨno avombile ʉmʉkɨjʉʉva ʉjʉ, jijovwagha. Mʉ ʉluo vikʉnkʉmbʉkagha ʉmʉkɨjʉʉva ʉjʉ.”

ɄYuuda ikwɨtɨka kʉkʉmwohela ʉYesu

(Mataayi 26:14-16; Lʉʉka 22:3-6)

10Pepano ʉYuuda Isikalioti, ʉmo mʉ vasungʼhua vala kɨjigho na vavɨlɨ, akalʉta kʉ vavaha va vatekesi kuuti amwohele ʉYesu kʉ veene. 11Voope ye vapʉliike, vakahovoka kyongo, vakamʉlagha kʉkʉmpeela indalama. Pepano ʉYuuda Isikalioti akatengʉla kulonda ʉnsiki ʉnnofu ʉghwa kʉmwohela ʉYesu.

Ʉlʉlɨngʼhanio ʉlwa Pasaka

(Mataayi 26:17-25; Lʉʉka 22:7-14, 21-23; Yohani 13:21-30)

12Ɨkɨghono ɨkya kwanda ɨkya kyɨmɨke kya makate ghano naghavɨkilue ɨkɨlʉle,#14:12 Ɨkɨghono ɨkya kwanda ɨkya kyɨmɨke kya makate ghano naghavɨkilue ɨkɨlʉle: Kyale kɨghono kya kʉkʉmbʉka vʉle ʉNgʉlʉve alyavapokile mʉ vʉkami kʉ Misili. pano vakabudagha ɨngʼholo ɨja kyɨmɨke kya Pasaka, avavʉlanɨsɨvua va Yesu vakamposia vakati, “Ghulonda tʉkʉlɨngʼhanɨkɨsie kʉʉghi ʉkwa kʉlɨɨla ɨkyɨmɨke ɨkya Pasaka?”

13Pepano ʉYesu akavomola vavɨlɨ nkate mʉ vavʉlanɨsɨvua vaake, akati, “Mʉlʉte kʉ lɨkaaja ɨlɨvaha ɨlya Yelusalemu, mʉ sɨla mutangʼhana ʉmʉkɨnhaata itwɨkile ʉlʉsaaji lwa malenga. Ʉjuo ghwe mʉmʼbɨngɨlɨlaghe, 14kuhanga ɨnyumba jɨno kyaikwingila. Apuo, mʉmʼbʉʉle ʉnya nyumba kuuti, ‘ɄMʼbʉlanɨsi iiti, kɨlɨ kʉʉghi ɨkyʉmba ɨkya vahesia, pano panoghiile alɨɨle ɨkyɨmɨke ɨkya Pasaka, palɨkɨmo na vavʉlanɨsɨvua vaake?’ 15Ʉmwene ɨkʉvasoona ɨkyʉmba ɨkya kʉ gholoofa, ɨkyeleefu kɨno kɨnosivue. Mʉtʉlɨngʼhanɨkɨsie ʉmuo.” 16Avavʉlanɨsɨvua vala vakavʉʉka vilʉta kʉ lɨkaaja ɨlio. Ye vafikile, vakasivona sooni ndavʉle ʉYesu aveele avavʉlile. Pe vakalɨngʼhania ɨkyɨmɨke ɨkya Pasaka.

Ɨkyɨmɨke ɨkya Pasaka

17Ye jɨfikile ɨvwilile, ʉYesu na vavʉlanɨsɨvua vaake kɨjigho na vavɨlɨ vakafika mʉ nyumba jɨla. 18Ye valɨ pilia, ʉYesu akati, “Nɨkʉvavʉʉla isa kyangʼhaani, jʉmonga mʉlyʉmue, ghwope ilia palɨkɨmo nuune, itapikʉnyohela.” 19Avavʉlanɨsɨvua vaake vakasukunala, nʉjʉnge akatengʉla kʉkʉmposia ʉYesu iiti, “Asi, neene?” 20ɄYesu akati, “Ʉmuunhu ʉjuo ghwa mʉ kɨpʉgha kiinu ʉmue kɨjigho na vavɨlɨ, mwe vano musaasa palɨkɨmo nuune mʉ kɨvʉghaana. 21Ʉne ne Mwana ghwa Muunhu nifua, ndavʉle lɨlembilue mʉ Malembe aMɨmɨke. Neke ɨga, ʉmuunhu ʉjuo jʉno ɨkʉnyohela ne Mwana ghwa Muunhu! Kɨba ʉmuunhu ʉjuo, ngale naaholwagha.”

