Mataayi 10

ɄYesu isuungʼha avasungʼhua vaake kɨjigho na vavɨlɨ

(Malɨka 3:13-19; 6:7-13; Lʉʉka 6:12-16; 9:1-6)

1ɄYesu akavakemeela avavʉlanɨsɨvua vaake kɨjigho na vavɨlɨ, akavapeela ʉvʉtavʉlɨlua ʉvwa kʉdaga amapepo amalamafu, kusosia inhamu sooni nʉ vʉvotevote vʉno vʉlɨ papinga. 2Amatavua gha vasungʼhua#10:2 Vasungʼhua: Ɨmba kʉ Vʉghanʉle vwa Masio aMahesia. avuo kɨjigho na vavɨlɨ ghe agha: ʉghwa kwanda ghwe Simoni, jʉno itambʉlua Peteli, nʉ Ndeleeya ʉnnuuna, avakina Sebedaayi ʉYakovo nʉ Yohani ʉnnuuna, 3ʉFilipo, ʉBatolomaayo, ʉTomasi, ʉMataayi ʉnsongesia songo, ʉYakovo ʉnkina Alufaayo, ʉTadaayo, 4ʉSimoni ʉNkananayo#10:4 ɄNkananayo: Kwekʉti ʉmuunhu ʉnya vʉvafi nɨ ɨɨsi jaake. ɄSimoni ʉjʉ alyale na matavua ghavɨlɨ, ɨlɨngɨ ghwe Simoni Nselote. Amatavua agha ʉmʉlʉvo ghwake ghwe ghʉmo (Lʉʉka 6:15; Mbombo sa Vasungʼhua 1:13). nʉ Yuuda Isikalioti, jʉno pambele akamwohela ʉYesu.

5ɄYesu akavasuungʼha avuo kɨjigho na vavɨlɨ, akavalaghɨla akati, “Namʉngalʉtaghe kʉ vaanhu vano naVaisilaeli, kange namʉngingilaghe mʉ makaaja ghooni agha Vasamalia.#10:5 Vasamalia: Ɨmba kʉ Vʉghanʉle vwa Masio aMahesia. 6Looli mʉlʉtaghe kʉ Vaisilaeli vano valɨ ndavʉle ingʼholo sino sisovile. 7Pano mulʉta, mʉpʉlɨsyaghe mʉtisaghe, ‘ɄVʉtwa vwa kʉkyanya vʉfikile.’ 8Mʉsosyaghe avatamu na vanya bʉʉba, mʉsyʉsyaghe avafue, na kudaga amapepo. Mʉpelilue vʉvʉle ʉvʉtavʉlɨlua ʉvuo, na jʉmue mʉvatangaghe avaanhu vʉvʉle. 9Namʉngagadaghe isahabu nambe indalama, nambe kugada ɨsilinge, 10nambe inyambe, nambe ʉmwenda ʉghwa kwandʉla, nambe ifilatu ifya kwandʉla, nambe ʉlʉkwegho, ʉlwakʉva ʉmʼbombi anoghiile kupelua fyoni fino ilonda.

11“Mʉ lɨkaaja nambe mʉ kɨkaaja muno kyamukwingila, mʉlondaghe ʉmuo ʉmuunhu ʉnnofu ʉghwa kʉvʉpɨla. Mukalaghe kwa mwene kuhanga ʉnsiki ghʉno muvʉʉka. 12Pano mukwingila mʉ nyumba, mʉvahʉngɨlaghe avanya nyumba. 13Lɨno, nave avanya nyumba vavʉpiile, mʉvasʉmɨlaghe kwa Ngʉlʉve kuuti avapelaghe ʉlʉtengaano. Looli nave navavʉpiile, ʉlʉtengaano lujigha numue. 14Nave ʉmuunhu naɨkʉvʉpɨla nambe kʉkʉvapʉlɨkɨsia, pano muhʉma mʉ nyumba nambe mʉ lɨkaaja ɨlio mʉkungʼunaghe ʉlʉngʼhʉnde lʉno lʉlɨ mʉ maghʉlʉ ghiinu.#10:14 Mʉkungʼunaghe ʉlʉngʼhʉnde lʉno lʉlɨ mʉ maghʉlʉ ghiinu: Kwe kʉvonia kuuti ʉNgʉlʉve avakanile avaanhu ava lɨkaaja lɨla, ʉlwakʉva vavakanile avasungʼhua vaake. 15Kyangʼhaani nɨkʉvavʉʉla, pa kɨghono ɨkya vʉhɨghi, ʉlʉpumuko lwave luliiva lʉkome kukila ʉlwa vaanhu ava lɨkaaja ɨlya Sodoma nɨ lya Gomola!#Vʉtengʉlɨlo 19:24-29

