Lʉʉka 16

Ɨkɨhwanɨkɨsio ɨkya mwɨmɨlɨli ʉnsʉfu

1ɄYesu akavavʉʉla avavʉlanɨsɨvua vaake akati, “Kwealyale ʉmmofu jʉmonga, jʉno alyale nʉ mwɨmɨlɨli ghwa kyʉma kyake. Ʉmmofu ʉjuo akapʉlɨka kuuti ʉmwɨmɨlɨli ghwake inangania ɨkyʉma kyake. 2Pe ʉmmofu akankemeela ʉmwɨmɨlɨli, akamʼbʉʉla akati, ‘Se nyɨki isi sino nipʉlɨka vwɨmɨla ɨmbombo jaako? Ʉhʉfie ʉvʉtavɨke vʉle ʉvombiile ɨkyʉma kyango, ʉlwakʉva nʉnoghiile kange kuuva mwɨmɨlɨli!’

3“Ʉmwɨmɨlɨli jʉla akiposia mʉ mwojo ghwake akati, ‘Ʉmʼbaha ghwango, ɨkʉmbʉsia pa mbombo, lɨno nɨsivombe kɨki? Kulɨma, nɨlɨ nsila ngʉfu. Kange, kusʉʉma nivona soni. 4Lɨno, nɨkagwile kɨno kyanivomba, kuuti kyaambʉsisie mʉ mbombo ɨjɨ, avaanhu vanyʉpɨlaghe kʉ kaaja saave.’

5“Pepano ʉmwɨmɨlɨli jʉla akavakemeela vooni, vano vasighilwagha nʉ mʼbaha ghwake. Akamposia ʉghwa kwanda akati, ‘Ghusighilua filɨngi nʉ mʼbaha ghwango?’ 6Akamwamʉla akati, ‘Nisighilua igaloni filʉndo lekelakwoni isa mafuta gha seituni.’ Ʉmwɨmɨlɨli akamʼbʉʉla akati, ‘Koogho ɨlɨkalataasi ɨlɨ, lɨno lɨlembilue kɨno ghusighilua, lemba ngʼhaningʼhaani filʉndo fine.’ 7Pe akamposia ʉghwa vʉvɨlɨ akati, ‘Ʉve ghusighilua filɨngi?’ Akamwamʉla akati, ‘Amafuko kɨlʉndo agha ngano.’ Ʉmwɨmɨlɨli jʉla akati, ‘Koogho ɨlɨkalataasi ɨlɨ, lɨno lɨlembilue kɨno ghusighilua, lemba fijigho lekelakwoni.’

8“Ʉmmofu jʉla akampaala ʉmwɨmɨlɨli ʉmʼbiivi jʉla, vʉle avombile nʉ lʉhala. Ʉlwakʉva, avaanhu vano navikʉmwɨtɨka ʉNgʉlʉve, vikʉvavombela avaanhu avange nʉ lʉhala kukila vano vikʉmwɨtɨka ʉNgʉlʉve. 9Lɨno, ʉne nɨkʉvavʉʉla kuuti, mʉvatangaghe avajiinu nɨ kyʉma kɨno mʉlɨ nakyo, neke kyande kɨsilile, mwʉpɨlue kʉ vukalo ʉvwa kʉvʉsila kʉsila.

10“Ʉmuunhu ghweni jʉno ikwɨmɨlɨla vʉnofu ifiinu ifidebe, ʉjuo anoghiile kukwɨmɨlɨla vʉnofu nambe ifiinu finga. Enendɨɨkɨ, ʉmuunhu ghweni jʉno namʉloleleli nnofu kʉ fiinu ifidebe, iiva namʉloleleli nnofu nambe kʉ fiinu ifinga. 11Lɨno, nave namʉlɨ valoleleli vanofu kʉ kyʉma ɨkya mʉ ɨɨsi ɨjɨ, ghwe veeni jʉno kyaɨkʉvapeela ɨkyʉma ɨkya kyangʼhaani!#16:11 Kyʉma ɨkya mʉ ɨɨsi ɨjɨ, ghwe veeni jʉno kyaɨkʉvapeela ɨkyʉma ɨkya kyangʼhaani: Ɨkyʉma ɨkya mʉ ɨɨsi fye fiinu fino ʉNgʉlʉve avapeliile avaanhu valolelelaghe palɨkɨmo ni fipelua fyave, neke ɨkyʉma ɨkya kyangʼhaani vwe vwʉmi ʉvwa kʉvʉsila kʉsila. 12Kange, nave namʉlɨ valoleleli vanofu kʉ kyʉma ɨkya jʉnge, ghwe veeni kyaɨkʉvapeela ɨkyʉma kiinu jʉmue? 13Nakwale ʉmuunhu jʉno iiva mʼbanda ghwa vatwa vavɨlɨ. Ʉlwakʉva pano ɨkʉmʉghana na kʉkʉmʼbombela vʉnofu ʉntwa ʉjʉ, pepano ɨkʉnkalalɨla na kʉkʉmʼbeda ʉntwa ʉjʉnge. Ɨkyʉma kɨngakʉteme nʉngamʼbombele ʉNgʉlʉve!”