Ɨkyakʉlia ɨkyɨmɨke ɨkya Mʉtwa

(Mataayi 26:26-30; Lʉʉka 22:14-20; 1 Vakolinto 11:23-25)

22Ye valɨ pilia, ʉYesu akatoola ʉnkate, akahongesia kwa Ngʉlʉve, akamenyʉlania, akavapeela avavʉlanɨsɨvua vaake akati, “Koogho, ʉghʉ ghwe mʼbɨlɨ ghwango.” 23Pe akatoola ɨkɨkombe ɨkya lʉhʉʉje, akahongesia kwa Ngʉlʉve, akavapeela, vakanyua vooni. 24Akavavʉʉla akati, “Ɨjɨ je danda jango ɨja lʉfingo#14:24 Lʉfingo: Ɨmba kʉ Vʉghanʉle vwa Masio aMahesia. lwa Ngʉlʉve#14:24 Lʉfingo lwa Ngʉlʉve: Ifitabu fimonga ifikʉʉlʉ valembile, Ʉlʉfingo ʉlʉpia. na vaanhu vaake, jɨno jikungʼika vwɨmɨla avaanhu vinga. 25Kyangʼhaani nɨkʉvavʉʉla niiti, ʉne nanɨlanyua kange ʉlʉhʉʉje ʉlʉ, kuhanga pano niliiva ninyua ʉlʉhʉʉje ʉlʉpia kʉ Vʉtwa vwa Ngʉlʉve.” 26Pepano vakɨmba ʉlwɨmbo,#14:26 Vakɨmba ʉlwɨmbo: Luvoneka kuuti vakɨmbagha ɨSabuli 113-114 pano vitengʉla pilia ɨkyɨmɨke kya Pasaka. Kange, pano vakavisagha vamalile pilia vakɨmbagha ɨSabuli ja 115-118. pe vakavʉʉka vilʉta kʉ kɨdunda ɨkya Miseituni.

ɄYesu ɨkʉmʼbʉʉla ʉPeteli kuuti kyaɨkʉnkaana

(Mataayi 26:31-35; Lʉʉka 22:31-34; Yohani 13:36-38)

27Apuo ʉYesu akavavʉʉla avavʉlanɨsɨvua vaake akati, “Ɨkɨlo ɨja mʉsyʉghʉ ʉmue mweni kyamʉkʉngʼhɨmbɨla, ʉlwakʉva lɨlembilue mʉ Malembe aMɨmɨke,

‘Nɨkʉntova ʉnʼdɨɨmi, nasi ngʼholo sipalasana.’#Sakalia 13:7 ”

28Akajova kange akati, “Neke niliiva nɨsyʉkile nilikʉvalongolela kulʉta kʉ Galilaya.”

29ɄPeteli akamʼbʉʉla akati, “Nambe avange vooni vakʉleke, ʉne nanɨkʉkʉleka!” 30ɄYesu akamwamʉla akati, “Kyangʼhaani nɨkʉkʉvʉʉla, ɨkɨlo jɨjɨɨjɨ ɨngʼhongove ye jɨkyale kuvɨka ʉlwa vʉvɨlɨ, ʉve ghuuva ʉngʼhanile katatu.”

31ɄPeteli akajova akakangasia akati, “Ʉne nanɨkʉkʉleka lʉsiku, nambe kʉʉve kwe kʉfua palɨkɨmo nuuve.” Voope avavʉlanɨsɨvua avange vooni vakajova vʉle vʉle.