Imhumuko sino sikwisa

(Malɨka 13:9-13; Lʉʉka 21:12-17)

16“Lolagha, nɨkʉvasuungʼha hwene ngʼholo pakate pa ngʼhekeeva. Mʉvisaghe vasʉfu ndavʉle ɨnjoka, kange mʉvisaghe vahʉʉgʉ ndavʉle ɨngʼhʉnda. 17Mʉvisaghe maaso, ʉlwakʉva avaanhu vilikʉvatwala pa vʉhɨghi, na kʉkʉvatova mʉ masinagogi ghaave. 18Kange, vilikʉvatwala pa vanjagɨla na pa vatwa, ʉlwakʉva mʉkʉmbɨngɨlɨla ʉne. Ʉghuo ghuuva ghwe nsiki ʉghwa kwoleka ʉlwɨtɨko lwinu kʉ veene na kʉ vano naVayahudi. 19Neke pano vikʉvatwala pa vʉhɨghi, namʉngasaghaghe kuuti kyamujova kɨki, ʉlwakʉva ʉNgʉlʉve ɨkʉvapeela ʉnsiki ʉghuo isa kʉjova. 20Amasio ghano kyamujova naghihʉma kʉlyʉmue, looli ghihʉma kwa Mhepo ghwa Ngʉlʉve ʉNhaata ghwinu, jʉno kyaijova kukilila ʉmue.

21“Ʉmuunhu ɨkʉmwohelagha ʉnnine kuuti abudue. Ʉviise ɨkʉmwohelagha ʉmwanaake, voope avaana vikʉvagalʉkɨlagha avapaafi vaave kuuti vabudue. 22Avaanhu vooni vilikʉvakalalɨlagha, ʉlwakʉva mʉkʉmbɨngɨlɨla ʉne. Neke jʉno ikuguda kuhanga kufika kʉvʉsililo, ʉjuo ghwe alakuluka. 23Avaanhu vangavapumusie mʉ lɨkaaja ɨlɨ, mʉkɨmbɨlɨlaghe mʉ lɨkaaja ɨlɨngɨ. Kyangʼhaani nɨkʉvavʉʉla, namʉngamale kughenda amakaaja ghooni agha Isilaeli ʉne ne Mwana ghwa Muunhu ye nɨkyale pikwisa.

24“Ʉmʼbʉlanɨsɨvua naangankile ʉmʼbʉlanɨsi ghwake, nambe ʉnkami naangankile ʉntwa ghwake. 25Looli lukwɨla ʉmʼbʉlanɨsɨvua kuuva ndavʉle ʉmʼbʉlanɨsi ghwake, ghwope ʉnkami kuuva ndavʉle ʉntwa ghwake. Nave vikʉntambʉla ʉmʼbaha ghwa nyumba kuuti ghwe Belisebuli,#10:25 Belisebuli: Ɨlɨ lɨtavua lya Setano, ʉmʼbaha ghwa mapepo ghooni. asi, avaanhu ava mʉ nyumba jaake navangavatambʉle amatavua amaviivi kukila?

ɄNgʉlʉve mwene anoghiile kukwoghopua

(Lʉʉka 12:2-9)

26“Lɨno, namʉngavoghopaghe avaanhu avuo, ʉlwakʉva sooni sino sili kʉ vʉsyefu silaava pa vʉvalafu, kange sooni sino sifisiime silakagʉlɨka. 27Sino nɨkʉvavʉʉla kʉ ngʼhiisi, mʉjovaghe kʉ lʉmuli. Kange, sino nɨkʉvapwepela, mʉpʉlɨsyaghe kʉ vaanhu vinga. 28Namʉngavoghopaghe vano vibuda ʉmʼbɨlɨ ghwene, looli mʉmwoghopaghe ʉNgʉlʉve jʉno itipula lwoni. Itipula nʉ mwoto ghʉno naghusima lʉsiku. 29Asi, ʉtʉjuni tʉvɨlɨ natughʉsɨvua kʉ ndalama indebe kyongo? Napano natughʉsɨvua kʉ ndalama nyinga, nakwekale nambe kamo kano kighua paasi kɨsila vughane vwa Ngʉlʉve, ʉNhaata ghwinu. 30Ʉmue, ʉNgʉlʉve avalile nalɨ lɨnyele ɨlya kʉ matu ghiinu. 31Lɨno, namʉngavoghopaghe, ʉlwakʉva ʉmue lʉvʉmbʉlɨlo lʉkome pamaaso gha Ngʉlʉve kukila ʉtʉjuni ʉtwinga.