14AVafalisayi ye vapʉliike amasio aghuo, vakatengʉla pikʉmʼbenapʉla, ʉlwakʉva valyasighanile kyongo indalama. 15ɄYesu akavavʉʉla akati, “Ʉmue, mukuvɨɨka vagholofu pamaaso gha vaanhu, neke ʉNgʉlʉve akagwile sino sili mʉ moojo ghiinu. Ʉlwakʉva si nyinga sino avaanhu vikʉsivɨkɨla mwojo, ʉNgʉlʉve ɨkʉsikalalɨla!

Imbʉlanɨsio vwɨmɨla indaghɨlo

(Mataayi 11:12-13; 5:31-32; Malɨka 10:11-12)

16“Indaghɨlo isa Moose na malembe gha vavɨli, filyavalongwisie avaanhu kufika amasiki gha Yohani. Kuhʉma amasiki aghuo, ɨMhola ɨNofu ɨja Vʉtwa vwa Ngʉlʉve jipʉlɨsɨvua, neke nʉjʉnge ikwingila ni ngʉfu mʉ Vʉtwa ʉvuo. 17Looli kɨhʉʉgʉ kyongo ʉvʉlanga nɨ ɨɨsi kusovanɨka, neke lʉtalamu kyongo kuvʉsia nambe akakelo kamo aka ndaghɨlo.

18“Ʉmuunhu ghweni jʉno itavʉla ʉnʼdala ghwake na kutoola ʉjʉnge, ivwafuka. Nambe jʉno itoola ʉnʼdala jʉno atavʉlilue nʉ mʉghoosi ghwake, ivwafuka.

Ʉmmofu nʉ nkotofu ʉLasali

19“Kwealyale ʉmmofu jʉmonga, jʉno akafwalagha amenda amanofu agha ndalama nyinga. Ifighono fyoni akalisagha ifyakʉlia ifya lʉtogo. 20Neke ʉnkotofu jʉmonga, jʉno akatambʉlwagha Lasali, vakamʼbɨkagha jaatu pa mʉlyango ghwa mmofu jʉla. ɄLasali alyale ni fikoongʼo ʉmʼbɨlɨ ghwoni, 21neke imbua sikamyangagha ifikoongʼo fyake. Ɨnjala jɨkamʼbavagha kyongo, pe akanoghelwagha kulia ifimenyʉkɨla, fino fikasangʉkagha kuhʉma pa meesa pano akalisagha ʉmmofu jʉla.

22“Pambele, ʉnkotofu ʉLasali akafua. Avanyamhola vakantoola, vakamʼbɨɨka piipi nʉ Abulahamu kʉkyanya. Ʉmmofu jʉla, ghwope akafua, vakansyɨla. 23Neke ʉmmofu jʉla ye ipumuka kyongo kʉvʉfue, akamwagha ʉAbulahamu pa vʉtali alɨ nʉ Lasali. 24Akankemeela fiijo akati, ‘Ghwe nhaata Abulahamu, ʉsʉngʉkɨle! Nipumuka kyongo mʉ mwoto ʉghʉ! Ʉnsuungʼhe ʉLasali, asaase ɨkyove mʉ malenga, neke adomokesie pa lʉmili lwango kuuti lʉsuvukilile.’

25“Neke ʉAbulahamu akamwamʉla akati, ‘Mwanango, ʉkʉmbʉke kuuti mʉ vwʉmi vwako vʉla, ʉkaale ni fiinu fyoni ifinono fino ghwalondagha, neke ʉLasali, ʉpɨlagha inhalamu. Lɨno, ʉmwene itengaana apa, na jʉʉve ghupumuka. 26Palɨkɨmo nʉluo, pakate palyʉsue numue, pwelɨlɨ ɨliina ɨlɨkome kyongo. Ɨliina ɨlio lɨvɨkilue kuuti, ava kʉno vano vilonda kukwisa kʉlyʉmue, vakunwaghe kulovoka, nambe ava ʉkuo vakunwaghe kukwisa kʉlyʉsue.’

27“Ʉmmofu jʉla akamʼbʉʉla akati, ‘Lɨno nhaata, nɨkʉkʉsʉʉma ʉnsuungʼhe ʉLasali alʉte kʉ kaaja kʉ nyumba ja nhaata ghwango. 28Ʉkuo nɨlɨ na vanunavango vahaano. Alʉte avapavɨle vasileke inyɨvi saave, neke valeke kukwisa kʉno kʉ lʉpumuko ʉlʉkome.’ 29Pe ʉAbulahamu akamwamʉla akati, ‘Avanyalʉkolo vaako, valɨ na masio ghano ghalembilue nʉ Moose na vavɨli, vaghapʉlɨkaghe aghuo!’

30“Ʉmmofu jʉla akajova kange akati, ‘Ndali, nhaata Abulahamu! Looli, ʉmuunhu kuhʉma kʉ vafue angalʉte kʉ veene, apuo kyavilaata inyɨvi saave.’ 31ɄAbulahamu akamwamʉla akati, ‘Nave navikʉnda ghano ghalembilue nʉ Moose na vavɨli, nambe ʉmuunhu asyʉke kuhʉma kʉ vafue, navangɨtɨke.’ ”

Currently Selected:

Lʉʉka 16: wbi

Highlight

Copy