ɄYesu ikufuunya kʉ Getisemani

(Mataayi 26:36-46; Lʉʉka 22:39-46)

32ɄYesu na vavʉlanɨsɨvua vaake vakafika pamonga, pano pakatambʉlwagha Getisemani. Pe akavavʉʉla avavʉlanɨsɨvua vaake akati, “Mukalaghe apa, pano ʉne nikufuunya.” 33Pe akantoola ʉPeteli, ʉYakovo nʉ Yohani, akalʉta navoope pavʉlongolo padebe. Akatengʉla kusukunala kyongo na kutelateela. 34Akavavʉʉla akati, “Ʉmwojo ghwango ghʉlɨ nʉ lʉsukunalo ʉlʉkome, ghunoghanogha mʉlwa kʉfua. Mukale bahaapa, mʉvisaghe maaso.”

35Ʉmwene akalʉta pavʉlongolo padebe, akakupama paasi, akifuunya kwa Nhaata kuuti, nave lʉnoghiile, ʉnsiki ʉghwa lʉpumuko ghʉleke kʉkʉmwagha. 36Akati, “Ghwe Nhaata, ʉve nakɨkʉtolile kɨmonga. Nisʉʉma ʉmbʉsɨkɨsie ɨkɨkombe ɨkya lʉpumuko. Neke nakwekʉti ʉvombe mʉ vughane vwango, looli mʉ vughane vwako.”

37Ye ifunyile, akagomoka kʉ vavʉlanɨsɨvua vatatu vala, akavona vaghoneliile. Pe akamʼbʉʉla ʉPeteli akati, “Simoni, ʉghoneliile? Ʉkunilue kuuva maaso nambe akavalɨlo kamo?” 38Pe akavavʉʉla akati, “Mʉʉve maaso, mufunyaghe kuuti ingelo sileke kʉkʉvalema. Ʉmwojo ghutavwile, neke ʉmʼbɨlɨ nʼdwesi.”

39ɄYesu akalʉta kukufuunya kange, akajova amasio ghala ghala. 40Ye ifunyile, akagomoka kange, akavona vaghoneliile, ʉlwakʉva vaale ni tʉlʉ nyinga. Vakakunua ɨkya kʉjova.

41Akalʉta ʉlwa vʉtatu kukufuunya. Ye agomwike, akavavʉʉla akati, “Mʉjiighe mufighona na kupʉʉma? Lʉkwɨlile lɨno! Ʉnsiki ghʉfikile ghʉno ʉne ne Mwana ghwa Muunhu nivɨkua mʉ mavoko gha vahosi. 42Ɨma, tʉlʉtaghe! Lolagha, ʉnya kʉnyohela alɨ piipi.”

ɄYesu ikolua

(Mataayi 26:47-56; Lʉʉka 22:47-53; Yohani 18:3-12)

43ɄYesu ye ajiighe ijova navo, ʉYuuda ʉmo mʉ vavʉlanɨsɨvua kɨjigho na vavɨlɨ, akafika nɨ lɨpʉgha ɨlɨvaha, vakolile ibamba ni mbunda. Avaanhu avuo valyasungʼhilue na vavaha va vatekesi, avavʉlanɨsi va ndaghɨlo na vagojo. 44ɄYuuda ʉmwohesi alyavavʉliile ngʼhaani avaanhu vala ɨkɨvalɨlo ɨkya kʉmmanya ʉYesu, akati, “Jʉno kyanɨkʉnnonela, ʉjuo iiva ghwe mwene, mʉnkolaghe, mʉlʉtaghe naghwo mʉ vʉloleleli.”

45ɄYuuda ye afikile, akamʼbelelela ʉYesu akati, “Mʼbʉlanɨsi.” Akannonela. 46Pe avaanhu vala vakankola ʉYesu. 47Neke jʉmonga mʉ vano valyɨmile pala, akasomola ɨbamba, akantova ʉnkami ʉghwa ntekesi ʉmʼbaha, akanʼdumula ɨmbulughutu.