32“Ʉmuunhu ghweni jʉno ikwɨtɨka pamaaso gha vaanhu kuuti ɨkʉmbɨngɨlɨla ʉne, na jʉʉne nilikwɨtɨka pamaaso gha Nhaata ghwango jʉno alɨ kʉkyanya kuuti ʉjuo mʼbɨngɨlɨli ghwango. 33Neke ʉmuunhu jʉno ɨkʉngʼhaana pamaaso gha vaanhu, na jʉʉne nilikʉnkaana pamaaso gha Nhaata ghwango jʉno alɨ kʉkyanya.”

Kukutavʉla kʉkʉmʼbɨngɨlɨla ʉYesu

(Lʉʉka 12:51-53; 14:26-27)

34“Mʉlekaghe kusaagha kuuti nisile kuleeta ʉlʉtengaano mʉ ɨɨsi. Jeeje, nanisile kuleeta ʉlʉtengaano, looli kupela amabaatu. 35Kwekʉti, nisile kusʉlania ʉnswambe nʉ viise, ʉmwalɨve nʉ ngʼina, ʉmuunhu nʉ nkwive. 36Kange, avalʉgʉ va muunhu ve va mʉ nyumba jaake.#Mika 7:6 37Ʉmuunhu jʉno amʉghanile ʉviise nambe ʉngʼina kukila kʉkʉngana ʉne, naanoghiile kuuva mʼbɨngɨlɨli ghwango. Kange, ʉmuunhu ghweni jʉno amʉghanile ʉnswambe, nambe ʉmwalɨve, kukila kʉkʉngana ʉne, ghwope naanoghiile kuuva mʼbɨngɨlɨli ghwango. 38Ʉmuunhu ghweni itavʉlaghe kʉkʉmbɨngɨlɨla ʉne na kupumusivua, nambe kʉʉve kwe kʉfua. Nave naivomba ʉluo naanoghiile kuuva mʼbɨngɨlɨli ghwango. 39Ʉmuunhu jʉno ilonda kupoka ʉvwʉmi vwake, ʉjuo ikwambʉsia, neke ʉmuunhu jʉno ikwambʉsia ʉvwʉmi vwake vwɨmɨla ʉne, ʉjuo iliiva nʉ vwʉmi ʉvwa kʉvʉsila kʉsila.”

Avaanhu vano vilikwʉpɨla ʉlʉvonolo

(Malɨka 9:41; Lʉʉka 10:16)

40“Ʉmuunhu jʉno ɨkʉvʉpɨla ʉmue, ɨkʉnyʉpɨla ʉne, jʉno ɨkʉnyʉpɨla ʉne, ɨkʉmwʉpɨla jʉno asungʼhile ʉne. 41Ʉmuunhu jʉno ɨkʉmwʉpɨla ʉmuunhu ʉlwakʉva mʼbɨli, ʉNgʉlʉve ilikʉmpeela ʉlʉvonolo lʉno vipelua avavɨli. Kange, jʉno ɨkʉmwʉpɨla ʉmuunhu ʉlwakʉva mʉgholofu, ʉNgʉlʉve ilikʉmpeela ʉlʉvonolo lʉno vipelua avagholofu. 42Kyangʼhaani nɨkʉvavʉʉla kuuti, ʉmuunhu ghweni jʉno ɨkʉmpeela ʉmo mʉ vano navatambʉlɨke nambe ʉtʉlenga ʉtʉsuvusu ʉlwakʉva mʼbʉlanɨsɨvua ghwango, ʉNgʉlʉve naangaleke kʉkʉmpeela ʉlʉvonolo.”

Currently Selected:

Mataayi 10: wbi

Highlight

Copy