48ɄYesu akavaposia avaanhu vala akati, “Mwisile ni bamba ni mbunda kʉkʉngʼhola ʉne hwene nɨlɨ mhɨjimʼbudi! 49Ongo jaatu navisagha numue nivʉlanɨsia mʉ nyumba ɨnyɨmɨke ɨja kufunyila, namwangʼholagha! Lɨno, isi sihʉmɨla kukwɨlanɨsia sooni sino silembilue mʉ Malembe aMɨmɨke.”

50Pepano avavʉlanɨsɨvua vaake vooni vakamʉleka, vakakɨmbɨla. 51Neke ʉnsoleka jʉmonga jʉno alitosisie ɨsopeka, akava ifikʉmʼbɨngɨlɨla ʉYesu. Avalʉgʉ vala vakankola, 52ʉmwene akapukunyuka, akaghʉleka ʉmwenda ghwake, akakɨmbɨla vʉfuula.

ɄYesu pa vʉhɨghi

(Mataayi 26:57-68; Lʉʉka 22:54-55, 63-71; Yohani 18:13-14, 19-24)

53Pe vakantwala ʉYesu kwa ntekesi ʉmʼbaha.#14:53 Ntekesi ʉmʼbaha: Ɨmba ɨlɨsio Vatekesi kʉ Vʉghanʉle vwa Masio aMahesia. Ʉkuo kwe vakakongʼhaana avavaha va vatekesi vooni, avagojo palɨkɨmo na vavʉlanɨsi va ndaghɨlo.#14:53 Avavaha va vatekesi vooni, avagojo palɨkɨmo na vavʉlanɨsi va ndaghɨlo: Ava ve valongosi va Vayahudi mʉ mbombo sooni. Ɨmba ɨlɨsio Kɨpʉgha kya valongosi kʉ Vʉghanʉle vwa Masio aMahesia. 54ɄPeteli akava ɨkʉmʼbɨngɨlɨla ʉYesu pa vʉtali. Pambele ghwope akingila mʉ lʉvɨɨka ʉlwa nyumba ɨja ntekesi ʉmʼbaha, akikala ikwota ʉmwoto palɨkɨmo na vasikali avaloleleli.#14:54 Vasikali avaloleleli: Ava vaale valoleleli va nyumba ɨnyɨmɨke ɨja kufunyila jɨno jaale kʉ Yelusalemu. Ɨmba kʉ Vʉghanʉle vwa Masio aMahesia.

55Pepano avavaha va vatekesi nɨ kɨpʉgha kya valongosi#14:55 Kɨpʉgha kya valongosi: Ɨmba kʉ Vʉghanʉle vwa Masio aMahesia. va Vayahudi, vakava vilonda ʉvwolesi ʉvwa kʉmhɨghɨla ʉYesu kuuti vamʼbude, neke navakalʉvona lʉmonga. 56Avaanhu vinga vakolekagha isa vʉdesi vwɨmɨla ʉmwene, neke ʉvwolesi vwave navʉkɨtɨngʼhanagha.

57Vamo vakɨɨma, vakoleka isa vʉdesi vakati, 58“Ʉsue tʉkampʉliike ʉmuunhu ʉjʉ iiti, ‘Ʉne nimemʉla ɨnyumba ɨjɨ ɨnyɨmɨke ɨja Ngʉlʉve#14:58 Ɨnyumba ɨjɨ ɨnyɨmɨke ɨja Ngʉlʉve: Kʉ Vayahudi ɨnyumba ɨnyɨmɨke ɨja Ngʉlʉve, pe Pavwɨmɨke pa Ngʉlʉve mwene. Ɨmba ɨlɨsio Nyumba ɨnyɨmɨke ɨja kufunyila kʉ Vʉghanʉle vwa Masio aMahesia. jɨno jɨjengilue na vaanhu, neke mʉ fighono fitatu nijenga ɨjɨngɨ jɨno najijengua na vaanhu.’ ” 59Vwope ʉvwolesi ʉvuo navʉkɨtɨngʼhanagha.

60Pepano ʉntekesi ʉmʼbaha akɨɨma pakate pa vaanhu, akamposia ʉYesu akati, “Naghukwamʉla nambe lɨsio? Avaanhu ava vikwoleka kɨki vwɨmɨla ʉve?” 61Ʉmwene ʉYesu akajika kɨmihe, naakamʉla nambe lɨsio. Ʉntekesi ʉmʼbaha akamposia kange akati, “Ʉve veeve Kɨlɨsite, Mwana ghwa Ngʉlʉve ʉMwɨmɨkua?”

62ɄYesu akamʉla akati, “Eena, neene. Kange, mʉlambona ne Mwana ghwa Muunhu nɨtemile palɨkɨmo nʉ Ngʉlʉve ʉnya ngʉfu, nikwisa mʉ mafunde kuhʉma kʉkyanya.”

63Ʉntekesi ʉmʼbaha ye apʉliike amasio aghuo, akakalala, akademʉla ʉmwenda ghwake iiti, “Lɨno pe tulonda vwakɨki ʉvwolesi ʉvʉnge? 64Mʉpʉliike ndavʉle ikuvɨɨka hwene Ngʉlʉve, ɨkʉmʉligha kyongo ʉNgʉlʉve! Mwiti ndaani ʉmuunhu ʉjʉ?” Vooni vakamhɨgha kuuti anoghiile kubudua.

65Avange vakatengʉla kʉkʉmfunyila amati, vakanʼdinda kʉ maaso, vakantova ni mbuli, vakamposia vakati, “Vɨla, veeni jʉno akʉtovile!” Voope avasikali avaloleleli vakantoola, vakantova na mapi.

ɄPeteli ɨkʉnkaana ʉYesu

(Mataayi 26:69-75; Lʉʉka 22:56-62; Yohani 18:15-18, 25-27)

66ɄYesu ye alɨ mʉnkate, ʉPeteli akajiighe pa lʉvɨɨka. Pepano akiisa ʉmhɨnja ʉmʼbombi ghwa ntekesi ʉmʼbaha. 67Akamwagha ʉPeteli ikwota ʉmwoto, akamʉlola, akati, “Na jʉʉve ʉveele lʉmo nʉ Yesu ʉMʉnasaleti!”

68ɄPeteli akakaana akati, “Nanɨkagwile, kange nanɨsitangʼhinie sino ghujova!” Akahʉma kʉnji kʉ lʉvɨɨka. Ɨngʼhongove jɨkavɨka.#14:68 Ɨngʼhongove jɨkavɨka: Amasio agha namweghale mʉ fitabu fimonga ifikʉʉlʉ.

69Ʉmʼbombi jʉla akamwagha kange ʉPeteli, pe akavavʉʉla vano pwevalyale pala akati, “Ʉjʉ ghwe ʉmo mʉ vala.” 70ɄPeteli akakaana kange.

Ʉnsiki nʼdebe vʉvʉle, avaanhu vano pwevalyale pala vakamʼbʉʉla kange ʉPeteli vakati, “Kyangʼhaani ʉve ʉlɨ ʉmo mʉ vala, ʉlwakʉva ʉve ʉlɨ Nʼgalilaya.” 71ɄPeteli akava ifikaana, akajɨɨgha akati, “Kyangʼhaani ʉmuunhu ʉjuo jʉno mujova, nanɨmmanyile!”

72Ʉnsiki ghʉghuo ɨngʼhongove jɨkavɨka ʉlwa vʉvɨlɨ. Apuo ʉPeteli akakʉmbʉka ɨlɨsio lɨno ʉYesu amʼbʉʉla kuuti, “Ɨngʼhongove ye jɨkyale kuvɨka ʉlwa vʉvɨlɨ, ghuuva ʉngʼhanile katatu.” Ye akʉmbwike ʉluo, akatengʉla pilɨla kyongo.

Currently Selected:

Malɨka 14: wbi

Highlight

Copy